Bɔ ni Ooofee Odamɔ Awerɛhoyeli Naa

“[Yakob] bihii lɛ kɛ ebiyei lɛ fɛɛ te shi, koni amɛbashɛje emii, shi ekpɛlɛɛɛ miishɛjemɔ, ni ekɛɛ: Ŋkɔmɔyeli mikɛaakpeleke shi kɛyanina mibi lɛ yɛ gbohiiaje. Ni etsɛ fó lɛ.”—1 MOSE 37:35.

 BLEMATSƐ Yakob ye awerɛho waa yɛ ebinuu lɛ gbele hewɔ. Ekɛɛ akɛ ebaaye awerɛho kɛyashi be ni ebaagbo. Ekolɛ obaanu he akɛ dɔlɛ ni onuɔ he yɛ osuɔlɔ ko gbele hewɔ lɛ naa wa aahu akɛ enaa baŋ shi taakɛ Yakob hu nu he lɛ. Ani awerɛhoyeli ni naa wa ni tamɔ nɛkɛ lɛ tsɔɔ akɛ obɛ hemɔkɛyeli yɛ Nyɔŋmɔ mli? Dabi kwraa!

Biblia lɛ tsɔɔ akɛ Yakob ji nuu ni yɔɔ hemɔkɛyeli ni mli wa. Ajie Yakob kɛ enii Abraham kɛ etsɛ Isak yi yɛ hemɔkɛyeli ni mli wa ni amɛjie lɛ kpo lɛ hewɔ. (Hebribii 11:8, 9, 13) Naa, be ko po lɛ, Yakob kɛ ŋwɛi bɔfo ko nɔ jenamɔ fɛɛ koni enine ashɛ jɔɔmɔ nɔ kɛjɛ Nyɔŋmɔ ŋɔɔ! (1 Mose 32:25-31) Ekã shi faŋŋ akɛ, Yakob ji mɔ ko ni kɛ Yehowa yɔɔ wekukpãa ni mli wa. Kɛ́ nakai ni lɛ, mɛni wɔbaanyɛ wɔkase kɛjɛ Yakob awerɛhoyeli lɛ mli? Awerɛho kɛ ŋkɔmɔ ni naa wa ni ayeɔ beni suɔlɔ ko egbo lɛ etsɔɔɔ akɛ abɛ hemɔkɛyeli ni mli wa yɛ Nyɔŋmɔ mli. Eji adesai afɔmɔ su akɛ amɛaaye awerɛho kɛ́ amɛsuɔlɔ ko gbo.

Mɛni Ji Awerɛho?

Mɛi yeɔ awerɛho yɛ gbɛi srɔtoi anɔ, shi yɛ mɛi pii agbɛfaŋ lɛ awerɛhoyeli haa amɛnuɔ dɔlɛ ni naa wa he. Susumɔ Leonardo ni eye afii 14 beni tsui hela ko gbe etsɛ trukaa lɛ niiashikpamɔ lɛ he okwɛ. Leonardo hiɛ kpaŋ gbi ni enyɛkwɛ lɛ ha ele akɛ etsɛ egbo lɛ nɔ kɔkɔɔkɔ. Klɛŋklɛŋ lɛ, eheee eyeee akɛ sane nɛɛ ji anɔkwale. Ena ni asaa etsɛ gbonyo lɛ afɔ̃ shi be ni afeɔ eyara lɛ, shi efee lɛ akɛ nɔ ni enaa lɛ jeee anɔkwale. Leonardo nyɛɛɛ afó aaafee nyɔji ekpaa sɔŋŋ. Bei pii lɛ, emɛɔ etsɛ lɛ ni eku esɛɛ kɛjɛ nitsumɔ kɛba shĩa. Ehé lɛ aaafee afi kome dani enu shishi diɛŋtsɛ akɛ etsɛ egbo lɛɛlɛŋ. Beni eyɔse enɛ lɛ, enu he akɛ eshwɛ ekome too pɛ. Daa gbi shihilɛ mli nibii—tamɔ kɛ́ eba shĩa ni ebaninaaa mɔ ko lɛ—haa ekaiɔ etsɛ gbele lɛ. Yɛ bei ni tamɔ nɛkɛ mli lɛ, nɔ ni efɔɔ feemɔ ji akɛ efoɔ waa. Ehiɛ tseɔ etsɛ waa!

Leonardo niiashikpamɔ lɛ haa wɔnaa bɔ ni awerɛhoyeli baanyɛ afee nɔ ni naa wa waa. Miishɛɛ sane ji akɛ abaanyɛ adamɔ naa. Shi kɛlɛ, ekolɛ enɛ feemɔ baahe be. Tamɔ bɔ ni eheɔ be dani mɔ ko ni epila waa lɛ he waa lɛ lɛ, nakai nɔŋŋ eheɔ be dani anyɛɔ adamɔɔ dɔlɛ ni anuɔ he yɛ suɔlɔ ko gbele hewɔ lɛ naa. Ekolɛ ebaahe nyɔji abɔ, afii fioo komɛi, loo nɔ ni fe nakai po dani abaanyɛ adamɔ awerɛhoyeli naa. Shi beni be shwieɔ mli lɛ, dɔlɛ ni naa wa ni onu he kɛjɛ shishijee mli lɛ naa baaba shi, ni fiofio lɛ bɔ ni onu he akɛ oshihilɛ efee shwɛm ni obɛ hiɛnɔkamɔ ko lɛ baatsake.

Shi dani enɛ aaaba lɛ, awerɛho ni ayeɔ lɛ fata nibii ni haa anyɛɔ adamɔɔ suɔlɔ ko gbele naa kɛ bɔ ni afeɔ atsakeɔ he awoɔ shihilɛ hee nɛɛ mli lɛ he. Adesa ko ni be ko lɛ wɔkɛ lɛ yɔɔ lɛ bɛ dɔŋŋ. Ehe baahia ni wɔle bɔ ni wɔɔhi shi ni efataaa wɔhe. Awerɛhoyeli baanyɛ aha wɔjie wɔhenumɔi akpo. Eji anɔkwale akɛ esoro bɔ ni mɔ fɛɛ mɔ yeɔ awerɛho ehaa. Shi anɔkwa sane ko yɛ ni saa mɔ fɛɛ mɔ he, ni no ji akɛ: Kɛ́ wɔtsĩ awerɛhoyeli naa lɛ, ebaanyɛ eye wɔ awui yɛ jwɛŋmɔŋ, henumɔŋ, kɛ gbɔmɔtsoŋ fɛɛ. Kɛ́ nakai ni lɛ, mɛɛ gbɛ nɔ wɔbaanyɛ wɔtsɔ wɔye awerɛho yɛ gbɛ̀i kpakpai anɔ? Enɛ he ŋaawoi kpakpai komɛi yɛ Biblia lɛ mli. *

 Bɔ ni Ooofee Odamɔ Awerɛhoyeli Naa

Mɛi ni agbo yɛ amɛnɔ lɛ ateŋ mɛi babaoo ena akɛ kɛ́ amɛkɛ mɛi wie amɛsuɔlɔ lɛ gbele lɛ he lɛ, enyɛɔ eyeɔ ebuaa amɛ ni amɛnyɛɔ amɛdamɔɔ amɛwerɛhoyeli lɛ naa. Ákɛ nɔkwɛmɔnɔ lɛ, kadimɔ wiemɔi ni Biblia mli gbɔmɔ Hiob ni bii nyɔŋmai lɛ fɛɛ gboi ni ena amanehulu krokomɛi hu lɛ wie lɛ. Ekɛɛ akɛ: “Mijeŋhilɛ eje mitsine; maŋmɛ mikɔmɔyeli lɛ gbɛ, mawie yɛ misusuma hejaramɔ lɛŋ.” (Hiob 1:2, 18, 19; 10:1) Kadimɔ akɛ ehe bahia ni Hiob ‘aŋmɛ’ ekɔmɔyeli lɛ “gbɛ.” Mɛɛ gbɛ nɔ ebaatsɔ efee enɛ? Ekɛɛ akɛ, “Mawie.”

Paulo ni emami eje mli lɛ wie akɛ: “Nibii ni yeɔ ebuaa mi lɛ ateŋ ekome ji mimami he saji ni mikɛ mɛi wieɔ lɛ.” No hewɔ lɛ, bɔ ni onuɔ sane lɛ he ohaa lɛ ni okɛ onaanyo ko ni omuɔ ofɔ̃ɔ enɔ lɛ aaawie he lɛ baanyɛ aha otsui anyɔ omli yɛ gbɛ ko nɔ. (Abɛi 17:17) Beni yoo ko ni atsɛɔ lɛ Yone mami gbo sɛɛ lɛ, ekɛɛ enanemɛi Kristofoi lɛ koni amɛfɔ lɛ saramɔ. Ekɛɛ akɛ, “Mɛi krokomɛi ni mikɛfɔɔ wiemɔ lɛ ji nɔ ni ba dɔlɛ ni minuɔ he lɛ shi.” Ekolɛ bo hu kɛ́ okɛ mɛi ni nuɔ he amɛhaa bo lɛ gba bɔ ni onuɔ he ohaa lɛ he sane lɛ, ebaaha ni efee mlɛo kɛha bo akɛ ooodamɔ naa.

Woloŋmaa hu baanyɛ aha wɔdamɔ awerɛhoyeli naa. Ekolɛ mɛi ni ewa kɛha amɛ akɛ amɛaawie bɔ ni amɛnuɔ he amɛhaa lɛ he lɛ baana akɛ ewaaa akɛ amɛaaŋmala amɛhenumɔi lɛ yɛ woji anɔ. Beni Saul kɛ Yonatan gbo sɛɛ lɛ, nuu anɔkwafo David fo ŋkɔmɔyeli lala ko ni taa mɔ mli waa ni ekɛfɔse awerɛho ni eyeɔ lɛ eshwie shi. Sɛɛ mli lɛ, ŋkɔmɔyeli lala nɛɛ batsɔ Biblia mli wolo ni ji Samuel Wolo ni Ji Enyɔ lɛ fã.—2 Samuel 1:17-27.

Yaafo hu baanyɛ aha wɔdamɔ awerɛhoyeli naa. Biblia lɛ kɛɔ akɛ: “Nɔ fɛɛ nɔ yɛ ebe ní ato, . . . yaafo be yɛ.” (Jajelɔ 3:1, 4) Hɛɛ, beni wɔsuɔlɔ ko egbo lɛ ji “yaafo be.” Esaaa akɛ efeɔ wɔ hiɛgbele akɛ wɔɔfo yɛ awerɛhoyeli hewɔ. Nɔkwɛmɔnii babaoo yɛ Biblia lɛ mli ni kɔɔ hii kɛ yei anɔkwafoi ni awerɛhoyeli ha amɛfó yɛ mɛi pii ahiɛ lɛ he. (1 Mose 23:2; 2 Samuel 1:11, 12) Yesu Kristo “fó” beni eshwɛ fioo ni ebaashɛ eshieŋtsɛ Lazaro gbonyobu lɛ he lɛ.—Yohane 11:33, 35.

 Ebiɔ tsuishitoo dani obaanyɛ odamɔ awerɛhoyeli naa, ejaakɛ awerɛhoyeli baanyɛ aha ohenumɔi atsake trukaa be fɛɛ be. Kaimɔ akɛ esaaa akɛ efeɔ bo hiɛgbele akɛ ooofó. Anɔkwafoi babaoo eyɔse akɛ yaafo ji adesai afɔmɔ su, ni efata nibii ni haa anyɛɔ adamɔɔ awerɛhoyeli naa lɛ ahe.

Tsi Obɛŋkɛ Nyɔŋmɔ

Biblia lɛ kɛɔ wɔ akɛ: “Nyɛtsia nyɛbɛŋkɛa Nyɔŋmɔ, ni eeetsi eeebɛŋkɛ nyɛ.” (Yakobo 4:8) Gbɛ̀i ni he hiaa ni wɔbaanyɛ wɔtsɔ nɔ wɔbɛŋkɛ Nyɔŋmɔ lɛ ateŋ ekome ji sɔlemɔ. Kaabu sɔlemɔ akɛ nɔ ko ni yɔɔ fɛlɛfɛlɛ! Biblia lɛ kɛ shiwoo ni shɛjeɔ mɔ mii nɛɛ haa akɛ: “Yehowa bɛŋkɛɔ mɛi ni tsuii ekumɔ lɛ, ni ehereɔ mɛi ni mumɔ tswiaa shi kɛ dɔlɛ lɛ.” (Lala 34:19) Ewoɔ wɔ shi hu akɛ: “Shɛ ojatsu lɛ ofɔ̃ Yehowa nɔ, ni lɛ eeehiɛ omli.” (Lala 55:23) Susumɔ enɛ he okwɛ. Taakɛ wɔna kɛtsɔ hiɛ lɛ, mɛi babaoo ena akɛ kɛ́ amɛkɛ amɛnaanyo ko ni amɛbaanyɛ amɛmu amɛfɔ̃ enɔ lɛ gba amɛhenumɔi ahe sane lɛ, eyeɔ ebuaa amɛ waa. Ani ebafeŋ nɔ ni sɛɛnamɔ babaoo yɔɔ he akɛ ooofɔse ohenumɔi oshwie Nyɔŋmɔ ni ewo shi akɛ ebaashɛje tsuii ni ekumɔ lɛ amii lɛ hiɛ?—2 Tesalonikabii 2:16, 17.

Paulo ni atsĩ etã kɛtsɔ hiɛ lɛ wie akɛ: “Kɛ́ mina akɛ minyɛɛɛ dɔlɛ ni minuɔ he lɛ naa madamɔ  dɔŋŋ lɛ, mikulaa shi ni mitsiɔ mibɛŋkɛɔ Nyɔŋmɔ yɛ sɔlemɔ mli. Mikpaa lɛ fai ni eye ebua mi.” Paulo na nɔmimaa akɛ esɔlemɔi lɛ ji nɔ ni ye ebua lɛ. Bo hu kɛ́ otee nɔ osɔle lɛ, ekolɛ obaana akɛ “miishɛjemɔ fɛɛ Nyɔŋmɔ lɛ” baaha osɔlemɔ lɛ hetoo kɛtsɔ ekãa kɛ nyɛmɔ ni ebaaha oná kɛdamɔ shihilɛ ni okɛkpeɔ lɛ naa lɛ nɔ.—2 Korintobii 1:3, 4; Romabii 12:12.

Gbohiiashitee He Hiɛnɔkamɔ Lɛ

Yesu kɛɛ akɛ: “Mi lɛ miji shitee lɛ kɛ wala lɛ; mɔ ni heɔ minɔ eyeɔ lɛ, kɛji egbo tete lɛ, ehiɛ aaakã.” (Yohane 11:25) Biblia lɛ tsɔɔ akɛ gbohii lɛ baaba wala mli ekoŋŋ. * Beni Yesu yɔɔ shikpɔŋ lɛ nɔ lɛ, eha ana akɛ ebaanyɛ etee gbohii lɛ ashi. Be ko lɛ, etee gbekɛ yoo ko ni eye afii 12 shi. Te efɔlɔi lɛ nu he amɛha tɛŋŋ? “Amɛ[mii shɛ] amɛhe naakpa.” (Marko 5:42) Yesu Kristo ni ji ŋwɛi nɔyeli lɛ nɔ Maŋtsɛ lɛ baatee mɛi babaoo ni aleee amɛyibɔ lɛ ashi koni amɛbahi shikpɔŋ lɛ nɔ yɛ toiŋjɔlɛ kɛ jalɛ mli yɛ e-Maŋtsɛyeli lɛ nɔyeli shishi. (Bɔfoi lɛ Asaji 24:15; 2 Petro 3:13) Kwɛ bɔ ni ebaafee miishɛɛ naakpa beni ateɔ gbohii ashi kɛbaa wala mli ni amɛkɛ amɛsuɔlɔi lɛ bafeɔ ekome ekoŋŋ lɛ!

Claudete ni ebinuu Renato gbo yɛ kɔɔyɔŋ lɛlɛ ko ni yagbee shi lɛ mli lɛ kɛ ebinuu lɛ mfoniri ma efriji lɛ nɔ. Efɔɔ mfoniri lɛ kwɛmɔ, ni be fɛɛ be ni ebaakwɛ lɛ ekɛɔ ehe akɛ, ‘Wɔbaakpe ekoŋŋ yɛ gbohiiashitee lɛ mli.’ Leonardo feɔ be ni etsɛ ni egbo lɛ baaku esɛɛ kɛba wala mli yɛ Nyɔŋmɔ jeŋ hee ni ewo he shi lɛ he mfoniri yɛ ejwɛŋmɔ mli. Hɛɛ, gbohiiashitee he hiɛnɔkamɔ lɛ shɛjeɔ amɛ kɛ mɛi babaoo hu ni amɛsuɔlɔi egboi lɛ amii diɛŋtsɛ. Ebaanyɛ eshɛje bo hu omii!

[Shishigbɛ niŋmai]

[Akrabatsa/Mfoniri ni yɔɔ baafa 7]

“Miishɛjemɔ Fɛɛ Nyɔŋmɔ Lɛ”

“Ajɔɔ Nyɔŋmɔ kɛ wɔ-Nuŋtsɔ Yesu Kristo tsɛ lɛ, mɔ ni ji musuŋtsɔlɛi atsɛ kɛ miishɛjemɔ fɛɛ Nyɔŋmɔ lɛ.” —2 Korintobii 1:3.

Biblia mli ŋmalɛ kuku nɛɛ tsɔɔ akɛ, Nyɔŋmɔ baanyɛ aye abua enɔkwa tsuji koni amɛnyɛ amɛdamɔ naagbai loo kaai fɛɛ ni ekolɛ amɛkɛbaakpe lɛ anaa. Gbɛ kome ni ekolɛ Yehowa baatsɔ nɔ eshɛje wɔmii ji kɛtsɔ naanyo loo suɔlɔ ko ni wɔkɛ lɛ hiɛ hemɔkɛyeli kome lɛ nɔ.

Leonardo kaiɔ niiashikpamɔ ko ni waje lɛ, ni eshɛje emii hu beni etsɛ gbo lɛ. Beni Leonardo shɛ shĩa ní ekai akɛ mɔ ko mɔ ko bɛ shĩa lɛ, ebɔi yaafo aahu akɛ enyɛɛɛ efɔ̃ɔ yaafo. Etee paaki ko ni bɛŋkɛ lɛ nɔ ni eyata sɛi ko nɔ, ni etee nɔ efó. Beni ekã he efoɔ lɛ, esɔle ekpa Nyɔŋmɔ fai ni eye ebua lɛ. Trukaa lɛ tsɔne ko bawa yɛ emasɛi, ni Leonardo yoo akɛ tsɔnekudɔlɔ lɛ ji enyɛmimɛi Kristofoi lɛ ateŋ mɔ kome. No mli lɛ, nyɛmi nuu nɛɛ miijara nibii kɛmiiha mɛi ni ekɛyeɔ jara lɛ, ni edu gbɛ kɛbayi jɛmɛ. Nyɛmi nuu lɛ pɛ kɛkɛ ní Leonardo na lɛ shɛje emii.

Be ko lɛ, nuu okulafo ko nu he akɛ ehe efee shoo ni ehao waa. Enyɛɛɛ ekpa yaafo ejaakɛ enu he akɛ egbe ejeŋ naa. Ekpa Nyɔŋmɔ fai ni eye ebua lɛ. Ehiɛ sɔlemɔ lɛ mli nɔŋŋ kɛkɛ ni etɛlifoŋ lɛ gbɛɛ. Enabi oblayoo fioo ko ji mɔ ni tswa lɛ telifon lɛ. Ekɛɛ akɛ: “Sane kuku ni wɔgba lɛ wo mi hewalɛ waa. Minu he waa akɛ tɛlifoŋ ni minabi lɛ tswa mi lɛ ji misɔlemɔ kɛha yelikɛbuamɔ lɛ hetoohamɔ.”

 [Akrabatsa ni yɔɔ baafa 9]

Shɛjemɔ Mɛi Krokomɛi Amii

“[Nyɔŋmɔ] shɛjeɔ wɔmii yɛ wɔmanehului lɛ fɛɛ mli, koni wɔ hu wɔnyɛ wɔkɛ miishɛjemɔ, ni Nyɔŋmɔ ŋɔshɛjeɔ wɔ diɛŋtsɛ wɔmii lɛ, ashɛje mɛi ni naa amanehulu fɛɛ amanehulu lɛ amii.”—2 Korintobii 1:4.

Anɔkwa Kristofoi babaoo kɛ shihilɛi komɛi ekpe, ni shihilɛi nɛɛ eha amɛná nɔ ni wiemɔi nɛɛ tsɔɔ lɛ mli niiashikpamɔ. Akɛni mɛi komɛi shɛje amɛmii koni amɛnyɛ amɛdamɔ amɛsuɔlɔ ko gbele naa hewɔ lɛ, amɛnaa akɛ amɛ hu amɛnyɛɔ amɛwoɔ mɛi krokomɛi hewalɛ ni amɛshɛjeɔ mɛi nɛɛ amii.

Susumɔ nyɛmi yoo Claudete ni fɔɔ mɛi krokomɛi asaramɔ koni ekɛ amɛ agba ehemɔkɛyelii ni damɔ Biblia lɛ nɔ lɛ ahe sane lɛ he okwɛ. Dani Claudete binuu lɛ baagbo lɛ, no mli lɛ eyasaraa yoo ko ni lá mli hela ko ni atsɛɔ lɛ leukemia egbe ebinuu. Yoo lɛ ná saramɔ lɛ he miishɛɛ, shi enu he akɛ Claudete nyɛŋ anu dɔlɛ ni enuɔ he lɛ shishi kɛmɔ shi. Shi beni Claudete binuu lɛ gbo sɛɛ etsɛɛ nɔŋŋ lɛ, yoo lɛ tee eyasara Claudete ni ekɛɛ akɛ, amrɔ nɛɛ ni lɛ hu ebinuu lɛ egbo lɛ, eba ni ebakwɛ akɛ Claudete kã he ehiɛ ehemɔkɛyeli lɛ mli lo. Akɛni hemɔkɛyeli ni mli wa ni Claudete jie lɛ kpo lɛ ta yoo lɛ tsuiŋ waa hewɔ lɛ, eha Claudete kɛ lɛ bɔi Biblia lɛ kasemɔ daa, ni Nyɔŋmɔ Wiemɔ lɛ miishɛje emii babaoo diɛŋtsɛ.

Beni Leonardo tsɛ gbo sɛɛ lɛ, ekpɛ eyiŋ akɛ ebaakase mumuii awiemɔ bɔni afee ni enyɛ ekɛ mumuii agba Biblia mli shɛɛ saji ni shɛjeɔ mɔ mii lɛ ahe sane. Eyɔse akɛ ená mɔdɛŋ ni ebɔ akɛ eye ebua mumuii lɛ he sɛɛ waa diɛŋtsɛ. Ekɛɛ akɛ: “Nibii ni ye ebua mi ni minyɛ midamɔ miwerɛhoyeli lɛ naa lɛ ateŋ ekome ji shwelɛ ni miná akɛ maye mabua mumuii ní amɛkase Nyɔŋmɔ he nii lɛ. Mikɛ be babaoo kɛ mihewalɛ fɛɛ tsuɔ nii kɛyeɔ buaa amɛ. Beni abaptisi mɔ klɛŋklɛŋ ni mikɛ lɛ kase Biblia lɛ, miishɛɛ baye miwerɛhoyeli lɛ najiaŋ! Yɛ anɔkwale mli lɛ, kɛjɛ beni mitsɛ gbo lɛ, enɛ ji be klɛŋklɛŋ ni minu he waa akɛ miná miishɛɛ naakpa.”—Bɔfoi lɛ Asaji 20:35.

[Mfoniri ni yɔɔ baafa 5]

Bɔ ni onuɔ he ohaa lɛ ni okɛ mɛi aaawie he lɛ baanyɛ aha otsui anyɔ omli yɛ gbɛ ko nɔ

[Mfoniri ni yɔɔ baafa 6]

Woloŋmaa baanyɛ aye abua wɔ ni wɔjie wɔwerɛhoyeli kpo

[Mfoniri ni yɔɔ baafa 6]

Gbohiiashitee he hiɛnɔkamɔ lɛ he sane ni wɔɔkane lɛ baanyɛ ashɛje wɔmii diɛŋtsɛ

[Mfoniri ni yɔɔ baafa 8, 9]

esu wo shi akɛ ebaatee mɛi ni náa hemɔkɛyeli yɛ emli lɛ ashi