1. Mɛni ji jamɔi ni yɔɔ Afrika lɛ ekomɛi?

SHWƐ fioo kulɛ mɔ fɛɛ mɔ ni yɔɔ Afrika lɛ kpɛlɛɔ nɔ akɛ Nyɔŋmɔ jamɔ he hiaa waa. Shi, gbeekpãmɔ bɛ amɛteŋ kwraa, yɛ bɔ ni esa akɛ ajá lɛ aha lɛ gbɛfaŋ. Mɛi komɛi jáa yɛ Muslim sɔlemɔtsu mli, ni mɛi krokomɛi yaa amɛmaŋ gbatsu mli. Ni mɛi krokomɛi hu yaa sɔlemɔ. Shi kɛlɛ, ebaafee tɔmɔ akɛ aaasusu akɛ jamɔi etɛ pɛ ayɔɔ yɛ Afrika. Yɛ Muslimbii ateŋ nɛkɛ lɛ, ayɛ mlai kɛ hemɔkɛyelii srɔtoi. Blema kusum jamɔi yɛ srɔtoi babaoo, kɛjɛɔ he kome kɛyaa he kroko. Yɛ mɛi ni tsɛɔ amɛhe Kristofoi asɔlemɔi lɛ ateŋ lɛ, mligbalamɔ agbo diɛŋtsɛ po yɛ. Yɛ jamɔi wuji ní ale jogbaŋŋ lɛ asɛɛ lɛ, ayɛ jamɔi akpei abɔ yɛ Afrika fɛɛ, ni mɔ fɛɛ mɔ hiɛ lɛ diɛŋtsɛ ehe.

2. (a) Bei pii lɛ, mɛni tsɔɔ jamɔ ní mɔ ko yɔɔ mli? (b) Mɛɛ nibii ni kɔɔ wɔ jamɔ lɛ he etsɔɔɔ doo akɛ Nyɔŋmɔ kpɛlɛɔ nɔ?

² Mɛni hewɔ gbɔmɛi jáa Nyɔŋmɔ bɔ ni amɛsumɔɔ lɛ? Mɛi babaoo ji mɛi ni kpɛlɛɔ amɛfɔlɔi ajamɔ nɔ. Nibii komɛi ni eho jeeŋmɔ hu náa jamɔ ni gbɔmɛi kɛ amɛhe woɔ mli ŋmɛnɛ lɛ nɔ hewalɛ. Wolo ni atsɛɔ lɛ The Africans​—A Triple Heritage lɛ kɛɛ akɛ: “Islam gbɛ eshwã kɛtee Sahara lɛ kooyigbɛ kɛtsɔ tawuu mli kunimyeli nɔ, . . . Kristojamɔ hu gbɛ eshwã kɛba Sahara lɛ wuoyigbɛ kɛtsɔ nakai gbɛ nɔŋŋ nɔ. Kɛji Islam gbɛ eshwã Sahara lɛ kooyigbɛ kɛtsɔ klante  nɔ lɛ, no lɛ Kristojamɔ gbɛ eshwã Sahara lɛ wuoyigbɛ kɛtsɔ tu nɔ.” Ni kɛlɛ, wɔteŋ mɛi babaoo heɔ yeɔ akɛ Nyɔŋmɔ kpɛlɛɔ wɔ jamɔ lɛ nɔ. Shi jamɔ ko efeee anɔkwale akɛni wɔfɔlɔi kɛ amɛhe woɔ mli, aloo akɛni maŋsɛɛ nɔyeli ko kɛ nakai jamɔ lɛ bafĩ wɔ blematsɛmɛi lɛ anɔ lɛ hewɔ kɛkɛ.

3-5. Mɛɛ nɔkwɛmɔnɔ ko yeɔ ebuaa wɔ ni wɔnaa akɛ jeee jamɔi fɛɛ tsɔɔ anɔkwale lɛ?

³ Eyɛ mli akɛ jamɔi fɛɛ kɛɔ akɛ amɛkɛ Nyɔŋmɔ jamɔ he gbɛtsɔɔmɔ ní anyɛɔ akɛ he fɔ̃ɔ nɔ haa moŋ, shi amɛsusumɔi lɛ yɛ srɔtoi. Amɛtsɔɔ nibii srɔtoi babaoo yɛ mɔ ni Nyɔŋmɔ ji kɛ nɔ ni ekpaa gbɛ kɛjɛɔ wɔdɛŋ lɛ he. Susumɔ enɛ he okwɛ: Ŋɔɔ lɛ akɛ ahe bo ní obatsu nii yɛ nitsumɔhe wulu ko mli. Klɛŋklɛŋ gbi ní otee nitsumɔ lɛ, oná ole akɛ nitsumɔ nɔkwɛlɔ lɛ etee hejɔɔmɔ fioo. No hewɔ lɛ obi nitsulɔi lɛ ateŋ mɛi etɛ nɔ ni esa akɛ ofee. Klɛŋklɛŋ nitsulɔ lɛ kɛɛ bo akɛ nitsumɔ nɔkwɛlɔ lɛ miitao ní obɛɛ tsũi lɛ amli. Mɔ ni ji enyɔ lɛ kɛɛ akɛ esa akɛ opɛnte tsũ lɛ he. Mɔ ni ji etɛ lɛ kɛɛ bo akɛ okɛ mɛi awoji ní aŋmala amɛ lɛ ayaha amɛ.

⁴ No sɛɛ lɛ, obi nitsulɔi lɛ nitsumɔ nɔkwɛlɔ lɛ he sane. Klɛŋklɛŋ mɔ lɛ kɛɛ bo akɛ nitsumɔ nɔkwɛlɔ lɛ kwɔ, eji oblanyo, ni eyitsoŋ wa. Mɔ ni ji enyɔ lɛ kɛɛ akɛ eyɛ kpitioo, égbɔ, ni emli hi. Mɔ ni ji etɛ lɛ kɛɛ bo akɛ nitsumɔ nɔkwɛlɔ lɛ jeee nuu​—nɔkwɛlɔ lɛ, eji yoo. Eka shi faŋŋ akɛ, obaamu sane naa akɛ nitsulɔi etɛ lɛ fɛɛ ewieee anɔkwale. Kɛ́ oosumɔ ní onitsumɔ hee nɛɛ akaje odɛŋ lɛ, no lɛ ekolɛ obaapɛi nibii amli koni ole mɔ ni onitsumɔ nɔkwɛlɔ lɛ ji diɛŋtsɛ kɛ nitsumɔ pɔtɛɛ ní etaoɔ ni otsu.

⁵ Nakai pɛpɛɛpɛ eji yɛ Nyɔŋmɔ jamɔ hu gbɛfaŋ. Akɛni ahiɛ susumɔi babaoo yɛ mɔ ni Nyɔŋmɔ ji kɛ nɔ ni etaoɔ yɛ wɔdɛŋ lɛ he hewɔ lɛ, ehe miihia ni wɔná nɔmimaa akɛ gbɛ ní wɔtsɔɔ nɔ wɔjáa lɛ lɛ kɛ anɔkwale lɛ kpãa gbee lo. Shi te wɔɔfee tɛŋŋ wɔle anɔkwale ni kɔɔ Nyɔŋmɔ he lɛ?