Mida yɛ Rmaysh, ni ji maŋ ni bɛŋkɛ he ni Israel kɛ Lebanon jeɔ husu yɛ lɛ gbɛ, nakai beaŋ lɛ maŋ ta miiya nɔ. Okplɛmii ni afũ yɛ shikpɔŋ ni fɛlɛɔ kɛ mɛi ni naji kɛ amɛniji kumɔ lɛ yɛ mijwɛŋmɔŋ lolo. Shihilɛ lɛ mli wa, ni awuiyeli kɛ yiwalɛ nifeemɔ ebu yɛ he fɛɛ he.

Wɔweku lɛ yaa Maronitebii Asɔlemɔ, ni ji Katolikbii lɛ Asɔlemɔ ni yɔɔ Bokagbɛ niiaŋ lɛ ateŋ ekome. Wɔyi 12 wɔyɔɔ weku lɛ mli, ni daa nɛɛ Ataa miibɔ mɔdɛŋ ni ehã wɔná wɔdaaŋ ŋmaa, ni Awo hu bɔɔ mɔdɛŋ koni ehã wɔnyɛ wɔya sɔlemɔ. Be ni be shwie mli lɛ, mibanu he akɛ sɔlemɔ lɛ feɔ enii tamɔ afeɔ yɛ maŋ nɔ he ni wɔyɔɔ lɛ nɔŋŋ, amɛnyɛɛɛ amɛye amɛbua mɛi ni yelikɛbuamɔ he ehia amɛ lɛ.

Be ni miye afii 13 kɛyaa lɛ, miná he miishɛɛ akɛ makase kung fu nɔmɔ. Mibɔ mɔdɛŋ waa ni mikase nɔmɔ nɛɛ, ni minyɛɔ mifɔ̃ɔ miniji kɛ minaji jogbaŋŋ kɛyiɔ mɛi, mibale bɔ ni akɛ nibii krokomɛi hu nɔɔ ahãa. Mikɛɛ mihe akɛ, ‘Eyɛ mli akɛ minyɛŋ mahã akpa ta lɛ wu moŋ, shi kɛ́ hooo kwraa lɛ manyɛ mahã mɛi ni yeɔ awui lɛ akpa awuiyeli.’ Be fɛɛ be ni mana mɛi enyɔ miinɔ lɛ, oya nɔŋŋ kɛkɛ lɛ mikɛ mihe eyawo mli. Mitsui shaa mi waa, no hewɔ lɛ, etsɛɛɛ nɔŋŋ kɛkɛ lɛ mimli efũ. Mɛi ni yɔɔ Lebanon wuoyigbɛ niiaŋ lɛ fɛɛ sheɔ mi gbeyei, ejaakɛ mi diɛŋtsɛ miiwu miishi jalɛsane ni ayeee kɛ yiwalɛ nifeemɔ.

Yɛ afi 1980 mli lɛ, mikɛ mihe yadɔmɔ kung fu kuu ko yɛ Beirut. Eyɛ mli akɛ daa lɛ atswiaa okplɛmii, kɛ okplɛmii henɔi srɔtoi moŋ, shi mitee nɔ mikase nɔmɔ lɛ. Daa gbi lɛ, nɔ pɛ ni mifeɔ ji, miyeɔ nii, miwɔɔ, ni mihiɔ shi tamɔ Bruce Lee, ni ji Chinanyo ko ni feɔ sini, ni fã eyahi Amerika, ni he esa waa kɛ kung fu nɔmɔ lɛ. Mikase bɔ ni efeɔ eyitsɔi, bɔ ni enyiɛɔ, kɛ bɔ ni eboɔ ehãa kɛ́ eenɔ kung fu lɛ. Daa nɛɛ mikpe mli.

Oti ni ma mihiɛ ji ni matsɔ mɔ ko ni he esa waa yɛ kung fu nɔmɔ mli yɛ China. Gbi ko gbɛkɛ be ni miifee trenii ni maya China kɛhã kung fu nɔmɔ ko lɛ, minu ni aatswa shinaa lɛ. Be ni migbele lɛ,  mina minaanyo ko kɛ Yehowa Odasefoi enyɔ komɛi yɛ shinaa lɛ naa. No mli lɛ miwo atade diŋ ko ni mikɛfeɔ trenii, ni latsa efɔ mi tsɔɔ, ni mikɛɛ amɛ akɛ, “Milé Biblia lɛ he nɔ ko kwraa.” Milé kwraa akɛ kɛjɛ nakai gbi lɛ nɔ lɛ, mishihilɛ baatsake.

Odasefoi lɛ jɛ Biblia lɛ mli amɛtsɔɔ mi nɔ hewɔ ni adesai diɛŋtsɛ nyɛŋ ajie jalɛsane ni ayeee kɛ yiwalɛ nifeemɔi kɛjɛ shihilɛ mli kɔkɔɔkɔ lɛ. Amɛgbala mli amɛhã mi akɛ Satan Abonsam ji mɔ diɛŋtsɛ ni kɛ naagbai nɛɛ baa. (Kpojiemɔ 12:12) Bɔ ni Odasefoi lɛ ahe jɔ kɛ bɔ ni amɛjie ekãa kpo lɛ hã mihe jɔ̃ mihe waa. Ni be ni amɛtsɔɔ mi akɛ Nyɔŋmɔ yɛ gbɛ́i lɛ, miná miishɛɛ waa. (Lala 83:19) Amɛkɛ 1 Timoteo 4:8 lɛ hu tsɔɔ mi, he ni kaneɔ akɛ: “Gbɔmɔtso he mɔdɛŋbɔɔ he sɛɛnamɔ faaa, shi Nyɔŋmɔjamɔ he yɛ sɛɛnamɔ yɛ nii fiaa mli, ni eyɛ wala ni yɔɔ agbɛnɛ nɛɛ kɛ nɔ ni baaba lɛ he shiwoo.” Sɛɛ mli lɛ, wiemɔi nɛɛ baná mishihilɛ nɔ hewalɛ waa.

Dɔlɛ sane ji akɛ, Odasefoi lɛ kpa miŋɔɔ baa, ejaakɛ miweku lɛ kɛɛ amɛ akɛ amɛkaba miŋɔɔ dɔŋŋ. Fɛɛ sɛɛ lɛ, mikpɛ miyiŋ akɛ, makpa kung fu lɛ nɔmɔ ni mabɔi Biblia lɛ kasemɔ. Minyɛmimɛi hii lɛ nyaaa yiŋ ni mikpɛ lɛ he, shi mitswa mifai shi akɛ matao Yehowa Odasefoi lɛ asɛɛ gbɛ ekoŋŋ ni mikɛ amɛ akase Biblia lɛ.

Mitee nɔ mitao Odasefoi lɛ asɛɛ gbɛ shi minaaa amɛ. Fee sɛɛ lɛ, miye awerɛho waa be ni mitsɛ gbo trukaa, ni miwekumɛi krokomɛi lɛ hu kɛ osharai kpe lɛ. Mikɛ tsumaa nitsumɔhe ko bɔi nitsumɔ, gbi ko lɛ mɔ ko ni wɔkɛtsuɔ nii ni atsɛɔ lɛ Adel lɛ kɛ mi gba sane ni ebi mi nɔ hewɔ ni mibɛ miishɛɛ lɛ. Ekɛ mi bɔi gbohiiashitee he hiɛnɔkamɔ ni yɔɔ Biblia lɛ mli lɛ he sane gbaa. Odasefonyo ni yɔɔ suɔmɔ, ni mli hi nɛɛ to etsui shi ehã mi ni ekɛ mi kase Biblia lɛ yɛ nyɔji nɛɛhu ni nyiɛ sɛɛ lɛ mli.

Be ni nikasemɔ lɛ yaa nɔ lɛ, mina akɛ ehe miihia ni mafee tsakemɔi wuji komɛi yɛ mishihilɛ mli. Minaaa lɛ mlɛo. Daa nɛɛ mimli ewo la. Biblia lɛ ye ebua mi bɔ ni afee ni manyɛ maye mimli ni fuɔ lɛ nɔ, koni nɔ fɛɛ nɔ kɛkɛ akahã mitsui ba. Akɛ nɔkwɛmɔnɔ lɛ, Yesu kɛ ŋaawoo ko hã yɛ Mateo 5:44 lɛ akɛ: ‘Nyɛsumɔa nyɛhenyɛlɔi, nyɛsɔlea nyɛhãa mɛi ni waa nyɛ yi lɛ.’ Ni Romabii 12:19 lɛ bɔ kɔkɔ akɛ: “Nyɛkatɔa nyɛ diɛŋtsɛ nyɛhe owele, . . . ejaakɛ aŋma akɛ: ‘Minɔ̃ ji oweletɔɔ, mi mato najiaŋ, Nuŋtsɔ lɛ kɛɛ.’” Ŋmalɛi nɛɛ kɛ ekrokomɛi ye ebua mi, ni fiofio lɛ, mihe jɔ.

Eyɛ mli akɛ shishijee lɛ miweku lɛ sumɔɔɔ ni mikɛ Yehowa Odasefoi lɛ akase Biblia lɛ moŋ, shi amrɔ nɛɛ amɛbasumɔ Odasefoi lɛ asane. Minyɛmimɛi hii lɛ ateŋ mɔ kome po ebafata mihe kɛmiijá Yehowa, ni be ni Awo yɔɔ wala mli lɛ, kɛ́ mɔ ko wie Odasefoi lɛ ahe sane gbonyo ko lɛ, efãa wɔhe.

Agbɛnɛ hu, ajɔɔ mi ni miná ŋa kpakpa ni yeɔ anɔkwa, ni atsɛɔ lɛ Anita, ni eyeɔ ebuaa mi yɛ be fɛɛ sɔɔmɔ lɛ mli. Kɛjɛ afi 2000 kɛbaa nɛɛ, mikɛ Anita ehi Eskilstuna, yɛ Sweden, ni wɔtsɔɔ mɛi ni wieɔ Arabic lɛ Biblia lɛ.

Loloolo lɛ, misumɔɔ ni maye mabua mɛi ni naa amanehulu yɛ yiwalɛ hewɔ lɛ. Shi be ni miná mile mɔ diɛŋtsɛ ni kɛ yiwalɛ nifeemɔ baa, ni miná mile hu akɛ etsɛŋ ni Nyɔŋmɔ baafo fɛɛ sɛɛ lɛ, ehã miná miishɛɛ ni mitoiŋ hu jɔ mi.—Lala 37:29.