Yɛ October 21, 1940 lɛ, New Zealand nɔyeli lɛ wie akɛ Yehowa Odasefoi ji maŋjwalɔi, ni amɛhe yɛ oshara kɛhã maŋbii lɛ. Eyɛ mli akɛ nɔ ni nɔyeli lɛ kɛɛ lɛ hã naagbai babaoo ba Yehowa Odasefoi lɛ anɔ moŋ, shi amɛnijiaŋ ejeee wui. Akɛ nɔkwɛmɔnɔ lɛ, amɛtee nɔ amɛkpe kɛhã amɛjamɔ nifeemɔi, eyɛ mli akɛ kɛ́ nɔyeli lɛ ná le lɛ, abaanyɛ abafite amɛkpee lɛ ni amɔmɔ amɛ po.

Andy Clarke, ni ejeee Yehowa Odasefonyo lɛ yɔse akɛ eŋa Mary ni ji Odasefonyo lɛ etswa efai shi akɛ yɛ bɔ ni awoɔ Yehowa Odasefoi ahe gbeyei lɛ fɛɛ sɛɛ lɛ, ebaakã he eya amɛsafoŋ kpeei lɛ. Eshe gbeyei akɛ kɛ́ eŋa lɛ miiya asafoŋ kpee lɛ abaamɔ lɛ. Eyɛ mli akɛ no mli lɛ, kɛ́ Mary miiya asafoŋ kpee lɛ Andy kɛ lɛ eyaaa moŋ nɛ, shi ekɛ lɛ babɔi asafoŋ kpeei lɛ yaa, ni ekɛɛ akɛ: “Kɛ́ amɛbaamɔ bo lɛ, belɛ esa akɛ amɛmɔ mi hu!” Kɛjɛ no sɛɛ kɛyaa lɛ, Andy yaa kpeei fɛɛ ni Yehowa Odasefoi lɛ feɔ lɛ. Be ko sɛɛ lɛ, lɛ hu ebatsɔ Yehowa Odasefonyo ni abaptisi lɛ. Eyɛ mli akɛ awa nyɛmimɛi ni hi shi yɛ New Zealand lɛ ayi be ni Jeŋ Ta II lɛ yaa nɔ lɛ moŋ nɛ, shi tamɔ Mary fee lɛ, amɛtee nɔ amɛye Yehowa anɔkwa.

Gbi ko be ni Nyɛminuu John Murray ni eye afii 78 lɛ shiɛɔ yɛ shĩa fɛɛ shĩa lɛ, polisifoi mɔ lɛ. Saneyelihe lɛ bu lɛ fɔ akɛ ekɛ ehe miiwo maŋjwalɔi akuu ko nifeemɔi amli. Amɔmɔ Odasefoi pii krokomɛi hu kɛtee saneyelihe; agbe mɛi komɛi shika gbele, ni awo mɛi komɛi hu tsuŋ nɔ ni miihe ashɛ nyɔji etɛ.

Odasefoi lɛ jɛ amɛhenilee ni amɛkɛ Biblia lɛ etsɔse lɛ mli amɛkpoo asraafoi anitsumɔ lɛ. (Yesaia 2:4) Enɛ hewɔ lɛ, be ni ta lɛ yaa nɔ lɛ, amɛkɛ jaramɔ shihilɛi kpe waa be ni atsɛ amɛteŋ mɛi pii ni amɛkɛ amɛhe abadɔmɔ asraafoi anitsumɔ lɛ. Akɛni Odasefoi lɛ ekpɛlɛɛɛ ni amɛbaatsu asraafoi lɛ anitsumɔ lɛ hewɔ lɛ, ayawo amɛteŋ mɛi 80 tsuŋ kɛyashi be ni ta lɛ baaba naagbee. Eyɛ mli akɛ awa nyɛmimɛi nɛɛ ayi waa yɛ tsuŋwoohe lɛ ni fɛ̃i ye amɛ waa moŋ, shi fɛɛ sɛɛ lɛ, amɛtee nɔ amɛkɛ miishɛɛ sɔmɔ Yehowa.

Odasefoi ni yɔɔ tsuŋwoohe lɛ bɔi asafoŋ kpee kɛ shiɛmɔ nitsumɔ lɛ he gbɛjianɔtoo amrɔ nɔŋŋ. Amɛtsu nii akɛ asafo, amɛfeɔ asafoŋ kpeei srɔtoi lɛ fɛɛ, ni amɛshiɛɔ amɛhãa mɛi ni yɔɔ tsuŋwoohe lɛ. Tsuŋwoohe lɛ ekomɛi amli po lɛ, aŋmɛ Odasefoi lɛ gbɛ ni amɛfee kpokpaa nɔ kpee, ni tsuŋwoohe lɛ nɔkwɛlɔi lɛ ekomɛi tee kpee lɛ. Mɛi ni ashiɛ ahã amɛ yɛ tsuŋwoohe lɛ ekomɛi kpɛlɛ Biblia mli anɔkwalei lɛ anɔ ni abaptisi amɛ akɛ Yehowa Odasefoi.

Bruce, ni ji Mary kɛ Andy ni wɔwie amɛhe kɛtsɔ hiɛ lɛ abi nuu fioo lɛ, na tsu ni awo lɛ akɛ hegbɛ ni ená ni ekɛbaawaje ekɛ Nyɔŋmɔ teŋ naanyobɔɔ lɛ. Ewie akɛ, “Yɛ migbɛfaŋ lɛ, etamɔ nɔ ni mitee skul ko, ejaakɛ ehã miná hegbɛ ni mikɛ nyɛmimɛi ni yɔɔ niiashikpamɔ waa lɛ baagba sane koni makase nibii yɛ amɛdɛŋ.”

Yɛ 1944 lɛ, nɔyeli lɛ kpɛ mli akɛ, ebaaŋmɛɛ mɛi ni awo amɛtsuŋ lɛ ekomɛi ahe. Shi asraafoi onukpai lɛ ekpɛlɛɛɛ nɔ, ejaakɛ amɛle akɛ kɛ́ aŋmɛɛ Odasefoi lɛ ahe lɛ, amɛbaaya nɔ amɛkɛ mɛi krokomɛi agba amɛhemɔkɛyeli lɛ he sane. Amaniɛbɔɔ lɛ tsɔɔ akɛ: “Eyɛ mli akɛ tsuŋwoo baanyɛ akudɔ mɛi ni tamɔ nɛkɛ lɛ anifeemɔi komɛi moŋ, shi enyɛŋ etsake amɛ kɔkɔɔkɔ.”

Akɛni Odasefoi lɛ anitsumɔ lɛ ni atsĩ naa lɛ gbɛ eshwã hewɔ lɛ, mɛi babaoo tao akɛ amɛbaale Odasefoi lɛ ahe sane. Be ni be shwie mli lɛ, mɛi babaoo bayɔse akɛ Yehowa Odasefoi lɛ jeee mɛi komɛi ni he yɔɔ oshara kɛhã maŋbii lɛ. Amɛyɔse akɛ Yehowa Odasefoi ahe bɛ gbeyei kwraa, moŋ lɛ amɛji Kristofoi ni tiuɔ toiŋjɔlɛ sɛɛ. Enɛ hewɔ lɛ, Yehowa Odasefoi ayibɔ lɛ tee hiɛ waa yɛ New Zealand. Yɛ 1939 lɛ amɛyibɔ ji 320, shi be ni shɛɔ 1945 lɛ, amɛyibɔ lɛ etee hiɛ kɛyashɛ 536!

Yɛ be kɛ beiaŋ lɛ, amralo lɛ najiaŋdamɔlɔi ni hiɛ jwɛŋmɔ ni ja lɛ naa akɛ ejaaa gbɛ akɛ atsĩɔ Odasefoi lɛ ajamɔ lɛ naa. Be ko be ni kojolɔ ko ebo odase ni aye ashi wɔnyɛminuu ko akɛ eeshiɛ lɛ toi egbe naa lɛ, etswa sane lɛ efɔ̃. Kojolɔ lɛ wie akɛ: “Yɛ nɔ ni miheɔ miyeɔ kɛ nɔ ni mile yɛ mla lɛ mli lɛ naa lɛ, efeee mi akɛ kɛ́ mɔ ko miija Biblia lɛ eehã mɛi lɛ, efee esha ni biɔ ni agbala etoi.”

Be ni ajie naatsĩi lɛ, amɛtswa amɛfai shi akɛ, amɛbaaye amɛbua amɛkutsoŋbii lɛ ni amɛkase Nyɔŋmɔ Maŋtsɛyeli lɛ he nii babaoo fe tsutsu lɛ. Yɛ 1945 lɛ, nitsumɔhe nine lɛ ŋma wolo ehã asafoi fɛɛ ni yɔɔ New Zealand lɛ akɛ: “Nyɛteŋ mɔ fɛɛ mɔ kɛ mɛi awie yɛ hiɛshikamɔ mli, nyɛtsea nyɛhiɛ nyɛhãa mɛi, ni nyɛkɛ mɛi fɛɛ aye yɛ mlihilɛ mli. Nyɛkwaa nifeemɔi ni kɛ naataamɔi kɛ mlifu baa. Nyɛkaia akɛ, mɛi ni wɔkɛkpeɔ lɛ heɔ amɛjamɔ tsɔɔmɔi lɛ anɔ amɛyeɔ jogbaŋŋ, ni amɛmiisumɔ ni amɛhi shi yɛ naa. . . . Amɛteŋ mɛi babaoo lɛ, Nuŋtsɔ lɛ ‘gwaŋtɛŋi’ ji amɛ, ni esa kɛ wɔye wɔbua amɛ ni amɛbale Yehowa kɛ e-Maŋtsɛyeli lɛ.”

Ŋmɛnɛ lɛ, Yehowa Odasefoi ni yɔɔ New Zealand lɛ miiya nɔ amɛmiishiɛ Biblia mli anɔkwalei lɛ amɛmiitsɔɔ maŋbii lɛ kɛ mɛi ni baa maŋ lɛ mli shisharamɔ lɛ. Gbi ko lɛ, yɛ ŋmlɛtswaa fioo ko pɛ mli lɛ, Odasefoi ejwɛ ni yɔɔ Turangi lɛ kɛ mɛi 67 ni jɛ maji 17 anɔ ni eba shisharamɔ lɛ gba sane!

Ekã shi faŋŋ akɛ, New Zealandbii lɛ eyɔse akɛ Yehowa Odasefoi lɛ sumɔɔ toiŋjɔlɛ, amɛji Kristofoi kpakpai, ni heɔ nɔ ni Biblia lɛ tsɔɔ amɛyeɔ, no hewɔ lɛ amɛbɔɔ mɔdɛŋ amɛhiɔ shi yɛ naa. Daa afi lɛ, abaptisiɔ mɛi fe ohai abɔ akɛ Yehowa Odasefoi yɛ jɛmɛ. Be ni shɛɔ afi 2019 lɛ, Yehowa Odasefoi ni fa fe 14,000 kɛ miishɛɛ miisɔmɔ Yehowa yɛ maŋ nɛɛ mli.