KATOLIKBII ni yɔɔ je lɛ mli lɛ ateŋ mɛi babaoo susuɔ akɛ, nɔ ni Vatican Council lɛ wie yɛ afi 1870 lɛ ji tsɔɔmɔ ko ni sɔlemɔ lɛ kɛba ni anyɛŋ atsake, ni esa akɛ mɔ fɛɛ mɔ akpɛlɛ nɔ. Shi esa akɛ abi akɛ, Ani tsɔɔmɔ nɛɛ damɔ Biblia lɛ nɔ? Kɛfata he lɛ, ani Paapa Francis ji bɔfo Petro sɛɛyelɔ? Ni ani Petro ji klɛŋklɛŋ paapa?

Nɔ ni Vatican Council lɛ wie yɛ afi 1870 lɛ damɔ bɔ ni amɛ diɛŋtsɛ amɛtsɔɔ Mateo 16:16-19 kɛ Yohane 21:15-17 lɛ shishi lɛ nɔ. Nɔ ni Yesu kɛɛ Petro yɛ ŋmalɛi nɛɛ amli lɛ, kɛ saji krokomɛi ni yɔɔ Biblia lɛ mli lɛ hãa wɔnaa akɛ, Petro tsu gbɛfaŋnɔ ko ni he hiaa waa he nii be ni ato Kristofoi asafo lɛ shishi klɛŋklɛŋ kwraa lɛ. Anɔkwa, be klɛŋklɛŋ ni Yesu kɛ Petro kpe lɛ, Yesu wie akɛ, Petro baajie sui ni mli wa tamɔ tɛsaa kpo yɛ eshihilɛ mli. (Yohane 1:42) Shi ani Kristo hã Petro hegbɛ ko ni hã enɔ kwɔ fe bɔfoi krokomɛi lɛ?

Yesu kɛɛ Petro yɛ Mateo 16:17, 18 lɛ akɛ: “Miikɛɛ bo akɛ: Bo ji Petro [ni gbɛ́i lɛ shishi ji “Tɛsaa” lɛ], ni tɛsaa nɛɛ nɔ matswa misɔlemɔ lɛ mamã.” * Ani no mli lɛ Yesu miitsɔɔ akɛ abaatswa ‘esɔlemɔ,’ loo esafo lɛ ama Petro, ni ji gbɔmɔ adesa lɛ nɔ? Ani Petro baafee Yesu sɛɛnyiɛlɔi krokomɛi lɛ fɛɛ yitso? Te bɔfoi krokomɛi ni yɔɔ jɛmɛ be ni Yesu kɛ Petro wie lɛ nu nɔ ni Yesu wie lɛ shishi amɛhã tɛŋŋ? Sanekpakpai lɛ hãa wɔnaa akɛ, sɛɛ mli lɛ, bɔfoi lɛ taa saji anaa shii abɔ yɛ mɔ ni ji agbo fe fɛɛ yɛ amɛteŋ lɛ he. (Mateo 20:20-27; Marko 9:33-35; Luka 22:24-26) Kɛji Yesu ehala Petro akɛ mɔ ni nɔ kwɔ fe fɛɛ yɛ esɛɛnyiɛlɔi ateŋ lɛ momo lɛ, ani bɔfoi lɛ baataa saji anaa yɛ mɔ ni ji agbo fe fɛɛ yɛ amɛteŋ lɛ he?

Te Petro diɛŋtsɛ hu nu Yesu wiemɔi lɛ shishi ehã tɛŋŋ? Akɛni Petro ji Israelnyo hewɔ lɛ, ekã shi faŋŋ  akɛ ele Hebri gbalɛi ni wieɔ “tɛ” loo “koŋtɛ” lɛ he lɛ waa. (Yesaia 8:13, 14; 28:16; Zakaria 3:9) Be ni Petro tsɛ amɛteŋ ekome yisɛɛ yɛ wolo ni eŋma eyahã enyɛmimɛi héyelilɔi lɛ eko mli lɛ, etsɔɔ mli akɛ “koŋtɛ” ni agba he sane afɔ̃ shi lɛ ji Nuŋtsɔ Yesu Kristo, ni ji Mesia lɛ. Petro kɛ Hela wiemɔ pe’tra (ni ji wiemɔ ni Yesu kɛtsu nii yɛ Mateo 16:18 lɛ) tsu nii kɛkɔ Kristo pɛ he.—1 Petro 2:4-8.

Bɔfo Paulo hu ji Yesu sɛɛnyiɛlɔi anɔkwafoi lɛ ateŋ mɔ kome. Ani Paulo he eye akɛ Yesu efee Petro mɔ ni nɔ kwɔ fe mɛi krokomɛi lɛ fɛɛ? Paulo ŋma akɛ Petro fata mɛi ni “asusuɔ akɛ amɛji akulashiŋi lɛ” ahe, ni ekɛ enɛ tsɔɔ akɛ ekpɛlɛɔ hegbɛ ni Petro yɔɔ yɛ mra be mli Kristofoi asafo lɛ mli lɛ nɔ. Paulo le akɛ jeee ‘akulashiŋ’ kome pɛ yɔɔ. (Galatiabii 2:9) Kɛfata he lɛ, eji Yesu ehala Petro akɛ asafo lɛ yitso kulɛ, ani enanemɛi héyelilɔi lɛ baasusu akɛ eji akulashiŋ?

Be ni Paulo ŋma bɔ ni Petro kɛ nyɛmimɛi lɛ eyayeee jogbaŋŋ lɛ he sane lɛ, ejɛ bulɛ kɛ shiŋŋfeemɔ mli ewie akɛ: “Mite shi miwo lɛ hiɛ kɛ hiɛ ejaakɛ eyɛ faŋŋ akɛ nɔ ni efeɔ lɛ ejaaa.” (Galatiabii 2:11-14) Paulo susuuu akɛ Kristo etswa esɔlemɔ, loo esafo lɛ ema Petro loo adesa ko ni yeee emuu lɛ nɔ. Moŋ lɛ, ehe eye akɛ atswa asafo lɛ ama Yesu Kristo, ni ji faneshi lɛ nɔ. Paulo le akɛ, “tɛsaa lɛ ji Kristo lɛ.”—1 Korintobii 3:9-11; 10:4.

No hewɔ lɛ, te esa akɛ wɔnu wiemɔi nɛɛ shishi wɔhã tɛŋŋ: “Bo ji Petro, ni tɛsaa nɛɛ nɔ matswa misɔlemɔ lɛ mama”? Dani wɔbaanu sane ko shishi jogbaŋŋ lɛ, esa akɛ wɔkane saji fɛɛ ni kɔɔ he. Belɛ, mɛni he Yesu kɛ Petro wieɔ mɔ? No mli lɛ, Yesu ebi ekaselɔi lɛ kɛtsɔ hiɛ akɛ: “Namɔ nyɛkɛɔ akɛ mi ji?” Nɔŋŋ kɛkɛ ni Petro hã hetoo akɛ: “Bo ji Mesia lɛ, Nyɔŋmɔ hiɛkãalɔ lɛ Bi lɛ.” No hewɔ lɛ Yesu jie Petro yi, ni ekɛfata he akɛ ebaatswa ‘esɔlemɔ’ loo esafo lɛ ema “tɛsaa” kple ko—Yesu diɛŋtsɛ—mɔ ni Petro etsɔɔ akɛ eyɛ hemɔkɛyeli yɛ emli lɛ nɔ.—Mateo 16:15-18.

 Enɛ hewɔ lɛ, “Mɛi ni Tsɔɔ Jamɔ He Saji yɛ Sɔlemɔ lɛ Mli” lɛ ateŋ mɛi babaoo ŋma akɛ, Kristo ji tɛsaa ni awie he yɛ Mateo 16:18 lɛ. Akɛ nɔkwɛmɔnɔ lɛ, Augustine ni hi shi yɛ afi 400 afii lɛ amli lɛ ŋma akɛ: “Nuŋtsɔ lɛ kɛɛ akɛ: ‘Tɛsaa nɛɛ nɔ matswa mi-Sɔlemɔ lɛ mama,’ ejaakɛ no mli lɛ Petro ekɛɛ lɛ akɛ: ‘Bo ji Kristo lɛ, Nyɔŋmɔ hiɛkãalɔ lɛ Bi lɛ.’ No hewɔ lɛ tɛsaa nɛɛ ni owie he lɛ nɔ matswa mi-Sɔlemɔ lɛ mama.” Augustine wie shii abɔ akɛ, “Tɛsaa (Petra) lɛ ji Kristo.”

Kɛ́ adamɔ nɔ ni Katolik Sɔlemɔ lɛ tsɔɔ ŋmɛnɛ lɛ nɔ akojo Augustine kɛ mɛi krokomɛi ni hiɛ susumɔ ni tamɔ enɔ lɛ, abaabu amɛ akɛ hemɔkɛyeli kwalɔi. Anɔkwa, Switzerland nyɔŋmɔjamɔ he nilelɔ ko ni atsɛɔ Ulrich Luz tsɔɔ akɛ, afi 1870 Vatican Council lɛ baabu susumɔ ni Biblia he nilelɔi ni yɔɔ ŋmɛnɛ lɛ hiɛ yɛ sane nɛɛ he lɛ akɛ eji hemɔkɛyeli kwamɔ.

Bɔfo Petro leee gbɛ́i ni ji “paapa” lɛ. Anɔkwa sane ji akɛ, dani afi 800 afii lɛ baashɛ lɛ, mɛi babaoo kɛ gbɛ́i nɛɛ tsɛɔ amɛhe ni amɛjeee Roma osɔfonukpai. Ni akɛ nakai gbɛ́i lɛ efɔɔɔ nitsumɔ tsɔ kɛyashi afi 1000 afii lɛ naagbee gbɛ. Agbɛnɛ hu lɛ, mra be mli Kristofoi lɛ ateŋ mɔ ko mɔ ko susuuu akɛ mɔ ko baye Petro sɛɛ ni ná hegbɛ ni asusu akɛ ená akɛ mɔ ni nɔ kwɔ fe mɛi krokomɛi fɛɛ lɛ eko. No hewɔ lɛ, Germany woloŋlelɔ ko ni atsɛɔ Martin Hengel lɛ wie akɛ, “odaseyeli ko bɛ yɛ yinɔsane mli loo yɛ Biblia lɛ mli ni abaanyɛ adamɔ nɔ amu sane naa akɛ paapa lɛ ji ‘mɔ ni kwɔ fe mɔ fɛɛ mɔ.’”

Naagbee kwraa lɛ, Ani Petro ji klɛŋklɛŋ paapa? Ani mɛi komɛi baye esɛɛ? Ani Katolik tsɔɔmɔ akɛ paapa lɛ nɔ kwɔ fe mɔ fɛɛ mɔ lɛ ja yɛ Ŋmalɛ naa? Sane hetoo kuku kɛhã sanebimɔi nɛɛ eko fɛɛ eko ji, dabi. Ŋwanejee ko kwraa be he akɛ, Yesu tswa esɔlemɔ lɛ, ni ji anɔkwa asafo lɛ ema lɛ diɛŋtsɛ enɔ. (Efesobii 2:20) Belɛ, esa akɛ wɔteŋ mɔ fɛɛ mɔ abi ehe akɛ, Ani mina nakai anɔkwa asafo lɛ?