OBAANA wolo ko ni atsɛɔ lɛ Rut yɛ Biblia lɛ mli. Eji sane ko ni kɔɔ weku ko ni hi shi beni Israel yɔɔ kojolɔi lɛ he. Rut ji oblayoo ko ni jɛ Moab shikpɔŋ lɛ nɔ; efataaa Nyɔŋmɔ maŋ ni ji Israel he. Shi beni Rut kase anɔkwa Nyɔŋmɔ Yehowa he sane lɛ, ebasumɔ esane waa diɛŋtsɛ. Naomi ji yoo onukpa ko ni ye ebua Rut, ni ekase Yehowa he nii.

Israel yoo ji Naomi. Lɛ kɛ ewu kɛ amɛbihii enyɔ fã kɛtee Moab shikpɔŋ lɛ nɔ yɛ be mli ni anaaa niyenii yɛ Israel lɛ. Kɛkɛ ni gbi ko lɛ Naomi wu bagbo. Yɛ sɛɛ mli lɛ Naomi bihii enyɔ lɛ kɛ Moab oblayei enyɔ ni atsɛɔ amɛ Rut kɛ Orpa bote gbalashihilɛ mli. Shi aaafee afii 10 sɛɛ lɛ, Naomi bihii enyɔ lɛ hu bagboi. Kwɛ bɔ ni Naomi kɛ oblayei enyɔ lɛ anii baafee mɔbɔ aha! Agbɛnɛ mɛni Naomi baafee?

Gbi ko lɛ Naomi kpɛ eyiŋ akɛ ebaafã gbɛ kakadaŋŋ lɛ ekoŋŋ kɛku esɛɛ kɛya ewebii aŋɔɔ. Rut kɛ Orpa miitao ni amɛkɛ lɛ ahi shi, no hewɔ lɛ amɛkɛ lɛ yi mli kɛmiiya. Shi beni amɛfã gbɛ kɛtee fioo yɛ gbɛ lɛ nɔ lɛ, Naomi tsɔ ehiɛ eha oblayei lɛ ni ekɛɛ amɛ akɛ: ‘Nyɛkua nyɛsɛɛ kɛyaa shia ni nyɛkɛ nyɛmamimɛi ayahi shi.’

Naomi shɔ obalayei lɛ anaa ni ekɛ amɛ ye shɛɛ. Kɛkɛ ni amɛbɔi yaafo, ejaakɛ amɛsumɔɔ Naomi sane waa diɛŋtsɛ. Amɛkɛɛ lɛ akɛ: ‘Dabi! Wɔkɛ bo baaya omaŋbii lɛ aŋɔɔ.’ Shi Naomi ha amɛ hetoo akɛ: ‘Nyɛkua nyɛsɛɛ, mibiyei. Ebaahi eha nyɛ yɛ shia.’ No hewɔ lɛ Orpa ku esɛɛ ni eyiŋ kɛtee shia. Shi Rut ekuuu esɛɛ.

Naomi tsɔ ehiɛ ni ekɛɛ lɛ akɛ: ‘Orpa etee. Bo hu okɛ lɛ aya shia.’ Shi Rut ha lɛ hetoo akɛ: ‘Kaabɔ mɔdɛŋ ni oshwie mi ni oha mishi bo! Ha ni mikɛ bo aya. He ni obaaya lɛ, jɛmɛ maya, ni he ni obaahi lɛ, jɛmɛ mi hu mahi. Omaŋ ji mimaŋ, ni o-Nyɔŋmɔ ji mi hu mi-Nyɔŋmɔ. He ni obaagbo yɛ lɛ, jɛmɛ magbo yɛ, ni jɛmɛ ji he ni abaafu mi yɛ.’ Beni Rut kɛɛ lɛ nɛkɛ sɛɛ lɛ, Naomi ebɔɔɔ mɔdɛŋ dɔŋŋ akɛ ebaaha eya shia.

Yɛ naagbee lɛ yei enyɔ lɛ yashɛ Israel. Biɛ ji he ni amɛyahi kwraa. Amrɔ nɔŋŋ kɛkɛ ni Rut bɔi nitsumɔ yɛ ŋmɔ mli, ejaakɛ nakai be lɛ ji be ni akɛkpaa akoko. Nuu ko ni atsɛɔ lɛ Boaz ŋmɛ lɛ gbɛ koni ebabua akoko naa yɛ eŋmɔ mli. Ani ole mɔ ni ji Boaz mami? Lɛ ji Rahab ni jɛ Yeriko maŋ lɛ mli lɛ.

Gbi ko lɛ Boaz kɛɛ Rut akɛ: ‘Minu ohe saji fɛɛ, kɛ bɔ ni ojie mɔbɔnalɛ kpo otsɔɔ Naomi lɛ. Mile bɔ ni oshi opapa kɛ omami kɛ bo diɛŋtsɛ omaŋ ni oba koni obahi maŋ kɛ gbɔmɛi ni oleee amɛ lɛ ateŋ. Yehowa afee bo ejurɔ!’

Rut ha lɛ hetoo akɛ: ‘Mihiɛ eba nyam yɛ ohiɛ, minuŋtsɔ. Oshɛje mimii, ni okɛ oweyoo ewie yɛ mlihilɛ mli.’ Boaz miisumɔ Rut sane naakpa, no hewɔ lɛ etsɛɛɛ kwraa ni amɛbote gbalashihilɛ mli. Kwɛ bɔ ni enɛ ha Naomi na miishɛɛ waa eha! Shi Naomi na miishɛɛ kɛteke nɔ beni Rut kɛ Boaz fɔ amɛkromɔ binuu ni atsɛɔ lɛ Obed lɛ. Yɛ sɛɛ mli lɛ Obed batsɔ David, mɔ ni wɔbaakase ehe saji babaoo yɛ sɛɛ mli lɛ nii.