YOO ko ni atsɛɔ lɛ Panayiota lɛ da yɛ Mediteranea ŋshɔkpɔ ko nɔ. Be ni eji oblayoo fioo lɛ, ekɛ ehe wo maŋkwramɔŋ saji amli waa. Sɛɛ mli lɛ, eyasɔmɔ akɛ woloŋmalɔ kɛhã maŋkwramɔŋ kuu ko ni yɔɔ akrowa ni eyɔɔ lɛ. Etee shĩa kɛ shĩa po eyaba shika ehã amɛkuu lɛ, ni ekɛ be babaoo tsu enɛ. Shi be ni be shwie mli lɛ, maŋkwramɔŋ saji baje Panayiota tsine kwraa. Eyɛ mli akɛ nakai beiaŋ lɛ, kuu lɛ mli bii lɛ tsɛɔ amɛhe nanemɛi moŋ, shi béi, awuŋayeli, kɛ sui gbohii krokomɛi yaa nɔ yɛ amɛteŋ.

Atsɔse nuu ko ni atsɛɔ lɛ Daniel lɛ yɛ weku ko ni yɔɔ Ireland ni kɛ Nyɔŋmɔjamɔ shwɛɛɛ kwraa lɛ mli. Shi dɔlɛ sane ji akɛ, ekaiɔ osato ni osɔfoi lɛ feɔ lɛ waa, ejaakɛ no mli lɛ amɛnuɔ dãa waa, amɛshwɛɔ asɔ, ni amɛjuɔ shika kɛjɛɔ onia ni atsuɔ lɛ mli, shi amɛkɛɔ lɛ akɛ kɛ́ efee esha lɛ, abaashã lɛ yɛ hɛl.

Nuu ko ni atsɛɔ lɛ Jeffery lɛ kɛ be babaoo tsu nii ehã United Kingdom kɛ United States nitsumɔhe ko ni yɔɔ meelei, ni yeɔ jara yɛ je lɛŋ hei srɔtoi lɛ. Ekaiɔ akɛ, bei pii kɛ́ amɛjarayelɔi lɛ kɛ jarayelɔi krokomɛi kɛ amralofoi lɛ miishara lɛ, amɛtsɔɔ juu kɛ fɔ̃ nɔ koni amɛná nibii ogbɔjɔ. Amɛwieɔ nibii ni bɛ mli bɔ ni afee ni amɛnine ashɛ nɔ ni amɛtaoɔ lɛ nɔ, ni enɛ tsɔɔ akɛ amɛji osatofoi.

Dɔlɛ sane ji akɛ, jeee mɛnɛɛmɛi pɛ kɛ shihilɛ ni tamɔ nɛkɛ ekpe. Ŋmɛnɛ lɛ, osatofeemɔ eyi adesai ashihilɛ mli fɛɛ—eyɛ maŋkwramɔ, jamɔ, kɛ jarayeli mli. Aná Blɔfo wiemɔ ni atsɔɔ shishi akɛ “osato” lɛ kɛjɛ Hela wiemɔ ko ni tsɔɔ wielɔ loo mɔ ko ni feɔ drama yɛ kpoku nɔ ni ewo kaakamotobi lɛ mli. Sɛɛ mli lɛ, akɛ wiemɔ nɛɛ batsu nii kɛhã mɔ fɛɛ mɔ ni kwaa efeɔ nɔ ko koni ekɛlaka mɛi loo ní ekɛye mɛi ahe nii.

Mɛi ni atsɔɔ osatofeemɔ nɔ ashishiuɔ amɛ lɛ baanyɛ anu dɔlɛ kɛ mlifũ he waa. Ni ekolɛ mɛi nɛɛ kɛ dɔlɛ baawie akɛ: “Osatofeemɔ! Ani esɛɛ baafo be ko?” Miishɛɛ sane ji akɛ, Nyɔŋmɔ Wiemɔ lɛ hãa wɔnaa akɛ esɛɛ baafo.

Biblia lɛ hãa wɔleɔ akɛ, mumɔŋ bɔɔ nɔ ko ni je osatofeemɔ shishi, shi jeee adesai. Be ni abɔ adesai lɛ, Satan Abonsam to akɛ ebaalaka Hawa, ni ji klɛŋklɛŋ yoo lɛ, no hewɔ lɛ etsɔ onufu ko nɔ efee ehe tamɔ mɔ ko ni miitao eye ebua lɛ. (1 Mose 3:1-5) Kɛjɛ nakai beiaŋ kɛbaa nɛɛ, adesai babaoo ekwa efee amɛhe mɛi ni amɛjeee, ni amɛfee nakai kɛlaka mɛi krokomɛi koni amɛnine ashɛ nɔ ni amɛtaoɔ nɔ.

Be ni alaka blema Israelbii lɛ ni amɛkɛ amɛhe yawo apasa jamɔ mli, ni amɛtsɔmɔ amɛhe mumɔŋ osatofoi lɛ, Nyɔŋmɔ bɔ amɛ kɔkɔ shii abɔ yɛ nɔ ni  baajɛ mli kɛba lɛ he. Yehowa Nyɔŋmɔ tsɔ gbalɔ Yesaia nɔ ewie akɛ: “Nɛkɛ maŋ nɛɛ bɛŋkɛɔ mi kɛ amɛdaa kɛkɛ, ni amɛkɛ amɛnaabu kɛkɛ woɔ mi, shi amɛtsui etsi ehe kɛjɛ mihe kɛtee shɔŋŋ.” (Yesaia 29:13) Be ni Israelbii lɛ kpoo akɛ amɛbaatsake amɛtsui lɛ, Nyɔŋmɔ ŋmɛ gbɛ ni maŋsɛɛ bii yafite amɛjamɔhe, ni ji Yerusalem kɛ esɔlemɔtsu lɛ—klɛŋklɛŋ lɛ Babilonbii lɛ yatutua amɛ yɛ afi 607 D.Ŋ.B. ni naagbee lɛ, Roma asraafoi lɛ yatutua amɛ yɛ afi 70 Ŋ.B. Eyɛ faŋŋ akɛ, Nyɔŋmɔ eŋmɛɛɛ osatofeemɔ gbɛ kɛyaaa naanɔ.

Nɔ ni tamɔɔɔ nakai lɛ, Nyɔŋmɔ kɛ e-Bi Yesu fɛɛ nyaa adesai ni yeɔ anɔkwa ni amɛfeee osato lɛ ahe waa. Akɛ nɔkwɛmɔnɔ lɛ, mra mli be ni Yesu je eshiɛmɔ nitsumɔ lɛ shishi lɛ, nuu ko ni atsɛɔ lɛ Natanael lɛ yanina lɛ. Be ni Yesu na lɛ lɛ, ewie akɛ: “Naa, Israelnyo ni ekã shi faŋŋ akɛ, lakamɔ ko bɛ emli.” (Yohane 1:47) Sɛɛ mli lɛ, Natanael, ni atsɛɔ lɛ hu akɛ Bartolomeo lɛ batsɔ Yesu bɔfoi 12 lɛ ateŋ mɔ kome.—Luka 6:13-16.

Yesu ná be ehã ekaselɔi lɛ, ni etsɔɔ amɛ gbɛ nɔ ni Nyɔŋmɔ tsɔɔ esusuɔ nii ahe. Esaaa akɛ Yesu sɛɛnyiɛlɔi lɛ feɔ osato. Yesu kɛ hiɛdɔɔ wie eshi osato ni jamɔŋ hiɛnyiɛlɔi ni yɔɔ yɛ nakai beiaŋ lɛ feɔ lɛ, ni ekɛbɔ esɛɛnyiɛlɔi lɛ kɔkɔ. Susumɔ nibii komɛi ni jamɔŋ hiɛnyiɛlɔi lɛ feɔ lɛ he okwɛ.

Amɛfeɔ ‘jalɛ nii’ koni mɛi ana amɛ. Yesu kɛɛ mɛi ni boɔ lɛ toi lɛ akɛ: ‘Nyɛkwɛa jogbaŋŋ ni nyɛkafea nyɛjalɛ nii lɛ yɛ gbɔmɛi ahiɛ koni amɛna nyɛ, taakɛ osatofoi lɛ feɔ.’ Ekɛɛ amɛ hu akɛ, kɛ́ amɛmiifee ejurɔ lɛ, amɛhã ‘ehi teemɔŋ.’ Esa akɛ amɛsɔle yɛ teemɔŋ, jeee ni mɛi ana amɛ. No baahã amɛjamɔ lɛ afee nɔ ni osato bɛ mli, ni e-Tsɛ hu baaná he miishɛɛ.—Mateo 6:1-6.

Amɛkɛ oyaiyeli wieɔ mɛi afatɔi ahe. Yesu kɛɛ akɛ: “Osatofo! Jiemɔ mplaŋ lɛ yɛ bo diɛŋtsɛ ohiŋmɛi mli klɛŋklɛŋ, kɛkɛ lɛ, obaana faŋŋ bɔ ni ooofee ojie jwɛi hwiaa lɛ yɛ onyɛmi lɛ hiŋmɛi mli.” (Mateo 7:5) Kɛ́ mɔ ko gbalaa ejwɛŋmɔ kɛyaa mɛi krokomɛi afatɔi anɔ, ni yɛ nakai beiaŋ nɔŋŋ lɛ, lɛ diɛŋtsɛ etɔɔ tɔmɔi ni yɔɔ hiɛdɔɔ lɛ, belɛ eefee osato. Anɔkwa sane ji akɛ, “mɛi fɛɛ efee esha ni amɛnyɛɛɛ amɛjie Nyɔŋmɔ anunyam lɛ kpo.”—Romabii 3:23.

Amɛhiɛɛɛ jwɛŋmɔ kpakpa. Gbi ko lɛ, Farisifoi lɛ akaselɔi kɛ Herode sɛɛfilɔi lɛ babi Yesu sane ko ni kɔɔ toowoo he. Amɛwo Yesu yiteŋ mulu amɛkɛɛ: “Tsɔɔlɔ, wɔle akɛ owieɔ anɔkwale ni otsɔɔ Nyɔŋmɔ gbɛ lɛ yɛ anɔkwale mli.” Kɛkɛ ni amɛbi lɛ sane kɛtsɔ lɛ akpa amɛkɛɛ: “Ani mla ŋmɛɔ gbɛ akɛ awo yi too ahã Kaisare aloo mla eŋmɛɛɛ gbɛ?” Yesu hã amɛ hetoo akɛ: “Osatofoi, mɛni hewɔ nyɛkaa mi?” Yesu tsɛ amɛ osatofoi, ni enɛ sa amɛ waa, ejaakɛ jeee sane ni amɛbabi lɛ lɛ hetoo amɛtaoɔ, shi amɛmiitao “amɛtsɔ nɔ ni ebaawie lɛ nɔ amɛdũ lɛ.”—Mateo 22:15-22.

Yɛ afi 33 Ŋ.B. Pentekoste gbi lɛ nɔ lɛ, ato Kristofoi asafo lɛ shishi, ni enɛ hã anɔkwayeli gbɛ eshwã. Anɔkwa Kristofoi lɛ bɔ mɔdɛŋ waa koni amɛjie osatofeemɔ kɛjɛ amɛteŋ. Akɛ nɔkwɛmɔnɔ lɛ, Petro, ni ji bɔfoi 12 lɛ ateŋ mɔ kome lɛ wo enyɛmimɛi Kristofoi lɛ hewalɛ ni amɛtsɔ ‘anɔkwale lɛ toiboo nɔ amɛjie nyɛmimɛi ahedɔɔ ní osato bɛ mli kpo.’ (1 Petro 1:22) Bɔfo Paulo wo ehefatalɔi nitsulɔi lɛ hewalɛ koni amɛjie “suɔmɔ ni jɛ tsui ni mli tse kɛ henilee kpakpa kɛ hemɔkɛyeli ní osato bɛ mli lɛ” kpo.—1 Timoteo 1:5.

Nibii ni Yesu kɛ ebɔfoi lɛ tsɔɔ, ni aŋma yɛ Biblia lɛ mli lɛ ahe yɛ sɛɛnamɔ ŋmɛnɛ, taakɛ eji yɛ klɛŋklɛŋ afii ohã lɛ mli lɛ. Bɔfo Paulo wie kɛkɔ enɛ he akɛ: “Nyɔŋmɔ wiemɔ lɛ hiɛ kã ni eyɛ hewalɛ ni enaa ba fe klante fɛɛ klante kɛ enaa nta, ni egbuɔ kɛboteɔ mli aahu kɛyashiɔ egbalaa susuma kɛ mumɔ mli, kɛ agbɛnɛ hu talɔi kɛ wuiaŋfɔ lɛ mli, ni enyɛɔ ekɔɔ tsui lɛ mli susumɔi kɛ yiŋtoi asɛɛ.” (Hebribii 4:12) Mɛi babaoo ekase Biblia lɛ ni amɛmiibɔ mɔdɛŋ ni amɛhi shi yɛ nɔ ni amɛkase lɛ naa, ni enɛ eye ebua amɛ ani amɛtsi amɛhe kɛje osatofeemɔ he ni amɛtsɔmɔ mɛi ni yeɔ anɔkwa. Susumɔ mɛi etɛ ni  awie amɛhe yɛ sane nɛɛ shishijee lɛ aniiashikpamɔ lɛ he okwɛ.

Be ni afɔ̃ Panayiota nine kɛtee Yehowa Odasefoi akpee ko shishi yɛ Maŋtsɛyeli Asa ko nɔ lɛ, nibii ni ena lɛ hã eshihilɛ tsake kwraa. Enaaa akɛ mɔ ko miifee nɔ ko ni ekɛsa mɛi ahiɛ kɛkɛ. Ekɛɛ akɛ: “Be ni mitee jɛmɛ lɛ, mina akɛ mɔ fɛɛ mɔ mijie suɔmɔ ni osato bɛ mli kpo—nɔ ko ni mina ko eko dã yɛ afii abɔ ni mikɛ mihe ewo maŋkwramɔŋ saji amli lɛ mli fɛɛ.”

Akɛ Panayiota bɔi Biblia lɛ kasemɔ, ni etee hiɛ kɛyashi abaptisi lɛ. Kɛjɛ be ni abaptisi lɛ nɛɛ, afii 30 eho. Nɔ ni ekɛɔ amrɔ nɛɛ ji: “Kɛjɛ be ni mibɔi Nyɔŋmɔ Maŋtsɛyeli—ni ji gbɛ pɛ ni wɔbaanyɛ wɔtsɔ nɔ wɔná jeŋ ni jalɛsaneyeli yɔɔ mli—lɛ he sane lɛ shiɛmɔ nɛɛ, miná miishɛɛ diɛŋtsɛ yɛ shihilɛ mli, ni enɛ ji nɔ ko ni be ni miyaa shĩa kɛ shĩa ni miyajieɔ maŋkwramɔŋ kuu ni miyɔɔ mli lɛ yi mihãa mɛi lɛ mináaa.”

Daniel tee ehiɛ waa yɛ Kristofoi asafo lɛ mli, ni akɛ sɔɔmɔ hegbɛi komɛi wo edɛŋ. Afii fioo komɛi asɛɛ lɛ, etɔ̃ tɔ̃mɔ ko ni hã ehe nilee bɔi lɛ yii. Ekɛɛ akɛ: “Akɛni afii komɛi ni eho be ni miyaa sɔlemɔ lɛ, mina osatofeemɔ ni yaa nɔ yɛ nakai sɔlemɔ lɛ mli lɛ hewɔ lɛ, minu he akɛ esa akɛ mikɛ misɔɔmɔ hegbɛi lɛ afɔ̃ shi. Misumɔɔɔ akɛ minanemɛi Kristofoi lɛ naa mi akɛ miji gbɔmɔ kpakpa ni yɛ anɔkwale mli lɛ miifee nɔ ko ni ejaaa.”

Miishɛɛ sane ji akɛ, be ni be shwie mli lɛ, Daniel nu he akɛ ebaanyɛ etsu sɔɔmɔ hegbɛi lɛ ahe nii ekoŋŋ ní ehe nilee gbaaa enaa, ni ekɛ miishɛɛ kpɛlɛ sɔɔmɔ hegbɛi anɔ ekoŋŋ yɛ asafo lɛ mli. Anaa anɔkwayeli ni tamɔ nɛkɛ lɛ yɛ mɛi ni sɔmɔɔ Nyɔŋmɔ ni amɛfeee osato lɛ ateŋ. Amɛbɔɔ mɔdɛŋ akɛ ‘amɛbaajie mplaŋ lɛ’ yɛ amɛ diɛŋtsɛ amɛhiŋmɛi mli dani ‘amɛjie jwɛi hwiaa’ lɛ kɛjɛ amɛnyɛmimɛi lɛ ahiŋmɛii amli.

Jeffery, ni kɛ ehe wo jarayeli nitsumɔ lɛ mli waa lɛ wie akɛ: “Be ni mitee hiɛ yɛ Biblia lɛ kasemɔ mli lɛ, mibayɔse akɛ minyɛŋ maya nɔ mafee mɔ ni shwɛɔ akpa, ní miisumɔ ni eto abla koni enine ashɛ nitsumɔi anɔ. Biblia lɛ mli ŋmalɛi komɛi ehã miná henilee kpakpa, tamɔ Abɛi 11:1 lɛ nɛkɛ; ni jɛmɛ kɛɔ akɛ, ‘shishiumɔ ŋsɛni lɛ, Yehowa miihĩ.’” Anɔkwa, Jeffery efeee enii tamɔ mɛi ni yabi Yesu toowoo he sane lɛ, moŋ lɛ ebɔ mɔdɛŋ akɛ kɛ́ ekɛ enyɛmimɛi Kristofoi lɛ kɛ mɛi krokomɛi fɛɛ miishara lɛ, efeŋ osato.

Yehowa Odasefoi akpekpei abɔ ni yɔɔ je lɛŋ fɛɛ lɛ bɔɔ mɔdɛŋ akɛ amɛkɛ nɔ ni amɛkaseɔ yɛ Biblia lɛ mli lɛ baatsu nii. Amɛmiimia amɛhiɛ ni amɛwo “subaŋ hee ní abɔ yɛ Nyɔŋmɔ suɔmɔ naa yɛ anɔkwa jalɛ kɛ anɔkwayeli krɔŋŋ mli lɛ.” (Efesobii 4:24) Wɔmiiwo bo hewalɛ ni otao mɛi ni Yehowa Odasefoi lɛ ji, nɔ ni amɛheɔ amɛyeɔ, kɛ bɔ ni amɛbaanyɛ amɛye amɛbua bo ni okase jeŋ hee ni Nyɔŋmɔ ewo he shi lɛ he nii. “Jalɛ baahi” nakai jeŋ hee lɛ mli lɛ, ni osatofeemɔ ehiŋ shi dɔŋŋ.—2 Petro 3:13.