Yɛ mɛi babaoo agbɛfaŋ lɛ, akɛ akɛ mɛi fɛɛ baaye jogbaŋŋ ekɔɔɔ he eko maŋ nɔ ni amɛjɛ lɛ ji lamɔ ko kɛkɛ.

•   “Yɛ je lɛŋ fɛɛ lɛ, hewolonɔ su mlijiemɔ ebafee tamɔ pɔizin ko ni miifite gbɛjianɔtoi, kui, kɛ mɛi ashihilɛi. Ehã be fɛɛ be nɛɛ mɛi kɛ mɛi krokomɛi yeee jogbaŋŋ.”​—António Guterres, Jeŋmaji Ekomefeemɔ Lɛ Hiɛnyiɛlɔ.

 Ani be ko baaba ni akɛ gbɔmɛi fɛɛ baaye jogbaŋŋ ekɔɔɔ he eko maŋ nɔ ni amɛjɛ loo amɛhewolonɔ su? Mɛni Biblia lɛ kɛɔ yɛ he?

 Biblia lɛ hãa wɔnaa bɔ ni Nyɔŋmɔ kɛ gbɔmɛi srɔtoi fɛɛ yeɔ ehãa.

•   “Gbɔmɔ kome mli [Nyɔŋmɔ jɛ] efee gbɔmɛi ajeŋmaji fɛɛ koni amɛhi shikpɔŋ muu lɛ fɛɛ nɔ.”​—Bɔfoi 17:26.

•   “Nyɔŋmɔ kwɛɛɛ mɛi ahiɛiaŋ, shi moŋ, yɛ jeŋmaŋ fɛɛ jeŋmaŋ mli lɛ, mɔ ni sheɔ lɛ gbeyei ni efeɔ nɔ ni ja lɛ, lɛ ji mɔ ni enáa ehe miishɛɛ.”​—Bɔfoi 10:34, 35.

 Biblia lɛ hãa wɔnaa akɛ gbɔmɛi fɛɛ lɛ weku kome mli amɛjɛ.

 Yɛ Nyɔŋmɔ Maŋtsɛyeli lɛ, ni ji ŋwɛi nɔyeli lɛ shishi lɛ, gbɔmɛi fɛɛ kɛ amɛhe baaye jogbaŋŋ ni hiɛaŋkwɛmɔ loo hewolonɔ su mlijiemɔ ko kwraa bɛ mli. Nakai nɔyeli lɛ baatsɔɔ mɛi bɔ ni akɛ mɛi krokomɛi yeɔ jogbaŋŋ ahãa. Abaatsɔɔ mɛi bɔ ni amɛbaafee amɛjie susumɔi ni ejaaa fɛɛ ni kɔɔ hewolonɔ su mlijiemɔ he lɛ amɛshɛ amɛfɔ̃.

•   “Mɛi ni yɔɔ shikpɔŋ lɛ nɔ lɛ kaseɔ jalɛ nifeemɔ.”​—Yesaia 26:9.

•   “Nɔ ni baajɛ anɔkwa jalɛ nifeemɔ mli aba ji toiŋjɔlɛ, ni yibii ni anɔkwa jalɛ nifeemɔ baawo ji, ebaahã mɛi atsui anyɔ amɛmli ni amɛhi shi shweshweeshwe daa.”​—Yesaia 32:17.

 Ŋmɛnɛ lɛ, mɛi akpekpei abɔ miikase bɔ ni amɛbaafee amɛkɛ mɛi fɛɛ aye yɛ bulɛ mli, ni amɛkɛ woo ahã amɛ.

•   Kɛ́ ootao ole enɛ he saji krokomɛi lɛ, kanemɔ Awake! ni yitso ji “Is There a Cure for Prejudice?” lɛ.

•   Kanemɔ sane ni ji “Bɔ Ni Obaafee Okɛ Obii Lɛ Asusu Hewolonɔ Su Mlijiemɔ He” lɛ koni ole gbɛ nɔ ni fɔlɔi baanyɛ amɛtsɔ amɛkɛ amɛbii asusu sane nɛɛ he yɛ shĩa.