1, 2. Namɔ nɔ Yesu tsɔɔ elɛɔ wɔ ŋmɛnɛ, ni mɛni hewɔ ehe hiaa ni wɔna mɔ ni nakai mɔ lɛ ji lɛ?

“NYƐMIMƐI, minyɛŋ makane shii abɔ ni nyɛŋmala saji ni kɔɔ nibii tuuntu ni mitaoɔ lɛ ahe yɛ be ni ehe hiaa mi waa lɛ mli.” Enɛ ji nɔ ni nyɛmi yoo ko ŋma kɛmaje nyɛmimɛi ni tsuɔ nii yɛ nitsumɔhe yitso lɛ kɛtsɔɔ bɔ ni ehiɛ sɔɔ amɛnitsumɔ lɛ ehaa. Ani bo hu onuɔ he nakai bei komɛi? Wɔteŋ mɛi babaoo nuɔ he nakai. Shi ani esa akɛ enɛ afee wɔ naakpɛɛ? Dabi kwraa.

² Mumɔŋ niyenii ni wɔnine shɛɔ nɔ yɛ be ni sa mli lɛ tsɔɔ akɛ Yesu, ni ji asafo lɛ Yitso lɛ, miiye shi ni ewo akɛ ebaaha wɔ wɔŋmaa lɛ nɔ. Namɔ nɔ etsɔɔ efeɔ enɛ? Beni Yesu kɛ okadi ni baatsɔɔ akɛ eba lɛ haa lɛ, ewie akɛ ebaatsɔ ‘nyɔŋ anɔkwafo kɛ hiɛshikalɔ lɛ’ nɔ eha ewebii lɛ “amɛŋmaa yɛ be ni sa nɔ.” * (Nyɛkanea Mateo 24:45-47.) Nakai nyɔŋ anɔkwafo lɛ ji mɔ ni Yesu tsɔɔ enɔ elɛɔ enɔkwa sɛɛnyiɛlɔi lɛ yɛ naagbee be nɛɛ mli. Ehe miihia ni wɔna mɔ ni nakai nyɔŋ anɔkwafo lɛ ji. Nyɔŋ anɔkwafo nɛɛ ji mɔ ni baaye abua wɔ ni wɔhe awa yɛ mumɔŋ kɛ agbɛnɛ hu, ni wɔná wɔ kɛ Nyɔŋmɔ teŋ wekukpaa kpakpa.—Mat. 4:4; Yoh. 17:3.

3. Mɛni wɔwie yɛ wɔwoji lɛ amli yɛ abɛbua ni kɔɔ nyɔŋ anɔkwafo lɛ he yɛ be ni eho lɛ mli?

³ Belɛ, te esa akɛ wɔnu Yesu abɛbua ni kɔɔ nyɔŋ anɔkwafo lɛ he lɛ shishi wɔha tɛŋŋ? Be ko ni eho lɛ, wɔwie saji ni nyiɛ sɛɛ nɛɛ yɛ wɔwoji lɛ amli akɛ: Yesu ŋɔ nyɔŋ anɔkwafo lɛ eto ewebii lɛ anɔ yɛ afi 33 Ŋ.B. Pentekoste gbi lɛ nɔ. Nyɔŋ lɛ ji Kristofoi fɛɛ ni afɔ amɛ mu ni yɔɔ shikpɔŋ lɛ nɔ yɛ be pɔtɛɛ ko mli akɛ kuu kɛjɛ afi 33 Ŋ.B. lɛ sɛɛ kɛbaa. Ewebii lɛ ji mɛi ni afɔ amɛ mu nɛɛ nɔŋŋ, ní abuuu amɛ akɛ kuu, shi moŋ akɛ aŋkroaŋkroi lɛ. Yɛ afi 1919 lɛ, Yesu ŋɔ nyɔŋ anɔkwafo lɛ eto “enii fɛɛ kwa,” ni ji Maŋtsɛyeli lɛ he nibii fɛɛ ni yɔɔ shikpɔŋ lɛ nɔ lɛ nɔ. Shi niiamlipɛimɔ  kɛ sɔlemɔ kɛ niianɔjwɛŋmɔ ekoŋŋ eha wɔna akɛ esa akɛ wɔtsake bɔ ni wɔnuɔ Yesu wiemɔi ni kɔɔ nyɔŋ anɔkwafo kɛ hiɛshikalɔ lɛ he lɛ shishi lɛ. (Abɛi 4:18) Kɛji wɔyɛ hiɛnɔkamɔ akɛ wɔbaaya ŋwɛi jio, wɔbaahi shikpɔŋ lɛ nɔ jio lɛ, nyɛhaa wɔsusua abɛbua lɛ he ekoŋŋ ni wɔkwɛ bɔ ni ekɔɔ wɔhe ehaa.

4-6. Mɛni hewɔ wɔbaanyɛ wɔkɛɛ akɛ Yesu abɛbua ni kɔɔ nyɔŋ anɔkwafo lɛ he lɛ bɔi mlibaa kɛjɛ afi 1914 sɛɛ lɛ?

⁴ Nɔ ni he ni Yesu wieɔ dani etsĩ nyɔŋ anɔkwafo kɛ hiɛshikalɔ lɛ tã lɛ haa wɔnaa akɛ, nɛkɛ abɛbua nɛɛ baaa mli yɛ afi 33 Ŋ.B. Pentekoste gbi lɛ nɔ, shi moŋ ebaaba mli yɛ naagbee be nɛɛ mli. Nyɛhaa wɔkwɛa bɔ ni Ŋmalɛ lɛ yeɔ ebuaa wɔ ni wɔnyɛɔ wɔkɛɔ nakai.

⁵ Abɛbua ni kɔɔ nyɔŋ anɔkwafo lɛ he lɛ fata Yesu gbalɛ ni kɔɔ ‘okadi ni baatsɔɔ akɛ eba, ni akɛ nibii agbɛjianɔtoo nɛɛ naagbee ebɛŋkɛ’ lɛ he. (Mat. 24:3) Gbalɛ nɛɛ klɛŋklɛŋ fã ni abɔ he amaniɛ yɛ Mateo 24:4-22 lɛ ba mli yɛ gbɛi enyɔ nɔ—klɛŋklɛŋ nɔ lɛ ba mli kɛjɛ afi 33 Ŋ.B. kɛyashi afi 70 Ŋ.B., ni nɔ ni ji enyɔ lɛ miiba mli yɛ gbɛ ni da nɔ yɛ wɔgbii nɛɛ amli. Ani enɛ tsɔɔ akɛ nɔ ni Yesu wie yɛ nyɔŋ anɔkwafo lɛ he lɛ hu baaba mli yɛ gbɛi enyɔ nɔ? Dabi.

⁶ Kɛjɛ Mateo 24:29 lɛ kɛbaa lɛ, Yesu bɔi nibii ni baaba mli yɛ wɔgbii nɛɛ amli lɛ titri ahe wiemɔ. (Nyɛkanea Mateo 24:30, 42, 44.) Beni ewieɔ nibii ni baaya nɔ yɛ amanehulu kpeteŋkpele lɛ mli lɛ ahe lɛ, ewie akɛ mɛi ‘baana gbɔmɔbi lɛ akɛ eeba yɛ ŋwɛi atatui lɛ anɔ.’ No sɛɛ lɛ, beni ewieɔ bɔ ni ehe baahia ni mɛi ni baahi wala mli yɛ naagbee gbii lɛ amli lɛ aha amɛhiɛ ahi amɛhe nɔ lɛ he lɛ, ekɛɛ akɛ: ‘Nyɛleee nɔ ŋmɛlɛtswaa nɔ ni nyɛnuŋtsɔ lɛ baa’ kɛ agbɛnɛ hu, ‘Nɔ ŋmɛlɛtswaa ni nyɛsusuuu lɛ nɔ gbɔmɔ bi lɛ baa.’ (Kanemɔ saji ni sa kadimɔ 2.) Beni Yesu wie nibii ni baaya nɔ yɛ naagbee gbii lɛ amli lɛ ahe egbe naa nɔŋŋ ni ewie abɛbua ni kɔɔ nyɔŋ anɔkwafo lɛ he lɛ. No hewɔ lɛ, wɔbaanyɛ wɔkɛɛ akɛ Yesu wiemɔi ni kɔɔ nakai nyɔŋ anɔkwafo lɛ he lɛ bɔi mlibaa beni naagbee gbii lɛ je shishi yɛ afi 1914 lɛ sɛɛ. Nilee yɛ mli akɛ wɔɔkɛɛ nakai. Mɛni hewɔ?

7. Mɛɛ sanebimɔ ni he hiaa te shi beni ŋmaakpamɔ be lɛ je shishi lɛ, ni mɛni hewɔ?

⁷ Susumɔ sanebimɔ nɛɛ he fioo okwɛ: ‘Namɔ tuuntu ji nyɔŋ anɔkwafo kɛ hiɛshikalɔ lɛ?’ Nɔ ko bɛ ni abaanyɛ adamɔ nɔ abi sane ni tamɔ nakai yɛ klɛŋklɛŋ afii 100 lɛ mli. Taakɛ wɔna yɛ nikasemɔ ni tsɔ hiɛ lɛ mli lɛ, bɔfoi lɛ fee naakpɛɛ nii, ni amɛha mɛi krokomɛi ná mumɔŋ duromɔ kee nii po, ni no tsɔɔ akɛ Nyɔŋmɔ miifi amɛsɛɛ. (Bɔf. 5:12) No hewɔ lɛ, mɛni hewɔ mɔ ko aaabi akɛ, namɔ tuuntu Kristo ehala akɛ ekwɛ nitsumɔ lɛ nɔ lɛ? Shi jeee nakai sane lɛ ji yɛ afi 1914 lɛ mli. Nakai afi lɛ nɔ ŋmaakpamɔ be lɛ je shishi. Be ni akɛbaabua jwɛi lɛ anaa kɛjɛ ŋmaa lɛ ateŋ lɛ eshɛ agbɛnɛ. (Mat. 13:36-43) Beni abɔi ŋmaa lɛ kpamɔ lɛ, sanebimɔ ko ni he hiaa te shi akɛ: Akɛni amale Kristofoi pii miitsɛ amɛhe Yesu anɔkwa sɛɛnyiɛlɔi hewɔ lɛ, te aaafee tɛŋŋ ayɔse ŋmaa lɛ, ni ji Kristofoi ni afɔ amɛ mu lɛ? Abɛbua ni kɔɔ nyɔŋ anɔkwafo lɛ he lɛ ha ana hetoo lɛ. Kristo sɛɛnyiɛlɔi ni afɔ amɛ mu lɛ baafee mɛi pɛ ni baaná mumɔŋ ŋmaa ni sa.

8. Mɛni hewɔ esa akɛ nyɔŋ anɔkwafo lɛ afee Kristofoi ni afɔ amɛ mu lɛ?

⁸ Esa akɛ nyɔŋ anɔkwafo lɛ afee Kristofoi ni afɔ amɛ mu ni yɔɔ shikpɔŋ lɛ nɔ. Atsɛɔ mɛi nɛɛ akɛ “maŋtsɛmɛi ní yeɔ osɔfoi,” ni afã amɛ akɛ ‘amɛjaje mɔ ni tsɛ́ amɛ kɛjɛ duŋ lɛ mli kɛba lɛ diɛŋtsɛ enaakpɛɛ la lɛ he lɛ agbojee lɛ.’ (1 Pet. 2:9) Eyɛ faŋŋ akɛ, “maŋtsɛmɛi ní yeɔ  osɔfoi” nɛɛ ji mɛi ni sa akɛ amɛtsɔɔ amɛnyɛmimɛi héyelilɔi lɛ anɔkwale lɛ.—Mal. 2:7; Kpoj. 12:17.

9. Ani Kristofoi ni afɔ amɛ mu lɛ fɛɛ feɔ nyɔŋ anɔkwafo lɛ? Tsɔɔmɔ mli.

⁹ Ani mɛi ni afɔ amɛ mu ni yɔɔ shikpɔŋ lɛ nɔ lɛ fɛɛ feɔ nyɔŋ anɔkwafo lɛ? Dabi. Anɔkwa sane lɛ ji akɛ, jeee mɛi ni afɔ amɛ mu lɛ fɛɛ ni haa amɛnyɛmimɛi ni yɔɔ je lɛŋ fɛɛ lɛ mumɔŋ ŋmaa. Mɛi ni afɔ amɛ mu ni ŋmaa lɛ feɔ amɛhe mfoniri lɛ ateŋ mɛi komɛi baanyɛ afee asafoŋ sɔɔlɔi loo asafoŋ onukpai yɛ amɛsafoi lɛ amli. Amɛtsɔɔ nii yɛ shĩa fɛɛ shĩa kɛ amɛsafoi lɛ amli, ni amɛkɛ gbɛtsɔɔmɔi fɛɛ ni jɛɔ nitsumɔhe yitso lɛ tsuɔ nii. Shi amɛfataaa mɛi ni toɔ mumɔŋ niyenii ni akɛlɛɔ nyɛmimɛi ni yɔɔ jeŋ fɛɛ lɛ he gbɛjianɔ lɛ ahe. Agbɛnɛ hu, nyɛmimɛi yei ni baa amɛhe shi, ni ekaŋ po akɛ amɛaatsɔɔ nii yɛ asafo lɛ mli lɛ fata mɛi ni afɔ amɛ mu lɛ ahe.—1 Kor. 11:3; 14:34.

10. Namɔ ji nyɔŋ anɔkwafo kɛ hiɛshikalɔ lɛ?

¹⁰ Belɛ, namɔ ji nyɔŋ anɔkwafo kɛ hiɛshikalɔ lɛ mɔ? Yɛ gbɛ ni Yesu tsɔ nɔ elɛ mɛi babaoo kɛtsɔ mɛi fioo nɔ lɛ kɛ gbeekpamɔ naa lɛ, nakai nyɔŋ lɛ ji mɛi ni afɔ amɛ mu lɛ ateŋ hii fioo ko ni tsuɔ nii akɛ kuu kɛtoɔ mumɔŋ niyenii he gbɛjianɔ ní amɛkɛhaa kɛjɛ be ni Kristo ba lɛ. Yɛ naagbee gbii nɛɛ amli lɛ, nyɛmimɛi hii ni afɔ amɛ mu ni tsuɔ nii akɛ nyɔŋ anɔkwafo lɛ fɛɛ sɔmɔɔ yɛ nitsumɔhe yitso lɛ. Yɛ afii nyɔŋmai abɔ ni eho nɛɛ amli lɛ, ayɔse akɛ nakai nyɔŋ lɛ ji Yehowa Odasefoi a-Gbɛtsɔɔmɔ Kuu lɛ. Shi kadimɔ akɛ, wiemɔ ni ji ‘nyɔŋ’ ni Yesu kɛtsu nii yɛ abɛbua lɛ mli lɛ damɔ shi kɛha mɔ kome, ni tsɔɔ akɛ kuu ko ni atsɛɔ lɛ nyɔŋ lɛ. No hewɔ lɛ, Gbɛtsɔɔmɔ Kuu lɛ mli bii lɛ feɔ ekome kɛkpɛɔ yiŋ.

11, 12. (a) Yɛ abɛbua lɛ mli lɛ, mɛɛ nitsumɔi enyɔ atu awo nyɔŋ anɔkwafo kɛ hiɛshikalɔ lɛ dɛŋ? (b) Mɛɛ be Yesu ŋɔ nyɔŋ anɔkwafo lɛ eto ewebii lɛ anɔ, ni namɛi ehala?

¹¹ Nɔ ko ni sa kadimɔ waa yɛ Yesu abɛbua lɛ mli ji akɛ, atu nitsumɔi srɔtoi enyɔ awo nyɔŋ anɔkwafo kɛ hiɛshikalɔ lɛ dɛŋ. Klɛŋklɛŋ lɛ, aŋɔ lɛ ato nuŋtsɔ lɛ webii lɛ anɔ; ni nɔ ni ji enyɔ lɛ, aŋɔ lɛ ato nuŋtsɔ lɛ nii fɛɛ kwa nɔ. Akɛni abɛbua nɛɛ ba mli yɛ naagbee be nɛɛ mli pɛ hewɔ lɛ, abaaŋɔ nitsumɔi enyɔ nɛɛ fɛɛ awo edɛŋ beni Yesu ebɔi nɔyeli akɛ maŋtsɛ yɛ afi 1914 mli lɛ sɛɛ.

¹² Mɛɛ be Yesu ŋɔ nyɔŋ anɔkwafo lɛ eto ewebii lɛ anɔ? Kɛha sanebimɔ  nɛɛ hetoo lɛ, esa akɛ wɔku wɔsɛɛ kɛya afi 1914—be ni ŋmaakpamɔ lɛ je shishi lɛ. Taakɛ wɔkase kɛtsɔ hiɛ lɛ, nakai beaŋ lɛ, jamɔi babaoo miitsɛ amɛhe Kristofoi. Mɛɛ jamɔ kuu mli Yesu baahala nyɔŋ anɔkwafo lɛ kɛjɛ, ni etu nitsumɔ lɛ ewo edɛŋ? Aná nakai sanebimɔ lɛ hetoo beni ekɛ e-Tsɛ basara sɔlemɔwe lɛ, loo mumɔŋ gbɛjianɔ ni ato kɛha Nyɔŋmɔjamɔ lɛ, kɛjɛ afi 1914 kɛyashi afi 1919 lɛ shishijee gbɛ lɛ. * (Mal. 3:1) Amɛnya Biblia Kaselɔi anɔkwafoi fioo ko ni tsɔɔ akɛ amɛyɛ Yehowa kɛ e-Wiemɔ lɛ he miishɛɛ lɛ ahe. Yɛ anɔkwale mli lɛ, ehe bahia ni atsuu amɛhe, ni amɛkpɛlɛ ni afee yɛ nakai be kukuoo ni aka amɛ akwɛ ni atsuu amɛhe lɛ mli. (Mal. 3:2-4) Nakai Biblia Kaselɔi lɛ ji Kristofoi ni ŋmaa lɛ feɔ amɛhe mfoniri lɛ. Yɛ afi 1919, ni ji be ni ehe bahia ni atswa amɛ ama shi yɛ mumɔŋ ekoŋŋ lɛ, Yesu hala mɛi ni afɔ amɛ mu lɛ ateŋ hii ni sa koni amɛsɔmɔ akɛ nyɔŋ anɔkwafo kɛ hiɛshikalɔ lɛ, ni eŋɔ amɛ eto ewebii lɛ anɔ.

13. Namɛi hu fata Yesu webii lɛ ahe, ni mɛni hewɔ?

¹³ No hewɔ lɛ, namɛi ji ewebii lɛ? Yɛ kukufoo mli lɛ, amɛji mɛi fɛɛ ni alɛɔ lɛ. Yɛ naagbee gbii lɛ shishijee gbɛ lɛ, no mli lɛ mɛi ni afɔ amɛ mu lɛ fɛɛ ji ewebii lɛ. Sɛɛ mli lɛ, asafo babaoo ni jɛ tooi krokomɛi lɛ ateŋ lɛ hu bafata ewebii lɛ ahe. Amrɔ nɛɛ, “kuu kome” ni yɔɔ Kristo kwɛmɔ shishi lɛ ateŋ tsiimɔ ji tooi krokomɛi lɛ. (Yoh. 10:16) Kui enyɔ lɛ fɛɛ náa mumɔŋ niyenii ni nyɔŋ anɔkwafo lɛ kɛhaa lɛ he sɛɛ. Ni Gbɛtsɔɔmɔ Kuu lɛ ni ŋmɛnɛ lɛ eji nyɔŋ anɔkwafo kɛ hiɛshikalɔ lɛ mli bii lɛ hu? Esa akɛ amɛ hu aha amɛ mumɔŋ ŋmaa. No hewɔ lɛ, amɛkɛ heshibaa kpɛlɛɔ nɔ akɛ, akɛ aŋkroaŋkroi lɛ, amɛhu amɛfata Yesu webii lɛ ahe tamɔ Yesu sɛɛnyiɛlɔi anɔkwafoi krokomɛi lɛ nɔŋŋ.

14. (a) Mɛɛ nitsumɔ akɛwo nyɔŋ anɔkwafo lɛ dɛŋ, ni mɛni enɛ biɔ? (b) Mɛɛ kɔkɔ Yesu bɔ nyɔŋ anɔkwafo kɛ hiɛshikalɔ lɛ? (Kwɛmɔ akrabatsa ni yitso ji, ‘Kɛji Nakai Nyɔŋ Fɔŋ lɛ . . .’)

¹⁴ Yesu tu nitsumɔ ni he hiaa waa ewo nyɔŋ anɔkwafo kɛ hiɛshikalɔ lɛ dɛŋ. Yɛ blema lɛ, nyɔŋ loo shĩa nɔkwɛlɔ ni amuɔ afɔ̃ɔ enɔ lɛ ji mɔ ni kwɛɔ enuŋtsɔ lɛ we nɔ. (Luka 12:42) No hewɔ lɛ, nitsumɔ ni akɛwo nyɔŋ anɔkwafo kɛ hiɛshikalɔ lɛ dɛŋ ji, ni ekwɛ Kristo nibii fɛɛ ni yɔɔ shikpɔŋ lɛ nɔ lɛ anɔ. Ni nɔ ni fata nitsumɔ nɛɛ he ji, ni ekwɛ heloonaa nibii, shiɛmɔ nitsumɔ lɛ, kpokpaa kɛ kpokpaa wuji anɔ kpeei ahe gbɛjianɔtoo, Biblia kasemɔ woji ni akɛtsuɔ nii yɛ  shiɛmɔ nitsumɔ lɛ mli, kɛ nɔ ni akɛfeɔ aŋkro nikasemɔ kɛ asafoŋ kpeei lɛ akalamɔ nɔ. Mumɔŋ niyenii ni nyɔŋ anɔkwafo lɛ kɛhaa nuŋtsɔ lɛ webii lɛ ji nɔ ni wajeɔ amɛ.

15, 16. Mɛɛ be Yesu baaŋɔ nyɔŋ lɛ eto enii fɛɛ kwa nɔ lɛ?

¹⁵ Mɛɛ be Yesu baaŋɔ nyɔŋ lɛ “eto enii fɛɛ kwa nɔ” lɛ? Yesu kɛɛ akɛ: ‘Nakai nyɔŋ lɛ yɛ miishɛɛ kɛ́ beni enuŋtsɔ baa lɛ, eeebanina lɛ akɛ eefee nakai lɛ. Lɛɛlɛŋ, miikɛɛ nyɛ akɛ, eeeŋɔ lɛ eto enii fɛɛ kwa nɔ.’ (Mat. 24:46, 47) Kadimɔ akɛ, Yesu kɛ nitsumɔ ni ji enyɔ lɛ wo nyɔŋ lɛ dɛŋ beni eba ni ebanina lɛ akɛ “eefee nakai lɛ,” ni ji eeha ewebii lɛ mumɔŋ niyenii lɛ. Enɛ tsɔɔ akɛ, be ko baakã be ni akɛ klɛŋklɛŋ nitsumɔ lɛ ha lɛ kɛ be ni akɛ nɔ ni ji enyɔ lɛ baaha lɛ lɛ teŋ. Kɛ́ wɔbaanu gbɛ ni Yesu tsɔ nɔ eŋɔ nyɔŋ lɛ eto enii fɛɛ kwa nɔ lɛ shishi, ní wɔle be hu ni efee nakai lɛ, no lɛ esa akɛ wɔle nibii enyɔ: be ni ebaaba, kɛ nɔ ni enii lɛ damɔ shi kɛha.

¹⁶ Mɛɛ be Yesu baaba? Hetoo lɛ yɛ sane ni no mli lɛ ewieɔ lɛ mli. Kaimɔ akɛ beni Yesu tsĩ ‘ebaa’ lɛ tã yɛ kukuji ni tsɔ hiɛ lɛ amli lɛ, ekɛ wiemɔ ni ji ‘baa’ lɛ tsu nii kɛkɔ be ni ebaaba ebakojo mɛi yɛ nibii agbɛjianɔtoo nɛɛ naagbee lɛ he. * (Mat. 24:30, 42, 44) No hewɔ lɛ, yɛ abɛbua ni kɔɔ nyɔŋ anɔkwafo lɛ he lɛ mli lɛ, Yesu ‘baaba’ yɛ amanehulu kpeteŋkpele lɛ mli.

17. Mɛni fata Yesu nii lɛ ahe?

¹⁷ Mɛni fata ‘Yesu nii fɛɛ kwa lɛ’ he? Yesu ekɛɛɛ akɛ “enii fɛɛ ni yɔɔ shikpɔŋ lɛ nɔ,” shi moŋ ekɛɛ, “enii fɛɛ kwa.” Yɛ anɔkwale mli lɛ, Yesu yɛ hegbɛ babaoo yɛ ŋwɛi. Ekɛɛ akɛ: “Aŋɔ hegbɛ fɛɛ aha mi yɛ ŋwɛi kɛ shikpɔŋ nɔ.” (Mat. 28:18; Efe.  1:20-23) Amrɔ nɛɛ, nɔ ni fata enii lɛ ahe ji Mesia Maŋtsɛyeli ní enine shɛ nɔ kɛjɛ afi 1914 lɛ, ni esɛɛnyiɛlɔi ni afɔ amɛ mu lɛ baafata ehe kɛye nɔ.—Kpoj. 11:15.

18. Mɛni baaha Yesu aná he miishɛɛ akɛ eeeŋɔ nyɔŋ lɛ eto enii fɛɛ kwa nɔ lɛ?

¹⁸ Yɛ nɔ ni wɔsusu he nɛɛ naa lɛ, mɛni wɔbaanyɛ wɔkɛɛ? Kɛ́ Yesu ba ebakojo mɛi yɛ amanehulu kpeteŋkpele lɛ mli lɛ, ebaana akɛ nyɔŋ anɔkwafo lɛ etee nɔ eha ewebii lɛ mumɔŋ niyenii yɛ be ni sa mli. No baaha Yesu mii ashɛ ehe, ni ebaaŋɔ lɛ eto enii fɛɛ kwa nɔ, ni no baafee nitsumɔ ni ji enyɔ lɛ. Mɛi ni feɔ nyɔŋ anɔkwafo lɛ anine baashɛ nitsumɔ nɛɛ nɔ kɛ́ amɛtee ŋwɛi, ní amɛyafata Kristo he yɛ enɔyeli lɛ mli lɛ.

19. Kɛ́ mɛi ni afɔ amɛ mu lɛ fɛɛ tee ŋwɛi lɛ, ani abaajuro nyɔŋ anɔkwafo lɛ fe mɛi krokomɛi lɛ? Tsɔɔmɔ mli.

¹⁹ Kɛ́ mɛi ni afɔ amɛ mu lɛ fɛɛ tee ŋwɛi lɛ, ani abaajuro nyɔŋ anɔkwafo lɛ fe mɛi krokomɛi lɛ? Dabi. Kɛ́ awo shi akɛ abaajuro kuu ko mli bii fioo ko lɛ, mɛi krokomɛi ni yɔɔ kuu lɛ mli lɛ fɛɛ baanyɛ aná he sɛɛ. Akɛ nɔkwɛmɔnɔ lɛ, susumɔ nɔ ni Yesu kɛɛ ebɔfoi anɔkwafoi 11 lɛ gbi gbɛkɛ ni enɔ jetsɛremɔ lɛ egbo lɛ he okwɛ. (Nyɛkanea Luka 22:28-30.) Yesu wo nakai hii fioo lɛ shi akɛ ebaajuro amɛ yɛ anɔkwa ni amɛyeɔ lɛ hewɔ. Amɛkɛ lɛ baaye nɔ akɛ maŋtsɛmɛi. Shi afii komɛi asɛɛ lɛ, etsɔɔ akɛ mɛi 144,000 lɛ fɛɛ baatara maŋtsɛsɛii anɔ ní amɛkɛ lɛ aye nɔ. (Kpoj. 1:1; 3:21) Nakai nɔŋŋ yɛ Mateo 24:47 lɛ, ewo shi akɛ ebaaŋɔ kuu fioo ko—nyɛmimɛi hii ni afɔ amɛ mu ni feɔ nyɔŋ anɔkwafo lɛ—eto enii fɛɛ kwa nɔ. Yɛ anɔkwale mli lɛ, mɛi 144,000 lɛ fɛɛ baafata Kristo he kɛkwɛ enii fɛɛ kwa lɛ nɔ.—Kpoj. 20:4, 6.

20. Mɛni hewɔ Yesu hala nyɔŋ anɔkwafo lɛ, ni mɛni otswa ofai shi akɛ obaafee?

²⁰ Ŋmɛnɛ lɛ, Yesu miitsɔ nyɔŋ anɔkwafo kɛ hiɛshikalɔ lɛ nɔ eelɛ mɛi babaoo taakɛ etsɔ mɛi fioo nɔ elɛ mɛi babaoo yɛ klɛŋklɛŋ afii 100 lɛ mli lɛ nɔŋŋ. Yesu hala nakai nyɔŋ anɔkwafo lɛ koni ekwɛ ni esɛɛnyiɛlɔi anɔkwafoi lɛ—mɛi ni afɔ amɛ mu kɛ tooi krokomɛi lɛ fɛɛ—aya nɔ aná mumɔŋ niyenii yɛ be ni sa mli yɛ naagbee gbii lɛ amli fɛɛ. Nyɛhaa wɔtswaa wɔfai shi akɛ wɔkɛ gbɛtsɔɔmɔi fɛɛ ni nyɛmimɛi hii ni afɔ amɛ mu ni feɔ nyɔŋ anɔkwafo kɛ hiɛshikalɔ lɛ kɛhaa wɔ lɛ baatsu nii, ni wɔkɛtsɔɔ akɛ wɔhiɛ sɔɔ amɛnitsumɔ lɛ.—Heb. 13:7, 17.