Ani Nyɔŋmɔ Kpɛlɛɔ Jamɔ Gbɛ̀i Srɔtoi Fɛɛ Anɔ?

Hetoi ni mɛi fɔɔ hamɔ:

▪ “Jamɔi fɛɛ ji gbɛ̀i ni atsɔɔ nɔ kɛyaa Nyɔŋmɔ ŋɔɔ.”

▪ “Ekɔɔɔ he eko nɔ ni oheɔ oyeɔ, ja otsui mli tse kɛkɛ.”

Mɛni Yesu wie?

▪ “Nyɛbotea agbó fintɔ̃ɔ lɛ mli! Ejaakɛ agbó ni lɛɛ kɛ gbɛ tɛtɛrɛɛ ji nɔ ni kɛ mɔ yaa hiɛkpatamɔ mli lɛ, ni mɛi ní boteɔ mli lɛ fá pii. Shi agbó fintɔ̃ɔ kɛ gbɛ ni etsa ji nɔ ni kɛ mɔ yaa wala mli lɛ, ni mɛi fioo ji mɛi ni naa no.” (Mateo 7:13, 14) Yesu heee eyeee akɛ jamɔ gbɛ̀i fɛɛ kɛ mɔ yaa Nyɔŋmɔ ŋɔɔ.

▪ “Mɛi pii aaakɛɛ mi yɛ no gbi lɛ nɔ akɛ: Nuŋtsɔ, Nuŋtsɔ! ani jeee bo ogbɛi lɛ mli wɔgba yɛ, ni ogbɛi lɛ mli wɔfamɔ daimonioi yɛ, ni ogbɛi lɛ mli wɔfee hewalɛ nibii pii yɛ lo? Ni no lɛ magba mli makɛɛ amɛ akɛ: Mileee nyɛ kwraa, nyɛjea minɔ nyɛyaa, nyɛ mɛi ni nyɛtsuɔ nibii ni ejaaa gbɛ!” (Mateo 7:22, 23) Jeee mɔ fɛɛ mɔ ni kɛɔ akɛ enyiɛ Yesu sɛɛ lɛ Yesu kpɛlɛɔ enɔ.

MƐI ni heɔ Nyɔŋmɔ nɔ amɛyeɔ lɛ ateŋ mɛi babaoo kɛ amɛhe kpɛtɛɔ amɛ diɛŋtsɛ amɛhemɔkɛyelii kɛ kusumii ahe. Te amɛfeɔ amɛnii amɛhaa tɛŋŋ kɛ́ amɛná amɛle akɛ amɛtsɔɔmɔi lɛ kɛ nɔ ni yɔɔ Nyɔŋmɔ Wiemɔ ni ji Biblia lɛ mli lɛ kpãaa gbee lɛ? Yesu tsɔɔ akɛ oshara yɛ he akɛ aaanyiɛ adesai akusumii asɛɛ beni ekɛɛ jamɔŋ hiɛnyiɛlɔi ni hi shi yɛ ebeaŋ lɛ akɛ: “Nyɛblema saji lɛ ahewɔ lɛ nyɛgu Nyɔŋmɔ kita lɛ.” No sɛɛ lɛ, etsɛ Nyɔŋmɔ wiemɔi nɛɛ ayisɛɛ akɛ: “Maŋ nɛɛ kɛ amɛnaabu woɔ mi; shi amɛtsui etsi ehe kɛjɛ mihe kɛtee shɔŋŋ. Shi yakatswaa amɛjáa mi lɛ, ejaakɛ amɛtsɔ̃ɔ tsɔɔmɔi ni ji gbɔmɛi akitãi.”—Mateo 15:1-9; Yesaia 29:13.

Jeee nibii ni mɔ heɔ eyeɔ lɛ pɛ ahe hiaa, shi bɔ ni ebaa ejeŋ ehaa lɛ hu he hiaa. Biblia lɛ wieɔ yɛ mɛi komɛi ni kɛɔ akɛ amɛjáa Nyɔŋmɔ lɛ ahe akɛ: “Amɛkɛɛ akɛ amɛle Nyɔŋmɔ, shi amɛkɛ amɛnitsumɔi kwaa lɛ.” (Tito 1:16) Yɛ anɔkwale mli lɛ, Biblia lɛ wieɔ yɛ mɛi ni yɔɔ wɔgbii nɛɛ amli lɛ ahe akɛ: “Mɛi ni sumɔɔ shwɛmɔ kɛ ŋɔɔmɔ fe Nyɔŋmɔ, mɛi ni hiɛ Nyɔŋmɔ-jamɔ su, shi amɛkwa emli hewalɛ lɛ; tsi ohe kɛjɛ nɛkɛ gbɔmɛi ahe.”—2 Timoteo 3:4, 5.

Ebiɔ ni wɔtsui mli atse moŋ, shi nibii krokomɛi hu ahe miihia. Mɛni hewɔ? Ejaakɛ mɔ ko baanyɛ ekɛ tsui ni mli tse afee nɔ ko ni eleee akɛ ejaaa. No hewɔ lɛ, ehe miihia ni aná Nyɔŋmɔ he anɔkwa nilee. (Romabii 10:2, 3) Kɛ́ wɔná nilee nɛɛ ni wɔba wɔjeŋ yɛ nɔ ni Biblia lɛ kɛɔ lɛ naa lɛ, ebaaye ebua wɔ ni wɔsa Nyɔŋmɔ hiɛ. (Mateo 7:21) Belɛ, eji anɔkwale akɛ, dani mɔ ko jamɔ aaafee nɔ ni ja lɛ, esa akɛ etsui mli atse, ená hemɔkɛyeli ni ja, ni eba ejeŋ jogbaŋŋ. Mɔ ni feɔ Nyɔŋmɔ suɔmɔnaa nii daa gbi lɛ ji mɔ ni baa ejeŋ jogbaŋŋ!—1 Yohane 2:17.

Kɛ́ ootao ni ole nibii babaoo ni kɔɔ nɔ ni Biblia lɛ kɛɔ wɔ yɛ Nyɔŋmɔ he lɛ he lɛ, taomɔ Yehowa Odasefoi asɛɛ gbɛ koni amɛkɛ bo akase Biblia lɛ yɛ oshĩa ni aheee bo nɔ ko.—w09 02/01-E.

[Wiemɔ ni akɔ ni akɛmiitsu nii ni yɔɔ baafa 9]

Dani mɔ ko jamɔ aaafee nɔ ni ja lɛ, esa akɛ etsui mli atse, ená hemɔkɛyeli ni ja, ni eba ejeŋ jogbaŋŋ