Misusu Akɛ Manyiɛ Shwiili Nane Nɔ Daa

Mɔ ni gba ji Zoya Dimitrova

Beni miye afii 15 lɛ, mishɛ oti ni mikɛma mihiɛ lɛ he—mifata kuu ko he ni wɔkɛ miishɛɛ miitu ajemelekutu ni wɔfãa gbɛ kɛyaa hei srɔtoi. Kɛkɛ ni yɛ September 4, 1970 lɛ, oshara ko ba. No mli lɛ mikɛ miishɛɛ miitu ajemelekutu kɛnyiɛ kɔɔyɔɔ lɛ mli. Beni mahɛle shi lɛ, mibatswa shikpɔŋ.

AFƆ mi December 16, 1952, ni mikɛ mifɔlɔi kɛ minyɛmiyoo kome hi Sofia yɛ Bulgaria. No mli lɛ Bulgaria yɛ Komunist nɔyeli shishi, ni eyɛ mli akɛ atsĩii jamɔ ko gbɛ moŋ, shi kɛlɛ awooo jamɔ he hewalɛ hu. Mɛi babaoo heee Nyɔŋmɔ nɔ amɛyeee, ni mɛi ni heɔ Nyɔŋmɔ nɔ amɛyeɔ lɛ hu kɛteɔ. Eyɛ mli akɛ mimami kɛ mipapa tsɛɔ amɛhe Ɔrtodɔksbii moŋ, shi amɛkɛ Nyɔŋmɔjamɔ tsɔseee mi, ni mijwɛŋŋ Nyɔŋmɔ he.

Kɛjɛ migbekɛbiiashi tɔ̃ɔ lɛ, minyaa kpɔiaŋgbɔlemɔ nifeemɔi ahe waa, titri lɛ ajemelekutu. Beni miye afii 13 lɛ, nuu ko ba wɔskul lɛ ní eetao oblayoo fioo ko koni atsɔse lɛ ní efata ajemelekutu tulɔi akuu ko he. Tsɔɔlɔ ni tsɔɔ wɔ ajemelekutu lɛ jie miyi eha nuu lɛ. Miyitsoŋ fɛɛ fuu mi beni nuu lɛ kɛ Amerikabii atsɔne gbĩi ko wó mi kɛtee koni ajemelekutu tsɔɔlɔi akuu ko ayata midaaŋ ní amɛka mi amɛkwɛ lɛ. Amɛhala mi, ni enɛ ha miná miishɛɛ waa. Nakai beaŋ abɔi mi tsɔsemɔ waa kɛha ajemelekutu lɛ tuu, ni enɛ he fe afii enyɔ. Atsɔse mi agbe naa beni miye afii 15, kɛkɛ ni mibɔi shwiili nane nɔ nyiɛmɔ—mikɛ ajemelekutu tulɔi akuu lɛ bɔi gbɛfãa. Shishijee mli lɛ, mikpa Bulgaria fɛɛ, ni no sɛɛ lɛ mitee maji komɛi ni yɔɔ tsutsu Soviet Union nɔyeli lɛ shishi lɛ anɔ, ni mitee Algeria, Hungary, kɛ tsutsu Yugoslavia po.

Beni mikɛ kuu nɛɛ tsu nii kɛ miishɛɛ afii etɛ lɛ, minu he akɛ mishɛ oti ni mikɛma mihiɛ lɛ he. Kɛkɛ ni gbi ko beni wɔmiitu ajemelekutu yɛ Titov Veles, yɛ Macedonia lɛ, oshara ni miwie he yɛ shishijee gbɛ lɛ ba. Mituɔ ajemelekutu lɛ kɛyaa ŋwɛi shɔŋŋ, ni no mli lɛ mɛi pii ebabua shi amɛmiikwɛ. Mɔ ni mikɛtuɔ lɛ tsotsoro ŋwɛi, ni eyitso miikwɛ shikpɔŋ, efɔ̃ɔ mi kɛyaa ŋwɛi kɛkɛ lɛ esɔo mi. Miyanyɛɛɛ enine mli mamɔ, ni kpãa ni akɛfi mi lɛ tse, ni mijɛ ŋwɛi mitai 6 mibatswa shi. Awó mi kpanyakpanya kɛtee helatsamɔhe, ni ayana yɛ jɛmɛ akɛ minine, miŋmawutsei saŋŋ, kɛ misɛɛ wu eku. Nɔ̃ nyɔ minɔ gbii fioo ko. Beni mihiɛ bɔi mi tserɛmɔ lɛ, miyɔse akɛ mikumɔ kɛjɛ mihɛ kɛyi shi. Shi akɛni midako tsɔ hewɔ lɛ, miha mihe tsui akɛ kɛ́ afee mi opireshɛŋ ni akɛ tsofa to he lɛ ebaahi, ni masaa manyiɛ ekoŋŋ ni ekolɛ manyɛ mabɔi ajemelekutu lɛ tuu po ekoŋŋ.

Yɛ afii enyɔ kɛ fã ni nyiɛ sɛɛ lɛ mli lɛ, afee mi tsofa yɛ helatsamɔhei srɔtoi, ni mihiɛ kã nɔ lolo akɛ mihe baawa mi. Shi beni be shwie  mli lɛ, mina akɛ minyɛŋ ajemelekutu lɛ matu dɔŋŋ. Mi ni kulɛ ‘minyiɛɔ shwiili nane nɔ daa’ lɛ, naa mi ni agbɛnɛ lɛ mita shwiili kroko moŋ mli daa—helatsɛmɛi ashwiili.

Mije Shihilɛ Kroko Shishi

Kɛ́ mikwɛ bɔ ni tsutsu ko lɛ miyaa mibaa lɛ, misusu akɛ migbe mijeŋ naa. Akɛni mihiɛnɔkamɔ fɛɛ tã hewɔ lɛ, mibatsɔ mɔ ko ni daa nɛɛ ehao. Kɛkɛ ni yɛ afi 1977 lɛ, oblanyo ko ni atsɛɔ lɛ Stoyan batswa mishinaa lɛ. Beni miná mile akɛ mikɛ enyɛmi ko etsu nii pɛŋ lɛ, oya nɔŋŋ ni miha lɛ sɛi. Beni wɔsanegbaa lɛ yaa nɔ lɛ, ebi mi kɛji mihiɛ kã nɔ akɛ mihe baawa mi. Akɛni minijiaŋ eje wui ni shihilɛ hu eje mitsine hewɔ lɛ, mito he akɛ hiɛnɔkamɔ ko kwraa bɛ. Beni eha mile akɛ Nyɔŋmɔ pɛ ji mɔ ni baanyɛ aye abua mi lɛ, mikɛ dɔlɛ bi akɛ, “Kɛ́ Nyɔŋmɔ ko yɛ lɛ, mɛni hewɔ mɔ ni miyɔɔ shihilɛ ni tamɔ nɛkɛ mli?”

Stoyan ŋɔ hegbɛ nɛɛ ni eto etsui shi egbála Biblia mli shiwoi ni yɔɔ miishɛɛ ni kɔɔ wɔsɛɛ shihilɛ he lɛ amli etsɔɔ mi. Tsutsu ko lɛ, lɛ hu etuɔ ajemelekutu yɛ United States, shi nyɛsɛɛ nɛɛ nɔŋŋ ebatsɔ Yehowa Odasefonyo. Le ni mibale akɛ etsɛŋ ni shikpɔŋ lɛ baatsɔ paradeiso lɛ ha miná miishɛɛ naakpa. Shi ni awo akɛ ‘gbele ehiŋ shi dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu ehiŋ shi dɔŋŋ’ lɛ ta mimli waa. (Kpojiemɔ 21:4) Miishwe gbi ni mihe baawa mi ekoŋŋ lɛ! Amrɔ nɔŋŋ ni mikpɛlɛ koni akɛ mi abakase Biblia lɛ daa. Enɛ ha mije shihilɛ kroko shishi. Agbɛnɛ lɛ, mibaná hiɛnɔkamɔ diɛŋtsɛ!

Mikɛ miishɛɛ kpaa Biblia lɛ ni akɛ mi bakaseɔ daa otsi lɛ gbɛ. Shishijee lɛ Stoyan kɛ mi kase nii, ni no sɛɛ lɛ Odasefonyo ko ni mli hi waa ni atsɛɔ lɛ Totka lɛ kɛ mi tsa nɔ. Totka ye ebua mi ni minu Biblia mli anɔkwale lɛ shishi oyayaayai, ni mijɔɔ miwala nɔ miha Yehowa Nyɔŋmɔ. No mli lɛ mɔ ko bɛ Sofia ni sa ni baanyɛ abaptisi mi, no hewɔ lɛ mimɛ kɛyashi nyɛmi nuu ko jɛ Macedonia ba. Beni mibɔi Biblia lɛ kasemɔ sɛɛ aaafee afi lɛ, abaptisi mi yɛ mihejuuhe lɛ yɛ nɔ ni mikãa mli kɛjuɔ mihe lɛ mli, yɛ September 11, 1978. Baptisimɔ ni abaptisi mi akɛ Yehowa Odasefonyo lɛ ha miná miishɛɛ naakpa, ni mishihilɛ bafee nɔ ni sa jogbaŋŋ agbɛnɛ.

Biblia mli anɔkwale lɛ ni mikase lɛ batsɔ tamɔ la ni miitso yɛ mimli. Mikɛ ekãa gba mɔ fɛɛ mɔ ni ba mishĩa lɛ hiɛnɔkamɔ hee ni miná lɛ. Dɔlɛ sane ji akɛ, mɔ ko mɔ ko kɛ nɔ ni miwieɔ lɛ tsuuu nii, ejaakɛ ekolɛ amɛsusu akɛ oshara ni miná lɛ etsɔ miyitsoŋ.

Mifee Nɔ ko ni Ehiii Kwraa

Nakai beaŋ lɛ, atsĩ Yehowa Odasefoi lɛ anaa yɛ Bulgaria, ni Odasefoi fioo ko pɛ yɔɔ maŋ lɛ mli. Afeee asafoŋ kpee ko kwraa yɛ he ni miyɔɔ lɛ, ni mikɛ Odasefoi krokomɛi efɔɔɔ sharamɔ. Enɛ kɛ yɔsemɔ ni miyayɔseee akɛ  oshara yɛ he akɛ mikɛ mɛi ni ehiii shi yɛ Biblia mli shishitoo mlai anaa lɛ aaabɔ lɛ ha mifee nɔ ko ni ehiii kwraa.

Mihenilee gba minaa waa, ni mina nɔ waa akɛni mitsi mihe kɛjɛ Yehowa Nyɔŋmɔ he lɛ hewɔ. Mitsui kumɔ ni mihiɛ gbo, no hewɔ lɛ misɔle ni mifɔse mitsuiŋ miha Yehowa, ni mikpa lɛ fai koni ekɛ mihe esha lɛ ake mi. Sɛɛ mli lɛ, asafoŋ onukpai lɛ jɛ suɔmɔ mli amɛye amɛbua mi ni wekukpãa kpakpa bakã mi kɛ Yehowa teŋ, ni mikɛ miishɛɛ bɔi lɛ sɔɔmɔ ekoŋŋ. Mihiɛ esɔ waa akɛ mikɛ henilee kpakpa miisɔmɔ Yehowa, ni mikɛ egbɛjianɔtoo ni he tse lɛ miibɔ!

Mije Kpa, shi Miyɛ Miishɛɛ

Oshara ni miná afii 40 ni eho nɛ lɛ ha oti ni mikɛma mihiɛ akɛ matu ajemelekutu ní mikɛfã gbɛ lɛ sɛɛ fo, ni eha mika helatsɛmɛi ashwiili mli. Ni kɛlɛ, miwerɛ hooo mihe ni mishwaaa mihe oookɛɛ nɔ ni sɛɛnamɔ bɛ mishihilɛ he. Biblia mli anɔkwale lɛ eye ebua mi ni miyɔse akɛ eji mitee nɔ mikɛ ajemelekutu tulɔi akuu lɛ tsu nii kulɛ, miishɛɛ ni maná lɛ sɛɛ etsɛŋ ni mitsui hu enyɔŋ mimli ekpakpa ko. Mɛi ni mikɛtsu nii ní tee nɔ amɛkɛ ajemelekutu tuu lɛ fee amɛnitsumɔ lɛ efee shwɛm yɛ shihilɛ mli, ni miina enɛ faŋŋ. Shi mi lɛ, miná mikɛ Yehowa Nyɔŋmɔ, ni ji mi-Bɔlɔ lɛ teŋ wekukpãa ni bɛŋkɛ kpaakpa, ni enɛ nɔ bɛ kwraa. Enɛ eha miná miishɛɛ ni nɔ bɛ, ni eji mitee nɔ mitu ajemelekutu lɛ kulɛ minaŋ miishɛɛ nɛɛ.

Kɛfata he lɛ, mɛi babaoo ebale Biblia mli anɔkwale lɛ ni amɛjɔɔ amɛwala nɔ amɛha Yehowa, wɔ-Nyɔŋmɔ ni yɔɔ suɔmɔ lɛ, ni enɛ ni minaa lɛ haa mitsui nyɔɔ mimli. Beni akɛ mi bɔi Biblia lɛ kasemɔ yɛ afi 1977 lɛ, no mli lɛ Yehowa Odasefoi fioo ko pɛ yɔɔ Bulgaria. Nyɛsɛɛ nɛɛ nɔŋŋ po beni Komunist nɔyeli lɛ gu, ni akɛ Yehowa Odasefoi anitsumɔ lɛ wo mla shishi klɛŋklɛŋ kwraa yɛ afi 1991 lɛ, no mli lɛ Odasefoi ni yɔɔ maŋ muu lɛ fɛɛ mli lɛ ayi shɛɛɛ 100. Bɔ ni Maŋtsɛyeli shiɛlɔi ni yɔɔ ŋmɛnɛ lɛ ayi miiya nɔ eefa ní amrɔ nɛɛ eeehe eshɛ 1,800 lɛ eha mitsui etɔ naakpa!

Nitsumɔ babaoo yɛ lolo ni esa akɛ atsu yɛ Bulgaria. Mɛi babaoo miitao ni amɛle Nyɔŋmɔ  Wiemɔ lɛ. Mɛi 3,914 ni ba Kristo gbele lɛ Kaimɔ lɛ yɛ afi 2010 lɛ yeɔ enɛ he odase faŋŋ. Kɛ́ mijwɛŋ odaseyeli nɛɛ ni tsɔɔ akɛ Yehowa ejɔɔ nitsumɔ ni aje shishi bibioo yɛ Bulgaria lɛ nɔ lɛ, mimii shɛɔ mihe naakpa. Mi diɛŋtsɛ miina gbalɛ ni yɔɔ Yesaia 60:22 lɛ mlibaa akɛ, “mɔ fioo hu” etsɔ “maŋ ni wa.”

Nɔ kroko hu ni haa mináa miishɛɛ ni mihiɛ kpaŋ nɔ hu ji New World Translation of the Holy Scriptures lɛ ni ajie lɛ kpo yɛ Bulgaria wiemɔ mli lɛ. Ajie lɛ kpo yɛ “Nyɛyaa Nɔ Nyɛsaraa!” Kpokpaa Wulu nɔ Kpee ni afee yɛ Sofia yɛ August 2009 lɛ shishi. Mishwe aahu akɛ ajie Biblia nɛɛ kpo yɛ mimaŋ wiemɔ mli! Ŋwanejee ko bɛ he akɛ, akɛbaatsu nii waa kɛye abua mɛi babaoo koni amɛbale Biblia mli anɔkwale lɛ yɛ Bulgaria.

Eyɛ mli akɛ minyɛɛɛ Nyɔŋmɔ Maŋtsɛyeli lɛ he sanekpakpa lɛ mashiɛ tsɔ akɛni mije kpa lɛ hewɔ moŋ, shi eŋɔɔ minaa waa akɛ mikɛ mikutsoŋbii lɛ kɛ mɛi fɛɛ ni baa mishĩa lɛ gbaa Biblia mli anɔkwale lɛ he sane. Be ko beni mita mitsu lɛ sɛɛ lɛ, mina mikutsoŋnyo ko miiho ni mitsɛ lɛ. Eba, ni mikɛ lɛ gba Biblia lɛ mli saji babaoo ni woɔ mɔ hewalɛ, oya nɔŋŋ kɛkɛ ni ekpɛlɛ koni mikɛ lɛ akase Biblia lɛ daa. Sɛɛ mli lɛ, abaptisi lɛ ni ebatsɔ mimumɔŋ nyɛmi yoo, ni miishɛɛ ni miná lɛ teke nɔ. Miye mibua mɛi ejwɛ ni amɛjɔɔ amɛwala nɔ amɛha Yehowa.

Ekolɛ nɔ titri ni haa mináa miishɛɛ ní woɔ mi hewalɛ ji akɛ mikɛ nyɛmimɛi ni fa fe 100 ní amɛbatsɔ miweku lɛ yaa Kristofoi akpeei daa. Akɛni tsɔji ni yɔɔ Bulgaria lɛ bɛ lɛ bɔ ni abaanyɛ akɛhole helatsɛmɛi kɛ mɛi ni egbɔlɔ hewɔ lɛ, ewaa kɛhaa mi akɛ maya asafoŋ kpeei. Shi mihiɛ sɔɔ bɔ ni nyɛmi nuu fioo ko jieɔ suɔmɔ kpo etsɔɔ mi lɛ waa. Be fɛɛ be kɛ́ abaaya asafoŋ kpee lɛ, ewóɔ mi kɛjɛɔ mitsu lɛ mli kɛyawoɔ etsɔne lɛ mli, ni kɛ́ wɔyashɛ lɛ, ewóɔ mi kɛjɛɔ tsɔne lɛ mli kɛyaa Maŋtsɛyeli Asa lɛ nɔ, ni efeɔ nakai nɔŋŋ kɛ́ akpa. Miida Yehowa shi waa akɛ mifata mumɔŋ weku ni suɔmɔ eyi mli tɔ nɛɛ he!

Miina akɛ amrɔ nɛɛ esoro mishihilɛ kwraa yɛ shihilɛ ni mitiu sɛɛ beni miji oblayoo fioo lɛ he. Yehowa sɔɔmɔ eha amrɔ nɛɛ miyɛ miishɛɛ waa, ni miyɛ hiɛnɔkamɔ kpakpa hu kɛha wɔsɛɛ. Minyaa shi ni Nyɔŋmɔ ewo akɛ “obubuafoi aaatumɔ akɛ ofrote” yɛ shikpɔŋ nɔ paradeiso mli lɛ he waa. (Yesaia 35:6) Mikɛ nɔmimaa miikpa gbi ni abaatsa mi ní mikɛ hewalɛ baatu kɛjɛ mishwiili lɛ mli kɛyi shi geleŋ lɛ gbɛ.

[Wiemɔ ni akɔ ni akɛmiitsu nii ni yɔɔ baafa 20]

‘Nɔ titri ni haa mináa miishɛɛ ní woɔ mi hewalɛ ji akɛ miyaa Kristofoi akpeei daa’

[Wiemɔ ni akɔ ni akɛmiitsu nii ni yɔɔ baafa 21]

‘Nɔ ko ni mihiɛ kpaŋ nɔ ji New World Translation of the Holy Scriptures lɛ ni ajie lɛ kpo yɛ Bulgaria wiemɔ mli lɛ’

[Mfoniri ni yɔɔ baafa 19]

Mibɔi ajemelekutu lɛ tuu beni miye afii 15