Ani onuɔ he akɛ ebɛ mlɛo akɛ abaana srɔto-feemɔ ni yɔɔ anɔkwale kɛ amale teŋ? Etamɔ nɔ ni bei nɛɛ amli lɛ, mɛi hãa amɛhenumɔi kɛ nibii ni amɛheɔ amɛyeɔ lɛ kudɔɔ amɛsusumɔi fe ni amɛbaahã anɔkwale kɛ saji ni ja akudɔ amɛ. Akɛ nɔkwɛmɔnɔ lɛ, asɔ̃ Blɔfo wiemɔ ni ji “post-truth” lɛ kɛdamɔ shi kɛhã shihilɛ nɛɛ, ni ebahe shi waa yɛ bei nɛɛ amli. a Ehãa wɔnaa bɔ ni jeŋ muu lɛ fɛɛ yɔɔ ŋmɛnɛ lɛ, ejaakɛ mɛi babaoo heɔ amɛyeɔ akɛ anɔkwale ko bɛ.

 Susumɔ nɛɛ jeee nɔ ko hee. Aaafee afii 2,000 ni eho nɛɛ, akɛni Roma Amralo Pontio Pilato heee eyeee akɛ anɔkwale ko yɛ hewɔ lɛ, ekwa ebi Yesu akɛ: “Mɛni ji anɔkwale?” (Yohane 18:38) Eyɛ mli akɛ Pilato emɛɛɛ ni Yesu ahã lɛ sane ni ebi lɛ hetoo moŋ, shi esanebimɔ lɛ he miihia. Biblia lɛ kɛ sanebimɔ nɛɛ hetoo ni baahã otsui anyɔ omli hãa, ni ebaanyɛ eye ebua bo ni ona bɔ ni obaahi shi ohã yɛ jeŋ ni mɛi babaoo heee amɛyeee akɛ anɔkwale ko yɛ nɛɛ mli.

Ani Anɔkwale yɛ po?

 Hɛɛ. Biblia lɛ kɛ wiemɔ “anɔkwale” lɛ tsuɔ nii kɛhãa nɔ ko ni yɛ mli lɛɛlɛŋ loo eja. Biblia lɛ tsɔɔ akɛ, Yehowa b Nyɔŋmɔ ji anɔkwale diɛŋtsɛ Jɛɛhe, ni etsɛɔ Yehowa akɛ “anɔkwale Nyɔŋmɔ.” (Lala 31:5) Anɔkwale ni jɛ Nyɔŋmɔ ŋɔɔ lɛ yɛ Biblia lɛ mli, ni Biblia lɛ kɛ anɔkwale lɛ toɔ la loo kane he, ejaakɛ ebaanyɛ ekudɔ bo jogbaŋŋ kɛtsɔ ŋmɛnɛ jeŋ ni mli shihilɛ efee basaa nɛɛ mli.​—Lala 43:3; Yohane 17:17.

Te obaafee tɛŋŋ ona anɔkwale lɛ?

 Nyɔŋmɔ sumɔɔɔ ni wɔkpɛlɛɔ anɔkwale ni yɔɔ Biblia lɛ mli lɛ nɔ kɛkɛ ni wɔsusuuu he. Eesumɔ ni wɔkɛ wɔjwɛŋmɔ atsu nii kɛpɛi Biblia mli anɔkwale lɛ mli moŋ fe ni wɔbaahã wɔhenumɔi akudɔ wɔ. (Romabii 12:1) Eesumɔ ni wɔtsɔ ‘wɔjwɛŋmɔ muu fɛɛ’ nɔ wɔbale lɛ ni wɔsumɔ lɛ hu, ni ewoɔ wɔ hewalɛ ni wɔ diɛŋtsɛ wɔpɛi nii amli kɛma nɔ mi wɔhã wɔhe akɛ, nibii ni wɔkaseɔ yɛ Biblia lɛ mli lɛ, anɔkwale ni.​—Mateo 22:37, 38; Bɔfoi 17:11.

Nɛgbɛ amale jɛ?

 Biblia lɛ tsɔɔ akɛ, Nyɔŋmɔ henyɛlɔ, Satan Abonsam, ni Biblia lɛ tsɛɔ lɛ “malemɔ tsɛ” lɛ ji mɔ ni kɛ amale ba. (Yohane 8:44) Emale Nyɔŋmɔ he etsɔɔ klɛŋklɛŋ adesai lɛ. (1 Mose 3:1-6, 13, 17-19; 5:5) Kɛjɛ no nɔ kɛbaa nɛɛ, Satan etee nɔ egbɛ Nyɔŋmɔ he amalei eshwa, ni ehãaa ale anɔkwale ni kɔɔ Nyɔŋmɔ he lɛ.​—Kpojiemɔ 12:9.

Mɛni hewɔ amale ehe shi waa ŋmɛnɛ nɛkɛ?

 Ye wɔbe nɛɛ, ni Biblia lɛ tsɛɔ lɛ “naagbee gbii lɛ” amli lɛ, Satan miiná mɛi anɔ hewalɛ, ni eelaka mɛi babaoo fe bei fɛɛ ni eho. Efɔɔ kaa akɛ mɛi wieɔ amale wiemɔi kɛlakaa mɛi koni amɛkɛshishiu amɛ. (2 Timoteo 3:1, 13) Ŋmɛnɛ lɛ, jamɔi babaoo amli eyi obɔ̃ kɛ amalei. Biblia lɛ gba yɛ wɔbei nɛɛ ahe akɛ, ‘mɛi baabua tsɔɔlɔi anaa amɛwo amɛhe koni ata amɛtoiiaŋ ahã amɛ,’ ejaakɛ “amɛbaakpa anɔkwale lɛ toiboo.”​—2 Timoteo 4:3, 4.

Mɛni hewɔ anɔkwale lɛ he hiaa lɛ?

 Anɔkwale hãa mɛi náa hekɛnɔfɔ̃ɔ yɛ mɛi amli. Kɛ́ hekɛnɔfɔ̃ɔ bɛ lɛ, naanyobɔɔ fiteɔ ni nibii eyaaa nɔ jogbaŋŋ yɛ maŋ mli. Biblia lɛ kɛɔ akɛ, Nyɔŋmɔ miisumɔ ni wɔjamɔ lɛ adamɔ anɔkwale nɔ. Ekɛɛ: “Mɛi ni jáa [Nyɔŋmɔ] lɛ, esa akɛ amɛkɛ mumɔ kɛ anɔkwale ajá lɛ.” (Yohane 4:24) Kɛ́ ootao ole bɔ ni Biblia mli anɔkwale lɛ baanyɛ aye abua bo koni oyɔse jamɔ mli amalei, ni otsi ohe kɛje he lɛ, kanemɔ saji ni aŋmala kɛtsara nɔ ni saneyitso ji “Amalei Ni Hãa Asusuɔ Akɛ Nyɔŋmɔ Yitsoŋ Wa” lɛ.

Mɛni hewɔ ni Nyɔŋmɔ miisumɔ ni male anɔkwale lɛ?

 Nyɔŋmɔ miisumɔ ni oná wala kɛya naanɔ, ni esa akɛ okase ehe anɔkwalei lɛ bɔ ni afee ni onine ashɛ naanɔ wala nɛɛ nɔ. (1 Timoteo 2:4) Kɛ́ okase Nyɔŋmɔ mlai ni kɔɔ nɔ ni ja kɛ nɔ ni ejaaa he, ni ohi shi yɛ naa lɛ, okɛ lɛ baabɔ naanyo kpaakpa. (Lala 15:1, 2) Nyɔŋmɔ tsu Yesu kɛba shikpɔŋ lɛ nɔ ni ebaye ebua mɛi koni amɛle anɔkwale lɛ. Nyɔŋmɔ miisumɔ ni wɔbo Yesu tsɔɔmɔi lɛ toi.​—Mateo 17:5; Yohane 18:37.

Ani Nyɔŋmɔ baahã Amale loo malemɔ sɛɛ afo gbi ko kɛ̃?

 Hɛɛ. Kɛ́ mɛi tsɔ̃ malemɔ nɔ amɛná nii yɛ mɛi ahe lɛ, Nyɔŋmɔ miihi kwraa. Ewo shi akɛ, ebaakpãtã mɛi ni etswa amɛfai shi akɛ amɛbaaya nɔ amɛmale lɛ ahiɛ. (Lala 5:6) Kɛ́ Nyɔŋmɔ fee nakai lɛ, ebaahã eshiwoo akɛ: “Naabu ni wieɔ anɔkwale lɛ baahi shi kɛya naanɔ” lɛ hu aba mli​—Abɛi 12:19.