Samuel ye Yehowa anɔkwa ewala gbii abɔ fɛɛ. Be ni eji gbekɛ nuu fioo lɛ, ekaseee Eli bihii Hofni kɛ Finehas jeŋba gbonyo lɛ. (1Sa 2:22-26) Samuel tee nɔ eda, ni Yehowa kɛ lɛ hi shi. (1Sa 3:19) Be ni egbɔ lɛ, etee nɔ eye Yehowa anɔkwa, eyɛ mli akɛ ebihii lɛ efeee nakai.​—1Sa 8:1-5.

Mɛni wɔbaanyɛ wɔkase yɛ Samuel sane lɛ mli? Kɛ́ odako tsɔ lɛ, hemɔ oye akɛ, Yehowa le naagbai ni okɛkpeɔ lɛ kɛ bɔ ni onuɔ he ohãa lɛ. Ebaanyɛ ewa bo ni ofee ekãa. (Yes 41:10, 13) Samuel nyɛŋ enyɛ ebii ni edara lɛ anɔ ni amɛye Yehowa anɔkwa. Kɛ́ oji fɔlɔ ni obi ko sɔmɔɔɔ Yehowa lɛ, hã anɔkwa sane nɛɛ ashɛje omii. Samuel shi sane lɛ ehã Yehowa, e-Tsɛ ni yɔɔ ŋwɛi lɛ, etee nɔ eye lɛ anɔkwa, ni efee nibii ni baahã Yehowa aná ehe miishɛɛ. Ekolɛ, onɔkwɛmɔnɔ kpakpa lɛ baahã obi lɛ aku esɛɛ kɛba Yehowa ŋɔɔ.

KWƐMƆ VIDIO NI JI, KASEMƆ NII KƐJƐ AMƐDƐŊ​—SAMUEL LƐ, KONI NO SƐƐ LƐ OHÃ SANEBIMƆI NI NYIƐ SƐƐ NƐƐ HETOO:

• Mɛɛ gbɛ nɔ Samuel fee ekãa be ni eji gbekɛ nuu fioo lɛ?

• Mɛɛ gbɛ nɔ Danny fee ekãa?

• Mɛɛ gbɛ nɔ Samuel fee nɔkwɛmɔnɔ kpakpa be ni egbɔ lɛ?

• Mɛɛ gbɛ nɔ Danny fɔlɔi fee nɔkwɛmɔnɔ kpakpa?