Yesu baptisimɔ lɛ sɛɛ etsɛɛɛ lɛ, ebɔi shiɛmɔ akɛ: ‘Nyɔŋmɔ Maŋtsɛyeli lɛ ebɛŋkɛ nyɛ.’ Ená kaselɔi, ni kaselɔi nɛɛ nyiɛ esɛɛ be ni efãa gbɛ kɛyaa hei srɔtoi yɛ Galilea kɛ Yudea lɛ. Sɛɛ mli lɛ, eku esɛɛ kɛtee emaŋ Nazaret. Be ni eshɛ jɛmɛ lɛ, etee kpeehe lɛ, egbele Yesaia wolokpo lɛ, ni ekane lɛ waa ehã mɛi lɛ. He ni egbele lɛ kaneɔ akɛ: ‘Yehowa ehã mi mumɔ krɔŋkrɔŋ lɛ koni mashiɛ sane kpakpa lɛ.’ Mɛni wiemɔi nɛɛ tsɔɔ? Etsɔɔ akɛ, eyɛ mli akɛ mɛi miitao Yesu afee naakpɛɛ nii moŋ, shi nɔ titri hewɔ ni Nyɔŋmɔ hã lɛ mumɔ krɔŋkrɔŋ lɛ ji, koni eshiɛ sane kpakpa lɛ. No sɛɛ lɛ, ekɛɛ mɛi ni boɔ lɛ toi lɛ akɛ: ‘Ŋmɛnɛ lɛ, gbalɛ nɛɛ eba mli.’

Enɛ sɛɛ lɛ, Yesu tee Galilea Ŋshɔ lɛ naa. Ekɛ wolɛi ejwɛ komɛi kpe yɛ jɛmɛ. Atsɛɔ amɛ Petro, Andrea, Yakobo, kɛ Yohane. Yesu kɛɛ amɛ akɛ: ‘Nyɛbanyiɛa misɛɛ, ni mafee nyɛ wolɛi ni baahɛ gbɔmɛi.’ Amrɔ nɔŋŋ lɛ, amɛshi amɛ wuoyaa nitsumɔ lɛ ni amɛnyiɛ esɛɛ. Amɛbatsɔmɔ ekaselɔi. Amɛkpa Galilea fɛɛ ni amɛshiɛ Yehowa Maŋtsɛyeli lɛ he sane. Amɛshiɛ yɛ kpeehei, jara lɛ nɔ, kɛ gbɛjegbɛi ahe. He fɛɛ he ni amɛbaaya lɛ, mɛi babaoo nyiɛɔ amɛsɛɛ kɛyaa. Mɛi ni yɔɔ hei srɔtoisrɔtoi nu Yesu he sane. Anu ehe sane yɛ Siria tɔ̃ɔ po.

Sɛɛ mli lɛ, Yesu hã esɛɛnyiɛlɔi lɛ ekomɛi hewalɛ ni amɛkɛtsa helai ni amɛfamɔ daimonioi. Amɛteŋ mɛi komɛi hu fata ehe kɛtee shiɛmɔ yɛ maji kɛ akrowai srɔtoi amli. Yei anɔkwafoi komɛi tamɔ Maria Magdalena, Yohana, kɛ Susana kwɛ Yesu kɛ esɛɛnyiɛlɔi lɛ.

Be ni Yesu tsɔse ekaselɔi lɛ egbe naa lɛ, etsu amɛ ní amɛyashiɛ. Amɛyashiɛ yɛ hei srɔtoisrɔtoi yɛ Galilea. Enɛ hewɔ lɛ, mɛi babaoo batsɔmɔ Yesu kaselɔi ni abaptisi amɛ. Mɛi ni miitao amɛtsɔmɔ Yesu kaselɔi lɛ ayi fa aahu akɛ, Yesu kɛɛ amɛtamɔ ŋmɔ ko ni eshɛ be ni esa akɛ akpa. Ewie akɛ: ‘Nyɛsɔlea nyɛhãa Yehowa ni ehã mɛi babaoo aba koni amɛbakpa ŋmɔ lɛ mli nii.’  Sɛɛ mli lɛ, ehala mɛi 70 kɛjɛ ekaselɔi lɛ ateŋ ni etsu amɛ enyɔnyɔɔnyɔ ni amɛyashiɛ yɛ Yudea kpokpaa lɛ nɔ fɛɛ. Kaselɔi nɛɛ gba mɛi srɔtoi fɛɛ Maŋtsɛyeli lɛ he sane. Be ni amɛku amɛsɛɛ lɛ, amɛkɛ miishɛɛ gba Yesu nibii ni ba be ni amɛtee lɛ. Abonsam nyɛɛɛ atsĩ shiɛmɔ nitsumɔ lɛ naa.

Yesu to gbɛjianɔ koni kɛ́ eku esɛɛ etee ŋwɛi lɛ, ekaselɔi lɛ atsa shiɛmɔ nitsumɔ lɛ nɔ, ejaakɛ eji nitsumɔ ko ni he hiaa waa. Ekɛɛ amɛ akɛ: ‘Nyɛshiɛa sane kpakpa lɛ yɛ shikpɔŋ lɛ nɔ fɛɛ. Nyɛtsɔa mɛi Nyɔŋmɔ Wiemɔ lɛ ni nyɛbaptisia amɛ.’