Biblia lɛ gbalaa wɔjwɛŋmɔ kɛyaa yiŋtoi enyɔ anɔ. Klɛŋklɛŋ lɛ, eyɛ mli akɛ adesai enyɛ efee nibii ni haa mɔ naa kpɛɔ ehe moŋ, kɛlɛ abɔɔɔ adesai koni amɛ diɛŋtsɛ amɛjaje amɛnajifaamɔi. Nɔ ni ji enyɔ lɛ, gbɛjianɔi ni adesai toɔ lɛ nyɛɛɛ aye omanye, ejaakɛ “jeŋ muu lɛ fɛɛ yɛ efɔŋ nɔyeli,” ni ji Satan Abonsam nɔyeli “shishi.” No hewɔ lɛ, adesai amɔdɛŋbɔi nyɛko ekɛ toiŋjɔlɛ aba je lɛŋ fɛɛ.—Kanemɔ Yeremia 10:23; 1 Yohane 5:19, Ga Biblia hee.

Adesa ŋkomeŋfa su kɛ ninámɔ loo hegbɛi asɛɛtiumɔ veveeve lɛ hu fata he ni anyɛko aná toiŋjɔlɛ yɛ jeŋ fɛɛ lɛ. Dani abaanyɛ aná toiŋjɔlɛ yɛ je lɛŋ fɛɛ lɛ, ja aná jeŋ nɔyeli ni baanyɛ aye abua mɛi koni amɛsumɔ jalɛnifeemɔ, ni amɛfó mɛi krokomɛi anɔ̃ mli hu.—Kanemɔ Yesaia 32:17; 48:18, 22.

Nyɔŋmɔ Ofe lɛ ewo shi akɛ, ebaato nɔyeli kome shishi, ni no baaye adesai fɛɛ anɔ. Nɔyeli nɛɛ baaye adesai anɔyelii lɛ anajiaŋ. (Daniel 2:44) Yesu, ni ji Nyɔŋmɔ Bi lɛ baaye nɔ akɛ Hejɔlɛ loo Toiŋjɔlɛ Lumɔ. Ebaajie nifɔjianii fɛɛ kɛjɛ shikpɔŋ lɛ nɔ, ni ebaaye ebua gbɔmɛi koni amɛtiu toiŋjɔlɛ sɛɛ.—Kanemɔ Yesaia 9:6, 7; 11:4, 9.

Amrɔ nɛɛ po lɛ, yɛ Yesu gbɛtsɔɔmɔ shishi lɛ, mɛi akpekpei abɔ kɛ Nyɔŋmɔ Wiemɔ, ni ji Biblia lɛ miitsu nii kɛmiitsɔɔ mɛi bɔ ni amɛbaafee amɛkɛ mɛi ahi shi yɛ toiŋjɔlɛ mli yɛ jeŋ fɛɛ. Etsɛŋ kwraa, abaaná jeŋ muu fɛɛ toiŋjɔlɛ lɛɛlɛŋ.—Kanemɔ Yesaia 2:3, 4; 54:13.