Tsɔɔmɔ Obii lɛ Anii

Timoteo—Efee Klalo ni Eesumɔ akɛ Esɔmɔ

“ANI ofee klalo?” Ani abi bo sane ko ni tamɔ nakai pɛŋ?— Ojogbaŋŋ, mɔ ni bi bo nakai sane lɛ miitao ele kɛji osaa ohe. Ákɛ nɔkwɛmɔnɔ lɛ, ekolɛ nɔ ni mɔ lɛ tsɔɔ ji akɛ: ‘Ani okɔlɔ onikasemɔ woji lɛ? Ani okane owoji lɛ?’ Taakɛ wɔbaana lɛ, Timoteo ji mɔ ko ni efee klalo.

Agbɛnɛ hu, Timoteo miisumɔ akɛ esɔmɔ. Ani ole nɔ ni enɛ tsɔɔ?— Beni atsɛ́ Timoteo koni ebasɔmɔ Nyɔŋmɔ lɛ, no mli lɛ ehiɛ su ni tamɔ Nyɔŋmɔ tsulɔ kroko ni kɛɛ akɛ: “Naa mi, tsũ mi!” lɛ nɔ lɛ. (Yesaia 6:8) Akɛni Timoteo efee klalo ni eesumɔ akɛ esɔmɔ hu hewɔ lɛ, ená miishɛɛ yɛ shihilɛ mli. Ani obaasumɔ ni ole enɛ he sane?—

Afɔ́ Timoteo yɛ Listra ni kɛ Yerusalem jɛkɛmɔ ji kilomitai ohai abɔ lɛ. Enaa Loise kɛ enyɛ Eunike ji mɛi ni kɛ hiɛdɔɔ kaseɔ Ŋmalɛi lɛ jogbaŋŋ. Beni Timoteo ji abifao po lɛ, amɛbɔi lɛ Nyɔŋmɔ Wiemɔ lɛ tsɔɔmɔ.—2 Timoteo 1:5; 3:15.

Bɔfo Paulo ŋɔ Barnaba efata ehe ni amɛyasara Listra yɛ eklɛŋklɛŋ shiɛmɔ he gbɛfãa kakadaŋŋ lɛ mli, no mli lɛ ekolɛ Timoteo kã he eji oblanyo fioo. Eeenyɛ efee akɛ, nɛkɛ be nɛɛ mli Timoteo nyɛ kɛ enaa batsɔmɔ Kristofoi. Ani obaasumɔ ni ole naagba ni Paulo kɛ Barnaba kɛkpe?— Ojogbaŋŋ, gbɔmɛi ni sumɔɔɔ Kristofoi asane lɛ tswia Paulo tɛi, amɛtsi lɛ amɛgbee shi, ni amɛgbala lɛ kɛjɛ maŋtiase lɛ mli. Amɛsusu akɛ egbo.

Mɛi ni hé nɔ ni Paulo tsɔɔ lɛ amɛye lɛ bua amɛhe naa kɛbɔle lɛ, ni ete shi. Enɔ jetsɛremɔ lɛ, Paulo kɛ Barnaba shi Listra, shi no sɛɛ etsɛɛɛ lɛ amɛku amɛsɛɛ amɛba maŋ lɛ mli ekoŋŋ. Beni amɛba lɛ, Paulo ha maŋshiɛmɔ ko, ni yɛ maŋshiɛmɔ lɛ mli lɛ ekɛɛ kaselɔi lɛ akɛ: “Esa akɛ wɔtsɔɔ amanehului pii amli kɛboteɔ Nyɔŋmɔ maŋtsɛyeli lɛ mli.” (Bɔfoi lɛ Asaji 14:8-22) Ani onu nɔ ni Paulo tsɔɔ lɛ shishi?— Nɔ ni etsɔɔ ji akɛ mɛi krokomɛi baawa mɛi ni sɔmɔɔ Nyɔŋmɔ lɛ ayi. Sɛɛ mli lɛ, Paulo ŋma kɛyaha Timoteo akɛ: ‘Mɛi fɛɛ ni taoɔ akɛ amɛhi shi yɛ Nyɔŋmɔjamɔ naa lɛ, abaawa amɛyi.’—2 Timoteo 3:12; Yohane 15:20.

 Beni Paulo kɛ Barnaba shi Listra lɛ, amɛku amɛsɛɛ kɛtee shĩa. Nyɔji komɛi asɛɛ lɛ, Paulo ŋɔ Sila efata ehe akɛ ekɛ lɛ baafã gbɛ, ni amɛyi enyɔ lɛ fɛɛ ku amɛsɛɛ kɛtee hei ni Paulo eyasara lɛ, ni amɛyawo kaselɔi heei ni yɔɔ jɛmɛ lɛ hewalɛ. Beni amɛbashɛ Listra lɛ, kwɛ bɔ ni ekolɛ Timoteo mii shɛ ehe eha akɛ ena Paulo ekoŋŋ! Miishɛɛ ni Timoteo ná lɛ bateke nɔ, beni Paulo fɔ̃ lɛ nine koni ebafata ekɛ Sila he kɛfã gbɛ lɛ. Timoteo kpɛlɛ ninefɔ̃ɔ lɛ nɔ. Efee klalo ni eesumɔ akɛ ekɛ amɛ aya.—Bɔfoi lɛ Asaji 15:40–16:5.

Amɛyi etɛ lɛ fɛɛ fee ekome kɛfã gbɛ lɛ, amɛnyiɛ kilomitai babaoo, kɛkɛ ni amɛyawó lɛlɛ. Beni amɛyakpeleke lɛ, amɛnyiɛ kɛtee Tesalonika yɛ Hela. Mɛi babaoo batsɔmɔ Kristofoi yɛ maŋ nɛɛ mli. Shi mɛi krokomɛi amli wo la ni amɛto basabasafeelɔi akuu ko shishi. Enɛ ha Paulo, Sila, kɛ Timoteo awala yaje oshara mli, no hewɔ lɛ amɛshi jɛmɛ kɛtee Beroea.—Bɔfoi lɛ Asaji 17:1-10.

Paulo hao waa yɛ heyelilɔi heei ni aná yɛ Tesalonika lɛ ahe, no hewɔ lɛ etsu Timoteo koni eku esɛɛ eya jɛmɛ. Ani ole nɔ hewɔ ni efee nakai lɛ?— Sɛɛ mli lɛ Paulo gbála mli etsɔɔ Kristofoi ni yɔɔ Tesalonika lɛ akɛ: ‘Koni nyɛhe awa, ni ashɛje nyɛmii bɔni afee ni nyɛteŋ mɔ ko nijiaŋ akaje wui.’ Ani ole nɔ hewɔ ni Paulo tsu oblanyo fioo Timoteo koni eyatsu nitsumɔ ni oshara yɔɔ he nɛɛ?— Ojogbaŋŋ, shitee-kɛwolɔi lɛ leee Timoteo tsɔ, ni lɛ hu eesumɔ ni eya. Enɛ bi ni ená ekãa babaoo! Mɛni jɛ saramɔ lɛ mli kɛba? Beni Timoteo ku esɛɛ eba lɛ, eha Paulo le akɛ Tesalonikabii lɛ ji anɔkwafoi. No hewɔ lɛ, Paulo ŋma kɛyaha amɛ akɛ: “Wɔmii eshɛ [wɔhe] yɛ nyɛhewɔ.”—1 Tesalonikabii 3:2-7.

Timoteo kɛ Paulo fee ekome kɛsɔmɔ yɛ afii nyɔŋma ni nyiɛ sɛɛ lɛ mli. No sɛɛ lɛ, awo Paulo tsuŋ yɛ Roma, ni Timoteo ní yɛ nakai beaŋ lɛ ajie lɛ kɛjɛ tsuŋwoo mli etsɛko tsɔ lɛ tee ekɛ lɛ yahi shi. Beni Paulo yɔɔ tsuŋwoohe lɛ, ekolɛ ekɛ Timoteo tsu nii akɛ ewoloŋmalɔ ni eŋma wolo kɛmaje Filipibii lɛ. Paulo kɛɛ akɛ: ‘Mihiɛ kã nɔ akɛ matsu Timoteo nyɛŋɔɔ, ejaakɛ mibɛ mɔ ko ni yeɔ anɔkwa babaoo tamɔ lɛ ní baasɔmɔ nyɛ.’—Filipibii 2:19-22; Hebribii 13:23.

Kwɛ bɔ ni ekolɛ nakai wiemɔi lɛ ha Timoteo mii shɛ ehe waa! Paulo basumɔ Timoteo sane waa ejaakɛ efee klalo ni eesumɔ akɛ esɔmɔ. Wɔheɔ wɔyeɔ akɛ bo hu obaafee nakai nɔŋŋ.

Sanebimɔi:

○ Nɛgbɛ Timoteo da yɛ, ni mɛni ba beni Paulo yasara jɛmɛ klɛŋklɛŋ kwraa lɛ?

○ Mɛni Timoteo fee beni Paulo fɔ̃ lɛ nine koni ebafata ekɛ Sila he kɛfã gbɛ lɛ?

○ Mɛɛ gbɛ nɔ Timoteo jie ekãafeemɔ kpo yɛ, ni mɛni hewɔ Paulo sumɔɔ esane waa nakai lɛ?

[Mfoniri ni yɔɔ baafa 24]

Mɛni eba?