1. Te Paulo nu he yɛ mɛi ni tsu nii waa kɛshiɛ sane kpakpa lɛ ahe ehã tɛŋŋ?

BƆFO Paulo hiɛ sɔ enyɛmimɛi hii kɛ yei ni tsu nii waa kɛshiɛ sane kpakpa lɛ. Eŋma akɛ: “Wɔkaiɔ nyɛhemɔkɛyeli nitsumɔ lɛ kɛ nyɛsuɔmɔ mɔdɛŋbɔɔ lɛ kɛ wɔ-Nuŋtsɔ Yesu Kristo he hiɛnɔkamɔ mli tsuishitoo lɛ yɛ Nyɔŋmɔ kɛ wɔtsɛ lɛ hiɛ.” (1 Tes. 1:3) Yehowa hu kaiɔ nɔ fɛɛ nɔ ni ewebii lɛ nyɛɔ amɛtsuɔ yɛ esɔɔmɔ lɛ mli lɛ, ni ehiɛ sɔɔ waa, kɛ́ babaoo amɛnyɛ amɛtsu jio, fioo amɛnyɛ amɛtsu jio.—Heb. 6:10.

2. Mɛni he wɔbaasusu yɛ nikasemɔ nɛɛ mli?

² Kristofoi ni hi shi yɛ blema kɛ mɛi ni yɔɔ ŋmɛnɛ lɛ fɛɛ kɛ nibii wuji eshã afɔle koni amɛnyɛ amɛtsu babaoo yɛ Yehowa sɔɔmɔ lɛ mli. Wɔbaasusu nɔ ni klɛŋklɛŋ afii 100 lɛ mli Kristofoi komɛi tsu yɛ Yehowa sɔɔmɔ lɛ mli lɛ he yɛ nikasemɔ nɛɛ mli. Agbɛnɛ hu, wɔbaana nɔ ni be fɛɛ sɔɔlɔi ni yɔɔ ŋmɛnɛ lɛ tsuɔ, ni wɔbaakwɛ gbɛi anɔ ni wɔɔtsɔ wɔye wɔbua amɛ.

3, 4. (a) Mɛɛ gbɛi komɛi anɔ klɛŋklɛŋ afii 100 lɛ mli Kristofoi lɛ ekomɛi sɔmɔ Yehowa? (b) Mɛɛ gbɛi anɔ klɛŋklɛŋ afii 100 lɛ mli Kristofoi lɛ ekomɛi ye amɛbua be fɛɛ sɔɔlɔi nɛɛ yɛ heloŋ?

³ Be ni abaptisi Yesu sɛɛ nɔŋŋ lɛ, ebɔi Maŋtsɛyeli lɛ shiɛmɔ, ni etsɔɔ mɛi krokomɛi hu ní amɛshiɛ. (Luka 3:21-23; 4:14, 15, 43) Yɛ Yesu gbele sɛɛ lɛ, bɔfoi lɛ kwɛ shiɛmɔ nitsumɔ lɛ nɔ, ni sane kpakpa lɛ tee nɔ egbɛ eshwa. (Bɔf. 5:42; 6:7) Kristofoi komɛi shi  amɛshĩai ni amɛyasɔmɔ akɛ maŋsɛɛ sɔɔlɔi. Akɛ nɔkwɛmɔnɔ lɛ, Filipo shiɛ yɛ Palestina kpokpaa lɛ nɔ hei srɔtoi. (Bɔf. 8:5, 40; 21:8) Paulo hu ní eji maŋsɛɛ sɔɔlɔ lɛ, shiɛ sane kpakpa lɛ yɛ maji babaoo ní kɛ he ni eyɔɔ lɛ jɛkɛ lɛ anɔ. (Bɔf. 13:2-4; 14:26; 2 Kor. 1:19) Mɛi krokomɛi tamɔ Marko, Luka, kɛ Silvano (loo mɔ ni atsɛɔ lɛ Sila) hu ŋma Biblia mli woji lɛ ekomɛi loo amɛsɔmɔ akɛ Biblia ŋmalɔi lɛ awoloŋmalɔi. (1 Pet. 5:12) Nyɛmimɛi yei babaoo hu fata nyɛmimɛi hii nɛɛ ahe kɛtsu nii. (Bɔf. 18:26; Rom. 16:1, 2) Nyɛmimɛi hii kɛ yei nɛɛ aniiashikpamɔi yɛ Kristofoi a-Hela Ŋmalɛi lɛ mli. Amaniɛbɔi nɛɛ hãa wɔnaa akɛ Yehowa hiɛ sɔɔ nitsumɔ ni etsuji lɛ tsuɔ lɛ, ni ehãa amɛ amɛhiamɔ nii.

⁴ Te be fɛɛ sɔɔlɔi ni hi shi yɛ blema lɛ fee tɛŋŋ amɛkwɛ amɛhe yɛ heloŋ lɛ? Bei komɛi lɛ, nyɛmimɛi lɛ feɔ amɛ gbɔ ni amɛyeɔ amɛbuaa amɛ yɛ gbɛi srɔtoi anɔ, shi be fɛɛ sɔɔlɔi nɛɛ balaaa nibii kɛjɛɛɛ amɛnyɛmimɛi lɛ adɛŋ. (1 Kor. 9:11-15) Nyɛmimɛi lɛ ekomɛi fɔ̃ amɛnine kɛba amɛshĩa koni amɛbaye nii, amɛhã amɛ he ko amɛwɔ, ni amɛye amɛbua amɛ yɛ gbɛi krokomɛi anɔ. Aŋkroaŋkroi kɛ asafoi po ye ebua amɛ. (Nyɛkanea Bɔfoi lɛ Asaji 16:14, 15; Filipibii 4:15-18.) Paulo kɛ enanemɛi ní ekɛfãa gbɛ lɛ hu kɛ be fã tsu heloonaa nitsumɔ kɛkwɛ amɛhe.

5. Mɛni gbalashihilɛ mli bii komɛi wie yɛ be fɛɛ sɔɔmɔ nitsumɔ lɛ ni amɛkɛ amɛhe ewo mli lɛ he?

⁵ Ŋmɛnɛ lɛ, mɛi babaoo kɛ amɛbe fɛɛ tsuɔ nii waa kɛsɔmɔɔ Yehowa yɛ gbɛi srɔtoi anɔ. (Kwɛmɔ akrabatsa ni yitso ji, “ Be Fɛɛ Sɔɔmɔ Nitsumɔ lɛ Fãi Srɔtoi” lɛ.) Te amɛnaa nɔ ni amɛtsuɔ lɛ amɛhãa tɛŋŋ? Kɛ́ obi nyɛmimɛi nɛɛ sane nɛɛ, hetoo ni amɛbaahã bo lɛ baawo bo hewalɛ waa. Nyɛmi nuu ko esɔmɔ akɛ daa gbɛgbalɔ, gbɛgbalɔ krɛdɛɛ, kɛ maŋsɛɛ sɔɔlɔ, ni esɔmɔ hu akɛ Betel weku lɛ mli nyo yɛ maŋ ko ni jeee emaŋ lɛ mli. Ewie akɛ: “Minuɔ he akɛ, be fɛɛ sɔɔmɔ lɛ ni mikɛ mihe wo mli lɛ ji yiŋ ni hi fe fɛɛ ni mikpɛ lɛ ateŋ ekome. Be ni miye afii 18 lɛ, no mli lɛ miyiŋ etɛɛɛ mi kɛji miya yunivɛsiti, mikɛ mibe fɛɛ atsu heloonaa nitsumɔ, loo mitsu gbɛgbamɔ nitsumɔ lɛ. Niiashikpamɔ ni mi diɛŋtsɛ miná lɛ ehã mina akɛ, Yehowa hiɛ kpaaa wɔhe ni wɔkɛshãa afɔle koni wɔnyɛ wɔkɛ wɔbe fɛɛ asɔmɔ lɛ lɛ nɔ. Mikɛ duromɔ keenii ni Yehowa kɛhã mi lɛ etsu nii yɛ gbɛi ni eji mihala heloonaa nitsumɔ kulɛ, minyɛŋ nakai mafee lɛ nɔ.” Eŋa wie akɛ: “Nitsumɔi fɛɛ ni akɛhã mi lɛ eye ebua mi ni mitee mihiɛ. Wɔna shii abɔ akɛ, Yehowa buɔ wɔhe, ni etsɔɔ wɔ gbɛ, ni efeɔ nakai yɛ gbɛi ni eji wɔhi shi ogbɔjɔ kulɛ wɔnaŋ lɛ nakai lɛ nɔ. Midaa Yehowa shi gbi fɛɛ gbi yɛ be fɛɛ sɔɔmɔ nitsumɔ lɛ ni wɔkɛ wɔhe ewo mli lɛ hewɔ.” Ani obaasumɔ ni bo hu onu he nakai yɛ shihilɛ mli?

6. Te Yehowa nuɔ he ehãa tɛŋŋ yɛ sɔɔmɔ ni wɔsɔmɔɔ lɛ lɛ he?

⁶ Eji anɔkwale akɛ, mɛi komɛi nyɛɛɛ amɛkɛ amɛhe awo be fɛɛ sɔɔmɔ nitsumɔ lɛ mli amrɔ nɛɛ, shi amɛkɛ amɛnyɛmɔ fɛɛ miisɔmɔ Yehowa. Wɔle akɛ ehiɛ sɔɔ amɛsɔɔmɔ lɛ waa. Akɛ nɔkwɛmɔnɔ lɛ, taakɛ aŋma yɛ Filemon 1-3 lɛ, Paulo kɛ ŋamɔi maje nyɛmimɛi ni yɔɔ Kolose asafo lɛ mli lɛ, ni etsĩ mɛi komɛi po agbɛ́i tã. (Nyɛkanea.) Paulo hiɛ sɔ bɔ ni amɛtsuɔ nii waa lɛ, ni nakai nɔŋŋ Yehowa hu nu he. Yɛ nakai gbɛ nɔŋŋ nɔ lɛ, Yehowa hiɛ sɔɔ nɔ fɛɛ nɔ ni ofeɔ yɛ esɔɔmɔ lɛ mli lɛ. Shi mɛni obaanyɛ ofee kɛye obua be fɛɛ sɔɔlɔi?

7, 8. Mɛni daa gbɛgbalɔi tsuɔ? Mɛɛ gbɛ nɔ asafoŋbii lɛ baanyɛ aye abua amɛ?

⁷ Taakɛ klɛŋklɛŋ afii 100 lɛ mli bii lɛ kɛ ekãa shiɛ lɛ, ŋmɛnɛ lɛ, daa gbɛgbalɔi hu woɔ asafo lɛ hewalɛ waa. Amɛteŋ mɛi babaoo kɛ aaafee ŋmɛlɛtswai 70 shiɛɔ daa nyɔɔŋ. Te ooofee tɛŋŋ oye obua amɛ lɛ?

 ⁸ Nyɛmi yoo gbɛgbalɔ ko ni atsɛɔ lɛ Shari wie akɛ: “Akɛni gbɛgbalɔi yaa shiɛmɔ daa gbi hewɔ lɛ, etamɔ nɔ ni amɛbɛ naagba. Kɛ̃lɛ, hewalɛwoo he miihia amɛ.” (Rom. 1:11, 12) Nyɛmi yoo kroko hu ni kɛ afii babaoo tsu gbɛgbamɔ nitsumɔ lɛ wie gbɛgbalɔi ni yɔɔ esafo lɛ mli lɛ ahe akɛ: “Amɛgboɔ deŋme waa. Kɛ́ mɛi krokomɛi kɛ amɛtsɔne wo amɛ yɛ shiɛmɔ nitsumɔ lɛ mli, amɛfɔ̃ amɛ nine koni amɛbaye nii, amɛhã amɛ shika fioo kɛhe pɛtro, loo amɛke amɛ shika lɛ, amɛnyaa he waa. Ehãa amɛnaa akɛ osusuɔ amɛhe waa.”

9, 10. Mɛni mɛi komɛi efee kɛye amɛbua gbɛgbalɔi ni yɔɔ amɛsafo lɛ mli lɛ?

⁹ Gbɛ kroko ni wɔbaanyɛ wɔtsɔ nɔ wɔye wɔbua daa gbɛgbalɔi ji, ni wɔkɛ amɛ baaya shiɛmɔ. Nyɛmimɛi yei gbɛgbalɔi enyɔ komɛi wie akɛ amɛmiitao mɛi babaoo kɛya shiɛmɔ yɛ otsi lɛ mli kɛ yɛ shwane mli. Nyɛmi yoo ko ni amrɔ nɛɛ eesɔmɔ yɛ Brooklyn Betel lɛ wie bɔ ni mɔ ko ye ebua lɛ be ni etsuɔ gbɛgbamɔ nitsumɔ lɛ he akɛ: “Nyɛmi yoo ko ni yɔɔ tsɔne lɛ kɛɛ mi akɛ, ‘Be fɛɛ be ni onáaa mɔ ko kɛya shiɛmɔ lɛ, tswaa mi, ni maba wɔya.’ Nɔ ni efee lɛ ye ebua mi waa ni minyɛ mitee nɔ mitsu gbɛgbamɔ nitsumɔ lɛ.” Shari wie akɛ: “Bei pii lɛ, kɛ́ gbɛgbalɔi ni boteko gbalashihilɛ mli lɛ kpa shiɛmɔ lɛ, amɛhe feɔ shoo. Yɛ be kɛ beaŋ lɛ, obaanyɛ ofɔ̃ nyɛmi nuu loo nyɛmi yoo ko nine ni ebafata nyɛhe kɛfee weku jamɔ. Kɛ́ otsɛ amɛ ofata ohe be ni ofeɔ nibii krokomɛi hu lɛ, ewajeɔ amɛ waa.”

¹⁰ Nyɛmi yoo ko ni kɛ aaafee afii 50 etsu be fɛɛ sɔɔmɔ nitsumɔ lɛ wie bɔ ni asafoŋ onukpai lɛ ye amɛbua lɛ kɛ nyɛmimɛi yei krokomɛi ni boteko gbalashihilɛ mli lɛ he akɛ: “Yɛ be kɛ beaŋ lɛ, asafoŋ onukpai lɛ basaraa gbɛgbalɔi lɛ. Amɛbabiɔ wɔshi, ni amɛbiɔ bɔ ni wɔheloonaa nitsumɔ lɛ yaa nɔ ehãa, ni amɛbiɔ kɛji wɔyɛ naagba ko lo. Amɛbiii kɛkɛ, shi amɛyeɔ amɛbuaa. Amɛbaa he ni wɔyɔɔ lɛ amɛbakwɛɔ akɛ yelikɛbuamɔ ko he miihia wɔ lo.” Asafoŋ onukpai nɛɛ kɛ mɛi krokomɛi ni tamɔ amɛ lɛ miikase Onesiforo. Eyɛ mli akɛ eyɛ weku ni eekwɛ moŋ, shi eye ebua Paulo.—2 Tim. 1:18.

11. Mɛni gbɛgbalɔi krɛdɛi tsuɔ?

¹¹ Be fɛɛ sɔɔmɔ lɛ fã kroko hu ji gbɛgbamɔ krɛdɛɛ nitsumɔ lɛ. Gbɛgbalɔi krɛdɛi babaoo kɛ aaafee ŋmɛlɛtswai 130 shiɛɔ daa  nyɔɔŋ. Amɛtsuɔ asafoŋ nitsumɔi krokomɛi hu. Akɛni amɛbɛ be tsɔ ni amɛkɛbaatsu heloonaa nitsumɔ hewɔ lɛ, nitsumɔhe nine lɛ hãa amɛ shika fioo ko daa nyɔɔŋ. Shika fioo nɛɛ yeɔ ebuaa amɛ ni amɛnyɛɔ amɛwoɔ amɛhe nyɔji, ni ehãa amɛnyɛɔ amɛnáa be babaoo kɛshiɛɔ.

12. Te asafoŋ onukpai kɛ mɛi krokomɛi aaafee tɛŋŋ aye abua gbɛgbalɔi krɛdɛi?

¹² Mɛni wɔbaanyɛ wɔfee kɛye wɔbua gbɛgbalɔi krɛdɛi? Asafoŋ onukpa ko ni tsuɔ nii yɛ nitsumɔhe nine ko, ní ekɛ gbɛgbalɔi krɛdɛi egba sane lɛ wie akɛ: “Esa akɛ asafoŋ onukpai lɛ kɛ amɛ agba sane, ni amɛle shihilɛ mli ni amɛyɔɔ, kɛkɛ lɛ amɛbaana bɔ ni amɛbaafee amɛye amɛbua amɛ. Odasefoi komɛi susuɔ akɛ akɛni ahãa gbɛgbalɔi krɛdɛi shika fioo ko hewɔ lɛ, amɛbɛ naagba, shi amɛsafoŋbii lɛ baanyɛ aye abua amɛ yɛ gbɛi pii anɔ.” Ni taakɛ eji yɛ daa gbɛgbalɔi agbɛfaŋ lɛ, kɛ́ nyɛmimɛi lɛ kɛ gbɛgbalɔi krɛdɛi lɛ tee shiɛmɔ lɛ, amɛnyaa he waa. Ani okɛ amɛ baaya shiɛmɔ?

13, 14. (a) Mɛni esa akɛ wɔhã ehi wɔjwɛŋmɔŋ yɛ kpokpaa nɔkwɛlɔi kɛ amɛŋamɛi ahe? (b) Mɛni obaanyɛ ofee kɛye obua kpokpaa nɔkwɛlɔi kɛ amɛŋamɛi?

¹³ Kpokpaa nɔkwɛlɔi kɛ amɛŋamɛi yɛ niiashikpamɔ kɛ hemɔkɛyeli ni mli wa, ni amɛwoɔ wɔ hewalɛ waa. Shi esaaa akɛ wɔhiɛ kpaa nɔ akɛ, amɛ hu hewalɛwoo he miihia amɛ. Amɛ hu amɛmiitao nyɛmimɛi ni amɛkɛbaatsu nii yɛ shiɛmɔ nitsumɔ lɛ mli. Kɛ́ nyɛmimɛi fɔ̃ amɛ nine ni amɛbajie amɛhiɛtserɛ lɛ, amɛnáa he miishɛɛ waa. Kɛ́ atsĩ kpokpaa nɔkwɛlɔ lɛ loo eŋa naa yɛ helatsamɔhe lɛ, wɔbaanyɛ wɔye wɔbua amɛ kɛtsɔ saramɔ ni wɔbaayasara amɛ kɛ nibii ni he hiaa amɛ ni wɔbaafee wɔhã amɛ lɛ nɔ. Luka, ni ji “tsofatsɛ ni asumɔɔ lɛ” ye ebua Paulo kɛ mɛi krokomɛi ni fata ehe kɛyasara asafoi srɔtoi lɛ.—Kol. 4:14; Bɔf. 20:5–21:18.

¹⁴ Kpokpaa nɔkwɛlɔi kɛ amɛŋamɛi sumɔɔ ni amɛná nanemɛi ni bɛŋkɛ amɛ kpaakpa ni baawo amɛ hewalɛ. Kpokpaa nɔkwɛlɔ ko wie akɛ: “Oookɛɛ nɔ ni minanemɛi lɛ le be ni hewalɛwoo he hiaa mi. Amɛbiɔ mi saji ní hãa minaa akɛ amɛsusuɔ mihe, ni no yeɔ ebuaa mi ni minyɛɔ migbaa amɛ minaagbai. Toi ní amɛfeɔ amɛhãa mi lɛ kɛkɛ po ji yelikɛbuamɔ kpele.” Kɛ́ nyɛmimɛi lɛ jie mɔhesusumɔ kpo, ni amɛkɛ kpokpaa nɔkwɛlɔ lɛ kɛ eŋa lɛ fee naanyo lɛ, amɛnyaa he waa.

15, 16. Mɛni hewɔ nitsumɔ ni Betelbii kɛ mɛi ni tsuɔ nii yɛ Kpee Asai anɔ lɛ tsuɔ lɛ he hiaa waa lɛ? Te wɔɔfee tɛŋŋ wɔye wɔbua amɛ?

¹⁵ Betelbii kɛ mɛi ni tsuɔ nii yɛ Kpee Asai anɔ lɛ tsuɔ nitsumɔ ko ni he hiaa waa, ni yeɔ ebuaa kɛhã sane kpakpa lɛ shiɛmɔ. Kɛ́ Betelbii yɛ osafo lɛ mli loo okpokpaa lɛ nɔ lɛ, mɛni obaafee kɛtsɔɔ akɛ okaiɔ amɛ?

¹⁶ Kɛ́ amɛba Betel klɛŋklɛŋ kwraa lɛ, amɛhe feɔ shoo, ni amɛhiɛ tseɔ amɛwekumɛi kɛ nanemɛi ni amɛshi yɛ sɛɛ lɛ. Mɛi hei ni eba Betel nɛɛ náa miishɛɛ waa kɛ́ Betelbii krokomɛi kɛ asafo hee ni amɛtee mli lɛ mli bii lɛ bɔ mɔdɛŋ akɛ amɛbaale amɛ jogbaŋŋ ní amɛtsɔmɔ amɛnanemɛi. (Mar. 10:29, 30) Betel nitsumɔ lɛ ŋmɛɔ Betelbii lɛ gbɛ ni amɛyaa asafoŋ kpeei kɛ shiɛmɔ daa otsi. Shi bei komɛi lɛ, Betelbii lɛ tsuɔ nibii krokomɛi kɛfataa nɔ ni amɛtsuɔ daa otsi lɛ he. Kɛ́ asafoi ni Betelbii lɛ yɔɔ mli lɛ nu enɛ shishi, ni amɛfee nibii ni tsɔɔ akɛ amɛhiɛ sɔɔ nɔ ni amɛtsuɔ lɛ, ehi jogbaŋŋ.—Nyɛkanea 1 Tesalonikabii 2:9.

17, 18. Mɛni be fɛɛ sɔɔlɔi ni sɔmɔɔ yɛ he ko ni jeee amɛmaŋ lɛ tsuɔ?

¹⁷ Ahãa be fɛɛ sɔɔlɔi komɛi yasɔmɔɔ yɛ he ko ni jeee amɛmaŋ. Ekolɛ ehe baahia ni amɛye niyenii ni amɛyeko dã, amɛkase wiemɔ kroko, ní amɛtsake amɛhe amɛwo shihilɛ ni yɔɔ he ni amɛtee lɛ mli. Mɛni be  fɛɛ sɔɔlɔi ni sɔmɔɔ yɛ he ko ni jeee amɛmaŋ lɛ tsuɔ?

¹⁸ Amɛteŋ mɛi komɛi sɔmɔɔ akɛ maŋsɛɛ sɔɔlɔi, ni amɛkɛ be babaoo shiɛɔ sane kpakpa lɛ. Amɛle bɔ ni ashiɛɔ ni atsɔɔ nii jogbaŋŋ, ni amɛtsɔɔ amɛsafoŋbii lɛ nibii ni amɛkase lɛ. Nitsumɔhe nine lɛ taoɔ he ko ni sa ehãa maŋsɛɛ sɔɔlɔi lɛ koni amɛhi jɛmɛ, ni ehãa amɛ shika fioo ní amɛkɛkwɛ amɛhe. Ahãa mɛi ni eshi amɛmaŋ nɛɛ ateŋ mɛi komɛi hu yasɔmɔɔ yɛ nitsumɔhe niji krokomɛi loo amɛyayeɔ amɛbuaa kɛmamɔɔ nitsumɔhe niji, ɔfisii ni wiemɔ shishitsɔɔlɔi baatsu nii yɛ mli, Kpee Asai, loo Maŋtsɛyeli Asai. Nitsumɔhe nine ni yɔɔ he ni amɛtee lɛ loo nyɛmimɛi ni yɔɔ jɛmɛ lɛ ni kwɛɔ amɛ, ni amɛhãa amɛ nibii tamɔ niyenii kɛ wɔɔhe. Nyɛmimɛi ni yeɔ amɛbuaa kɛmamɔɔ tsũi nɛɛ hu yaa asafoŋ kpeei kɛ shiɛmɔ daa otsi, taakɛ Betelbii lɛ feɔ lɛ. Asafoi ni nyɛmimɛi nɛɛ yɔɔ mli lɛ náa amɛniiashikpamɔi lɛ he sɛɛ jogbaŋŋ.

19. Mɛni obaafee kɛye obua be fɛɛ sɔɔlɔi ni eba amɛsɔmɔɔ yɛ omaŋ lɛ?

¹⁹ Mɛni obaafee kɛye obua be fɛɛ sɔɔlɔi ni eba amɛsɔmɔɔ yɛ omaŋ lɛ? Kaimɔ akɛ, kɛ́ amɛba klɛŋklɛŋ kwraa lɛ, ekolɛ amɛleŋ bɔ ni ayeɔ niyenii ni yɔɔ omaŋ lɛ mli lɛ ekomɛi. No hewɔ lɛ, kɛ́ oofɔ̃ amɛ nine ní amɛbaye nii lɛ, obaanyɛ otsɔ hiɛ obi amɛ kɛji amɛbaasumɔ ni amɛka niyenii ko ni amɛyeko dã loo ní amɛtsɔɔ bo nɔ ni amɛsumɔɔ. Kɛ́ amɛmiibɔ mɔdɛŋ amɛkase omaŋ wiemɔ kɛ nyɛkusum lɛ, ekolɛ amɛnaŋ lɛ mlɛo. No hewɔ lɛ, ná tsui ohã amɛ ni oye obua amɛ fiofio. Ejaakɛ amɛmiisumɔ ni amɛkase!

20. Mɛɛ gbɛ nɔ wɔbaanyɛ wɔye wɔbua be fɛɛ sɔɔlɔi kɛ amɛfɔlɔi?

²⁰ Be ni be shwieɔ mli lɛ, ehe baahia ni be fɛɛ sɔɔlɔi ni eshi amɛmaŋ lɛ akpɛ amɛyiŋ yɛ bɔ ni amɛbafee amɛkwɛ amɛfɔlɔi ni daraa yɛ afii amli lɛ he. Bei pii lɛ, kɛ́ amɛfɔlɔi ji Odasefoi lɛ, amɛbaasumɔ ni amɛbii lɛ aya nɔ asɔmɔ. (3 Yoh. 4) Eji anɔkwale akɛ, be fɛɛ sɔɔlɔi baabɔ mɔdɛŋ fɛɛ ni amɛbaanyɛ kɛkwɛ amɛfɔlɔi, ni amɛbaasara amɛ yɛ be kɛ beaŋ. Shi mɛi ni yɔɔ he ni fɔlɔi lɛ yɔɔ lɛ hu baanyɛ aye abua be fɛɛ sɔɔlɔi lɛ. Amɛbaanyɛ amɛye amɛbua fɔlɔi lɛ kɛ́ ehe bahia. Esaaa akɛ wɔhiɛ kpaa nɔ akɛ be fɛɛ sɔɔlɔi lɛ kɛ amɛdeka fɛɛ miiye kɛmiibua koni ashiɛ sane kpakpa lɛ, ni ji nitsumɔ ni he hiaa fe fɛɛ yɛ shikpɔŋ lɛ nɔ lɛ. (Mat. 28:19, 20) Ani obaanyɛ okai be fɛɛ sɔɔlɔi lɛ kɛtsɔ amɛfɔlɔi ni oooye obua lɛ nɔ?

21. Kɛ́ mɛi krokomɛi wo mɛi ni yɔɔ be fɛɛ sɔɔmɔ lɛ mli lɛ hewalɛ, ni amɛye amɛbua amɛ lɛ, te be fɛɛ sɔɔlɔi lɛ nuɔ he amɛhãa tɛŋŋ?

²¹ Mɛi babaoo tsuɔ nii waa koni amɛtsɔmɔ niiatsɛmɛi. Shi mɛi ni kɛ amɛhe ewo be fɛɛ sɔɔmɔ nitsumɔ lɛ mli lɛ tsuɔ nii waa, ejaakɛ amɛmiisumɔ ni amɛkɛ amɛnyɛmɔ fɛɛ asɔmɔ Yehowa ní amɛye amɛbua mɛi krokomɛi. No hewɔ lɛ, amɛhiɛ sɔɔ nɔ fɛɛ nɔ ni mɛi feɔ kɛyeɔ amɛbuaa amɛ lɛ waa. Nyɛmi yoo ko ni yɔɔ be fɛɛ sɔɔmɔ lɛ mli, ni miisɔmɔ yɛ he ko ni jeee emaŋ lɛ wie akɛ: “Kɛ́ mɔ ko ŋma wolo kɛtsɔɔ akɛ ehiɛ sɔɔ nɔ ni otsuɔ lɛ, no po kɛkɛ hãa onaa akɛ asusuɔ ohe, ni mɛi yɛ nɔ ni otsuɔ lɛ he miishɛɛ.”

22. Te onaa be fɛɛ sɔɔmɔ nitsumɔ lɛ ohãa tɛŋŋ?

²² Mɛi ni tsuɔ be fɛɛ sɔɔmɔ nitsumɔ lɛ náa miishɛɛ waa, ni amɛtsui nyɔɔ amɛmli hu. Enɛ ji shihilɛ gbɛ ni hi fe fɛɛ ŋmɛnɛ. Be fɛɛ sɔɔlɔi lɛ kaseɔ nibii ni baaye abua amɛ kɛ mɛi krokomɛi ŋmɛnɛ kɛ agbɛnɛ hu, yɛ jeŋ hee lɛ mli. Etsɛŋ Yehowa tsuji fɛɛ baatsu nitsumɔ ni hãa mɔ tsui nyɔɔ emli gbi fɛɛ gbi. No hewɔ lɛ, nyɛhãa wɔyaa nɔ wɔkaia be fɛɛ sɔɔlɔi lɛ ‘ahemɔkɛyeli nitsumɔ kɛ amɛsuɔmɔ mɔdɛŋbɔɔ lɛ.’—1 Tes. 1:3.