Afɔ mi yɛ Acul, ni ji maŋ ko ni etse ehe banee yɛ Guatemala anaigbɛ gɔji lɛ anɔ lɛ mli. Wɔweku lɛ ji Ixilbii, ni jɛ Maya wekutɔkpaa lɛ mli. Miwieɔ Spanish kɛ wɔmaŋ wiemɔ lɛ. Be ni miji gbekɛ fioo lɛ, no mli Guatemala ta ni akɛ afii 36 wu lɛ miiya nɔ. Agbe Ixilbii pii yɛ ta lɛ mli.

Be ko be ni miná afii ejwɛ lɛ, minyɛmi nuu ni eye afii kpawo lɛ kɛ okplɛmi bibioo ko miishwɛ, kɛkɛ ni efɛ. Enɛ hã mihiŋmɛi fite; dɔlɛ sane ji akɛ, minyɛmi nuu lɛ gbo. No sɛɛ lɛ, akɛ mi tee shwilafoi askul ko yɛ Guatemala City, ni miyakase Braille. Be ni miyɔɔ jɛmɛ, tsɔɔlɔi lɛ eŋmɛɛɛ mi gbɛ ni mi kɛ minanemɛi skulbii lɛ agba sane, ni skulbii lɛ hu bɛŋkɛɛɛ mi, shi mileee nɔ hewɔ kwraa ni amɛfee nakai lɛ. Bei pii lɛ mihe feɔ shoo, ni mishweɔ gbɛhamɔ be ni mi kɛ mimami, ni ji mɔ ko ni mli hi ni musuŋtsɔɔ lɛ hu lɛ baahi shĩa lɛ waa; gbɛhamɔ be lɛ heɔ nyɔji enyɔ yɛ afi mli. Dɔlɛ sane ji akɛ, be ni miye afii nyɔŋma lɛ, mimami gbo. Be ni mina akɛ mɔ pɛ ni sumɔɔ mi yɛ je lɛ mli fɛɛ lɛ egbo lɛ, mihao waa.

Be ni miye afii 11 lɛ, miku misɛɛ mitee wɔmaŋ lɛ mli, ni mi kɛ mitsɛ binuu ko kɛ eweku lɛ yahi shi. Amɛhã mi nibii ni he hiaa mi, shi mɔ ko kwraa nyɛɛɛ ashɛje mimii. Bei komɛi lɛ, mikɛ yaafo biɔ Nyɔŋmɔ akɛ: “Mɛni hewɔ ni mimami gbo? Mɛni hewɔ esa akɛ mashwila?” Mɛi kɛɛ mi akɛ eji Nyɔŋmɔ suɔmɔnaa nii akɛ enɛɛmɛi fɛɛ aba. Mimu sane naa akɛ Nyɔŋmɔ yitsoŋ wa, ni eyeee jalɛ sane. Yiŋtoo kome hewɔ ní migbeee mi he ji akɛ, no mli lɛ mináaa nɔ ko ni mikɛbaafee nakai.

Akɛni mishwila hewɔ lɛ, mishihilɛ bafee nɔ ni yɔɔ oshara waa. Be ni miji gbekɛ lɛ, mɛi to mi kabonaa shii abɔ. Mikɛɛɛ mɔ ko mɔ ko efɔŋ ni afee mi nɛɛ—misusu akɛ mɔ ko mɔ ko efoŋ midaŋ. Mɛi kɛ mi efɔɔɔ sane gbaa, ni mi hu mikɛ mɔ ko egbaaa sane. Bei pii lɛ mihãaa mɛi abɛŋkɛ mi, ni mihaoɔ, ni miheee mɔ ko mɔ ko miyeee.

Be ni miná afii 13 lɛ, Yehowa Odasefoi komɛi (nuu ko kɛ eŋa) ba mimasɛi, no mli miyɛ skul ní wɔtee shwane hejɔɔmɔ. Miskul tsɔɔlɔi lɛ ateŋ mɔ kome ni na mi mɔbɔ lɛ ji mɔ ni kɛɛ amɛ akɛ amɛbasara mi. Amɛkɛɛ mi akɛ, Biblia lɛ ewo shi akɛ, be ko baaba ni abaatee gbohii lɛ ashi, ni akɛ,  shwilafoi baana nii ekoŋŋ. (Yesaia 35:5; Yohane 5:28, 29) Nɔ ni amɛtsɔɔ mi lɛ ŋɔɔ minaa waa, shi akɛni mifɔɔɔ wiemɔ hewɔ lɛ, minyɛɛɛ mi kɛ amɛ agba sane. Shi yɛ sane ni mi kɛ mɛi egbaaa lɛ fɛɛ sɛɛ lɛ, amɛjɛ mlihilɛ mli amɛbasara mi shii abɔ koni amɛtsɔɔ mi saji ni yɔɔ Biblia lɛ mli lɛ. Mɛi nɛɛ nyiɛɔ nɔ ni fe kilomitai nyɔŋma kɛtsɔmɔɔ gɔji anɔ dani amɛbashɛɔ wɔmaŋ lɛ mli.

Minyɛmi nuu ni mikɛyɔɔ lɛ kɛɛ mi akɛ amɛji mɛi komɛi ni amɛsaa amɛhe jogbaŋŋ, shi amɛbɛ nɔ ko tsɔ. Kɛ̃lɛ, amɛsusuɔ mi he be fɛɛ be, ni amɛbakeɔ mi nii. Minu he akɛ anɔkwa Kristofoi pɛ baanyɛ amɛkɛ amɛhe ashã afɔle nɛkɛ.

Mikase Biblia lɛ kɛtsɔ woji ni afee yɛ Braille mli lɛ nɔ. Eyɛ mli akɛ minuɔ nɔ ni amɛtsɔɔ mi lɛ shishi moŋ, shi bei komɛi lɛ nibii lɛ ekomɛi ashishinumɔ wa kɛhã mi. Akɛ nɔkwɛmɔnɔ lɛ, ebawa kɛhã mi akɛ mahe maye akɛ Nyɔŋmɔ susuɔ mihe, loo akɛ mɛi krokomɛi susuɔ mihe tamɔ Nyɔŋmɔ feɔ lɛ. Minu nɔ hewɔ ni Yehowa eŋmɛ efɔŋfeemɔ gbɛ be fioo lɛ shishi, shi ebawa kɛhã mi akɛ makpɛlɛ nɔ akɛ eji Tsɛ ni yɔɔ suɔmɔ diɛŋtsɛ. *

Fiofio lɛ, nibii ni mikaseɔ yɛ Ŋmalɛi amli lɛ ye ebua mi ni mitsake misusumɔ. Akɛ nɔkwɛmɔ lɛ, mikase akɛ Nyɔŋmɔ nuɔ he ehãa mɛi ni naa amanehulu lɛ. Nyɔŋmɔ wie yɛ etsuji ni awaa amɛyi lɛ he akɛ: ‘Mina amanehulu ni mimaŋ lɛ naa lɛ, ni mile amɛnidɔɔnii lɛ.’ (2 Mose 3:7) Be ni mibale sui kpakpai ni Yehowa yɔɔ lɛ jogbaŋŋ lɛ, no tsirɛ mi ni mijɔɔ miwala nɔ mihã lɛ. Yɛ afi 1998 lɛ, abaptisi mi akɛ Yehowa Odasefonyo.

Yɛ mibaptisimɔ lɛ sɛɛ aaafee afi lɛ, mitee skul ko ni afee ahã shwilafoi yɛ he ko ni bɛŋkɛ Escuintla lɛ eko. Asafoŋ onukpa ko ni yɔɔ jɛmɛ lɛ ná ele naagba ni mikɛkpeɔ kɛ́ miiya asafoŋ kpee be ni miyɔɔ wɔmaŋ lɛ mli lɛ. Ole, asafo ni bɛŋkɛ mi fe fɛɛ lɛ yɛ he ni Odasefoi ni kɛ mi bakase nii lɛ jɛɔ kɛbaa lɛ, ni akɛni esa akɛ matsɔmɔ gɔji anɔ hewɔ lɛ, mináaa gbɛfãa lɛ mlɛo. Bɔ ni afee ni asafoŋ onukpa lɛ anyɛ aye abua mi lɛ, etao Odasefoi aweku ko yɛ Escuintla ní yɛ he tsui akɛ amɛbaahã mahi amɛshĩa lɛ koni amɛwa mi kɛya asafoŋ kpeei. Kɛjɛ nakai beiaŋ kɛbaa nɛɛ, amɛmiikwɛ mi tamɔ nɔ ni miji amɛweku lɛ mli nyo.

Manyɛ matsɔɔ nibii babaoo ni asafo lɛ mli bii lɛ efee ehã mi kɛtsɔɔ akɛ amɛsumɔɔ mi waa diɛŋtsɛ. Nibii nɛɛ fɛɛ hãa mináa nɔmimaa akɛ, akɛ Yehowa Odasefonyo lɛ, miyɛ anɔkwa Kristofoi ateŋ.—Yohane 13:34, 35.

Amrɔ nɛɛ minuuu he dɔŋŋ akɛ sɛɛnamɔ ko bɛ mihe, loo akɛ hiɛnɔkamɔ ko bɛ kɛhã mi. Amrɔ nɛɛ miyɛ miishɛɛ yɛ shihilɛ mli. Akɛ Yehowa Odasefonyo ni kɛ ebe fɛɛ shiɛɔ lɛ, mikɛ mijwɛŋmɔ yaa Biblia mli anɔkwalei ni matsɔɔ mɛi krokomɛi lɛ anɔ moŋ fe ni majwɛŋ mihiŋmɛi ni eshwila lɛ he. Agbɛnɛ hu lɛ, miisɔmɔ akɛ asafoŋ onukpa, ni mihãa Biblia mli wiemɔi yɛ asafoi ni yɔɔ he ni miyɔɔ lɛ amli. Mihãa Biblia mli wiemɔi po yɛ kpokpaa wuji anɔ kpeei ni mɛi akpekpei abɔ baa lɛ ashishi.

Yɛ afi 2010 lɛ, mitee Biblia Skul Kɛhã Oshijafoi (ni amrɔ nɛɛ atsɛɔ lɛ Skul Kɛhã Maŋtsɛyeli Sane Kpakpa Jajelɔi lɛ) ni afee yɛ El Salvador lɛ eko. Skul nɛɛ ye ebua mi koni manyɛ matsu sɔ̃i ni jwere minɔ yɛ asafo lɛ mli lɛ ahe nii jogbaŋŋ. Tsɔsemɔ nɛɛ ni minine shɛ nɔ lɛ ehã mina akɛ Yehowa Nyɔŋmɔ, ni baanyɛ esaa mɔ fɛɛ mɔ kɛhã enitsumɔ lɛ, buɔ mihe akɔntaa waa, ni esumɔɔ mi hu.

Yesu kɛɛ akɛ: “Nɔhãmɔ hãa mɔ náa miishɛɛ fe nɔhemɔ.” (Bɔfoi 20:35) Ŋmɛnɛ lɛ, manyɛ makɛɛ akɛ miyɛ miishɛɛ waa, ni eyɛ mli akɛ be ko ni eho lɛ kulɛ misusu akɛ minyɛŋ manyɛ maye mɛi, shi amrɔ nɛɛ mina akɛ manyɛ maye mabua mɛi krokomɛi.