Mɛi Babaoo Heɔ Amɛyeɔ

“Be ko ni eho lɛ milaa akɛ aashã mi yɛ hɛl la mli! Milaa akɛ ashɛɔ mi afɔ̃ɔ he ko ni miitso, ni mihiɛ tsɛ̃ɔ ni miibolɔ. Enɛ ha mibɔ mɔdɛŋ waa koni mikafee eshã.”—Arline.

ANI oheɔ oyeɔ akɛ hɛl ji he ko ni asaa ato kɛha efɔŋfeelɔi apiŋmɔ? Mɛi pii heɔ amɛyeɔ. Ákɛ nɔkwɛmɔnɔ lɛ, yɛ afi 2005 mli lɛ, beni nilelɔ ko ni tsɔɔ nii yɛ University of St. Andrews ni yɔɔ Scotland lɛ bibii Scotland osɔfoi komɛi asaji lɛ, ena akɛ amɛteŋ mɛi etɛ fɛɛ etɛ ateŋ mɔ kome heɔ eyeɔ akɛ mɛi ni etsi amɛhe kɛjɛ Nyɔŋmɔ he lɛ baapiŋ “yɛ amɛjwɛŋmɔŋ kɛya naanɔ yɛ hɛl.” Amɛteŋ mɛi enumɔ fɛɛ enumɔ ateŋ mɔ kome heɔ eyeɔ akɛ abaapiŋ mɛi ni yɔɔ hɛl lɛ yɛ heloo mli.

Yɛ maji babaoo amli lɛ, mɛi babaoo heɔ hɛl tsɔɔmɔ lɛ amɛyeɔ. Ákɛ nɔkwɛmɔnɔ lɛ, yɛ United States lɛ atsɔ gbɛ ko ni atsɔɔ nɔ abibiɔ mɛi saji ni atsɛɔ lɛ akɛ Gallup poll lɛ nɔ abibii mɛi asaji yɛ afi 2007 mli, ni ana akɛ mɛi ni abibii amɛ saji lɛ ateŋ oha mlijaa 70 heɔ hɛl tsɔɔmɔ lɛ amɛyeɔ. Yɛ maji ni mɛi babaoo nyaaa Nyɔŋmɔjamɔ he lɛ po amli lɛ, mɛi yɛ ni heɔ hɛl tsɔɔmɔ lɛ amɛyeɔ lolo. Ana yɛ Gallup poll ko ni afee yɛ afi 2004 mli lɛ mli akɛ, Canadabii ateŋ oha mlijaa 42 heɔ hɛl tsɔɔmɔ lɛ amɛyeɔ. Ni yɛ Great Britain lɛ, mɛi ni shɛɔ oha mlijaa 32 yɛ nɔmimaa akɛ hɛl yɛ.

Nɔ ni Osɔfoi lɛ Tsɔɔ

Osɔfoi babaoo etsɔɔɔ amɛsafoŋbii lɛ dɔŋŋ akɛ hɛl ji he ko ni akɛ la shãa mɛi lɛɛlɛŋ. Yɛ no najiaŋ lɛ, amɛtsɔɔ hɛl shishi yɛ gbɛ ni tamɔ bɔ ni atsɔɔ shishi yɛ wolo ko (Catechism of the Catholic Church) ni ajie lɛ kpo yɛ afi 1994 lɛ mli lɛ nɔ. Wolo nɛɛ tsɔɔ mli akɛ: “Toigbalamɔ tuuntu ni mɛi anine shɛɔ nɔ yɛ hɛl ji amɛhe ni amɛtsiɔ kɛjɛɔ Nyɔŋmɔ he kɛyaa naanɔ.”

Yɛ enɛ fɛɛ sɛɛ lɛ, mɛi heɔ amɛyeɔ lolo akɛ hɛl ji he ko ni apiŋɔ mɛi yɛ jwɛŋmɔŋ loo heloo mli. Mɛi ni tsɔɔ hɛl shishi yɛ nɛkɛ gbɛ nɔ lɛ kɛɔ akɛ tsɔɔmɔ nɛɛ jɛ Biblia lɛ mli. Skul ko ni akaseɔ Nyɔŋmɔjamɔ he nii (Southern Baptist Theological Seminary) lɛ nɔkwɛlɔ R. Albert Mohler kɛɛ akɛ: “Eji anɔkwa sane ko ni yɔɔ Ŋmalɛ lɛ mli.”

Mɛni Hewɔ Nɔ ni Oheɔ Oyeɔ lɛ He Hiaa?

Kɛ́ hɛl ji he ko ni apiŋɔ mɛi yɛ jɛmɛ lɛɛlɛŋ lɛ, esa akɛ oshe hɛl gbeyei. Shi kɛ tsɔɔmɔ nɛɛ jeee anɔkwale lɛ, jamɔŋ hiɛnyiɛlɔi ni tsɔɔ tsɔɔmɔ nɛɛ miiha mɛi ayiŋ miifutu amɛ ni no haa mɛi ni heɔ amɛyeɔ lɛ feɔ yeyeeye bɔ ni esaaa. Nakai feemɔ hu gbeɔ Nyɔŋmɔ he guɔ.

Mɛni Nyɔŋmɔ Wiemɔ ni ji Biblia lɛ kɛɔ yɛ sane nɛɛ he? Wɔkɛ Ga Biblia momo lɛ kɛ ehee lɛ baatsu nii yɛ saji ni nyiɛ sɛɛ lɛ amli kɛha sanebimɔi etɛ ni nyiɛ sɛɛ nɛɛ ahetoo: (1) Mɛni diɛŋtsɛ baa mɔ nɔ kɛ́ egbo? (2) Mɛni Yesu wie yɛ hɛl he? (3) Mɛɛ gbɛ nɔ anɔkwale ni kɔɔ hɛl he ni ooole lɛ baanyɛ aná onɔ hewalɛ?—w08 11/1-E.