YESU kɛ ŋmɛlɛtswai babaoo epiŋ yɛ sɛŋmɔtso lɛ nɔ ni egbo. Maria kula shi, sane lɛ edɔlɛ aahu akɛ elé nɔ ni ebaawie po. Bo ni ebinuu lɛ bo waa dani egbo lɛ miigbɛɛ yɛ etoiiaŋ lolo. Shwane ŋmɛlɛ 12 pɛ atswa, shi duŋ ewo. Ni amrɔ nɛɛ shikpɔŋ lɛ miihoso waa. (Mateo 27:45, 51) Ekolɛ, yɛ Maria hiɛ lɛ, efee tamɔ nɔ ni Yehowa diɛŋtsɛ miihã jeŋ fɛɛ ale akɛ, Yesu Kristo gbele lɛ edɔlɛ waa fe mɔ fɛɛ mɔ.

Nakai shwane lɛ, Maria ye awerɛho yɛ ebinuu lɛ he, be ni jeŋ tseɔ ekoŋŋ yɛ Golgota, loo Yitsoŋoŋohe lɛ. (Yohane 19:17, 25) Eeenyɛ efee akɛ ebinuu lɛ sane bayi ejwɛŋmɔŋ. Ekolɛ ekai sane ko ni tee nɔ aaafee afii 33 ni eho. Be ni ekɛ Yosef kɛ amɛbi ni amɛshwɛɛɛ ehe kwraa lɛ etee sɔlemɔwe lɛ yɛ Yerusalem lɛ, akɛ mumɔ etsirɛ nuumo ko ni atsɛɔ lɛ Simeon ni egba gbalɛ ko. Egba akɛ Yesu baafee nibii kpelei, shi ekɛfata he akɛ, be ko baashɛ ni Maria baanu he tamɔ nɔ ni akɛ tsi egbu emli. (Luka 2:25-35) Amrɔ nɛɛ ni ebinuu lɛ egbo nɛɛ, kpaako enu anɔkwa wiemɔi nɛɛ ashishi jogbaŋŋ.

Mɛi kɛɔ akɛ nɔ ko ni wa waa, ni dɔɔ mɔ fe fɛɛ ni mɔ ko baanyɛ ekɛkpe ji ni ebi baagbo. Gbele ji henyɛlɔ ko ni yitsoŋ wa waa, ni eye wɔteŋ mɔ fɛɛ mɔ awui yɛ gbɛ ko nɔ. (Romabii 5:12; 1 Korintobii 15:26) Ani wɔbaanyɛ wɔkpee awui ni gbele yeɔ wɔ lɛ naa? Wɔbaasusu nibii ni tee nɔ yɛ Maria shihilɛ mli kɛjɛ be ni Yesu bɔi esɔɔmɔ nitsumɔ lɛ kɛyashi be ni agbele lɛ lɛ kɛ no sɛɛ fioo lɛ he. Enɛ baahã wɔkase Maria hemɔkɛyeli lɛ he saji pii. Hemɔkɛyeli nɛɛ ji nɔ ni wa lɛ ni enyɛ ekpee shihilɛ ni jaraa waa ni ekɛkpe lɛ naa.

Nyɛhãa wɔkɛ wɔjwɛŋmɔ ayaa nɔ ni tee nɔ afii etɛ kɛ fã dani Yesu baagbo lɛ nɔ. Maria nu he akɛ etsɛŋ ni eshihilɛ baatsake. Yɛ Nazaret maŋ ni edaaa lɛ mli po lɛ, mɛi miiwie Yohane Baptisilɔ lɛ kɛ tsui tsakemɔ sane ni kanyaa mɔ ni eshiɛɔ lɛ he. Maria na akɛ ebinuu nukpa lɛ bu shiɛmɔ nɛɛ akɛ okadi ni tsɔɔ akɛ be eshɛ ni ebaaje esɔɔmɔ lɛ shishi. (Mateo 3:1, 13) Kɛ́ Yesu shi shĩa lɛ, Maria kɛ weku lɛ mli bii krokomɛi ni eshwɛ lɛ ashihilɛ baatsake kwraa. Mɛni hewɔ?

Eeenyɛ efee akɛ, no mli lɛ Yosef, ni ji Maria wu lɛ, egbo momo. Kɛ́ nakai ni lɛ, belɛ, gbele jeee nɔ ko hee kɛhã Maria. * Amrɔ nɛɛ jeee “ŋaalɔ lɛ bi” pɛ ji gbɛ́i ni akɛle Yesu, shi ale lɛ hu akɛ “ŋaalɔ” lɛ. Ekã shi faŋŋ akɛ, Yesu emɔ etsɛ nitsumɔ lɛ mli ni bianɛ lɛ lɛ ji mɔ ni kwɛɔ emami kɛ enyɛmimɛi bibii lɛ; no mli lɛ, kɛ́ hooo lɛ eyɛ nyɛmimɛi ekpaa loo nɔ ni fe nakai. (Mateo 13:55, 56; Marko 6:3) Kɛ́ Yesu tsɔɔ Yakobo, ni ji binuu nukpa yɛ esɛɛ lɛ, ni lɛ ekwɛ nitsumɔ lɛ nɔ po lɛ, shi ni Yesu, ni ji amɛnyɛmi nukpa lɛ shiɔ lɛ efeŋ mlɛo kɛhaŋ weku lɛ. Ani ekolɛ Maria ye etsui yɛ Yesu shimɔ lɛ he, akɛni sɔ̃i pii jwere enɔ momo lɛ hewɔ? Wɔnyɛŋ wɔtsɔɔ. Shi sanebimɔ ko ni he hiaa waa ji: Te ebaafee enii ehã tɛŋŋ kɛ́ ená ele akɛ Yesu ni jɛ Nazaret lɛ ebatsɔ Yesu Kristo ni ji shiwoo Mesia ni awie ehe kɛjɛ blema lɛ? Biblia mli sane ko baaye abua wɔ ni wɔná sanebimɔ nɛɛ hetoo.—Yohane 2:1-12.

 Yesu tee Yohane ŋɔɔ ni ebaptisi lɛ, no sɛɛ lɛ ebatsɔ Mɔ ni Nyɔŋmɔ Efɔ lɛ Mu lɛ, loo Mesia lɛ. (Luka 3:21, 22) No sɛɛ lɛ, ebɔi ekaselɔi lɛ halamɔ. Eyɛ mli akɛ dekã bɛ enitsumɔ lɛ he kwraa moŋ, shi ehe be ni ekɛ eweku lɛ kɛ enanemɛi fee ekome kɛná miishɛɛ yɛ nifeemɔi komɛi ashishi. Be ko lɛ, Yesu, emami, ekaselɔi lɛ, kɛ enyɛmimɛi hii lɛ, tee yookpeemɔ ko shishi yɛ Kana. Eeenyɛ efee akɛ Kana nɛɛ yɛ gɔŋ nɔ ni ekɛ Nazaret teŋ jekɛmɔ aaafee kilomitai 13. Be ni nifeemɔ lɛ yaa nɔ lɛ, Maria na akɛ naagba ko eba. Ekolɛ ena akɛ gbalashilɛ mli hefatalɔi lɛ wekumɛi lɛ ekomɛi atsui miiye, amɛmiikwɛkwɛɛ amɛhiɛ ni amɛmiiwiewie ablɛbiaŋ amɛmiitsɔɔtsɔɔ amɛhe. Amɛwein lɛ etã! Yɛ Yudafoi akusum naa lɛ, kɛ́ wein tã yɛ nifeemɔ ko ni tamɔ nɛkɛ shishi lɛ, ekɛ hiɛgbele baa weku ni feɔ nii lɛ nɔ, ni efiteɔ nifeemɔ lɛ. Maria nu he ehã amɛ ni etee eyana Yesu.

Ekɛɛ ebinuu lɛ akɛ, “Amɛbɛ wein.” Wɔlé nɔ ni kulɛ Maria taoɔ ni Yesu afee; shi ele akɛ ebinuu lɛ ji gbɔmɔ wulu ni baafee naakpɛɛ nii. Ekolɛ esusu akɛ Yesu baabɔi naakpɛɛ nii lɛ feemɔ amrɔ nɔŋŋ. Yɛ gbɛ ko nɔ lɛ, ekɛɛ Yesu akɛ, “Mibi feemɔ he nɔ ko!” Ekolɛ hetoo ni Yesu hã lɛ lɛ hã ehiɛ fee lɛ yaa. Ekɛɛ lɛ akɛ: “Mɛɛ sane mikɛo yɔɔ, awó?” Mɛi komɛi susuɔ akɛ nɔ ni Yesu wie lɛ etsɔɔɔ bulɛ, shi jeee nakai sane lɛ ji. Kɛ̃lɛ, ejɛ bulɛ mli ejaje ejwɛŋmɔ. Yesu miikai emami akɛ jeee lɛ ji mɔ ni esa akɛ etsɔɔ lɛ bɔ ni esa akɛ etsu esɔɔmɔ nitsumɔ lɛ ehã; e-Tsɛ, Yehowa, ji mɔ ni yɔɔ hegbɛ akɛ efeɔ nakai.

Akɛni Maria ji yoo ni nuɔ nii ashishi ni ebaa ehe shi hewɔ lɛ, ekpɛlɛ jajemɔ ni Yesu jaje lɛ lɛ nɔ. Etsɔ̃ ehe ehã tsuji ni woɔ wein lɛ ni ekɛɛ amɛ akɛ: “Nɔ fɛɛ nɔ ní eeekɛɛ nyɛ lɛ, nyɛfea.” Maria na akɛ jeee lɛ esa akɛ etsɔɔ ebinuu lɛ nɔ ni esa akɛ efee dɔŋŋ; no najiaŋ lɛ esa akɛ lɛ kɛ mɛi krokomɛi abo Yesu toi ni amɛfee nɔ ni ebaakɛɛ amɛ lɛ. Bɔ ni Maria nu he ehã mɛi ni boteɔ gbalashihilɛ lɛ mli lɛ, nakai nɔŋŋ Yesu hu nu he ehã amɛ. Ehã nu tsɔ wein, ni enɛ ji klɛŋklɛŋ naakpɛɛ nii ni efee. Mɛni jɛ mli kɛba? “Ekaselɔi lɛ he enɔ amɛye.” Maria hu he Yesu nɔ eye. Ena lɛ akɛ e-Nuŋtsɔ kɛ e-Yiwalaherelɔ shi jeee akɛ ebi kɛkɛ.

Ŋmɛnɛ lɛ, fɔlɔi baanyɛ akase nibii pii kɛjɛ Maria hemɔkɛyeli lɛ mli. Mɔ ko tsɔseko bi ni eye emuu tamɔ Yesu pɛŋ. Shi fɛɛ sɛɛ lɛ, kɛ́ gbekɛ ko da ni ebatsɔ onukpa lɛ, bei komɛi lɛ ekɛ naagbai baa. Bei komɛi lɛ, fɔlɔi komɛi kɛ amɛbii ni edara lɛ yeɔ oookɛɛ gbekɛbii ji amɛ, tsɛbelɛ esaaa akɛ amɛfeɔ nakai. (1 Korintobii 13:11) Mɛni fɔlɔi baanyɛ afee kɛye abua amɛbii ni edara lɛ? Nɔ kome ni amɛbaanyɛ amɛfee ji, ni amɛaahã amɛbii ni yeɔ anɔkwa lɛ ale akɛ amɛheɔ amɛyeɔ akɛ amɛbaaya nɔ amɛhi shi yɛ nibii ni amɛkase kɛjɛ Biblia lɛ mli lɛ anaa, koni Yehowa ajɔɔ amɛ. Kɛ́ fɔlɔ ko jɛ heshibaa mli ewie wiemɔi ni tamɔ nɛkɛ etsɔɔ ebii ni edara lɛ, ebaaye ebua amɛ waa. Ekã shi faŋŋ akɛ, Yesu hiɛ sɔ bɔ ni Maria fĩ esɛɛ yɛ esɔɔmɔ nitsumɔ lɛ mli lɛ waa.

Yɛ afii etɛ kɛ fã ni Yesu kɛtsu esɔɔmɔ nitsumɔ lɛ mli lɛ, awieee Maria he tsɔ yɛ Sanekpakpai lɛ amli. Kaimɔ akɛ, eeenyɛ efee akɛ no mli lɛ Maria ji okulafo, ni ekolɛ eyɛ bii bibii yɛ shĩa ni ekome eekwɛ amɛ. No hewɔ lɛ, ekolɛ ebaawa kɛhã lɛ akɛ eeenyiɛ Yesu sɛɛ be ni eshiɛɔ yɛ emaŋ lɛ mli lɛ. (1 Timoteo 5:8) Fɛɛ sɛɛ lɛ, etee nɔ ejwɛŋ nibii ni ekase kɛjɛ ŋmalɛi amli ni kɔɔ Mesia lɛ he lɛ nɔ, ni etee kpeei ni afeɔ yɛ kpeehe ni yɔɔ amɛmaŋ lɛ mli lɛ, taakɛ amɛweku lɛ fɔɔ feemɔ lɛ.—Luka 2:19, 51; 4:16.

 No hewɔ lɛ, eeenyɛ efee akɛ be ni Yesu wieɔ etsɔɔ mɛi yɛ kpeehe ni yɔɔ Nazaret lɛ, no mli lɛ Maria yɛ jɛmɛ. Kwɛ bɔ ni emii baashɛ ehe ahã be ni ebinuu lɛ wie akɛ Mesia lɛ he gbalɛ ko ni agba afɔ̃ shi afii ohai abɔ ni eho lɛ eba mli yɛ enɔ amrɔ nɛɛ! Shi be ni Maria na akɛ emaŋbii ni ji Nazaretbii lɛ heee ebi lɛ nɔ yeee lɛ, egba enaa waa. Amɛka ebi lɛ po gbee!—Luka 4:17-30.

Yesu nyɛmimɛi hii krokomɛi lɛ heee enɔ yeee, ni enɛ hu gba Maria naa waa. Yohane 7:5 lɛ hãa wɔnaa akɛ eyɛ mli akɛ Maria he Yesu nɔ eye moŋ, shi Yesu nyɛmimɛi hii ejwɛ lɛ efeee nakai. Wɔkaneɔ akɛ: “Enyɛmimɛi lɛ . . . heee enɔ yeee.” Kɛ́ hooo lɛ, Yesu yɛ nyɛmimɛi yei enyɔ, shi Biblia lɛ etsɔɔɔ kɛji amɛhe enɔ ye loo amɛfeee nakai. * Bɔ fɛɛ bɔ ni sane lɛ ji lɛ, Maria na akɛ ewa ákɛ akɛ mɛi ni akɛ amɛ ehiɛɛɛ hemɔkɛyeli kome lɛ aaahi shi. Ehe bahia ni eŋmɛ pɛpɛɛpɛ; esa akɛ eye Yehowa anɔkwa, ni yɛ nakai beaŋ nɔŋŋ lɛ, ebɔ mɔdɛŋ ni eye ebua eweku lɛ mli bii krokomɛi lɛ ni amɛbale anɔkwale lɛ yɛ gbɛ ni haŋ amɛsusu akɛ eenyɛ amɛnɔ loo ekɛ amɛ miitaa saji anaa.

Be ko lɛ, Yesu wekumɛi komɛi—ni ekã shi faŋŋ akɛ enyɛmimɛi hii lɛ fata he lɛ—tee lɛ “mɔmɔ.” Yɛ anɔkwale mli lɛ, amɛkɛɛ akɛ: “Eyiŋ miikã lɛ.” (Marko 3:21, 31) Maria fata ebihii lɛ ahe ni atee, jeee akɛ ekpɛlɛɔ nɔ ni amɛkɛɔ lɛ nɔ, shi ekolɛ esusu akɛ amɛbaanu loo amɛbaana nɔ ko ni baahã amɛhe Yesu nɔ amɛye. Ani eba mli nakai? Yesu fee naakpɛɛ nii pii ni etsɔɔ anɔkwalei ni nɔ bɛ, shi loloolo lɛ, Maria bihii krokomɛi lɛ heee enɔ yeee. Ekolɛ sane lɛ wo Maria mli la fioo, ni ebi ehe akɛ, “Mɛni kwraa amɛtaoɔ ni amɛnu loo amɛna dani amɛhe Yesu nɔ amɛye?”

Ani esoro jamɔ ni oyɔɔ mli lɛ yɛ nɔ ni owekumɛi lɛ yɔɔ mli lɛ he? Nibii pii yɛ ni obaanyɛ okase kɛjɛ Maria hemɔkɛyeli lɛ mli. Maria nijiaŋ ejeee wui yɛ ewekumɛi ni heee yeee lɛ ahe. Moŋ lɛ, efee nibii ni baahã amɛna akɛ nɔ ni eheɔ eyeɔ lɛ ehã ená miishɛɛ kɛ toiŋjɔlɛ. Yɛ nakai beaŋ nɔŋŋ lɛ, etee nɔ efĩ Yesu sɛɛ. Eeenyɛ efee akɛ ehiɛ tseɔ Yesu bei komɛi, ni ekolɛ ená ni Yesu yɛ amɛmasɛi lolo. Kɛ́ ebalɛ nakai po lɛ, enyɛ eye ehe nɔ. Ena akɛ eji hegbɛ ni ená akɛ eeefĩ Yesu sɛɛ ni ewo lɛ hewalɛ. Ani bo hu obaaye obua obii lɛ ni amɛkɛ Nyɔŋmɔ aye klɛŋklɛŋ gbɛhe yɛ amɛshihilɛ mli?

Ani ajɔɔ Maria yɛ hemɔkɛyeli ni eyɔɔ yɛ Yesu mli lɛ hewɔ? Yehowa woɔ mɛi fɛɛ ni yɔɔ hemɔkɛyeli lɛ nyɔmɔ loo ejɔɔ amɛ, ni nakai pɛpɛɛpɛ efee ehã Maria. (Hebribii 11:6) Bo lɛ susumɔ bɔ ni Maria mii baashɛ ehe ahã kɛ́ eebo ebi lɛ toi, loo bɔ ni ebaanu he ehã kɛ́ mɛi ni eyabo Yesu shiɛmɔ lɛ toi lɛ miigba lɛ nibii ni amɛnu lɛ.

Ekolɛ nibii ni Yesu tsi tã yɛ enɔkwɛmɔnii lɛ amli lɛ hã Maria kai Yesu gbekɛbiiashi be ni edaa yɛ Nazaret lɛ. Eeenyɛ efee akɛ Yesu nɔkwɛmɔnii ni kɔɔ yoo ko ni miibɛɛ eshĩa ni etao eshika ni elaaje, mɛi ni miiwiɛ nii, loo kane ni asũ ni akɛma kanetso nɔ lɛ he lɛ, hã Maria kai be ni ehiɛ Yesu bibioo yɛ emasɛi ni etsuɔ shĩa nii lɛ. (Luka 11:33; 15:8, 9; 17:35) Be ni Yesu wie akɛ epã lɛ teremɔ waaa ni ejatsu lɛ etsiii lɛ, ekolɛ Maria jwɛŋmɔ tee shwane ko ni eekwɛ Yosef be ni etsɔɔ Yesu bɔ ni agbɔɔ apã ahãa bɔ ni afee ni ekaye kooloo ni baatere lɛ awui lɛ nɔ, ni enɛ hã emii shɛ ehe waa. (Mateo 11:30) Ŋwanejee ko bɛ he akɛ, be fɛɛ be ni Maria baashwie eyiŋ yɛ hegbɛ ni Yehowa kɛduro lɛ akɛ ewa  ni atsɔse bi ni baatsɔ Mesia lɛ he lɛ, etsui nyɔɔ emli waa diɛŋtsɛ. Ekã shi faŋŋ akɛ, be fɛɛ be ni ebaabo Yesu ni ji adesa tsɔɔlɔ ni fe fɛɛ, mɔ ni nyɛɔ ehãa anaa nibii ni nɔ bɛ ni abaanyɛ akase kɛjɛ nibii ni mɔ fɛɛ mɔ le lɛ mli lɛ toi lɛ, enáa miishɛɛ waa!

Fɛɛ sɛɛ lɛ, Maria ba ehe shi. Yesu ekɛɛɛ akɛ ákɛ woo krɛdɛɛ ko ahã Maria, aahu ni eeekɛɛ akɛ aja lɛ. Be ko be ni eshiɛɔ ehãa asafo ko lɛ, yoo ko ni yɔɔ mɛi lɛ ateŋ lɛ wo egbee nɔ ni ekɛɛ akɛ ajɔɔ Yesu nyɛ akɛ efɔ lɛ. Shi Yesu here nɔ akɛ: ‘Ajɔɔ mɛi ni nuɔ Nyɔŋmɔ wiemɔ lɛ ni amɛyeɔ nɔ lɛ moŋ!’ (Luka 11:27, 28) Ni be ko be ni mɛi komɛi kɛɛ Yesu akɛ enyɛ kɛ enyɛmimɛi hii lɛ miitao lɛ lɛ, ekɛɛ amɛ akɛ mɛi ni heɔ enɔ yeɔ lɛ moŋ ji enyɛmɛi kɛ enyɛmimɛi. Maria mli fuuu Yesu kwraa yɛ nɔ ni ewie nɛɛ hewɔ, ejaakɛ ena nɔ ni etsɔɔ lɛ—mɛi ni heɔ yeɔ lɛ ahe hiaa kwraa fe heloonaa wekumɛi.—Marko 3:32-35.

Mɛɛ wiemɔi po okɛbaatsɔɔ dɔlɛ ni Maria nu he be ni ena ebi lɛ ni eepiŋ yɛ tso lɛ nɔ aahu kɛyashi egbo lɛ mli? Afii komɛi asɛɛ lɛ, bɔfo Yohane ni na nɔ ni tee nɔ lɛ ŋma nɔ ko ni sa kadimɔ waa, akɛ: Be ni Yesu piŋɔ ni egboɔ lɛ, Maria damɔ “Yesu sɛŋmɔtso lɛ masɛi.” Nɔ ko nɔ ko nyɛɛɛ agbala nyɛ ni yeɔ anɔkwa ni yɔɔ suɔmɔ nɛɛ kɛ ebi lɛ teŋ kɛyashi egbele mli tɔŋŋ. Yesu na lɛ, ni eyɛ mli akɛ enaaa lɛ mlɛo akɛ eeemu ni ewie moŋ, shi emia ehiɛ ni ewie. Etuu enyɛ lɛ ewo bɔfo Yohane, ni ji bɔfo ni esumɔɔ waa lɛ dɛŋ. Akɛni Yesu nyɛmimɛi hii lɛ heee enɔ yeee lolo hewɔ lɛ, etuuu Maria ewooo amɛteŋ mɔ ko dɛŋ, shi moŋ etuu lɛ ewo esɛɛnyiɛlɔi anɔkwafoi lɛ ateŋ mɔ kome dɛŋ. Nɔ ni Yesu fee nɛɛ tsɔɔ akɛ, esa akɛ nuu ni yɔɔ hemɔkɛyeli lɛ akwɛ lɛ diɛŋtsɛ emɛi, titri lɛ yɛ nibii ni kɔɔ amɛ kɛ Yehowa teŋ wekukpaa lɛ he.—Yohane 19:25-27.

Be ni Yesu gbo lɛ, Maria nu piŋmɔ ni jaraa waa ni agba afɔ̃ shi jeeŋmɔ akɛ ekɛbaakpe lɛ he. Kɛ́ ewa kɛhã wɔ akɛ wɔɔna bɔ ni Maria piŋ ehã lɛ, no lɛ, bɛ wɔnyɛŋ wɔna nɔ hewɔ ni gbii etɛ pɛ sɛɛ lɛ ena miishɛɛ lɛ! Maria na naakpɛɛ nii ni fe fɛɛ lɛ ni ji Yesu shi ni atee lɛ! Ena miishɛɛ waa, sɛɛ mli lɛ Yesu jie ehe kpo etsɔɔ enyɛmi Yakobo yɛ teemɔŋ. (1 Korintobii 15:7) Enɛ ná Yakobo kɛ Yesu nyɛmimɛi krokomɛi lɛ anɔ hewalɛ waa diɛŋtsɛ. Sɛɛ mli lɛ, amɛhe Yesu nɔ ye akɛ lɛ ji Kristo lɛ. Etsɛɛɛ nɔŋŋ ni amɛkɛ amɛnyɛ bɔi Kristofoi akpeei yaa, ni ‘amɛhiɛ sɔlemɔ mli waa.’ (Bɔfoi lɛ Asaji 1:14) Sɛɛ mli lɛ, amɛteŋ mɛi enyɔ, Yakobo kɛ Yuda, ŋmala Biblia lɛ mli woji lɛ eko.

Be ni Maria kɛ ebihii lɛ bua amɛhenaa ni amɛsɔle lɛ ji naagbee ni atsi egbɛ́i tã yɛ Biblia lɛ mli. Kwɛ bɔ ni amu Maria he sane ni yɔɔ Biblia lɛ mli lɛ naa jogbaŋŋ ahã, ni enɛ ji nɔkwɛmɔnɔ ni nɔ bɛ ni eshi ehã wɔ! Akɛni Maria yɛ hemɔkɛyeli hewɔ lɛ, enyɛ ekpee shihilɛ ko ni jaraa waa lɛ naa, ni yɛ naagbee lɛ enine shɛ jwetri ko ni yɔɔ nyam waa nɔ. Kɛ́ wɔkase ehemɔkɛyeli lɛ, wɔ hu wɔbaanyɛ wɔkpee jaramɔ shihilɛ fɛɛ jaramɔ shihilɛ ni jeŋ ni haomɔi eyi mli tɔ nɛɛ kɛbaaba wɔnɔ lɛ naa, ni wɔbaaná jɔɔmɔi babaoo fe bɔ ni wɔsusuɔ lɛ po.