Nuu ko ni yɔɔ Brazil lɛ kɛɛ akɛ: “Bei pii lɛ, wɔgbɛkɛ Weku Jamɔ lɛ mli nifeemɔi lɛ heɔ wɔjwɛŋmɔ aahu akɛ, kɛ́ mihaaa wɔfo sɛɛ lɛ, beni wɔbaahɛle shi lɛ jenamɔ yi ewa.” Weku yitso ko ni yɔɔ Japan lɛ hu wie akɛ, bei pii lɛ ebinuu ni eye afii nyɔŋma lɛ sumɔɔ ni atsa nɔ ni akaseɔ lɛ nɔ, eyɔseee akɛ be etee. Mɛni hewɔ? Etsɛ lɛ kɛɛ akɛ: “Enyaa nɔ ni akaseɔ lɛ he waa, ni ehaa enáa miishɛɛ.”

Eji anɔkwale akɛ, jeee gbekɛbii fɛɛ sumɔɔ nibii ni akaseɔ lɛ, ni mɛi komɛi po nyaaa weku jamɔ he. Mɛni hewɔ? Nuu ko ni yɔɔ Togo lɛ tsɔɔ nɔ ni eyɔse. Ekɛɛ akɛ: “Esaaa akɛ Yehowa jamɔ feɔ nɔ ni miishɛɛ bɛ mli.” Kɛ́ ebaa lɛ nakai lɛ, ani eeenyɛ efee akɛ ejɛ bɔ ni afeɔ weku jamɔ lɛ ahaa lɛ? Wekui babaoo eyɔse akɛ, weku jamɔ baanyɛ aha mɔ ‘mii ashɛ ehe’ taakɛ Yesaia wie yɛ Hejɔɔmɔ Gbi lɛ he lɛ.—Yes. 58:13, 14.

Tsɛmɛi ni ji Kristofoi lɛ eyɔse akɛ, kɛ́ weku jamɔ baafee nɔ ni yɔɔ miishɛɛ lɛ, esaaa akɛ ahaa efeɔ mɔ ko mɔ ko ahuntoo. Nuu ko ni atsɛɔ lɛ Ralf, ni yɔɔ biyei etɛ kɛ nuu kome lɛ wie akɛ, amɛweku jamɔ lɛ yɛ lɛ sanegbaa moŋ fe nikasemɔ, ni tsɔɔ akɛ mɔ fɛɛ mɔ kɛ ehe woɔ mli. Eji anɔkwale akɛ, ebɛ mlɛo akɛ aaaha nikasemɔ lɛ afee nɔ ni yɔɔ miishɛɛ ni mɔ fɛɛ mɔ kɛ ehe awo mli. Yoo ko wie akɛ: “Jeee be fɛɛ be minyɛɔ mihaa weku jamɔ lɛ feɔ miishɛɛ taakɛ mitaoɔ lɛ.” Te ooofee tɛŋŋ oha efee miishɛɛ be fɛɛ be lɛ?

Weku yitso ko ni yɔɔ Germany ni yɔɔ bii enyɔ lɛ wie akɛ: “Esaaa akɛ afeɔ nɔ kome too lɛ nɔŋŋ.” Yoo ko ni atsɛɔ lɛ Natalia ni yɔɔ bii enyɔ lɛ hu wie akɛ: “Nɔ ni he hiaa wɔweku lɛ  titri ji, ni wɔtsake mli, wɔtsake mli, wɔtsake mli.” Wekui pii jaraa amɛweku jamɔ lɛ mli amɛwoɔ fãi srɔtoi amli. Nuu ko ni atsɛɔ lɛ Cleiton ni yɔɔ Brazil ni yɔɔ bii enyɔ ni amɛná afii 17 kɛ afii 14 lɛ wie akɛ: “Enɛ haa wɔnyɛɔ wɔfeɔ nibii srɔtoisrɔtoi, ni weku lɛ mli bii fɛɛ kɛ amɛhe woɔ mli.” Kɛ́ ajara nikasemɔ lɛ mli awo fãi srɔtoi amli lɛ, ehaa fɔlɔi nyɛɔ amɛtsuɔ amɛbii ni esoro afii abɔ ni amɛteŋ mɔ fɛɛ mɔ eye lɛ ahiamɔ nii ahe nii. Ehaaa fɔlɔi ahala nɔ kome too lɛ nɔŋŋ, shi moŋ, eyeɔ ebuaa amɛ ni amɛhalaa nikasemɔ ni baakɔ weku lɛ mli bii lɛ ateŋ mɔ fɛɛ mɔ he, ni amɛnaa bɔ ni amɛaafee lɛ jogbaŋŋ amɛha.

Mɛni wekui komɛi feɔ kɛtsakeɔ mli? Mɛi komɛi láa kɛjieɔ Yehowa yi kɛjeɔ amɛweku jamɔ lɛ shishi. Nuu ko ni atsɛɔ lɛ Juan ni jɛ Mexico lɛ wie akɛ: “Esaa wɔjwɛŋmɔ kɛhaa nikasemɔ lɛ, ni ehaa wɔjeɔ shishi kɛ miishɛɛ.” Eweku lɛ halaa lalai ni kɔɔ saji ni amɛbaakase nakai gbɛkɛ lɛ ekomɛi ahe.

Wekui babaoo feɔ ekome kɛkaneɔ Biblia lɛ fã ko. Bɔni afee ni anyɛ atsake mli lɛ, ahaa weku lɛ mli bii srɔtoi kaneɔ mɛi ni atsĩ amɛtã yɛ Biblia lɛ fã ni akaneɔ lɛ mli lɛ anaa wiemɔi. Weku yitso ko ni yɔɔ Japan lɛ wie akɛ, ‘shishijee mli lɛ, gbɛ nɛɛ ni wɔtsɔ nɔ wɔkane Biblia lɛ fee mi srɔto ko.’ Shi ebihii enyɔ lɛ nya he akɛ amɛkɛ amɛfɔlɔi efee ekome kɛmiikane nii. Wekui komɛi po feɔ Biblia mli saji lɛ ahe drama. Nuu ko ni atsɛɔ lɛ Roger ni yɔɔ South Africa ni yɔɔ bihii enyɔ lɛ wie akɛ, gbekɛbii lɛ “nyɛɔ amɛnaa nibii komɛi yɛ Biblia lɛ mli ni wɔ, ni ji fɔlɔi lɛ po wɔnako.”

Gbɛ kroko ni abaanyɛ atsɔ nɔ atsake weku jamɔ mli ji, ni afee ekome kɛtsu nɔ ko he nii, tamɔ Noa adeka lɛ loo Salomo sɔlemɔtsu lɛ henɔ ko ni aaafee nɛkɛ. Nifeemɔ ni tamɔ nɛkɛ biɔ ni atao nii amli, ni eyɛ miishɛɛ pam. Akɛ nɔkwɛmɔnɔ lɛ, gbekɛ yoo fioo ko ni yɔɔ Asia ni eye afii enumɔ lɛ kɛ efɔlɔi kɛ enaa fee ekome kɛfee shwɛmɔ nii ko ni tamɔ ludu ni kɔɔ bɔfo Paulo maŋsɛɛ sɔɔmɔ he gbɛfãi lɛ he. Wekui komɛi hu efee shwɛmɔ nii ni tamɔ nakai nɔŋŋ ni kɔɔ nibii ni tee nɔ yɛ 2 Mose lɛ mli lɛ he. Oblanyo ko ni atsɛɔ lɛ Donald ni yɔɔ Togo ni eye afii 19 lɛ wie akɛ, tsakemɔ ni wɔtsake mli lɛ “eha wɔweku jamɔ lɛ eŋɔɔ fe tsutsu lɛ, ni wɔweku lɛ ená miishɛɛ.” Ani nɔ ko yɛ ni nyɛweku lɛ baanyɛ afee ekome kɛtsu he nii ni baaha nyɛweku jamɔ lɛ afee nɔ ni yɔɔ miishɛɛ?

Eyɛ mli akɛ kɛ́ atsake weku jamɔ lɛ mli, ni afeee nɔ kome too lɛ nɔŋŋ lɛ, ehaa esɔɔ moŋ, shi kɛ́ abaanyɛ akase nɔ ko kɛjɛ mli lɛ, ja mɔ fɛɛ mɔ esaa ehe kɛtsɔ hiɛ dã. Bei komɛi lɛ, etɔɔ gbekɛbii ni yɔɔ weku lɛ mli lɛ, no hewɔ lɛ ehe miihia ni weku yitsei kɛ hiɛshikamɔ ahala saji ni abaasusu he lɛ, ni amɛsaa amɛhe jogbaŋŋ. Weku yitso ko wie akɛ: “Kɛ́ misaa mihe lɛ, mɔ fɛɛ mɔ kɛ ehe woɔ nikasemɔ lɛ mli kɛ miishɛɛ.” Weku yitso ko ni yɔɔ Germany lɛ haa eweku lɛ leɔ nɔ ni amɛbaasusu he yɛ otsii ni baaba lɛ amli lɛ kɛtsɔɔ hiɛ. Beni nuu ko ni yɔɔ Benin, ni yɔɔ bii ekpaa ni yeko afii 13 lɛ to gbɛjianɔ koni amɛkwɛ asafo lɛ DVD lɛ eko lɛ, etsɔ hiɛ eha eweku lɛ le sanebimɔi ni amɛkɛbaasusu nakai sini lɛ he. Eji anɔkwale akɛ, kɛ́ asaa he jogbaŋŋ lɛ, ehaa weku jamɔ lɛ mɔɔ shi waa.

Kɛ́ atsɔ hiɛ aha weku lɛ le nɔ ni abaasusu he lɛ, amɛnyɛɔ amɛgbaa he sane yɛ otsi lɛ mli, ni no haa amɛkɛ miishɛɛ kpaa lɛ gbɛ. Ni kɛ́ aha mɔ fɛɛ mɔ nifeemɔ ko yɛ weku jamɔ lɛ mli lɛ, ehaa mɔ fɛɛ mɔ kɛ ehe woɔ mli jogbaŋŋ.

Ewa kɛha wekui babaoo akɛ amɛaafee weku jamɔ lɛ daa otsi.

Tsɛmɛi babaoo kɛ ŋmɛlɛtswai babaoo tsuɔ nii dani weku lɛ náa amɛdaaŋ ŋmaa. Akɛ nɔkwɛmɔnɔ lɛ, weku yitso ko ni yɔɔ Mexico lɛ shiɔ shĩa leebi ŋmɛji ekpaa, ni ebaa shĩa gbɛkɛ ŋmɛlɛ kpaanyɔ. Bei komɛi hu lɛ, ehe bahiaa ni atsake be ni akɛfeɔ Weku Jamɔ lɛ yɛ teokrase nifeemɔi krokomɛi ahewɔ.

Fɛɛ sɛɛ lɛ, esa akɛ wɔtswa wɔfai shi akɛ wɔfolɔŋ wɔweku jamɔ lɛ mli. Gbekɛ yoo ko ni atsɛɔ lɛ Loïs ni eye afii 11 ni yɔɔ Togo lɛ wie akɛ: “Eyɛ mli akɛ bei komɛi lɛ shihilɛi komɛi ni yaa nɔ yɛ gbi lɛ mli lɛ haaa wɔje wɔweku jamɔ lɛ shishi yɛ be naa moŋ, shi wɔfolɔɔɔ mli.” Enɛ hewɔ ni wekui komɛi feɔ amɛweku jamɔ lɛ yɛ otsi lɛ shishijee gbɛ lɛ. Kɛkɛ lɛ, kɛ́ nɔ ko ni akpaaa gbɛ ba po lɛ, amɛbaanyɛ amɛtsi amɛto be kroko yɛ nakai otsi lɛ mli.

Gbɛ́i ni ji “weku jamɔ” lɛ po tsɔɔ akɛ efata jamɔ ni wɔkɛhaa Yehowa lɛ he. No hewɔ lɛ, okɛ oweku lɛ mli bii lɛ fɛɛ ‘aŋɔa nyɛnaabui nyɛfea tsinahii nyɛhaa’ Yehowa daa otsi. (Hosh. 14:2) Ni eba akɛ nakai be lɛ baafee miishɛɛ be kɛha mɔ fɛɛ mɔ ni yɔɔ weku lɛ mli lɛ, “ejaakɛ Yehowa he nyamɔ lɛ ji nyɛhewalɛ!”—Neh. 8:9, 10.