Ani Ehe Miihia ni Ole Hetoi Lɛ?

“Nyɛaale anɔkwale lɛ, ni anɔkwale lɛ aaaha nyɛye nyɛhe.”—YOHANE 8:32.

BIBLIA mli anɔkwalei lɛ baanyɛ aha wɔye wɔhe kɛjɛ Yesu he tsɔɔmɔi ni futuɔ mɔ yiŋ loo ehe amale tsɔɔmɔi po ahe. Shi ani nibii ni oheɔ oyeɔ yɛ Yesu he lɛ he miihia? Hɛɛ, ehe miihia. Ehe miihia Yehowa. Ehe miihia Yesu. Ni esa akɛ ehe ahia wɔ hu.

● Mɛni hewɔ ehe hiaa Yehowa? Ejaakɛ “Nyɔŋmɔ lɛ, suɔmɔ ji lɛ,” kɛ́ wɔɔfo lɛ kuku. (1 Yohane 4:8) Yehowa miisumɔ ni wɔná miishɛɛ yɛ shihilɛ mli kɛya naanɔ. Yesu kɛɛ akɛ: “Nɛkɛ Nyɔŋmɔ sumɔ je lɛ [ni ji adesai], akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ . . . ená naanɔ wala.” (Yohane 3:16) Nyɔŋmɔ tsu e-Bi lɛ koni ebakpɔ̃ wɔ, ní egbele gbɛ eha wɔ ni wɔhi shi kɛya naanɔ yɛ Paradeiso yɛ shikpɔŋ lɛ nɔ, taakɛ E-yiŋtoo ji kɛjɛ shishijee lɛ. (1 Mose 1:28) Nyɔŋmɔ miisumɔ waa ni ekɛ naanɔ wala ake mɛi fɛɛ ni kaseɔ anɔkwalei ni kɔɔ e-Bi lɛ he ni amɛhiɔ shi yɛ naa lɛ.—Romabii 6:23.

● Mɛni hewɔ ehe hiaa Yesu? Ejaakɛ Yesu hu sumɔɔ adesai. Ejie hekɛafɔleshaa suɔmɔ kpo kɛtsɔ esuɔmɔ mli ni ejɛ ekɛ ewala ŋmɛ shi eha wɔ lɛ nɔ. (Yohane 15:13) Ele akɛ nakai feemɔ nɔ ebaatsɔ egbele gbɛ kome pɛ ni kɛ mɔ yaa yiwalaheremɔ mli lɛ. (Yohane 14:6) Ani esa akɛ efee wɔ naakpɛɛ akɛ Yesu miisumɔ ni mɛi babaoo aná ekpɔmɔ afɔleshaa lɛ he sɛɛ? No hewɔ ni efã enɔkwa sɛɛnyiɛlɔi lɛ koni amɛtsɔɔ mɛi ni yɔɔ jeŋ fɛɛ lɛ Nyɔŋmɔ suɔmɔnaanii kɛ eyiŋtoo lɛ he nii lɛ.—Mateo 24:14; 28:19, 20.

● Mɛni hewɔ esa akɛ ehe ahia wɔ? Hemɔ be fioo kɛsusu nibii ni kã otsui nɔ waa—ogbɔmɔtsoŋ hewalɛnamɔ kɛ oweku—lɛ he okwɛ. Ani oosumɔ ni oná gbɔmɔtsoŋ hewalɛ kpakpa ní nibii ahi jogbaŋŋ kɛha bo kɛ osuɔlɔi? Yehowa miitsɔ Yesu nɔ eeha bo kɛ osuɔlɔi aná hiɛnɔkamɔ akɛ nyɛbaahi shi ni hela mɔɔɔ nyɛ, ni nyɛbaaná wala ni sɛɛ efooo yɛ jeŋ hee ni piŋmɔ kɛ nɔnaa bɛ mli lɛ mli. (Lala 37:11, 29; Kpojiemɔ 21:3, 4) Ani obaasumɔ ni ohi shi yɛ jeŋ ni tamɔ nɛkɛ mli? Kɛ́ nakai ni lɛ, belɛ nɔ ko yɛ ni esa akɛ ofee.

Susumɔ ŋmalɛ ni aŋma yɛ saneyitso lɛ shishi lɛ he ekoŋŋ okwɛ: “Nyɛaale anɔkwale lɛ, ni anɔkwale lɛ aaaha nyɛye nyɛhe.” Anɔkwale ni kɔɔ Yesu he kɛ gbɛfaŋnɔ ni etsuɔ yɛ Nyɔŋmɔ yiŋtoo mli lɛ baanyɛ aha wɔye wɔhe kɛjɛ esha kɛ gbele, ni ji nibii ni ŋɔɔ wɔ nom lɛ ateŋ nɔ ni ehiii fe fɛɛ lɛ dɛŋ. Shi kɛ́ obaanyɛ oye ohe kɛjɛ nibii nɛɛ ahe lɛ, no lɛ esa akɛ ‘ole anɔkwale lɛ.’ Mɛni hewɔ okaseee anɔkwale nɛɛ, kɛ bɔ ni bo kɛ osuɔlɔi aaafee aná he sɛɛ lɛ he nii babaoo? Yehowa Odasefoi baaná he miishɛɛ akɛ amɛaaye amɛbua bo ni ofee nakai.