Tsi Obɛŋkɛ Nyɔŋmɔ

Yehowa Haa Wɔ Hegbɛ Koni Wɔhala nɔ ni Wɔsumɔɔ

5 Mose 30:11-20

KRISTOFONYO yoo ko ni shihilɛ gbonyo ko ni etsɔ mli beni eji gbekɛ lɛ ha enu he akɛ enyɛŋ eye omanye kɔkɔɔkɔ lɛ wie akɛ: “Be ko ni eho lɛ, misheɔ gbeyei yɛ gbɛ ni esaaa nɔ akɛ minyɛŋ maye Yehowa anɔkwa.” Ani nakai eji? Ani wɔji mɛi ni kɛ́ shihilɛ gbonyo ko ba wɔnɔ lɛ, wɔnyɛŋ he nɔ ko kwraa wɔfee? Dabi. Yehowa Nyɔŋmɔ eha wɔ hegbɛ ni wɔkɛhala nɔ ni wɔsumɔɔ, ni no hewɔ lɛ, wɔ diɛŋtsɛ wɔbaanyɛ wɔkpɛ wɔyiŋ yɛ bɔ ni wɔsumɔɔ ni wɔhi shi wɔha lɛ he. Yehowa miisumɔ ni wɔkpɛ yiŋ ni ja, ni e-Wiemɔ ni ji Biblia lɛ tsɔɔ wɔ gbɛ nɔ ni wɔbaanyɛ wɔtsɔ wɔfee nakai. Susumɔ Mose wiemɔi ni yɔɔ 5 Mose yitso 30 lɛ he okwɛ.

Ani ewa akɛ wɔɔle nɔ ni Nyɔŋmɔ taoɔ yɛ wɔdɛŋ, koni wɔtsu he nii? * Mose kɛɛ akɛ: “Nɛkɛ kita nɛɛ ní miwoɔo ŋmɛnɛ gbi nɛɛ lɛ, ewaaa haaao, ni ebɛ shɔŋŋ hu.” (Kuku 11) Yehowa biii ni wɔfee nɔ ko ni wɔnyɛŋ wɔfee. Etaooo nibii babaoo tsɔ kɛjɛɛɛ wɔdɛŋ, ni wɔbaanyɛ wɔshɛ etaomɔ nii lɛ ahe. Agbɛnɛ hu wɔbaanyɛ wɔle etaomɔ nii lɛ. Ehe ehiaaa ni wɔkwɔ ‘kɛya ŋwɛi’ loo wɔfo kɛya “ŋshɔ sɛɛ” dani wɔle nibii ni Nyɔŋmɔ kpaa gbɛ kɛjɛɔ wɔdɛŋ. (Kuku 12, 13) Biblia lɛ tsɔɔ wɔ faŋŋ bɔ ni esa akɛ wɔba wɔjeŋ wɔha.—Mika 6:8.

Shi kɛlɛ, Yehowa enyɛɛɛ wɔnɔ ni wɔbo lɛ toi. Mose kɛɛ akɛ: “Ŋmɛnɛ gbi nɛɛ mikɛ wala kɛ ekpakpa, gbele kɛ efɔŋ miishwie ohiɛ.” (Kuku 15) Wɔyɛ hegbɛ akɛ wɔhalaa wala loo gbele, kɛ ekpakpa loo efɔŋ. Wɔbaanyɛ wɔhala akɛ wɔbaajá Nyɔŋmɔ ni wɔbo lɛ toi koni ejɔɔ wɔ, loo wɔbaanyɛ wɔhala akɛ wɔboŋ lɛ toi ni wɔtere sɔ̃i ni baajɛ mli kɛba lɛ. Esa akɛ wɔ diɛŋtsɛ wɔkpɛ wɔyiŋ yɛ enɛɛmɛi ateŋ nɔ ni wɔsumɔɔ lɛ ahe.—Kuku 16-18; Galatabii 6:7, 8.

Ani yiŋ ni wɔɔkpɛ lɛ kɔɔ Yehowa he eko? Hɛɛ! Nyɔŋmɔ kɛ emumɔ lɛ tsirɛ Mose ni eŋma akɛ: “Kɔ wala.” (Kuku 19) Shi te wɔɔfee tɛŋŋ wɔkɔ wala? Mose tsɔɔ mli akɛ: “[Suɔmɔ] Yehowa, o-Nyɔŋmɔ lɛ, ni obo egbee toi, ni okɛ ohe akpɛtɛ ehe.” (Kuku 20) Kɛ́ wɔná suɔmɔ wɔha Yehowa lɛ, wɔbaajɛ wɔtsuiŋ wɔbo lɛ toi ni wɔye lɛ anɔkwa yɛ nii fɛɛ mli. Kɛ́ wɔfee nakai lɛ, no tsɔɔ akɛ wɔkɔ wala—no ji shihilɛ gbɛ ni hi fe fɛɛ amrɔ nɛɛ, nɔ ni baaha wɔná gbɛkpamɔ akɛ wɔbaaná naanɔ wala yɛ Nyɔŋmɔ jeŋ hee ni baaba lɛ mli.—2 Petro 3:11-13; 1 Yohane 5:3.

Mose wiemɔi lɛ maa anɔkwa sane ko ni ma shi shiŋŋ nɔ mi kɛhaa wɔ. Ekɔɔɔ he eko shihilɛ fɛɛ shihilɛ ni okɛbaakpe yɛ jeŋ fɔŋ nɛɛ mli lɛ, ojeee mɔ ni nyɛŋ he nɔ ko afee; ni asaŋ no etsɔɔɔ akɛ onyɛŋ oye omanye kɔkɔɔkɔ. Yehowa eha bo hegbɛ ni ohala nɔ ni osumɔɔ, ni enɛ ji nikeenii ni ekɛduro bo. Hɛɛ, obaanyɛ okpɛ oyiŋ akɛ obaasumɔ Yehowa, obo lɛ toi, ni oye lɛ anɔkwa daa. Kɛ́ okɔ gbɛ ni tamɔ nɛkɛ lɛ, Yehowa baajɔɔ omɔdɛŋbɔi lɛ anɔ.

Anɔkwa sane nɛɛ—ni ji akɛ wɔ diɛŋtsɛ wɔbaanyɛ wɔkpɛ wɔyiŋ akɛ wɔbaasumɔ Yehowa ni wɔsɔmɔ lɛ lɛ—shɛje yoo ni atsĩ etã kɛtsɔ hiɛ lɛ mii. Ekɛɛ akɛ: “Misumɔɔ Yehowa waa. Bei komɛi lɛ, mihiɛ kpaa nɔ akɛ nɔ ni ye ebua mi titri ji anɔkwale ni eji akɛ misumɔɔ Yehowa lɛ. No hewɔ lɛ, manyɛ maye Yehowa anɔkwa.” Bo hu obaanyɛ ofee nakai yɛ Yehowa yelikɛbuamɔ naa.—w09-E 11/1.

[Shishigbɛ niŋmaa]