Biblia lɛ kɛɔ akɛ: “Kɛ́ mɔ fɔŋ miiye lumɔ lɛ, maŋ dɔmɔɔ ŋtsɔi.”—Abɛi 29:2.

Yinɔsane mli eyi obɔ kɛ nɔyelɔi ni kɛ yiwalɛ ye nɔ, ni no ha amɛshishibii na nɔ lɛ ahe saji. Kɛlɛ, jeee nɔyelɔi fɛɛ ayitseiaŋ wala. Ekolɛ, amɛteaŋ mɛi komɛi hiɛ amɛmaŋbii lɛ ahe jwɛŋmɔ kpakpa. Kɛlɛ, kɛ́ amɛbɔi nɔyeli lɛ, bei pii lɛ amɛnaa akɛ naagbai ni yaa nɔ yɛ amɛnɔyeli lɛ mli lɛ, kɛ nɔyeli hegbɛ hepelemɔ haaa amɛnyɛ amɛtsu amɛyiŋtoi ahe nii. Aloo ekolɛ amɛkɛ hegbɛ lɛ tsuuu nii jogbaŋŋ, amɛfoɔ amɛ pɛ amɛnɔ mli, ni amɛkuɔ amɛhiɛ amɛshwieɔ maŋbii lɛ anɔ. U.S. Maŋsɔɔlɔ Nukpa Henry Kissinger kɛɛ akɛ: “Yinɔsane mli eyi obɔ kɛ mɔdɛŋbɔi ni efee yaka kɛ hiɛnɔkamɔi ni eyabaaa mli.”

Biblia lɛ hu feɔ lɛ faŋŋ akɛ: “Adesa ní nyiɛ nɛɛ, bɔ ni eeetsɔ ejaje enajifaamɔi eha lɛ, ebɛ edɛŋ.” (Yeremia 10:23) Akɛni adesai yeee emuu hewɔ lɛ, amɛbɛ nilee kɛ hiɛshikamɔ ni he hiaa ni amɛkɛbaatsu amɛsaji ahe nii ni amɛye omanye. Kɛ́ mɛi nyɛɛɛ amɛkudɔ amɛ diɛŋtsɛ amɛnajifaamɔi lɛ, te amɛbaafee tɛŋŋ amɛkudɔ maŋ muu fɛɛ nɔ hu? Agbɛnɛ, bɛ oona nɔ hewɔ ni adesa nɔyelɔi bɛ nyɛmɔ ni amɛkɛbaajie nɔnaa kɛjɛ shihilɛ mli lɛ? Anɔkwa, efɔɔ kaa akɛ, maŋkwramɔ gbonyo, loo nɔyeli gbonyo ji nɔ ni haa gbɔmɛi naa nɔ!

Yesu kɛɛ akɛ: “Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.”—Yohane 13:35.

Jamɔŋ hiɛnyiɛlɔi ni yɔɔ lɛ fɛɛ shiɛɔ kɛkɔɔ suɔmɔ kɛ ekomefeemɔ he. Shi anɔkwa sane lɛ ji akɛ, amɛnyɛko amɛdu suɔmɔ amɛwo amɛsɛɛnyiɛlɔi lɛ amli bɔ ni baaha amɛkwa niiamlijiemɔ. Nɔ najiaŋ ni jamɔ baaye abua mɛi koni amɛná suɔmɔ lɛ, efɔɔ kaa akɛ efeɔ nibii ni kɛ mligbalamɔ, hetsɛ̃, kɛ bei baa mɛi kɛ maji ateŋ. Beni osɔfo ko ni atsɛɔ lɛ Hans Küng lɛ muɔ ewolo ko (Christianity and the World Religions) naa lɛ, eŋma akɛ: “Jamɔi ji mɛi ni hɔ maŋkwramɔ hepelemɔi ni efite nii fe fɛɛ, ni eye awui fe fɛɛ ni eba pɛŋ lɛ asɛɛ nigii, loo amɛkɛ amɛhe ewo mli, loo amɛfi sɛɛ kpetekpelee.”

 Kɛfata he lɛ, jamɔŋ hiɛnyiɛlɔi babaoo kpɛlɛɔ bɔlɛnamɔ ni tsɔɔ gbalashihilɛ hiɛ, hefatalɔ sɛɛ ni ajeɔ akɛ mɔ kroko náa bɔlɛ, kɛ nuu kɛ nuu loo yoo kɛ yoo teŋ bɔlɛnamɔ nɔ yɛ faŋŋ mli. Enɛ kɛ helai, hɔkpɔmɔ, hɔ ni akpaaa gbɛ, gbalashihilɛ kɛ wekui ni mli gbalaa eba, ni eha piŋmɔi kɛ nɔnai efa babaoo.

“Mɔ fɛɛ mɔ lɛ, lɛ diɛŋtsɛ ekɔnɔ ni gbalaa lɛ ni lakaa lɛ lɛ kaa lɛ. No sɛɛ lɛ akɔnɔ lɛ, kɛ́ eŋɔ hɔ lɛ, efɔɔ esha.”—Yakobo 1:14, 15.

Akɛni afɔ wɔ fɛɛ akɛ mɛi ni yeee emuu hewɔ lɛ, wɔtɔ̃ɔ ni wɔfeɔ esha, ni ehe bahia ni wɔwuu wɔshi shwelɛ ni wɔnáa akɛ ‘wɔfee nii ni heloo lɛ sumɔɔ lɛ.’ (Efesobii 2:3) Ewa waa akɛ abaakpoo akɔnɔ fɔŋ, titri lɛ kɛ́ ebalɛ akɛ aná hegbɛ ni akɛbaatsu he nii. Kɛ́ wɔŋmɛɛ wɔhe wɔha akɔnɔi gbohii lɛ, nɔ ni baajɛ mli aba lɛ baanyɛ afite nii waa.

Woloŋmalɔ P. D. Mehta ŋma akɛ: “Nɔnai ni wɔkɛkpeɔ lɛ amli tsiimɔ jɛɔ wɔ diɛŋtsɛ wɔshwelɛi ni wɔnáa, miishɛɛ sɛɛ ni wɔtiuɔ kɛ wɔkɔnɔi ni wɔnyɛɛɛ wɔkudɔ, wɔhiɛjoomɔ kɛ wɔhiɛkɔɔ.” Shwelɛi ni anáa ahaa nibii gbohii kɛ sui gbohii fɛɛ ni kaa mɔ he lɛ—dãa, tsofai, asɔshwɛmɔ, bɔlɛnamɔ, kɛ ekrokomɛi—efite “hiɛnaanɔbii” komɛi ashihilɛ, ni eha amɛwekui, amɛnanemɛi, kɛ mɛi krokomɛi miina nɔ waa. Yɛ emuu ni adesai yeee hewɔ lɛ, esa akɛ wɔkɛ sane ni Biblia lɛ wieɔ nɛɛ akpã gbee, ekɛɛ akɛ: “Mɔ fɛɛ mɔ ni yɔɔ hiŋmɛi lɛ naa akɛ, amrɔ nɛɛ bɔɔnii fɛɛ ni yɔɔ je lɛŋ he fɛɛ he lɛ dɔmɔɔ ŋtsɔi ni amɛkɔmɔɔ.”—Romabii 8:22, The New Testament in Modern English, ni J. B. Phillips tsɔɔ shishi lɛ.

Biblia lɛ haa anáa akɛ Satan ji “je nɛŋ nyɔŋmɔ lɛ,” ni ákɛ mumɔi fɔji ni yɔɔ hewalɛ ni atsɛɔ amɛ daimonioi lɛ fata ehe.—2 Korintobii 4:4; Kpojiemɔ 12:9.

Taakɛ eji yɛ Satan gbɛfaŋ lɛ, daimonioi lɛ hu miiná gbɔmɛi anɔ hewalɛ waa ni amɛmiilaka amɛ. Bɔfo Paulo yɔse enɛ ni eŋma akɛ: “Jeee heloo kɛ lá wɔkɛna nɔmɔ lɛ, shi moŋ wɔkɛ onukpayelii kɛ hegbɛi kɛ je nɛŋ lumɛi ni yɔɔ benɛ be duŋ lɛ mli lɛ, kɛ mumɔi fɔji asafo ni yɔɔ ŋwɛiniiaŋ lɛ.”—Efesobii 6:12.

Eyɛ mli akɛ daimonioi lɛ amii shɛɔ amɛhe akɛ amɛmiihao gbɔmɛi moŋ, shi jeee no ji oti ni ma amɛhiɛ. Nɔ ni kã amɛtsui nɔ ji ni amɛtsi gbɔmɛi kɛjɛ Nyɔŋmɔ Ofe, ni ji Yehowa lɛ he. (Lala 83:19) Nifeemɔi tamɔ ŋulamiiaŋkwɛmɔ, ashwãifeemɔ, ŋkunyaayeli, kɛ kalamɔ ji nibii ni daimonioi lɛ kɛtsuɔ nii kɛlakaa mɛi ni amɛkɛnáa amɛnɔ hewalɛ lɛ ateŋ fioo kɛkɛ. Enɛ hewɔ ni Yehowa hɛleɔ wɔ shi yɛ nakai osharai lɛ ahe koni ekɛbu mɛi fɛɛ ni teɔ shi woɔ Satan kɛ daimonioi lɛ ahe lɛ.—Yakobo 4:7.

Aaafee afii akpei enyɔ ni eho nɛ lɛ, Biblia lɛ gba akɛ: “Ná enɛ ole akɛ naagbee gbii lɛ anɔ lɛ jaramɔ bei baaba.”

Beni Biblia lɛ tsɔɔ nɔ ni haa efeɔ jaramɔ bei lɛ, etee nɔ ewie akɛ: “Ejaakɛ gbɔmɛi aaatsɔmɔ hesuɔlɔi, shika suɔlɔi, shwãlɔi, hewolɔi, . . . mɛi ni edɔɔɔ mɔ he, kpaŋmɔ mlikulɔi, oshekuyelɔi, mɛi ni nyɛɛɛ amɛkɔnɔ nɔ amɛye, mɛi ni hiɛ yɔɔ la, mɛi ni sumɔɔɔ ekpakpa, sɛɛgbɛtsɔɔlɔi, yiwalɔi, henɔwolɔi, mɛi ni sumɔɔ shwɛmɔ kɛ ŋɔɔmɔ fe Nyɔŋmɔ.” Ekã shi faŋŋ akɛ, yiŋtoo titri hewɔ ni wɔnaa nɔnai fɛɛ ni yaa nɔ lɛ ji akɛ wɔyɛ “naagbee gbii lɛ” amli.—2 Timoteo 3:1-4.

Aso otii ni wɔsusu he nɛɛ hako ona nɔ hewɔ ni yɛ adesai ayiŋtoo kpakpai lɛ fɛɛ sɛɛ lɛ, amɛnyɛko amɛfo nɔnaa sɛɛ lɛ? Belɛ nɛgbɛ wɔbaaya kɛha yelikɛbuamɔ mɔ? Esa akɛ wɔkɛ wɔhiɛ afɔ̃ wɔ-Bɔlɔ lɛ, mɔ ni ewo shi akɛ ‘ebaafite Abonsam’ kɛ esapatei lɛ ‘anitsumɔi lɛ’ nɔ. (1 Yohane 3:8) Sane ni nyiɛ sɛɛ lɛ baatsɔɔ nɔ ni Nyɔŋmɔ baafee koni ekɛjie nibii fɛɛ ni kɛ nɔnaa baa lɛ kɛjɛ shihilɛ mli.