1, 2. Shishijee lɛ, te Adam kɛ Hawa shihilɛ ji hã tɛŋŋ? Mɛɛ sanebimɔi enɛ teɔ amɛ shi?

BE NI abɔ Adam kɛ Hawa lɛ, no mli lɛ amɛbɛ henyɛlɔ ko. Amɛye emuu ni amɛyɛ he ko ni afee lɛ paradeiso. Wekukpaa ni mli wa waa yɛ amɛ kɛ amɛ-Bɔlɔ lɛ teŋ. Ni ekɛ amɛ yɛ akɛ ebinuu kɛ ebiyoo. (1 Mose 2:7-9; Luka 3:38, Ga Biblia hee) Nyɔŋmɔ kɛ nitsumɔ ko ni he hiaa wo amɛdɛŋ. (Nyɛkanea 1 Mose 1:28.) Afii enyiɛ ebaahe amɛ kɛgbe nitsumɔ nɛɛ naa? Jeee ja amɛhi shi kɛtee naanɔ dani amɛbaanyɛ ‘amɛfɔ ni amɛyi shikpɔŋ lɛ nɔ obɔ ni amɛnaanaa nɔ.’ Shi ja amɛhi shi kɛtee naanɔ dani amɛbaanyɛ ‘amɛye kooloo fɛɛ kooloo ni tsiɔ ehe yɛ shikpɔŋ lɛ nɔ lɛ nɔ.’ Kulɛ amɛbaatsu nitsumɔ nɛɛ kɛ miishɛɛ kɛya naanɔ.

² Mɛni hewɔ nibii etsake kwraa bianɛ lɛ? Mɛni hewɔ wɔyɔɔ henyɛlɔi babaoo, ní amɛteŋ otu ji gbele, ní hãaa  wɔná miishɛɛ lɛ? Mɛɛ gbɛ nɔ Nyɔŋmɔ baakpata henyɛlɔi nɛɛ ahiɛ? Sanebimɔi nɛɛ ahetoo yɛ Biblia lɛ mli. Nyɛhãa wɔsusua he wɔkwɛa.

3, 4. (a) Mɛɛ kita Nyɔŋmɔ wo Adam kɛ Hawa? (b) Mɛni hewɔ ehe hiaa waa akɛ amɛbo kita nɛɛ toi lɛ?

³ Eyɛ mli akɛ abɔ Adam kɛ Hawa koni amɛhi shi kɛya naanɔ moŋ, shi no etsɔɔɔ akɛ ahã amɛ wala ni gbooo. Ja amɛtee nɔ amɛmu, amɛnu nu, amɛwɔ, ni amɛye nii dani amɛbaaya nɔ amɛhi wala mli. Shi nɔ ni he hiaa fe fɛɛ ni baahã amɛya nɔ amɛhi wala mli ji, ní amɛbaahã wekukpaa kpakpa ahi amɛ kɛ Yehowa ni ji wala Halɔ lɛ teŋ. (5 Mose 8:3) Ja amɛhã Yehowa etsɔɔ amɛ gbɛ dani amɛbaanyɛ amɛya nɔ amɛhi wala mli. Dani Yehowa baabɔ Hawa po lɛ, efee lɛ faŋŋ ehã Adam akɛ: “Trom lɛ mli tsei lɛ fɛɛ nɔ yibii lɛ ye bɔ ni osumɔɔ; shi ekpakpa kɛ efɔŋ lee tso lɛ yibii lɛ kaaye eko; ejaakɛ gbi nɔ ni oooye eko lɛ, gbo ooogbo!”—1 Mose 2:16, 17.

⁴ “Ekpakpa kɛ efɔŋ lee tso lɛ” hãa anaa akɛ Nyɔŋmɔ yɛ hegbɛ akɛ etsɔɔ nɔ ni ja kɛ nɔ ni ejaaa. Shi no mli lɛ, Adam le nɔ ni ji ekpakpa kɛ efɔŋ momo, ejaakɛ abɔ lɛ yɛ Nyɔŋmɔ subaŋ nɔ, ni eyɛ henilee. Tso lɛ kaiɔ Adam kɛ Hawa akɛ, Yehowa gbɛtsɔɔmɔ he miihia amɛ be fɛɛ be. Kɛ́ amɛye tso nɛɛ nɔ yibii lɛ, belɛ amɛmiikɛɛ Nyɔŋmɔ akɛ, “Wɔsumɔɔɔ ni owoɔ wɔ mla.” Enɛ baahã amɛ kɛ amɛbii fɛɛ agboi taakɛ Nyɔŋmɔ ebɔ amɛ kɔkɔ lɛ.

5. Mɛni hewɔ Adam kɛ Hawa gbo Yehowa nɔ toi lɛ?

⁵ Adam hã Hawa le Yehowa fãmɔ lɛ. Hawa le mla nɛɛ jogbaŋŋ aahu akɛ, sɛɛ mli lɛ eti mli po. (1 Mose 3:1-3) Eti mli ehã Satan Abonsam, mɔ ni tsɔ onufu nɔ ekɛ lɛ wie lɛ. Satan hã shwelɛ ni eyɔɔ akɛ eye mɛi anɔ loo etse ehe lɛ tee nɔ emli wa. (Okɛto Yakobo 1:14, 15 lɛ he.) Satan kɛɛ Hawa akɛ Nyɔŋmɔ ji amalelɔ, ni kɛ́ egbo Nyɔŋmɔ nɔ toi lɛ, egboŋ shi moŋ ebaatsɔ tamɔ Nyɔŋmɔ. (1 Mose 3:4, 5) Hawa he lɛ eye, ni etse aduawa lɛ eko eye kɛtsɔɔ akɛ esumɔɔɔ ni Nyɔŋmɔ yeɔ enɔ, ni ekɛɛ Adam ní efee nakai nɔŋŋ. (1 Mose 3:6, 17) Abonsam elaka lɛ kwraa. (Nyɛkanea 1 Timoteo 2:14.) Eyɛ mli akɛ Adam le akɛ nɔ ni eŋa lɛ kɛɛ lɛ lɛ ejaaa moŋ, shi ebo eŋa lɛ toi. Ekolɛ amɛna onufu lɛ akɛ amɛnaanyo, shi Satan Abonsam ji henyɛlɔ ko ni yitsoŋ wa, mɔ ko ni le awui ni malemɔ ni emaleɔ lɛ baaye.

6, 7. Te Yehowa tsu Adam kɛ Hawa kojomɔ lɛ he nii ehã tɛŋŋ?

⁶ Adam kɛ Hawa tse Yehowa, mɔ ni duro amɛ wala kɛ nibii kpakpai fɛɛ ni amɛyɔɔ lɛ hiɛ atua. Eji anɔkwale akɛ, Yehowa na nɔ ni amɛfee lɛ. (1 Kron. 28:9; nyɛkanea Abɛi 15:3.) Shi eŋmɛ Adam, Hawa, kɛ Satan fɛɛ gbɛ koni amɛtsɔɔ akɛ amɛmiisumɔ ni eye amɛnɔ loo amɛsumɔɔɔ. Akɛni eji amɛ-Tsɛ hewɔ lɛ, ekã shi faŋŋ akɛ nɔ ni amɛfee lɛ dɔ lɛ waa. (Okɛto 1 Mose 6:6 lɛ he.) Shi akɛ Kojolɔ hu lɛ, ekojo eshafeelɔi lɛ.

⁷ Adam le nɔ ni baajɛ ekpakpa kɛ  efɔŋ lee tso lɛ nɔ yibii lɛ eko ni amɛbaaye lɛ mli kɛba. Nyɔŋmɔ etsɔ hiɛ ekɛɛ lɛ akɛ: “Gbi nɔ ni oooye eko lɛ, gbo ooogbo!” Ekolɛ Adam yasusu akɛ, enɛ tsɔɔ akɛ, ebaagbo dani hulu baanyɔ shi. Shi sɛɛ mli yɛ nakai gbi lɛ nɔ nɔŋŋ lɛ, Yehowa kɛ Adam kɛ Hawa wie. (1 Mose 3:8) Akɛ Kojolɔ ni ja lɛ, ebo nɔ ni amɛyɔɔ kɛɛmɔ lɛ toi klɛŋklɛŋ. (1 Mose 3:9-13) Kɛkɛ ni ebu eshafeelɔi enyɔ lɛ gbele fɔ. (1 Mose 3:14-19) Eji egbe amɛ amrɔ nɔŋŋ kulɛ, yiŋ ni eto kɛhã adesai lɛ baŋ mli. (Yes. 55:11) Eyɛ mli akɛ nɔ ni jɛ esha ni Adam kɛ Hawa fee lɛ mli ba lɛ je shishi amrɔ nɔŋŋ moŋ, shi Yehowa ŋmɛ amɛ gbɛ ní amɛhi shi be kplaŋŋ bɔ ni afee ni amɛnyɛ amɛfɔ bii ni baanyɛ aná shihilɛ kpakpa wɔsɛɛ. Gbi ni amɛfee esha lɛ nɔ nɔŋŋ lɛ, ena amɛ akɛ mɛi ni egboi. Ni akɛni yɛ Yehowa hiɛ lɛ, afii 1,000 tamɔ gbi kome hewɔ lɛ, eji anɔkwale akɛ amɛgboi yɛ nakai “gbi” lɛ nɔŋŋ nɔ.—2 Pet. 3:8.

8, 9. Mɛɛ gbɛ nɔ esha ni Adam fee lɛ sa ebii ahe? (Kwɛmɔ mfoniri ni yɔɔ nikasemɔ lɛ shishijee lɛ.)

⁸ Ani nɔ ni Adam kɛ Hawa fee lɛ baasa amɛbii ahe? Hɛɛ. Romabii 5:12 lɛ kɛɔ akɛ: “Gbɔmɔ kome nɔ esha tsɔ kɛba je lɛŋ, ni gbele tsɔ esha nɔ kɛba, ni no hã gbele lɛ tsɛŋe gbɔmɛi fɛɛ, ejaakɛ amɛ fɛɛ amɛfee esha.” Bɔfo Paulo kɛfata he akɛ: “Atsɔ gbɔmɔ kome lɛ toigbele lɛ nɔ ahã mɛi pii tsɔmɔ eshafeelɔi.” (Rom. 5:19) Mɔ klɛŋklɛŋ ni gbo ji anɔkwafo Habel. (1 Mose 4:8) No sɛɛ lɛ, Adam bii kɛ nabii krokomɛi lɛ gbɔlɔ ni amɛgboi. Gboshinii ni eshi ehã adesai ji esha kɛ gbele, ni ji henyɛlɔi enyɔ ni mɔ ko mɔ ko nyɛɛɛ ajo amɛnaa foi. Eyɛ mli akɛ wɔleee bɔ tuuntu ni fee ni Adam kɛ esha kɛ gbele hã eshwiei lɛ kɛtsɔ fɔmɔ nɔ moŋ, shi wɔnaa nibii ni tsɔɔ akɛ amɛshi esha kɛ gbele amɛhã wɔ.

⁹ Esa jogbaŋŋ akɛ Biblia lɛ kɛ esha kɛ gbele toɔ “muhɔɔ ní alɛɛ mli aha jeŋmaji fɛɛ nɔ” kɛ “hiɛhaa nɔ ní aŋɔha majimaji fɛɛ hiɛ lɛ” he. (Yes. 25:7) Adesa ko nyɛŋ ajo esha kɛ gbele naa foi. No hewɔ ni Biblia lɛ kɛɔ akɛ, “Adam mli ni mɛi fɛɛ gboiɔ yɛ” lɛ. (1 Kor. 15:22) Enɛ hewɔ lɛ, Paulo bi akɛ: “Namɔ aaajie mi kɛaajɛ nɛkɛ gbele gbɔmɔtso nɛɛ dɛŋ?” Ani mɔ ko baanyɛ ajie Paulo kɛjɛ mli? *—Rom. 7:24.

10. (a) Mɛɛ ŋmalɛi tsɔɔ akɛ Yehowa baafo gbele sɛɛ? (b) Mɛni ŋmalɛi nɛɛ tsɔɔ wɔ yɛ Yehowa kɛ e-Bi lɛ he?

¹⁰ Lɛɛlɛŋ, Yehowa baanyɛ ajie Paulo. Biblia lɛ kɛɔ akɛ: “Eeemi gbele kɛaatee naanɔ; ni Nuŋtsɔ Yehowa aaatsumɔ hiɛaŋ fɛɛ yaafonui.” (Yes. 25:8) Tamɔ bɔ ni kɛ́ gbekɛbii miina nɔ lɛ, amɛtsɛ jieɔ nɔ ni hãa amɛnaa nɔ lɛ ni etsumɔɔ amɛhiɛaŋ yaafonui lɛ, Yehowa hu miisumɔ waa akɛ efo gbele sɛɛ! Yesu hu fiɔ esɛɛ. Ŋmalɛ lɛ kɛɔ yɛ 1 Korintobii 15:22 lɛ akɛ: “Kristo mli ni amɛ fɛɛ amɛyi aaaná wala yɛ.” Paulo hu hã sane ni ebi akɛ “namɔ aaajie mi?” lɛ hetoo akɛ: “Miitsɔ wɔ-Nuŋtsɔ Yesu Kristo nɔ miida  Nyɔŋmɔ shi.” (Rom. 7:25) Eyɛ faŋŋ akɛ be ni Adam kɛ Hawa fee esha lɛ, suɔmɔ ni Yehowa yɔɔ kɛhã adesai lɛ sɛɛ efooo. Ni nakai nɔŋŋ Yesu, mɔ ni ye ebua e-Tsɛ lɛ kɛbɔ Adam kɛ Hawa lɛ sumɔɔ adesai lolo. (Abɛi 8:30, 31) Shi te aaafee tɛŋŋ ajie adesai kɛjɛ esha kɛ gbele dɛŋ lɛ?

11. Mɛni Yehowa fee kɛye ebua adesai?

¹¹ Be ni Adam fee esha lɛ Yehowa bu lɛ gbele fɔ. Enɛ hewɔ lɛ, adesai fɛɛ yeee emuu, ni amɛgboiɔ. (Rom. 5:12, 16) Romabii 5:18 lɛ kɛɔ akɛ: “Atsɔ mɔ kome shigbeemɔ nɔ abu gbɔmɛi fɛɛ fɔ.” Mɛni Yehowa baafee kɛye ebua adesai ni nakai beaŋ nɔŋŋ lɛ ekuuu lɛ diɛŋtsɛ eshishitoo mlai amli? Yesu hã sanebimɔ nɛɛ hetoo be ni ewie akɛ, eba koni “eŋɔ esusuma lɛ ehã yɛ mɛi pii akpɔmɔ hewɔ lɛ.” (Mat. 20:28) Akɛni no mli lɛ Yesu ji adesa ni eye emuu hewɔ lɛ, enyɛ eŋɔ ehe ehã akɛ kpɔmɔnɔ ehã mɛi fɛɛ. Mɛɛ gbɛ nɔ kpɔmɔnɔ nɛɛ kɛ Yehowa jalɛsaneyeli kpaa gbee?—1 Tim. 2:5, 6.

12. Mɛɛ kpɔmɔnɔ akɛhã ni kɛ Yehowa jalɛsaneyeli kpaa gbee?

¹² Akɛ gbɔmɔ ni eye emuu lɛ, kulɛ Yesu baanyɛ ahi shi kɛya naanɔ. Nakai ji bɔ ni Yehowa to ehã Adam. Shi suɔmɔ ni Yesu yɔɔ kɛhã e-Tsɛ lɛ kɛ Adam shwiei lɛ hewɔ lɛ, eŋɔ ewala akɛ adesa lɛ ehã, ni enɛ kɛ nɔ ni ŋmɛɛ Adam lɛ yeɔ egbɔ. Sɛɛ mli lɛ, Yehowa tee Yesu shi kɛtee ŋwɛi akɛ mumɔŋ gbɔmɔ. (1 Pet. 3:18) Kpɔmɔnɔ nɛɛ kɛ Yehowa jalɛsaneyeli kpaa gbee, ejaakɛ aŋɔ wala ni eye emuu ahã yɛ wala ni eye emuu najiaŋ. Yesu gbele gbɛ ehã Adam shwiei koni amɛná naanɔ wala. Enɛ hewɔ Paulo tsɛ Yesu akɛ, “naagbee Adam,” mɔ ni ji mumɔ ni hãa mɔ yi náa wala lɛ.—1 Kor. 15:45.

13. Mɛni “naagbee Adam” lɛ baafee ehã mɛi ni egboi lɛ?

¹³ Etsɛŋ kwraa, “naagbee Adam” lɛ baahã Adam shwiei lɛ aná naanɔ wala. Mɛi ni egboi lɛ ateŋ mɛi babaoo baaná naanɔ wala. Abaatee amɛ shi kɛba wala mli ekoŋŋ yɛ shikpɔŋ lɛ nɔ.—Yoh. 5:28, 29.

14. Mɛɛ gbɛ nɔ abaatsɔ ahã adesai aye emuu?

¹⁴ Mɛɛ gbɛ nɔ abaatsɔ ahã adesai aye emuu? Yehowa to ŋwɛi nɔyeli ko shishi koni etsu enɛ he nii. Mɛi ni baaye nɔ ji Yesu kɛ mɛi 144,000 ní ahala kɛjɛ adesai ateŋ lɛ. (Nyɛkanea Kpojiemɔ 5:9, 10.) Akɛni be ni mɛi 144,000 lɛ yɔɔ shikpɔŋ lɛ nɔ lɛ, amɛji adesai ni yeee emuu hewɔ lɛ, amɛbaanu amɛshishi bii lɛ ashishi. Yesu kɛ mɛi ni ekɛyeɔ nɔ lɛ baaye abua adesai afii 1,000 koni amɛye emuu.—Kpoj. 20:6.

15, 16. (a) Mɛɛ gbele Biblia lɛ tsɛɔ lɛ akɛ “naagbee henyɛlɔ” lɛ? Mɛɛ be abaafo sɛɛ? (b) Taakɛ 1 Korintobii 15:28 lɛ tsɔɔ lɛ, mɛni Yesu baafee?

¹⁵ Yɛ afii 1,000 lɛ naagbee lɛ, adesai ni boɔ Yehowa toi lɛ baaye amɛhe kɛjɛ esha kɛ gbele dɛŋ. Paulo tsɔɔ mli akɛ: “Taakɛ bɔ ni Adam mli ni mɛi fɛɛ gboiɔ yɛ lɛ, nakai nɔŋŋ kɛ̃ Kristo mli ni amɛ fɛɛ amɛyi aaaná wala yɛ. Shi mɔ fɛɛ mɔ yɛ lɛ diɛŋtsɛ egbɛjianɔ: klɛŋklɛŋ mɔ ji Kristo, no sɛɛ lɛ mɛi ni ji Kristo nii [ni ji mɛi ni kɛ lɛ baaye nɔ] lɛ, yɛ ebaa lɛ mli; no sɛɛ dani naagbee lɛ baaba, be ni eeeŋɔ maŋtsɛyeli lɛ eha Nyɔŋmɔ kɛ tsɛ lɛ, ni eeefo nɔyeli fɛɛ kɛ hegbɛ fɛɛ kɛ hewalɛ fɛɛ sɛɛ lɛ. Shi ja  eye maŋtsɛ kɛyashi beyinɔ ni eeeŋɔ henyɛlɔi lɛ fɛɛ eto enajiashi. Naagbee henyɛlɔ ni abaafo esɛɛ ji gbele.” (1 Kor. 15:22-26) Naagbee kwraa lɛ, abaafo gbele ni wɔná kɛjɛ Adam dɛŋ, ni ji naagbee henyɛlɔ lɛ sɛɛ. Abaajie “muhɔɔ” ni ha adesai anɔ lɛ kɛya kwraa.—Yes. 25:7, 8.

¹⁶ Paulo tsa nɔ akɛ: “Be ni aŋɔ nii fɛɛ ato bi lɛ shishi lɛ, no lɛ lɛ diɛŋtsɛ hu eeeŋɔ ehe eto mɔ ni ŋɔ nii fɛɛ to eshishi lɛ shishi, koni Nyɔŋmɔ afee nibii fɛɛ ayitso.” (1 Kor. 15:28) Yiŋtoo hewɔ ni awo Yesu maŋtsɛ lɛ baaba naagbee yɛ nakai beaŋ. No hewɔ lɛ, ebaajɛ esuɔmɔ mli ekɛ hegbɛ lɛ aku sɛɛ ahã Yehowa, ni ebaaŋɔ adesai ni eye emuu lɛ ehã lɛ.

17. Mɛni abaafee Satan?

¹⁷ Mɛni abaafee Satan, mɔ tuuntu ni kɛ adesai anaagbai lɛ fɛɛ ba lɛ? Wɔnaa hetoo lɛ yɛ Kpojiemɔ 20:7-15 lɛ. Yɛ afii 1,000 lɛ naagbee lɛ, abaaŋmɛ Satan gbɛ ni ebaka adesai ni eye emuu lɛ nɔ ni ji naagbee nɔ. Kɛkɛ lɛ, abaakpata Satan kɛ mɛi ni baabo lɛ toi lɛ fɛɛ hiɛ kwraa. Enɛ ji nɔ ni Biblia lɛ tsɛɔ lɛ “gbele ni ji enyɔ lɛ.” (Kpoj. 21:8) ‘Afoŋ’ gbele nɛɛ “sɛɛ” kɔkɔɔkɔ, ejaakɛ ateŋ mɛi ni gboɔ “gbele ni ji enyɔ lɛ” shi dɔŋŋ. Kɛ́ wɔyeɔ Yehowa anɔkwa lɛ, ehe ehiaaa ni wɔshe “gbele ni ji enyɔ lɛ” gbeyei.

18. Te aaafee tɛŋŋ agbe nitsumɔ ni Nyɔŋmɔ kɛwo Adam dɛŋ lɛ naa kwraa lɛ?

¹⁸ Nakai beaŋ lɛ, adesai fɛɛ baaye emuu, ni Yehowa baabu amɛ akɛ mɛi ni sa naanɔ wala. No mli lɛ, ajie henyɛlɔi fɛɛ ni hãaa adesai aná miishɛɛ lɛ yɛ shihilɛ mli. Adesai ni eye emuu lɛ baagbe nitsumɔ ni Nyɔŋmɔ kɛwo Adam dɛŋ lɛ naa ní Adam he bɛ mli. Eshwiei lɛ kɛ miishɛɛ baakwɛ shikpɔŋ lɛ kɛ kooloi lɛ anɔ. Eŋɔɔ wɔnaa akɛ etsɛŋ Yehowa baafo naagbee henyɛlɔ, ni ji gbele lɛ sɛɛ!