1. Namɔ baanyɛ atsɔɔ wɔ bɔ ni esa akɛ wɔjá Nyɔŋmɔ wɔhã?

JAMƆI babaoo kɛɛ amɛtsɔɔ Nyɔŋmɔ he anɔkwa saji. Shi te enɛ baafee tɛŋŋ afee anɔkwale, be ni esoro nɔ ni jamɔ fɛɛ jamɔ tsɔɔ yɛ mɔ ni Nyɔŋmɔ ji, kɛ bɔ ni esa akɛ ajá lɛ ahã lɛ he lɛ? Te wɔbaafee tɛŋŋ wɔle bɔ ni Nyɔŋmɔ sumɔɔ akɛ wɔjá lɛ wɔhã lɛ? Yehowa pɛ ji mɔ ni baanyɛ atsɔɔ wɔ bɔ ni esa akɛ wɔjá lɛ wɔhã.

2. Te obaafee tɛŋŋ ona bɔ ni esa akɛ ojá Nyɔŋmɔ ohã lɛ?

² Yehowa kɛ Biblia lɛ ehã wɔ koni wɔjɛ mli wɔkase bɔ ni esa akɛ wɔjá lɛ wɔhã. No hewɔ lɛ, kasemɔ Biblia lɛ, ni Yehowa baaye abua bo koni oná nibii ni etsɔɔ bo kɛjɛɔ Biblia lɛ mli lɛ ahe sɛɛ, ejaakɛ ejwɛŋɔ ohe waa.​—Yesaia 48:17.

3. Mɛni Nyɔŋmɔ sumɔɔ ni wɔfee?

³ Mɛi komɛi kɛɔ akɛ Nyɔŋmɔ yɛ jamɔi fɛɛ ahe miishɛɛ, shi jeee nakai Yesu tsɔɔ wɔ. Ekɛɛ akɛ: “Jeee mɔ fɛɛ mɔ ni kɛɔ mi akɛ, ‘Nuŋtsɔ, Nuŋtsɔ’ lɛ, baabote ŋwɛi Maŋtsɛyeli lɛ mli, shi moŋ, mɔ ni feɔ mi-Tsɛ ni yɔɔ ŋwɛi lɛ suɔmɔnaa nii lɛ pɛ.” No hewɔ lɛ, esa akɛ wɔkase nɔ ni Nyɔŋmɔ sumɔɔ, koni wɔfee no. Yesu kɛ mɛi ni booo Nyɔŋmɔ toi lɛ to ojotswalɔi loo ‘mɛi ni tsuɔ nitsumɔi ni mla eŋmɛɛɛ gbɛ’ lɛ ahe, no hewɔ lɛ, esaaa ni wɔkɛ sane nɛɛ shwɛɔ kwraa.​—Mateo 7:21-23.

4. Kɛ́ wɔmiitao wɔfee nɔ ni Nyɔŋmɔ sumɔɔ lɛ, te Yesu kɛɛ ebaatamɔ tɛŋŋ? Mɛni esa akɛ wɔfee koni wɔná naanɔ wala?

⁴ Yesu hã wɔle akɛ jeee be fɛɛ be ebaafee mlɛo kɛhã wɔ akɛ wɔbaafee nɔ ni Nyɔŋmɔ sumɔɔ. Ekɛɛ akɛ: “Nyɛtsɔa  agbó bibioo lɛ mli, ejaakɛ agbó ni da kɛ gbɛ ni lɛɛ lɛ ji nɔ ni kɛ mɔ yaa hiɛkpatamɔ mli, ni mɛi babaoo ji mɛi ni tsɔɔ agbó nɛɛ mli; shi agbó bibioo lɛ kɛ gbɛ ni elɛɛɛ lɛ ji nɔ ni kɛ mɔ yaa wala mli, ni mɛi fioo ji mɛi ni naa no.” (Mateo 7:13, 14) Kɛ́ wɔnyiɛ gbɛ ni elɛɛɛ lɛ nɔ, ni tsɔɔ akɛ wɔjá Nyɔŋmɔ yɛ gbɛ ni esumɔɔ lɛ nɔ lɛ, wɔbaaná naanɔ wala. Shi kɛ́ wɔnyiɛ gbɛ ni lɛɛ lɛ nɔ, ni tsɔɔ akɛ wɔjá Nyɔŋmɔ yɛ gbɛ ni esumɔɔɔ lɛ nɔ lɛ, wɔbaagboi. Shi Yehowa sumɔɔɔ ni mɔ ko mɔ ko agbo. Eesumɔ ni mɔ fɛɛ mɔ akase ehe nii.​—2 Petro 3:9.

5. Te obaafee tɛŋŋ ona mɛi ni jáa Nyɔŋmɔ yɛ gbɛ ni esumɔɔ lɛ nɔ lɛ?

⁵ Yesu kɛɛ akɛ wɔbaanyɛ wɔyɔse mɛi ni jáa Nyɔŋmɔ yɛ gbɛ ni esumɔɔ akɛ ajá lɛ ahã lɛ nɔ lɛ. Kɛ́ wɔpɛi nibii ni amɛheɔ amɛyeɔ kɛ nibii ni amɛfeɔ lɛ amli lɛ wɔbaanyɛ wɔna amɛ. Ekɛɛ akɛ: “Amɛyibii lɛ nyɛkɛbaayoo amɛ.” Ekɛɛ hu akɛ: “Tso kpakpa fɛɛ tso kpakpa woɔ yibii kpakpai.” (Mateo 7:16, 17) Enɛ etsɔɔɔ akɛ mɛi ni jáa Nyɔŋmɔ yɛ gbɛ ni esumɔɔ akɛ ajá lɛ ahã lɛ nɔ lɛ tɔ̃ɔɔ. Shi Nyɔŋmɔ tsuji bɔɔ mɔdɛŋ akɛ amɛbaafee nɔ ni ja be fɛɛ be. Amrɔ nɛɛ, wɔbaakwɛ nibii ni baaye abua wɔ ni wɔyɔse mɛi ni jáa Nyɔŋmɔ yɛ gbɛ ni esumɔɔ lɛ nɔ lɛ.

6, 7. Mɛni hewɔ nibii ni mɛi ni jáa Nyɔŋmɔ yɛ gbɛ ni esumɔɔ lɛ nɔ lɛ tsɔɔ fɛɛ jɛ Biblia lɛ mli lɛ? Mɛni Yesu fee ni esa akɛ wɔkase?

⁶ Nibii ni amɛtsɔɔ lɛ jɛ Biblia lɛ mli. Biblia lɛ kɛɔ akɛ: “Ŋmalɛ muu lɛ fɛɛ jɛ Nyɔŋmɔ mumɔ lɛŋ, ni ehe yɛ sɛɛnamɔ kɛhã nitsɔɔmɔ, kɛhã mɔjajemɔ, kɛhã nibii ajajemɔ, kɛhã tsɔsemɔ yɛ jalɛ mli, koni Nyɔŋmɔ gbɔmɔ lɛ afee mɔ ni sa jogbaŋŋ, ni asaa lɛ jogbaŋŋ kɛhã nitsumɔ kpakpa fɛɛ nitsumɔ kpakpa.” (2 Timoteo 3:16, 17) Bɔfo Paulo kɛɛ Kristofoi akɛ: “Be ni nyɛnine shɛ Nyɔŋmɔ  wiemɔ ni nyɛnu yɛ wɔnaa lɛ nɔ lɛ, nyɛmɔ mli, jeee akɛ gbɔmɛi awiemɔ, shi moŋ akɛ Nyɔŋmɔ wiemɔ, tamɔ bɔ ni eji hu lɛɛlɛŋ lɛ.” (1 Tesalonikabii 2:13) Nibii ni mɛi ni jáa Nyɔŋmɔ yɛ gbɛ ni esumɔɔ lɛ nɔ lɛ tsɔɔ lɛ fɛɛ jɛ Nyɔŋmɔ Wiemɔ ni ji Biblia lɛ pɛ mli. Ejɛɛɛ adesai asusumɔi, loo kusumii, loo nɔ kroko mli.

⁷ Nɔ fɛɛ nɔ ni Yesu tsɔɔ lɛ jɛ Nyɔŋmɔ Wiemɔ lɛ mli. (Kanemɔ Yohane 17:17.) Etsɛ saji ayisɛɛ kɛjɛ ŋmalɛi lɛ amli. (Mateo 4:4, 7, 10) Tamɔ bɔ ni Yesu fee lɛ, nibii ni mɛi ni jáa Nyɔŋmɔ yɛ gbɛ ni esumɔɔ lɛ nɔ lɛ tsɔɔ lɛ hu fɛɛ jɛ Biblia lɛ mli.

8. Mɛni Yesu tsɔɔ wɔ yɛ bɔ ni esa akɛ wɔjá Yehowa wɔhã lɛ he?

⁸ Amɛjáa Yehowa pɛ. Lala 83:18 lɛ kɛɔ akɛ: “Bo ni ogbɛ́i ji Yehowa lɛ, bo okome too ji Mɔ Ni Nɔ Kwɔ Fe Fɛɛ yɛ shikpɔŋ lɛ nɔ fɛɛ.” Yesu hã mɛi le mɔ ni anɔkwa Nyɔŋmɔ lɛ ji, ni ehã amɛle Nyɔŋmɔ gbɛ́i lɛ hu. (Kanemɔ Yohane 17:6.) Yesu kɛɛ akɛ: “Yehowa, o-Nyɔŋmɔ lɛ, esa akɛ ojá, ni lɛ pɛ esa akɛ okɛ sɔɔmɔ krɔŋŋ ahã.” (Mateo 4:10) No hewɔ lɛ, akɛ Nyɔŋmɔ tsuji lɛ, wɔkaseɔ nɔkwɛmɔnɔ ni Yesu fee lɛ. Wɔjáa Yehowa pɛ, wɔkɛ egbɛ́i lɛ tsuɔ nii, ni wɔhãa mɛi leɔ Nyɔŋmɔ gbɛ́i lɛ kɛ nɔ ni ebaafee ehã wɔ.

9, 10. Mɛni wɔfeɔ kɛtsɔɔ akɛ wɔsumɔɔ wɔhe?

⁹ Amɛsumɔɔ amɛnyɛmi gbɔmɔ kɛ suɔmɔ krɔŋŋ. Yesu tsɔɔ ekaselɔi lɛ koni amɛsumɔ amɛhe. (Kanemɔ Yohane 13:35.) Ekɔɔɔ he eko maŋ nɔ ni wɔjɛ, wɔkusumii, niiatsɛmɛi ji wɔ jio, ohiafoi ji wɔ jio lɛ, esa akɛ wɔsumɔ wɔhe. Akɛni wɔsumɔɔ wɔhe hewɔ lɛ, wɔnaa wɔhe akɛ nyɛmimɛi hii kɛ nyɛmimɛi yei. (Kolosebii 3:14) No hewɔ lɛ, wɔyaaa ta, ni wɔgbeee mɛi hu. Biblia lɛ kɛɔ akɛ: “Anɔkwa sane ni hãa anaa Nyɔŋmɔ bii lɛ kɛ Abonsam bii lɛ nɛ: Mɔ fɛɛ mɔ ni efeee jalɛ nii lɛ, ejɛɛɛ Nyɔŋmɔ mli,  nakai nɔŋŋ ji mɔ ni sumɔɔɔ enyɛmi hu.” Ni ekɛɔ hu akɛ: “Wɔsumɔsumɔɔ wɔhe; jeee tamɔ Kain, mɔ ni jɛ mɔ fɔŋ lɛ mli ni egbe enyɛmi lɛ.”​—1 Yohane 3:10-12; 4:20, 21.

¹⁰ Wɔkɛ wɔbe, wɔhewalɛ, kɛ nibii ni wɔyɔɔ lɛ yeɔ wɔbuaa wɔhe ni wɔwowoɔ wɔhe hewalɛ hu. (Hebribii 10:24, 25) ‘Wɔfeɔ mɛi fɛɛ ekpakpa.’​—Galatiabii 6:10.

11. Mɛni hewɔ wɔheɔ wɔyeɔ akɛ Yesu pɛ nɔ abaatsɔ ahere wɔyiwala lɛ?

¹¹ Amɛheɔ amɛyeɔ akɛ Yesu pɛ nɔ abaatsɔ ahere wɔyiwala. Biblia lɛ kɛɔ akɛ: “Yiwalaheremɔ ko bɛ mɔ kroko mli, ejaakɛ gbɛ́i kroko bɛ ŋwɛi shishi ni akɛhã yɛ gbɔmɛi ateŋ ni esa akɛ atsɔ nɔ ahere wɔyiwala.” (Bɔfoi 4:12) Wɔkase yɛ wolo nɛɛ Yitso 5 lɛ mli akɛ, Yehowa tsu Yesu koni ekɛ ewala abahã kɛkpɔ adesai ni baabo Nyɔŋmɔ toi lɛ. (Mateo 20:28) Yehowa ehala Yesu koni eye shikpɔŋ lɛ nɔ akɛ Maŋtsɛ. No hewɔ ni Biblia lɛ kɛɔ wɔ akɛ, kɛ́ wɔmiisumɔ ni wɔhi shi kɛya naanɔ lɛ, esa akɛ wɔbo Yesu toi lɛ.​—Kanemɔ Yohane 3:36.

12. Mɛni hewɔ wɔkɛ wɔhe wooo pɔlitis loo maŋ saji amli lɛ?

¹² Amɛkɛ amɛhe wooo pɔlitis loo maŋ saji amli. Be ni Yesu ba shikpɔŋ lɛ nɔ lɛ ekɛ ehe wooo pɔlitis loo maŋ saji amli. Be ni amralo ni atsɛɔ lɛ Pilato ni ji Romanyo lɛ yeɔ Yesu sane lɛ, Yesu kɛɛ lɛ akɛ: “Mi-Maŋtsɛyeli lɛ jɛɛɛ je nɛɛ mli.” (Kanemɔ Yohane 18:36.) Yesu na ehe akɛ eji Nyɔŋmɔ Maŋtsɛyeli ni yɔɔ ŋwɛi lɛ mli nyo, no hewɔ lɛ, ekɛ ehe wooo pɔlitis loo maŋ saji amli. Wɔ hu wɔnaa wɔhe akɛ Nyɔŋmɔ Maŋtsɛyeli lɛ shishi bii, ni no hewɔ lɛ, ekɔɔɔ he eko he ni wɔyɔɔ lɛ, wɔkɛ wɔhe wooo pɔlitis loo maŋ saji amli. Shi Biblia lɛ fãa wɔ akɛ wɔbo “hegbɛi ni yeɔ nɔ lɛ” ni ji nɔyelii lɛ toi. (Romabii 13:1) Wɔboɔ maŋ ni wɔyɔɔ mli lɛ mlai toi. Shi kɛ́ mla ko teɔ shi ewoɔ Nyɔŋmɔ mlai lɛ, wɔkaseɔ bɔfoi lɛ, amɛkɛɛ akɛ: “Esa akɛ  wɔbo Nyɔŋmɔ moŋ toi akɛ nɔyelɔ fe gbɔmɛi.”​—Bɔfoi 5:29; Marko 12:17.

13. Mɛni hewɔ wɔshiɛɔ Nyɔŋmɔ Maŋtsɛyeli lɛ wɔtsɔɔ mɛi lɛ?

¹³ Amɛheɔ amɛyeɔ akɛ Nyɔŋmɔ Maŋtsɛyeli lɛ pɛ baatsu naagbai ni adesai kɛkpeɔ lɛ ahe nii. Yesu kɛɛ akɛ abaashiɛ “Maŋtsɛyeli lɛ he sane kpakpa” lɛ yɛ jeŋ fɛɛ. (Kanemɔ Mateo 24:14.) Adesa nɔyeli ko nyɛŋ afee nɔ ni Nyɔŋmɔ Maŋtsɛyeli lɛ baafee ehã wɔ lɛ kɔkɔɔkɔ. (Lala 146:3) Yesu tsɔɔ wɔ ni wɔsɔle yɛ Nyɔŋmɔ Maŋtsɛyeli lɛ he, ekɛɛ akɛ: “O-Maŋtsɛyeli lɛ aba. Afee nɔ ni osumɔɔ yɛ shikpɔŋ lɛ nɔ, tamɔ bɔ ni afeɔ yɛ ŋwɛi lɛ.” (Mateo 6:10) Biblia lɛ kɛɔ wɔ akɛ Nyɔŋmɔ Maŋtsɛyeli lɛ baakpãtã adesa nɔyelii lɛ fɛɛ ahiɛ, ni “lɛ pɛ ebaadamɔ shi kɛya naanɔ.”​—Daniel 2:44.

14. Namɛi osusuɔ akɛ amɛjáa Nyɔŋmɔ yɛ gbɛ ni esumɔɔ lɛ nɔ?

¹⁴ He ni okase nii lɛ kɛshɛ nɛɛ, bi ohe akɛ, ‘Namɛi tsɔɔ nii kɛjɛɔ Biblia lɛ mli? Namɛi hãa mɛi leɔ Nyɔŋmɔ gbɛ́i lɛ? Namɛi sumɔɔ amɛhe kɛ suɔmɔ krɔŋŋ, ni amɛheɔ amɛyeɔ akɛ Nyɔŋmɔ hã Yesu ba shikpɔŋ lɛ nɔ koni ebahere wɔyiwala? Namɛi kɛ amɛhe wooo pɔlitis loo maŋ saji amli? Namɛi shiɛɔ akɛ Nyɔŋmɔ Maŋtsɛyeli lɛ pɛ baanyɛ atsu wɔnaagbai lɛ ahe nii?’ Yehowa Odasefoi pɛ.​—Yesaia 43:10-12.

15. Kɛ́ wɔmiisumɔ ni Nyɔŋmɔ aná wɔjamɔ lɛ he miishɛɛ lɛ, mɛni esa akɛ wɔfee?

¹⁵ Hemɔ ni wɔbaahe wɔye akɛ Nyɔŋmɔ yɛ lɛ kɛkɛ faaa. Daimonioi po heɔ amɛyeɔ akɛ Nyɔŋmɔ yɛ, shi amɛbooo lɛ toi. (Yakobo 2:19) Kɛ́ wɔmiisumɔ ni Nyɔŋmɔ aná wɔjamɔ lɛ he miishɛɛ lɛ, jeee he pɛ esa akɛ wɔhe wɔye akɛ eyɛ, shi esa akɛ wɔbo lɛ toi hu.

16. Mɛni hewɔ esa akɛ wɔtsi wɔhe kɛje amale jamɔ he?

 ¹⁶ Ja wɔtsi wɔhe kɛje amale jamɔ he dani Nyɔŋmɔ baaná wɔjamɔ he miishɛɛ. Gbalɔ Yesaia ŋma akɛ: “Nyɛjea emli, nyɛhãa nyɛhe atsea.” (Yesaia 52:11; 2 Korintobii 6:17) No hewɔ ni esa akɛ wɔtsi wɔhe kɛje nɔ fɛɛ nɔ ni kɛ amale jamɔ yɔɔ tsakpãa lɛ he lɛ.

17, 18. Mɛni ji “Babilon Kpeteŋkpele” lɛ, ni mɛni hewɔ amrɔ nɛɛ ji be ni esa akɛ oje emli lɛ?

¹⁷ Mɛni ji amale jamɔ? Jamɔ fɛɛ jamɔ ni etsɔɔɔ mɛi koni amɛjá Nyɔŋmɔ yɛ gbɛ ni Biblia lɛ tsɔɔ akɛ ajá Nyɔŋmɔ yɛ nɔ lɛ ji amale jamɔ. Biblia lɛ tsɛɔ amale jamɔi fɛɛ akɛ “Babilon Kpeteŋkpele.” (Kpojiemɔ 17:5) Mɛni hewɔ? Yɛ Noa beiaŋ Nu Afua lɛ sɛɛ lɛ, abɔi amale tsɔɔmɔi babaoo tsɔɔmɔ yɛ Babilon maŋ lɛ mli. Nakai amale tsɔɔmɔi lɛ gbɛ eshwã shikpɔŋ lɛ nɔ fɛɛ. Akɛ nɔkwɛmɔnɔ lɛ, mɛi ni hi shi yɛ Babilon lɛ ja nyɔŋmɔi srɔtoi etɛ ni afee amɛ nyɔŋmɔ kome, ni amɛyɛ nɛkɛ nyɔŋmɔi nɛɛ babaoo. Ŋmɛnɛ hu lɛ, jamɔi babaoo tsɔɔ akɛ Nyɔŋmɔ lɛ Triniti ni, ni tsɔɔ akɛ Nyɔŋmɔ ji mɛi srɔtoi etɛ ni afee amɛ ekome. Shi Biblia lɛ tsɔɔ faŋŋ akɛ, ayɛ anɔkwa Nyɔŋmɔ koome, lɛ ji Yehowa, ni e-Bi ji Yesu. (Yohane 17:3) Mɛi ni hi shi yɛ Babilon lɛ heɔ amɛyeɔ hu akɛ, kɛ́ gbɔmɔ gbo lɛ, eyaa nɔ ehiɔ shi, ni abaanyɛ apiŋ lɛ yɛ hɛl. Tsɔɔmɔ nɛɛ ji amale tsɔɔmɔ.​—Kwɛmɔ Wiemɔi Komɛi Amligbalamɔ 14, 17, kɛ 18.

¹⁸ Nyɔŋmɔ egba akɛ etsɛŋ ni abaakpãtã amale jamɔi fɛɛ ahiɛ. (Kpojiemɔ 18:8) Ani ole nɔ hewɔ ni amrɔ nɛɛ ji be ni esa akɛ otsi ohe kɛje amale jamɔ he lɛ? Yehowa Nyɔŋmɔ miisumɔ ni ofee nakai dani ekpe sɛɛ.​—Kpojiemɔ 18:4.

19. Kɛ́ okpɛ oyiŋ akɛ obaasɔmɔ Yehowa lɛ, te ebaakwɛ bo ehã tɛŋŋ?

¹⁹ Kɛ́ okpɛ oyiŋ akɛ obaatsi ohe kɛje amale jamɔ he ni osɔmɔ Yehowa lɛ, ekolɛ onanemɛi loo owekumɛi lɛ  ekomɛi nuŋ yiŋ ni okpɛ lɛ shishi ni ekolɛ amɛbaawa bo yi po. Shi Yehowa kwaŋ bo. Obaabatsɔ weku ko kɛ emli bii akpekpei abɔ ni yɔɔ jeŋ fɛɛ ni sumɔɔ amɛhe kɛ suɔmɔ krɔŋŋ lɛ mli nyo, ni obaaná hiɛnɔkamɔ akɛ obaahi shi kɛya naanɔ yɛ jeŋ hee ni Nyɔŋmɔ baato shishi lɛ mli. (Marko 10:28-30) Ekolɛ sɛɛ mli lɛ, onanemɛi kɛ owekumɛi ni náaa yiŋ ni okpɛ akɛ obaasɔmɔ Yehowa lɛ he miishɛɛ lɛ ateŋ mɛi komɛi baabakase Biblia lɛ.

20. Mɛni hewɔ ehe miihia ni ojá Nyɔŋmɔ yɛ gbɛ ni esumɔɔ ni ajá lɛ lɛ nɔ lɛ?

²⁰ Etsɛŋ, Nyɔŋmɔ baajie efɔŋfeemɔ fɛɛ kɛje shikpɔŋ lɛ nɔ, ni e-Maŋtsɛyeli lɛ baaye shikpɔŋ lɛ nɔ. (2 Petro 3:9, 13) Wɔbaaná miishɛɛ waa diɛŋtsɛ yɛ nakai beiaŋ! Mɔ fɛɛ mɔ baajá Yehowa yɛ gbɛ ni Yehowa sumɔɔ ni wɔjá lɛ lɛ nɔ. No hewɔ lɛ, ehe miihia ni okpɛ oyiŋ amrɔ nɛɛ nɔŋŋ, ni ojá Nyɔŋmɔ yɛ gbɛ ni esumɔɔ ni ajá lɛ lɛ nɔ.