Be ni Jeŋ Ta II lɛ ba naagbee yɛ afi 1945 lɛ, Germany maŋ lɛ mli fɛɛ efee basaa. Emli maji lɛ efite, aŋamɔ skul srɔtoi lɛ, helatsamɔhei lɛ jeee he ni abaanyɛ aya ejaakɛ jɛmɛ efite, ni okplɛmii ni fɛlɛko yɛ maŋ lɛ mli hei srɔtoi fɛɛ. Ni akɛni niyenii ahe esɛ̃ hewɔ lɛ, amɛjara wa waa. Akɛ nɔkwɛmɔnɔ lɛ, mɛi ni yeɔ dujiashi jara lɛ hɔɔ bɔta gram 500 kɛheɔ otsii ekpaa nyɔmɔwoo!

Mɛi ni shihilɛ nɛɛ sa amɛhe lɛ ekomɛi ji Yehowa Odasefoi ohai babaoo ni ye afii abɔ yɛ tsuŋwoohei kɛ nsarai amli yɛ amɛhemɔkɛyeli hewɔ. Yɛ afi 1945 lɛ, aŋmɛɛ amɛhe ni amɛhiɛɛɛ nɔ ko nɔ ko, ni nɔ pɛ ni amɛkɛje kpo ji tsuŋwoohe atade ni amɛwo lɛ. Odasefoi krokomɛi hu ashĩai kɛ amɛnibii krokomɛi ŋmɛɛ amɛ. Hɔmɔ ye amɛteŋ mɛi komɛi aahu akɛ, kɛ́ aafee asafoŋ kpeei lɛ, nɔ nyɔɔ amɛnɔ.

Yehowa Odasefoi ni yɔɔ je lɛŋ hei krokomɛi lɛ ahe fee oya ni amɛkɛ niyenii kɛ atadei yaye amɛbua. Nyɛmimɛi ni nyiɛɔ nitsumɔ lɛ hiɛ yɛ nitsumɔhe yitso lɛ, ni yɔɔ United States lɛ bi ni nyɛmimɛi ni yɔɔ Bern, yɛ Switzerland lɛ, aye abua nyɛmimɛi ni yɔɔ Germany lɛ. Nathan H. Knorr, ni no mli lɛ, eji nitsumɔhe yitso lɛ najiaŋdamɔlɔ lɛ, yasara Yuropa koni eye ebua kɛto gbɛjianɔ srɔtoi ni akɛbaaye abua nyɛmimɛi lɛ.

Odasefoi ni yɔɔ Switzerland lɛ jɛ amɛsuɔmɔ mli amɛhã niyenii, atadei, kɛ shika. Akɛ nibii nɛɛ tee Bern klɛŋklɛŋ, ayajara mli, ato awo adekai kɛ nibii krokomɛi amli ni akɛtee Germany. Odasefoi ni yɔɔ maji krokomɛi anɔ, ni Sweden, Canada, kɛ United States fata he lɛ, hu ye amɛbua kɛ nibii nɛɛ ahe nitsumɔ kɛ amɛjaramɔ. Jeee Yehowa webii ni yɔɔ Germany lɛ pɛ ná nibii nɛɛ ahe sɛɛ, shi nyɛmimɛi ni yɔɔ maji krokomɛi ni yɔɔ Yuropa kɛ Asia ni ta lɛ fite nibii yɛ jɛmɛ lɛ hu ná he sɛɛ.

Nyɔji fioo komɛi amli lɛ, Switzerland nitsumɔhe nine lɛ kɛ kɔfi, miliki, sikli, omɔ, wiiti kɛ amɛhenɔi lɛ, aduawai ni aka ni egbi, yelibai, kɛ loi maje koni akɛyaye abua. Akɛ shika hu fata he.

Kɛfata he lɛ, Odasefoi ni yɔɔ Switzerland lɛ kɛ atadei srɔtoi srɔtoi ni ji hii anɔ kɛ yei anɔ yaye amɛbua. January 15, 1946, Buu-Mɔɔ lɛ wie akɛ: “Jeee wɔnyɛmimɛi lɛ anibii ni he ehiaaa amɛ lɛ ji nɔ ni amɛkɛyaye amɛbua lɛ, moŋ lɛ, amɛnibii ni hi fe fɛɛ lɛ ji nɔ ni amɛkɛyaye amɛbua lɛ. Amɛkɛ nibii shã afɔle diɛŋtsɛ kɛye amɛbua amɛnyɛmimɛi ni yɔɔ Germany lɛ.”

Odasefoi ni yɔɔ Switzerland lɛ hã shuu loo tokotai srɔtoi aaafee 1,000 sɔŋŋ. Akwɛ fɛɛ ni ana akɛ naagba ko kwraa bɛ nibii nɛɛ ahe dani akɛtee. Be ni nyɛmimɛi ni yɔɔ Wiesbaden, yɛ Germany lɛ gbele nibii ni akɛmaje amɛ nɛɛ anaa lɛ, amɛna akɛ shuu srɔtoi kpakpai sɔŋŋ yɔɔ mli. Nyɛmi nuu ko ŋma akɛ, “Efeee mi akɛ shwapo ko yɛ Germany maŋ nɛɛ mli ni atadei srɔtoisrɔtoi kpakpai nɛɛ fɛɛ eko yɛ mli.”

Atee nɔ akɛ yelikɛbuamɔ nibii nɛɛ maje nyɛmimɛi nɛɛ kɛyashi August 1948. Kɛ́ abu fɛɛ naa lɛ, Odasefoi ni yɔɔ Switzerland lɛ kɛ nibii adekai 444 ni tsiimɔ shɛɔ tɔn 25 sɔŋŋ lɛ yaye amɛbua amɛnyɛmimɛi Odasefoi ni yɔɔ Germany lɛ. Taakɛ wɔtsĩ tã lɛ, jeee Odasefoi ni yɔɔ Switzerland lɛ pɛ kɛ amɛhe wo yelikɛbuamɔ nitsumɔ nɛɛ mli. Shi amɛji kui ni yaye amɛbua lɛ ateŋ bibioo ni yɔɔ mli. Nakai beiaŋ lɛ, Odasefoi 1,600 lɛ pɛ yɔɔ Switzerland!

Yesu Kristo wie akɛ: “Kɛji nyɛsumɔɔ nyɛhe lɛ, no mɛi fɛɛ kɛbaale akɛ mikaselɔi ji nyɛ.” (Yohane 13:34, 35) Suɔmɔ tsirɛ Yehowa webii lɛ ní amɛkɛ amɛnibii kpakpai fe fɛɛ lɛ ayahã amɛnyɛmimɛi lɛ, jeee amɛnibii ni he ehiaaa amɛ. (2 Korintobii 8:1-4) Lɛta ko ni aŋma kɛjɛ Zurich lɛ tsĩ tã akɛ “Nyɛmimɛi ni bɛ atade kɛ nibii ni amɛkɛbaahã, shi amɛmiisumɔ ni amɛye amɛbua yɛ gbɛ fɛɛ gbɛ nɔ lɛ kɛ shika fioo ni amɛyɔɔ lɛ yaye amɛbua.”

Etsɛɛɛ kɛkɛ ni Yehowa webii ni yɔɔ Germany lɛ baje yiwai kɛ naagbai ni ta lɛ kɛba lɛ mli, no ji amɛhe bajɔ amɛ. Bɔ ni ato nibii ahe gbɛjianɔ jogbaŋŋ ni amɛnyɛmimɛi Odasefoi lɛ hu kɛ amɛhe shã afɔle, amɛjie suɔmɔ kpo, ni amɛkɛ nibii hu baye amɛbua lɛ ji yiŋtoo kome hewɔ ni amɛhe jɔ amɛ lɛ.