1, 2. Mɛɛ su Yehowa tsuji ejie lɛ kpo kɛjɛ blema kɛbashi ŋmɛnɛ?

KƐ́ YEHOWA gba akɛ nɔ ko baaba lɛ, etsuji yaa nɔ amɛmɛɔ kɛyashi nɔ ni egba lɛ baaba mli. Akɛ nɔkwɛmɔnɔ lɛ, be ni Yehowa gba akɛ Babilonbii lɛ baaba amɛbakpãtã Yuda maŋ lɛ hiɛ lɛ, Yeremia to etsui shi emɛ aahu kɛyashi nakai gbalɛ lɛ ba mli yɛ afi 607 D.Ŋ.B. (Yeremia 25:8-11) Be ni Yesaia gba akɛ Yehowa baahã Yudafoi ni aŋɔ amɛ nom lɛ aku sɛɛ kɛba Yuda lɛ, ewie akɛ: “Ajɔɔ mɛi fɛɛ ní mɛɔ [Yehowa] lɛ!” (Yesaia 30:18) Mika hu mɛ Yehowa, ejaakɛ ená nɔmimaa akɛ, Yehowa baaye eshiwoi lɛ anɔ. Ewie akɛ: “Makwɛ Yehowa gbɛ.” (Mika 7:7) Be ni Nyɔŋmɔ wo shi akɛ Mesia lɛ loo Kristo lɛ baaba lɛ, etsuji kɛ afii ohai abɔ tee nɔ amɛkpa Mesia lɛ gbɛ.—Luka 3:15; 1 Petro 1:10-12. * (Kwɛmɔ shishigbɛ niŋmaa lɛ.)

² Ŋmɛnɛ lɛ, wɔ hu wɔmiimɛ ni gbalɛi komɛi ni kɔɔ Yehowa Maŋtsɛyeli lɛ he lɛ aba mli. Etsɛŋ, Yesu, ni ji nakai  Maŋtsɛyeli lɛ nɔ Maŋtsɛ lɛ, baakpɔ̃ Nyɔŋmɔ tsuji kɛjɛ jeŋ ni bɛ shweshweeshwe nɛɛ mli. Ebaakpãtã mɛi fɔji ahiɛ, ni ebaahã nɔnaa fɛɛ sɛɛ afo. (1 Yohane 5:19) Yehowa gbi lɛ baanyɛ aba be fɛɛ be, no hewɔ lɛ, esa akɛ wɔhã wɔhiɛ ahi wɔhe nɔ, ni wɔsaa wɔhe jogbaŋŋ wɔto nakai gbi lɛ.

3. Kɛji wɔkɛ afii pii emɛ naagbee lɛ, mɛni ekolɛ wɔbaabi wɔhe?

³ Wɔkɛ miishɛɛ miikpa be ni abaafee Nyɔŋmɔ suɔmɔnaa nii yɛ shikpɔŋ lɛ nɔ lɛ gbɛ. (Mateo 6:10) Shi, kɛji wɔkɛ afii pii emɛ naagbee lɛ, ekolɛ wɔbaabi wɔhe akɛ, ‘Mɛni hewɔ esa akɛ maya nɔ makpa gbɛ akɛ etsɛŋ ni naagbee lɛ baaba lɛ?’

4. Mɛni hewɔ ehe miihia ni ‘wɔya nɔ wɔbu’ lɛ?

⁴ Yesu fã esɛɛnyiɛlɔi lɛ ni ‘amɛya nɔ amɛbu’ ni ‘amɛshi kpe.’ Enɛ hewɔ lɛ, ehe miihia ni wɔhã ehi wɔjwɛŋmɔŋ be fɛɛ be akɛ, etsɛŋ ni naagbee lɛ baaba. (Mateo 24:42; Luka 21:34-36) Agbɛnɛ hu, Yehowa gbɛjianɔtoo lɛ kaiɔ wɔ be fɛɛ be akɛ, ‘wɔmɛ’ Yehowa gbi lɛ, wɔhã ‘ebaa lɛ ahi wɔjwɛŋmɔ mli jogbaŋŋ,’ ni wɔkɛ wɔjwɛŋmɔ ama jeŋ hee ni ewo shi akɛ ekɛbaaba lɛ nɔ.—Kanemɔ 2 Petro 3:11-13.

5. Mɛɛ yiŋtoo kroko hewɔ esa akɛ wɔmɛ Yehowa gbi lɛ?

⁵ Kɛ́ ehe bahia ni Yesu sɛɛnyiɛlɔi ni hi shi yɛ klɛŋklɛŋ afii 100 lɛ mli lɛ amɛ Yehowa gbi lɛ, belɛ esa akɛ wɔhã wɔhiɛ ahi nakai gbi lɛ nɔ waa fe amɛ po. Mɛni hewɔ? Ejaakɛ kɛjɛ afi 1914 kɛbaa nɛɛ, wɔna nibii ni Yesu wie akɛ nomɛi baatsɔɔ akɛ wɔyɛ “shihilɛ gbɛjianɔtoo lɛ naagbee gbii lɛ” amli, ni akɛ awo lɛ Nyɔŋmɔ Maŋtsɛyeli lɛ nɔ Maŋtsɛ lɛ. Akɛ nɔkwɛmɔnɔ lɛ, taakɛ Yesu gba lɛ, je lɛŋ shihilɛ efite kwraa, ni eeya nɔ eefite lolo. Agbɛnɛ hu, aashiɛ Maŋtsɛyeli lɛ he sane kpakpa lɛ yɛ shikpɔŋ lɛ nɔ fɛɛ. (Mateo 24:3, 7-14) Yesu etsɔɔɔ afii abɔ ni naagbee gbii lɛ baaye, no hewɔ lɛ, esa akɛ wɔsaa wɔhe wɔto naagbee lɛ, ejaakɛ wɔleee be ni ebaaba.

6. Mɛni hewɔ wɔheɔ wɔyeɔ akɛ, dani naagbee lɛ baaba lɛ, je lɛŋ shihilɛ baafite kwraa fe bɔ ni eji bianɛ lɛ po?

⁶ Ani eeenyɛ efee akɛ, “shihilɛ gbɛjianɔtoo lɛ naagbee gbii lɛ” kɔɔ wɔsɛɛ be ko be ni nibii baafite kwraa fe bɔ ni eji bianɛ lɛ he? Biblia lɛ hãa wɔleɔ akɛ, yɛ “naagbee gbii lɛ amli lɛ,” efɔŋfeemɔ mli baawo wu. (2 Timoteo 3:1, 13; Mateo 24:21; Kpojiemɔ 12:12) No hewɔ lɛ, eyɛ mli akɛ je lɛŋ shihilɛ efite waa moŋ, shi wɔle akɛ emli baawo wu fe nɛkɛ po.

7. Mɛni Mateo 24:37-39 lɛ hãa wɔleɔ yɛ bɔ ni je lɛŋ shihilɛ baafee yɛ naagbee gbii lɛ amli lɛ he?

⁷ Mɛi komɛi susuɔ akɛ, dani “amanehulu kpeteŋkpele lɛ” baafɛ lɛ, abaawu ta yɛ maŋ fɛɛ maŋ nɔ, helai baagbɛ ashwã he fɛɛ he, ni hɔmɔ baaye wɔ fɛɛ. (Kpojiemɔ 7:14) Shi kɛ́ nakai ebaaba lɛ lɛɛlɛŋ lɛ, kulɛ mɔ fɛɛ mɔ baana akɛ, nɔ ni Biblia lɛ egba lɛ ni baa mli lɛ, ni mɛi ni heee nɔ ni Biblia lɛ ewie lɛ amɛyeee lɛ po baana akɛ, naagbee lɛ eshɛ etã. Kaimɔ akɛ, Yesu wie akɛ, mɛi pii ‘ajwɛŋmɔ eyaŋ nɔ’ akɛ naagbee gbii lɛ amli wɔyɔɔ lɛ. Amɛbaahi shi tamɔ nɔ ni nɔ fɛɛ nɔ miiya nɔ pɛpɛɛpɛ, ni Yehowa gbi lɛ baabati amɛ shi trukaa. (Kanemɔ Mateo 24:37-39.) No hewɔ lɛ, esaaa akɛ wɔkpaa gbɛ akɛ, dani “amanehulu kpeteŋkpele lɛ” baaba lɛ, je lɛŋ shihilɛ  baafite kwraa bɔ ni mɛi fɛɛ baana akɛ naagbee lɛ eshɛ etã.—Luka 17:20; 2 Petro 3:3, 4.

8. Akɛni wɔhiɛ yɛ nibii ni Yesu tsɔɔ akɛ nomɛi baakadi naagbee gbii lɛ anɔ hewɔ lɛ, mɛɛ nɔmimaa wɔyɔɔ?

⁸ Yesu tsɔɔ nibii ni baakadi naagbee gbii lɛ, koni kɛ́ nakai be lɛ shɛ lɛ, esɛɛnyiɛlɔi lɛ anyɛ ayɔse faŋŋ, ejaakɛ amɛji mɛi ni baakpa nakai be lɛ gbɛ. (Mateo 24:27, 42) Kɛjɛ afi 1914 kɛbaa nɛɛ, wɔmiina nibii ni Yesu wie lɛ. Enɛ hewɔ lɛ, wɔyɛ nɔmimaa akɛ, “shihilɛ gbɛjianɔtoo lɛ naagbee gbii lɛ” amli wɔyɔɔ lɛ. Yehowa eto be ni ekɛbaakpãtã Satan jeŋ fɔŋ nɛɛ hiɛ lɛ momo.

9. Mɛni hewɔ esa akɛ wɔya nɔ wɔkpa gbɛ akɛ etsɛŋ ni naagbee lɛ baaba lɛ?

⁹ No hewɔ lɛ, mɛni hewɔ esa akɛ wɔya nɔ wɔkpa gbɛ akɛ etsɛŋ ni naagbee lɛ baaba lɛ? Klɛŋklɛŋ lɛ, Yesu Kristo kɛɛ wɔfee nakai, ni esa akɛ wɔbo lɛ toi. Agbɛnɛ hu, wɔmiina nibii ni Yesu tsɔɔ akɛ nomɛi baahã wɔna akɛ wɔyɛ naagbee gbii lɛ amli lɛ. Jeee nɔ fɛɛ nɔ ni wɔnuɔ lɛ wɔheɔ wɔyeɔ. Shi, wɔheɔ wɔyeɔ akɛ naagbee lɛ ebɛŋkɛ, ejaakɛ wɔna nibii ni tsɔɔ faŋŋ akɛ nɔ ni Biblia lɛ ewie yɛ nɛkɛ be nɛɛ he lɛ miiba mli. Esa akɛ wɔhã wɔhiɛ ahi wɔhe nɔ, ni wɔsaa wɔhe wɔto naagbee lɛ.

10, 11. (a) Mɛni hewɔ Yesu kɛɛ ekaselɔi lɛ akɛ ‘amɛya nɔ amɛbu lɛ’? (b) Mɛni Yesu kɛɛ esɛɛnyiɛlɔi lɛ akɛ amɛfee kɛ́ amɛnu he akɛ naagbee lɛ sɛɛ miigbala shi? (Kwɛmɔ mfoniri ni yɔɔ nikasemɔ lɛ shishijee lɛ.)

¹⁰ Wɔteŋ mɛi babaoo kɛ afii pii etee nɔ eye Yehowa anɔkwa, ni wɔkɛ miishɛɛ ekpa egbi lɛ gbɛ. Shi ekɔɔɔ he eko afii abɔ ni wɔkɛmɛ nakai gbi lɛ, esa akɛ wɔya nɔ wɔkpa gbɛ akɛ etsɛŋ ni ebaaba. Esa akɛ wɔhiɛ ahi wɔhe nɔ, bɔ ni afee ni kɛ́ Yesu ba koni ebakpãtã Satan je lɛ hiɛ lɛ, ekabati wɔ shi trukaa. Kaimɔ nɔ ni Yesu kɛɛ esɛɛnyiɛlɔi lɛ. Ekɛɛ amɛ akɛ: “Nyɛyaa nɔ nyɛkwɛa, nyɛyaa nɔ nyɛshia kpe, ejaakɛ nyɛleee be ni ato lɛ. Etamɔ nuu ko ni miifã gbɛ ni eshi eshĩa, ni ehã enyɔji lɛ hegbɛ yɛ nɔ, ni ehã mɔ fɛɛ mɔ enitsumɔ, ni efã shinaanaakwɛlɔ lɛ akɛ eya nɔ ebu. No hewɔ lɛ, nyɛyaa nɔ nyɛbua, ejaakɛ nyɛleee gbi nɔ ni shĩa lɛ nuŋtsɔ lɛ baaba, gbɛkɛ jio, nyɔɔŋteŋ jio, maŋkɛ jio loo leebi maŋkpa jio, bɔ ni afee ni kɛ́ eba trukaa lɛ, ekabana nyɛ akɛ nyɛmiiwɔ. Shi nɔ ni mikɛɔ nyɛ nɛɛ, mɛi fɛɛ mikɛɔ lɛ: Nyɛyaa nɔ nyɛbua.”—Marko 13:33-37.

¹¹ Be ni Yesu sɛɛnyiɛlɔi lɛ yɔse akɛ awo lɛ Maŋtsɛ yɛ afi 1914 lɛ, amɛna akɛ naagbee lɛ baanyɛ aba be fɛɛ be. No hewɔ lɛ, amɛsaa amɛhe amɛto nakai gbi lɛ kɛtsɔ ekãa babaoo ni amɛkɛtsu shiɛmɔ nitsumɔ lɛ nɔ. Shi Yesu wie akɛ, ekolɛ ebaaba “maŋkɛ” loo “leebi maŋkpa.” Kɛ́ nakai beiaŋ ebaaba lɛ, belɛ mɛni ehe baahia ni esɛɛnyiɛlɔi lɛ afee? Yesu kɛɛ amɛ akɛ: “Nyɛyaa nɔ nyɛbua.” No hewɔ lɛ, kɛ́ wɔnuɔ he akɛ wɔmɛ naagbee lɛ afii babaoo po lɛ, no etsɔɔɔ akɛ naagbee lɛ náko aba aloo ebaŋ yɛ wɔwala beiaŋ.

12. Mɛni Habakuk bi Yehowa? Ni mɛɛ hetoo ehã lɛ?

 ¹² Gbalɔ Habakuk to etsui shi emɛ Yehowa be ni eshiɛɔ Yerusalem hiɛkpatamɔ lɛ. Be ni ebɔi shiɛmɔ lɛ, no mli lɛ gbalɔi krokomɛi kɛ afii pii ejaje nakai sane lɛ momo. Habakuk na akɛ efɔŋfeemɔ kɛ jalɛsane ni ayeee mli ewo wu. No hewɔ lɛ, ekpa Yehowa fai ni eye ebua lɛ. Ebi akɛ: “Yehowa, mɛɛ beyinɔ nɔŋŋ mabolɔ kɛyashi?” Eyɛ mli akɛ Yehowa etsɔɔɔ Habakuk be ni ebaakpãtã Yerusalem hiɛ moŋ, shi ewo lɛ shi akɛ, “ekpeŋ sɛɛ!” Yehowa kɛɛ lɛ akɛ: “Mɛɛ lɛ kɛ̃.”—Kanemɔ Habakuk 1:1-4; 2:3.

13. Mɛɛ jwɛŋmɔ kulɛ Habakuk baanyɛ aná? Ni mɛni hewɔ kulɛ enɛ baafee oshara kɛhã lɛ lɛ?

¹³ Kulɛ, Habakuk baanyɛ anu he akɛ enyɛɛɛ emɛ gbi lɛ dɔŋŋ, ní ewie akɛ: ‘Mikɛ afii babaoo emɛ Yerusalem hiɛkpatamɔ lɛ. Naagbee lɛ náko aba. Ehe ehiaaa ni maya nɔ mashiɛ; esa akɛ mashi nakai nitsumɔ lɛ mahã mɛi krokomɛi.’ Eji efee nakai kulɛ, mɛni baaba? Kulɛ, Yehowa náŋ ehe miishɛɛ dɔŋŋ, Yerusalem hiɛkpatamɔ lɛ baabati lɛ shi trukaa, ni ekolɛ, ewala po baaŋmɛɛ lɛ.

14. Mɛni hewɔ wɔbaada Yehowa shi akɛ ebɔ wɔ kɔkɔ ni wɔya nɔ wɔmɛ naagbee lɛ?

¹⁴ Feemɔ he mfoniri ni nibii ni Yehowa ewie yɛ naagbee gbii lɛ ahe lɛ fɛɛ eba mli pɛpɛɛpɛ, ni oyashɛ jeŋ hee lɛ mli. Ani nibii ni ona lɛ hãŋ hemɔkɛyeli ni oyɔɔ yɛ Yehowa mli lɛ mli awa, ni okɛ ohiɛ afɔ̃ enɔ akɛ, ebaatsu nibii krokomɛi fɛɛ ni ewo he shi lɛ ahe nii? (Kanemɔ Yoshua 23:14.) Nakai gbi lɛ, obaada Yehowa shi waa akɛ, ehã naagbee lɛ ba yɛ be ni eto lɛ naa, ni akɛ ebɔ ewebii lɛ kɔkɔ ni amɛya nɔ amɛkpa nakai gbi lɛ gbɛ.—Bɔfoi 1:7; 1 Petro 4:7.

15, 16. Mɛni hewɔ esa akɛ wɔkɛ wɔhewalɛ fɛɛ atsu shiɛmɔ nitsumɔ lɛ yɛ naagbee gbii nɛɛ amli lɛ?

¹⁵ Yehowa asafo lɛ baaya nɔ akai wɔ ni wɔhã Yehowa sɔɔmɔ lɛ afee nɔ ni he hiaa wɔ fe fɛɛ yɛ shihilɛ mli. Kaimɔi nɛɛ baaye abua wɔ ni wɔkɛ ekãa asɔmɔ Nyɔŋmɔ, ni wɔna akɛ, sane ni wɔshiɛɔ lɛ he hiaa waa. Nibii ni Yesu wie akɛ nomɛi baatsɔɔ akɛ wɔyɛ naagbee gbii lɛ amli lɛ miiya nɔ ŋmɛnɛ, no hewɔ lɛ, wɔyɛ nɔmimaa akɛ, etsɛŋ kwraa ni naagbee lɛ baaba. Enɛ hewɔ lɛ, wɔkɛ Yehowa yeɔ klɛŋklɛŋ gbɛhe yɛ wɔshihilɛ mli, ni wɔyaa nɔ wɔshiɛɔ Maŋtsɛyeli lɛ he sane kpakpa lɛ.—Mateo 6:33; Marko 13:10.

 ¹⁶ Kɛ́ wɔshiɛ sane kpakpa lɛ wɔtsɔɔ mɛi lɛ, wɔmiiye wɔmiibua amɛ ni amɛje hiɛkpatamɔ ni etsɛŋ ebaaba Satan jeŋ fɔŋ nɛɛ nɔ lɛ mli. Yɛ afi 1945 lɛ, meele ko ni atsɛɔ lɛ Wilhelm Gustloff lɛ shiu. Mɛi akpei abɔ gboi yɛ oshara nɛɛ, ni ji ŋshɔ hiɛ osharai ni yɔɔ gbeyei waa lɛ ateŋ ekome lɛ mli. Nyɛmi yoo ko kɛ ewu fata mɛi ni je oshara nɛɛ mli shweshweeshwe lɛ ahe. Ewie akɛ be ni meele lɛ shiuɔ lɛ, yoo ko bɔi bolɔmɔ akɛ: “Mipɔtomatoi lɛ ee ei! Mipɔtomatoi lɛ ee ei! Ao, mijwinei lɛ! Mijwinei lɛ fɛɛ eka tsũ lɛ mli yɛ shishi lɛ. Migbe mijeŋ naa!” Shi mɛi krokomɛi ni yɔɔ meele lɛ mli lɛ yɔse akɛ, nɔ ni he hiaa fe fɛɛ yɛ nakai be lɛ mli ji, ni amɛbaaye amɛbua mɛi ni wala eyaje oshara mli lɛ. Ŋmɛnɛ hu lɛ, mɛi awala eyaje oshara mli. Taakɛ mɛi ni yɔɔ meele lɛ mli, ni ye bua mɛi krokomɛi ni wala eyaje oshara mli lɛ fee lɛ, wɔ hu wɔmiisumɔ ni wɔkɛ wɔjwɛŋmɔ fɛɛ ama bɔ ni shiɛmɔ nitsumɔ lɛ he hiaa lɛ nɔ, ni wɔfee nɔ fɛɛ nɔ ni wɔbaanyɛ kɛye wɔbua mɛi, koni amɛje jeŋ fɔŋ nɛɛ hiɛkpatamɔ lɛ mli.

17. Mɛni hewɔ esa akɛ wɔhe wɔye akɛ naagbee lɛ baanyɛ aba be fɛɛ be lɛ?

¹⁷ Nɔ fɛɛ nɔ miitsɔɔ akɛ nɔ ni Biblia lɛ ewie lɛ miiba mli, ni jeŋ fɔŋ nɛɛ naagbee ebɛŋkɛ kpaakpa. Amrɔ nɛɛ, wɔmiimɛ ni “akolontoi nyɔŋma” lɛ kɛ “kooloo awuiyelɔ lɛ” atutua Babilon Kpeteŋkpele lɛ, ni ji amale jamɔi  fɛɛ ni yɔɔ je lɛ mli lɛ. (Kpojiemɔ 17:16) Wɔkasusu kɔkɔɔkɔ akɛ nɔ ni atsɔɔ nɛɛ náko aba. Esaaa akɛ wɔhiɛ kpaa nɔ akɛ, Nyɔŋmɔ ji mɔ ni ‘kɛbaawo amɛtsuiiaŋ’ akɛ amɛtutua amale jamɔ, ni akɛ ebaanyɛ efee enɛ be fɛɛ be ni esumɔɔ, kɛ́ ŋmɛnɛ po! (Kpojiemɔ 17:17) Etsɛŋ kwraa, abaakpãtã Satan jeŋ fɔŋ nɛɛ hiɛ. No hewɔ lɛ, nyɛhãa wɔboa Yesu kɔkɔbɔɔ lɛ toi, akɛ: “Nyɛhiɛ ahia nyɛhe nɔ koni fufeemɔ kɛ dãanumɔ babaoo kɛ shihilɛ mli yeyeeyefeemɔi akahe nyɛtsuii ni nakai gbi lɛ bati nyɛ shi trukaa tamɔ tsɔne.” (Luka 21:34, 35; Kpojiemɔ 16:15) Nyɛhãa wɔtswaa wɔfai shi akɛ, wɔbaahã wɔhiɛ ahi wɔhe nɔ, ni wɔkɛ wɔnyɛmɔ fɛɛ asɔmɔ Yehowa, ejaakɛ wɔle akɛ, ebaahere ‘mɛi ni hiɛ kã enɔ lɛ’ ayiwala.—Yesaia 64:3.

18. Mɛɛ sanebimɔ he wɔbaasusu yɛ nikasemɔ ni nyiɛ sɛɛ lɛ mli?

¹⁸ Be ni wɔmɛɔ ni Yehowa akpãtã jeŋ fɔŋ nɛɛ hiɛ lɛ, esa akɛ wɔbo ŋaa ni kaselɔ Yuda wo lɛ toi, akɛ: “Mɛi ni asumɔɔ, nyɛ lɛ, nyɛtswaa nyɛhe nyɛmaa nyɛhemɔkɛyeli ni yɔɔ krɔŋkrɔŋ fe fɛɛ lɛ nɔ, ni nyɛsɔlea yɛ mumɔ krɔŋkrɔŋ lɛ kɛ gbeekpamɔ naa, bɔ ni afee ni nyɛya nɔ nyɛhi Nyɔŋmɔ suɔmɔ lɛ mli, be mli ni nyɛmɛɔ wɔ-Nuŋtsɔ Yesu Kristo mɔbɔnalɛ ní baahã nyɛná naanɔ wala lɛ.” (Yuda 20, 21) Shi mɛni wɔbaanyɛ wɔfee kɛtsɔɔ akɛ wɔmiimɛ Nyɔŋmɔ jeŋ hee lɛ, wɔmiikpa lɛ gbɛ waa, ni wɔle akɛ etsɛŋ ebaaba? Wɔbaasusu sanebimɔ nɛɛ he yɛ nikasemɔ ni nyiɛ sɛɛ lɛ mli.