Yehowa Nyɔŋmɔ ji wala Hãlɔ. (Lala 36:10) Belɛ, ani nilee bɛ mli akɛ wɔɔhe wɔye akɛ Nyɔŋmɔ ni tamɔ nɛkɛ lɛ baanyɛ ekɛ mɛi ni egboi lɛ aba wala mli ekoŋŋ? Biblia lɛ woɔ wɔ shi akɛ nakai pɛpɛɛpɛ ebaafee wɔsɛɛ. (Kanemɔ Bɔfoi 24:15) Shi mɛni hewɔ ebaafee nakai?

Eji wɔ-Bɔlɔ lɛ yiŋtoo kɛjɛ shishijee tɔ̃ɔ akɛ gbɔmɔ ahi shi kɛya naanɔ yɛ shikpɔŋ lɛ nɔ. (1 Mose 1:31; 2:15-17) Eyiŋtoo nɛɛ tsakeko. Kɛ́ ena nibii ni wɔtsɔɔ mli ŋmɛnɛ—shihilɛ ni mli eyi obɔ kɛ haomɔi kɛ gbele ni foɔ wala sɛɛ oya lɛ—edɔɔ lɛ waa.—Kanemɔ Hiob 14:1, 14, 15.

Ani Nyɔŋmɔ bɔ gbɔmɔ ni ehi shi yɛ ŋwɛi? Dabi. Nyɔŋmɔ bɔ ŋwɛibɔfoi ni amɛhi ŋwɛi. Ebɔ gbɔmɛi ni amɛhi shikpɔŋ lɛ nɔ. (1 Mose 1:28; Hiob 38:4, 7) Be ni enɛ yɔɔ ojwɛŋmɔ mli lɛ, susumɔ gbohii ni Yesu tee amɛ shi lɛ ahe okwɛ. Etee amɛ ashi kɛba wala mli yɛ shikpɔŋ nɛɛ nɔ. Nakai nɔŋŋ wɔsɛɛ lɛ mɛi ni abaatee amɛ shi lɛ ateŋ mɛi babaoo baahi shikpɔŋ lɛ nɔ.—Kanemɔ Yohane 5:28, 29; 11:44.

Kɛ̃lɛ, Nyɔŋmɔ ehala mɛi fioo komɛi ni abaatee amɛ shi kɛya ŋwɛi akɛ mumɔŋ gbɔmɛi. (Luka 12:32; 1 Korintobii 15:49, 50) Mɛi ni abaatee amɛ shi kɛya ŋwɛi lɛ kɛ Kristo baaye shikpɔŋ lɛ nɔ akɛ maŋtsɛmɛi.—Kanemɔ Kpojiemɔ 5:9, 10.