GBI ko lɛ, mimami bi mi akɛ: “Mɛni hewɔ osumɔɔɔ ni ojáa oblematsɛmɛi lɛ? Ani oleee akɛ amɛ amɛhã bo wala? Mɛni hewɔ otaoɔ ofee amɛnɔ otrumu? Blema kpãa nɔ atsaa, shi bo lɛ osumɔɔɔ ni ofeɔ nakai. Kɛ́ owooo wɔblematsɛmɛi lɛ ahiɛ nyam lɛ, belɛ ootao otsɔɔ akɛ, wɔjamɔ lɛ jwɛŋmɔ bɛ mli.” Be ni Awo wie enɛ egbe naa lɛ, ejwa yaafo.

Mimami mli fuko mi nakai dã, ejaakɛ miboɔ lɛ toi be fɛɛ be. Shi nɔ ni ba ji akɛ, nyɔji fioo komɛi dani sane nɛɛ baaba lɛ, Yehowa Odasefoi ba wɔŋɔɔ, ni amɛkɛɛ amɛkɛ lɛ baakase Biblia lɛ. Esumɔɔɔ ni amɛkɛ lɛ kaseɔ nii lɛ, shi akɛni ehiɛ miigbo amɛ hewɔ lɛ, ehã amɛkɛ mi moŋ bɔi nikasemɔ. Nikasemɔ lɛ hã mibana akɛ, kɛ́ mijá miblematsɛmɛi lɛ, Yehowa naŋ miishɛɛ. Enɛ hewɔ lɛ, minyɛɛɛ mabo mimami toi yɛ sane nɛɛ mli. Mináaa lɛ mlɛo kwraa, shi Yehowa waje mi.

Buddhabii pii yɛ Japan, ni wɔweku lɛ hu fata he. Shi be ni mikɛ Yehowa Odasefoi kase nii nyɔji enyɔ pɛ lɛ, mina akɛ nɔ ni Biblia lɛ wieɔ lɛ ji anɔkwale. Nikasemɔ lɛ hã mina akɛ, miyɛ Tsɛ yɛ ŋwɛi, ni mishwe waa ni male lɛ jogbaŋŋ. Yɛ shishijee mli lɛ, migbaa Awo nibii ni mikaseɔ lɛ, ni enáa he miishɛɛ waa. Mibɔi asafoŋ kpeei yaa Hɔgbaa. Be ni mikase nii lɛ kɛshɛ he ko lɛ, mikɛɛ Awo akɛ mikɛ mihe woŋ Buddha jamɔ lɛ mli dɔŋŋ. Enɛ hã emli fu. Ekɛɛ mi akɛ, “Eji hiɛgbejiasane akɛ mɔ ko baahi wɔweku lɛ mli ni esumɔɔɔ wɔblematsɛmɛi lɛ.” Ekɛɛ mi akɛ mikpa Biblia lɛ kasemɔ kɛ asafoŋ kpeei yaa. Mikpaaa gbɛ kwraa akɛ mimami baawie nɔ ko nakai! Anɔkwa, ehe fee mi naakpɛɛ waa.

Mipapa kpɛlɛ nɔ ni mimami wie lɛ nɔ. No mli lɛ, mikane yɛ Efesobii yitso 6 lɛ mli akɛ, Yehowa miisumɔ ni mabo mifɔlɔi atoi. Miisumɔ ni toiŋjɔlɛ ahi wɔweku lɛ mli, ni misusu akɛ kɛ́ mibo amɛ toi lɛ, wɔsɛɛ lɛ, amɛ hu amɛbaanu mi shishi. Nakai beiaŋ lɛ, miisaa mihe kɛhã skul kaa ko, no hewɔ lɛ, mikpɛ miyiŋ akɛ mabo mifɔlɔi lɛ atoi, ni makpa asafoŋ kpeei yaa nyɔji etɛ. Shi miwo Yehowa shi akɛ, kɛ́ nyɔji etɛ lɛ shɛ pɛ, mabɔi yaa ekoŋŋ.

Yiŋ ni mikpɛ nɛɛ ehiii yɛ yiŋtoi enyɔ ahewɔ. Klɛŋklɛŋ lɛ, miyasusu akɛ suɔmɔ ni miyɔɔ kɛhã Yehowa sɔɔmɔ lɛ he ejɔŋ yɛ nakai nyɔji etɛ lɛ amli. Shi eyeee be ko kwraa ni wekukpaa ni yɔɔ mi kɛ lɛ teŋ lɛ mli gbɔjɔ. Nɔ ni ji enyɔ lɛ, yɛ nɔ najiaŋ ni Awo kɛ Ataa baanu mi shishi lɛ, amɛnyɛ minɔ waa moŋ koni mikɛ Yehowa afo tako mli.

Be ni miyaa asafoŋ kpeei lɛ, mikɛ nyɛmimɛi pii ni amɛwekumɛi ete shi ewo amɛ lɛ kpe. Amɛwo mi hewalɛ, ni amɛkɛɛ mi akɛ Yehowa  baawaje mi. (Mateo 10:34-37) Amɛhã mile akɛ, kɛ́ mitee nɔ miye Yehowa anɔkwa lɛ, ekolɛ no nɔ baatsɔ ni miweku lɛ hu baaba anɔkwale lɛ mli. Mikpɛ miyiŋ akɛ mikɛ mihiɛ baafɔ̃ Yehowa nɔ, no hewɔ lɛ mibɔi sɔlemɔ kɛ hiɛdɔɔ.

Mifɔlɔi te shi amɛwo mi yɛ gbɛi srɔtoi anɔ. Awo kpa mi fai ni makpa Biblia lɛ kasemɔ, ni ebɔ mɔdɛŋ akɛ ebaakɔne miyiŋ ni maŋmɛɛ mihemɔkɛyeli lɛ he. Bei pii kɛ́ eewie lɛ, mifeɔ diŋŋ. Shi bei komɛi hu lɛ, mijieɔ naa. Ni kɛ́ eba lɛ nakai lɛ, eyafeɔ naataamɔ, ejaakɛ wɔ fɛɛ wɔmiitao wɔtsɔɔ akɛ wɔsane ja. Bianɛ lɛ miina akɛ, eji miná tsui mihã Awo ni minu lɛ shishi yɛ bɔ ni enuɔ he ehãa kɛ nibii ni eheɔ eyeɔ lɛ ahewɔ kulɛ, nibii amli eshiŋ nakai. Mifɔlɔi loo shĩa nitsumɔi pii amɛshwie minɔ, bɔ ni afee ni mikanyɛ mije kpo. Bei komɛi lɛ, amɛhãaa mi niyenii, loo be ni maku misɛɛ maba shĩa lɛ, amɛŋmɛ shinaa lɛ mli.

Awo kɛɛ mɛi ni amɛye amɛbua lɛ ni etsake mijwɛŋmɔ. Ekɛ sane lɛ yafɔ̃ miskul tsɔɔlɔ lɛ hiɛ, shi nibii anaa eyakpaaa bɔ ni etaoɔ. No hewɔ lɛ, ekɛ mi tee enitsumɔtsɛ lɛ ŋɔɔ, koni enitsumɔtsɛ lɛ akɔne miyiŋ ni makpɛlɛ nɔ akɛ jamɔi fɛɛ ehiii, akɛ ja Buddha jamɔ lɛ pɛ. Bei komɛi lɛ, etswaa wɔwekumɛi lɛ, ni efoɔ eshwieɔ amɛnɔ akɛ amɛye amɛbua lɛ. Enɛ wo mimli la waa. Shi asafoŋ onukpai lɛ ye amɛbua mi. Kɛ́ mitee asafoŋ kpeei lɛ, amɛkaiɔ mi akɛ, be fɛɛ be ni mimami baawie sane lɛ he etsɔɔ mɔ ko lɛ, eeye mɔ lɛ odase.

Ekã mifɔlɔi atsui nɔ waa akɛ amɛkɛ mi baaya yunivɛsiti, koni maná nitsumɔ kpakpa ko matsu. Shi no mli lɛ, mi hu mikɛ mumɔŋ otii komɛi emamɔ mihiɛ. Wɔnyɛɛɛ wɔsusu sane nɛɛ he yɛ naajɔlɛ mli. No hewɔ lɛ, miŋmala amɛ woji kɛgbala otii ni mikɛ mamɔ mihiɛ lɛ amli mitsɔɔ amɛ. Mipapa mli fu waa, ni ekɛɛ mi akɛ,  “Kɛ́ efeɔ bo akɛ obaaná nitsumɔ lɛ, belɛ taomɔ eko wɔ, kɛjeee nakai lɛ, mashwie bo kɛjɛ shĩa nɛɛ mli.” Misɔle mikpa Yehowa fai ni eye ebua mi. Enɔ jetsɛremɔ be ni minyiɛ shiɛmɔ nɔ lɛ, nyɛmimɛi yei enyɔ kɛɛ mi akɛ amɛbaasumɔ ni mibatsɔɔ amɛbii lɛ anii. Mipapa eyanyaaa enɛ he kwraa, no hewɔ lɛ ekɛ mi kpa wiemɔ, ni efooo midaaŋ dɔŋŋ. Awo kɛɛ mi akɛ, eji mitsɔ ojotswalɔ po kulɛ ehi fe ni matsɔ Yehowa Odasefonyo.

Bei komɛi lɛ, minu he akɛ Yehowa nyaaa bɔ ni mikɛ mifɔlɔi yeɔ hãa lɛ he. No hewɔ lɛ, misɔle mihã Yehowa ni mijwɛŋ nɔ ni Biblia lɛ wieɔ yɛ esuɔmɔ lɛ he lɛ he. Enɛ ye ebua mi ni miná jwɛŋmɔ ni ja yɛ shihilɛ ni mikɛkpeɔ lɛ he. Mibayɔse akɛ, misane kã mifɔlɔi atsui nɔ, ni no hewɔ amɛfeɔ amɛnii nakai lɛ. Yehowa ye ebua mi ni mitsake misusumɔ ni mina nɔ ni esa akɛ mafee. Agbɛnɛ hu, mitee shiɛmɔ waa, ni no ye ebua mi ni mibanya shiɛmɔ nitsumɔ lɛ he. Mikpɛ miyiŋ akɛ matsɔ daa gbɛgbalɔ.

Be ni nyɛmimɛi yei komɛi nu akɛ miitao matsɔ gbɛgbalɔ lɛ, amɛkɛɛ mi akɛ, esa akɛ mamɛ ni mifɔlɔi lɛ atsui he ajɔ fioo dã. Misɔle mibi Yehowa hiɛshikamɔ, mitao nii amli yɛ asafo lɛ woji lɛ amli, misusu nɔ hewɔ ni mitaoɔ matsɔ gbɛgbalɔ lɛ he, ni mikɛ nyɛmimɛi hii kɛ yei ni edara yɛ mumɔŋ gba sane. Mikpɛ miyiŋ akɛ mafee nɔ ni Yehowa sumɔɔ. Miyɔse hu akɛ, kɛ́ mibɔi gbɛgbamɔ nitsumɔ lɛ amrɔ nɔŋŋ jio, mimɛ fioo jio, kɛ́ mifɔlɔi kɛɛ amɛbaate shi amɛwo mi lɛ amɛbaate shi amɛwo mi.

Mibɔi gbɛgbamɔ be ni eshwɛ fioo ni magbe sɛkɛndre skul naa. Be fioo ko sɛɛ lɛ, mishwe akɛ mayasɔmɔ yɛ he ko ni hiamɔ lɛ da yɛ. Shi mimami kɛ mipapa sumɔɔɔ ni mishiɔ shĩa. No hewɔ lɛ, mimɛ kɛyashi miye afii 20. Kɛkɛ ni miŋma nitsumɔhe nine lɛ koni ahã mayasɔmɔ yɛ Japan wuoyigbɛ he ko ni bɛŋkɛ miwekumɛi komɛi. Mifee nakai bɔ ni afee ni Awo akaye etsui tsɔ yɛ mihe.

Mɛi ni mikɛkase nii yɛ he ni mitee lɛ ateŋ mɛi pii tee amɛhiɛ ni abaptisi amɛ, ni enɛ hã miná miishɛɛ waa. Bɔ ni afee ni manyɛ matsu babaoo yɛ Yehowa sɔɔmɔ lɛ mli lɛ, mibɔi Blɔfo kasemɔ. No mli lɛ, nyɛmimɛi hii gbɛgbalɔi krɛdɛi enyɔ komɛi yɛ misafo lɛ mli. Ekãa ni amɛyɔɔ, kɛ bɔ ni amɛyeɔ amɛbuaa mɛi krokomɛi lɛ kanya mi ni mi hu mikpɛ miyiŋ akɛ masumɔ ni matsɔ gbɛgbalɔ krɛdɛɛ. Awo he baye waa shii enyɔ, ni shii enyɔ lɛ fɛɛ lɛ, miku misɛɛ kɛtee shĩa ni miyaye mibua lɛ. Efee lɛ naakpɛɛ, ni no hã etsake esubaŋ fioo.

Afii kpawo sɛɛ lɛ, gbɛgbalɔi krɛdɛi lɛ ni mitsɔ hiɛ miwie amɛhe lɛ ateŋ mɔ kome ni atsɛɔ lɛ Atsushi lɛ, ŋma mi wolo. Ehã mile akɛ eetao ebote gbalashihilɛ mli, ni eleee kɛji masumɔ ni mikɛ lɛ ahi shi. No mli lɛ, misusuko Atsushi he akɛ mɔ ko ni baanyɛ abatsɔ miwu, ni eji mɔ ko kɛɛ mi akɛ eesumɔ mi kulɛ, maje he ŋwane. Nyɔɔŋ kome sɛɛ lɛ, mihã lɛ hetoo akɛ masumɔ ni mikɛ lɛ abɔi nyiɛmɔ koni male lɛ jogbaŋŋ. Wɔna akɛ, wɔhiɛ jwɛŋmɔ kome. Wɔ fɛɛ wɔmiitao ni wɔhi be fɛɛ sɔɔmɔ lɛ mli, ni wɔtsu nitsumɔ fɛɛ nitsumɔ ni Yehowa kɛbaawo wɔdɛŋ. Wɔbote gbalashihilɛ mli. Eŋɔɔ minaa waa akɛ mimami, mipapa, kɛ miwekumɛi krokomɛi ba yookpeemɔ lɛ shishi.

Wɔsɔmɔ akɛ daa gbɛgbalɔi, shi eyeee be ko ni ahala Atsushi akɛ kpokpaa nɔkwɛlɔ sɛɛmɔ. No sɛɛ lɛ, ahã wɔsɔmɔ akɛ gbɛgbalɔi krɛdɛi, kɛkɛ ni wɔbɔi kpokpaa nɔkwɛmɔ nitsumɔ lɛ. Wɔsara asafoi fɛɛ ni yɔɔ wɔkpokpaa lɛ mli lɛ shi kome. Kɛkɛ ni atswa wɔ kɛjɛ nitsumɔhe nine lɛ. Abi wɔ kɛji wɔbaasumɔ ni wɔyatsa kpokpaa nɔkwɛmɔ nitsumɔ lɛ nɔ yɛ Nepal.

No mli lɛ, mileee bɔ ni mifɔlɔi baanu he amɛhã kɛji mikɛɛ amɛ akɛ wɔmiiya he ko shɔŋŋ  nakai. Be ni mitswa amɛ ni mikɛɛ amɛ lɛ, mipapa here nɔ akɛ, “He ni nyɛyaa lɛ yɛ fɛo waa.” Asomoaŋ lɛ, enaanyo ko ehã lɛ wolo ko ni wieɔ Nepal he, ni no sɛɛ otsi pɛpɛɛpɛ ni mitswa amɛ lɛ. Eyɛ mipapa jwɛŋmɔŋ po akɛ ebaasumɔ ni eyakwɛ jɛmɛ.

Nepalbii tseɔ amɛhiɛ amɛhãa mɔ waa, ni wɔná miishɛɛ be ni wɔsɔmɔɔ yɛ jɛmɛ lɛ. Sɛɛ mli lɛ, akɛ Bangladesh fata kpokpaa ni wɔsɔmɔɔ lɛ he. Eyɛ mli akɛ Bangladesh bɛŋkɛ Nepal kpaakpa, shi esoro jɛmɛ shihilɛ kwraa. Wɔkɛ mɛi srɔtoisrɔtoi kpe yɛ shiɛmɔ nitsumɔ lɛ mli. Afii enumɔ sɛɛ lɛ, ahã wɔku wɔsɛɛ kɛba Japan, ni amrɔ nɛɛ wɔmiisɔmɔ yɛ kpokpaa nitsumɔ lɛ mli yɛ jɛmɛ.

Hegbɛ ni wɔná kɛsɔmɔ yɛ Japan, Nepal, kɛ Bangladesh lɛ, hã mikase nibii pii yɛ Yehowa he. Esoro shihilɛ ni yɔɔ maji etɛ nɛɛ ateŋ eko fɛɛ eko mli, kɛ bɔ ni mɛi ni yɔɔ jɛmɛ lɛ feɔ amɛnii amɛhãa. Ni yɛ maji nɛɛ ateŋ eko fɛɛ eko nɔ lɛ, onyɛŋ okɛ mɔ ko ato mɔ kroko he; esoro mɔ fɛɛ mɔ. Mina akɛ, Yehowa susuɔ mɛi fɛɛ he akɛ aŋkroaŋkroi, ehãa amɛ hegbɛ akɛ amɛbasɔmɔ lɛ, eyeɔ ebuaa amɛ, ni ejɔɔ amɛ.

Miida Yehowa shi waa yɛ nibii babaoo ni efee ehã mi lɛ ahewɔ. Ehã mi hegbɛ ni makase ehe nii, ni matsu enitsumɔ lɛ eko. Ni eduro mi wu kpakpa ni sɔmɔɔ Nyɔŋmɔ. Nyɔŋmɔ eye ebua mi ni mikpɛ miyiŋ yɛ nilee mli. Amrɔ nɛɛ wekukpaa kpakpa yɛ mi kɛ lɛ teŋ, ni wekukpaa kpakpa yɛ mi kɛ miweku lɛ hu teŋ. Yehowa duromɔ naa lɛ, mi kɛ Awo etsɔmɔ nanemɛi kpakpai ekoŋŋ. Eŋɔɔ minaa waa akɛ mikɛ Nyɔŋmɔ kɛ mimami ekpãtã.