Kɛ́ afee mɔ ko efɔŋ ni ayeee lɛ jalɛsane lɛ, Yesu le bɔ ni mɔ lɛ nuɔ he ehãa. Afolɔ enaa, ayi lɛ bɔ ni mla eŋmɛɛɛ gbɛ, atsɔ sane hiɛ abu shi be ni ayeɔ esane, abu lɛ fɔ ni efeko nɔ ko, ni agbe lɛ musuŋshaa nɔ. Eyɛ mli akɛ efeko efɔŋ ko moŋ, shi ejɛ esuɔmɔ mli ekɛ ‘ewala hã akɛ kpɔmɔnɔ kɛkpɔ̃ mɛi babaoo.’ (Mateo 20:28; Yohane 15:13) Amrɔ nɛɛ, akɛ Nyɔŋmɔ Maŋtsɛyeli lɛ nɔ Maŋtsɛ lɛ, etsɛŋ ebaahã aye jalɛsane yɛ shikpɔŋ lɛ nɔ fɛɛ, ni ebaafo efɔŋfeemɔ sɛɛ kwraa.​—Yesaia 42:3.

 Biblia lɛ tsɔɔ bɔ ni je lɛ shihilɛ baafee ahã be ni Yesu etsu saji ahe nii lɛ sɛɛ, ekɛɛ:

•   “Onaŋ mɛi fɔji lɛ dɔŋŋ; obaayakwɛ he ni amɛyɔɔ lɛ, shi onaŋ amɛ yɛ jɛmɛ. Shi mɛi ni he jɔ lɛ, shikpɔŋ lɛ baatsɔ amɛnɔ, ni amɛmii baashɛ amɛhe waa yɛ toiŋjɔlɛ babaoo mli.”​—Lala 37:10, 11.

 Mɛni wɔbaanyɛ wɔfee kɛtsɔɔ bɔ ni wɔhiɛ sɔɔ nibii fɛɛ ni Yesu efee kɛ nɔ ni etsɛŋ ebaafee ehã wɔ lɛ? Yɛ Luka 22:19 lɛ, Yesu kɛɛ esɛɛnyiɛlɔi lɛ akɛ amɛkai egbele lɛ. No hewɔ ni daa afi lɛ, kɛ́ eshɛ gbi nɔ ni Yesu gbo lɛ, Yehowa Odasefoi buaa amɛhe naa kɛkaiɔ lɛ lɛ. Wɔmiifɔ̃ bo nine koni obafata wɔhe kɛye Yesu gbele lɛ Kaimɔ gbi jurɔ lɛ yɛ Hɔgbaa, March 24, 2024.

Taomɔ He Ko Ni Abaafee Kaimɔ Lɛ Yɛ