KƐ́ WƆGBOI lɛ, ani Nyɔŋmɔ baasumɔ ni etee wɔ shi, ni ji akɛ, ekɛ wɔ aba wala mli ekoŋŋ?— Gbɔmɔ kpakpa Hiob hé eye akɛ, Nyɔŋmɔ miisumɔ ni efee nakai. No hewɔ lɛ, beni Hiob susu akɛ ebaagbo lɛ, ekɛɛ Nyɔŋmɔ akɛ: “Oootsɛ́, ni mahereo nɔ.” Hiob kɛɛ akɛ Yehowa Nyɔŋmɔ baatao, aloo ebaasumɔ waa akɛ etee lɛ shi.—Hiob 14:14, 15.

Yesu tamɔ Yehowa Nyɔŋmɔ, ni ji e-Tsɛ lɛ pɛpɛɛpɛ. Yesu miisumɔ ni eye ebua wɔ. Beni nuu ko ni he yeɔ kɛ hela ni ji kpiti lɛ kɛɛ lɛ akɛ, “kɛji oosumɔ lɛ, ooonyɛ oha mihe atse” lɛ, Yesu ha lɛ hetoo akɛ: “Miisumɔ!” Kɛkɛ ni etsá nuu lɛ kpiti lɛ eha lɛ.—Marko 1:40-42, wɔma efã ko nɔ mi.

Yesu kase kɛjɛ e-Tsɛ lɛ ŋɔɔ akɛ esa akɛ ená suɔmɔ eha gbekɛbii. Yɛ bei enyɔ komɛi ni eho lɛ mli lɛ, Yehowa kɛ etsuji tsu nii koni amɛtee gbekɛbii ni egboi lɛ ashi. Elia kpa Yehowa fai koni etee yoo ni Elia  efee lɛ ekpakpa babaoo lɛ binuu lɛ shi. Ni Yehowa fee nakai. Yehowa kɛ etsulɔ Elisha hu tsu nii koni etee gbekɛ nuu bibioo ko shi.—1 Maŋtsɛmɛi 17:17-24; 2 Maŋtsɛmɛi 4:32-37.

Ani ejeee miishɛɛ sane akɛ wɔɔle akɛ Yehowa sumɔɔ wɔ babaoo nakai?— Jeee be mli ni wɔyɔɔ wala mli pɛ esusuɔ wɔhe. Ekaiɔ wɔ hu kɛ́ wɔgboi. Yesu kɛɛ akɛ, Tsɛ lɛ buɔ mɛi ni egboi ni esumɔɔ amɛ lɛ po akɛ amɛyɛ wala mli lolo! (Luka 20:38) Biblia lɛ kɛɔ akɛ, ‘gbele jio, wala jio, aloo nibii ni yɔɔ nɛɛ jio, aloo nibii ni baaba lɛ jio, amɛnyɛŋ amɛgbála wɔkɛ Nyɔŋmɔ suɔmɔ lɛ teŋ.’—Romabii 8:38, 39.

Beni Yesu yɔɔ shikpɔŋ nɔ lɛ, etsɔɔ akɛ Yehowa susuɔ gbekɛbii bibii ahe. Obaakai akɛ Yesu hé be ni ekɛ gbekɛbii wie Nyɔŋmɔ he. Shi ani ole akɛ Nyɔŋmɔ kɛ hewalɛ ha Yesu koni ekɛ gbekɛbii ni egboi lɛ aba wala mli ekoŋŋ?— Ha wɔwie be ni Yesu tee nuu ko ni atsɛɔ lɛ Yairo lɛ biyoo ni eye afii 12 lɛ shi kɛba wala mli lɛ he.

Yairo kɛ eŋa kɛ amɛbi kome pɛ lɛ hi shi yɛ Galilea Ŋshɔ lɛ masɛigbɛ. Gbi ko lɛ gbekɛ yoo lɛ he baye waa, ni Yairo nyɛ́ ena akɛ ebiyoo lɛ baagbo. Yairo je shishi esusu Yesu, ni ji nakai nuu ni he yɔɔ naakpɛɛ waa ni enu ehe sane, ni nyɛɔ etsáa gbɔmɛi ahelai lɛ he. No hewɔ lɛ, Yairo tee eyatao lɛ. Ena Yesu yɛ Galilea Ŋshɔ lɛ naa, ní eetsɔɔ mɛi pii anii.

Yairo ho kɛtsɔ gbɔmɛi pii lɛ ateŋ ni eyakula shi yɛ Yesu najiashi. Ekɛɛ Yesu akɛ: ‘Mibiyoo fioo lɛ he miiye waa. Ofainɛ ani obaaba ni obaye obua lɛ? Ofainɛ ba.’ Amrɔ nɔŋŋ ni Yesu kɛ Yairo tee. Gbɔmɛi asafo babaoo ni amɛba koni amɛbana Tsɔɔlɔ Kpele lɛ hu nyiɛ amɛsɛɛ kɛtee. Shi beni amɛnyiɛ kɛshɛ hiɛ saŋŋ lɛ, hii komɛi jɛ Yairo shia lɛ amɛbakɛɛ lɛ akɛ: “Obiyoo lɛ égbo; mɛɛba ogbáa tsɔɔlɔ lɛ naa lolo?”

 Yesu nu ni hii lɛ miiwie nakai. Ele bɔ ni Yairo baaye awerɛho eha kɛ́ ebi kome too pɛ lɛ gbo. No hewɔ lɛ, E-kɛɛ lɛ akɛ: ‘Kaashe gbeyei. Bo lɛ ná Nyɔŋmɔ mli hemɔkɛyeli kɛkɛ, ni obiyoo lɛ he baawa lɛ.’ Amɛtee nɔ amɛnyiɛ kɛyashi amɛbashɛ Yairo shia lɛ. Weku lɛ nanemɛi miifó. Amɛmiiye awerɛho ejaakɛ amɛnaanyo fioo lɛ egbo. Shi Yesu kɛɛ amɛ akɛ: ‘Nyɛkpaa yaafó. Gbekɛ yoo lɛ gboko, shi eewɔ.’

Beni Yesu wie enɛ lɛ, gbɔmɛi lɛ je shishi amɛŋmɔ, ejaakɛ amɛle akɛ gbekɛ yoo lɛ egbo. Belɛ mɛni hewɔ osusuɔ akɛ Yesu kɛɛ akɛ eewɔ lɛ?— Mɛɛ nikasemɔ ko osusuɔ akɛ etaoɔ ni etsɔɔ gbɔmɛi lɛ?— Eesumɔ ni amɛle akɛ gbele baanyɛ atamɔ wɔ̀ ni tsii. Eesumɔ ni etsɔɔ amɛ akɛ, ebaanyɛ etsɔ Nyɔŋmɔ hewalɛ lɛ nɔ ekɛ mɔ ni egbo lɛ aba wala mli yɛ gbɛ ni waaa kwraa nɔ, tamɔ bɔ ni abaanyɛ atsĩɛ mɔ ko ni wɔɔ lɛ hiɛ lɛ.

Yesu ha mɔ fɛɛ mɔ shi shia lɛ mli, ja ebɔfoi ni ji Petro, Yakobo, kɛ Yohane, kɛ gbekɛ yoo lɛ papa kɛ emami. Kɛkɛ ni etee he ni gbekɛ yoo lɛ yɔɔ lɛ. Emɔ enine mli ni ekɛɛ akɛ: ‘Gbekɛ yoo, tee shi!’ Amrɔ nɔŋŋ ni ete shi ni ebɔi nyiɛmɔ! Epapa kɛ emami ná miishɛɛ babaoo diɛŋtsɛ.—Marko 5:21-24, 35-43; Luka 8:40-42, 49-56.

 Agbɛnɛ susumɔ enɛ he okwɛ. Akɛni Yesu baanyɛ ni ekɛ nakai gbekɛ yoo lɛ aba wala mli hewɔ lɛ, ani ebaanyɛ efee nakai nɔŋŋ eha mɛi krokomɛi?— Ani osusuɔ akɛ ebaafee nakai diɛŋtsɛ?— Hɛɛ, ebaafee. Yesu diɛŋtsɛ kɛɛ akɛ: “Ŋmɛlɛtswaa lɛ miiba, nɔ̃ mli ni mɛi fɛɛ ni yɔɔ gbohiiabui lɛ amli lɛ aaanu egbee, ni amɛaaje kpo.”—Yohane 5:28, 29.

Ani osusuɔ akɛ Yesu miisumɔ ni etee mɛi ashi?— Nɔkwɛmɔnɔ kroko hu ni yɔɔ Biblia lɛ mli lɛ yeɔ ebuaa wɔ koni wɔha nakai sanebimɔ lɛ hetoo. Nɔ ni ba gbi ko yɛ he ko ni bɛŋkɛ Nain maŋ lɛ tsɔɔ bɔ ni Yesu nuɔ he ehaa mɛi ni miiye awerɛho yɛ yarafeemɔ shishi lɛ.

Yoo ko fata ebinuu lɛ yarafeelɔi ni amɛto sɛrɛnɛɛ kɛyaa lɛ he yɛ be mli ni asafo babaoo lɛ shi Nain lɛ. Yoo lɛ wu etsɔ hiɛ egbo, ni agbɛnɛ ebi kome too pɛ lɛ hu egbo. Kwɛ bɔ ni eyeɔ awerɛho waa ehaa! Nain maŋ lɛ mli bii pii nyiɛ esɛɛ beni amɛtere ebinuu lɛ gbonyo yɛ maŋ lɛ sɛɛ lɛ. Yoo lɛ miifó waa, ni gbɔmɛi lɛ nyɛɛɛ afee nɔ ko ni amɛkɛshɛje emii.

Yɛ nɛkɛ gbi nɛɛ nɔ lɛ, Yesu kɛ ekaselɔi lɛ nyiɛ kɛmiiba he ni Nain maŋ lɛ yɔɔ lɛ. Amɛkɛ asafo ni yaa amɛyafũ yoo lɛ binuu lɛ kpe yɛ maŋ lɛ agbonaa. Beni Yesu na yoo ni fóɔ lɛ, enii fee lɛ mɔbɔ. Awerɛho pii ni eyeɔ lɛ sa Yesu tsui he. Eesumɔ ni eye ebua lɛ.

No hewɔ lɛ, ekɛ musuŋtsɔlɛ kɛ shiŋŋfeemɔ ni ha yoo lɛ bo lɛ toi kɛɛ lɛ akɛ: “Kaafó!” Gbɛ ni etsɔ nɔ lɛ kɛ enifeemɔ ha mɔ fɛɛ mɔ kɛ miishɛɛ kwɛ lɛ. Kɛkɛ lɛ, beni Yesu yaa gbonyo lɛ he lɛ, mɔ fɛɛ mɔ baasusu nɔ ni ebaafee lɛ he. Yesu wie, ni efã lɛ akɛ: “Oblanyo, miikɛɛo akɛ: Tee shi!” Amrɔ nɔŋŋ ni ete shi eta shi! Kɛkɛ ni ebɔi wiemɔ.—Luka 7:11-17.

Susumɔ bɔ ni yoo lɛ baanu he eha lɛ he okwɛ! Te osusuɔ akɛ obaahere suɔlɔ ko ni egbo ni atee lɛ shi ekoŋŋ lɛ he oha tɛŋŋ?—  Ani enɛ etsɔɔɔ akɛ Yesu sumɔɔ gbɔmɛi lɛɛlɛŋ, ni ákɛ eesumɔ ni eye ebua amɛ?— Susumɔ bɔ ni ebaafee naakpɛɛ sane eha yɛ Nyɔŋmɔ jeŋ hee lɛ mli, ákɛ abaahere mɛi atuu kɛba wala mli ekoŋŋ lɛ he okwɛ!—2 Petro 3:13; Kpojiemɔ 21:3, 4.

Yɛ nakai be lɛ mli lɛ, mɛi ni abaatee amɛ shi lɛ ateŋ mɛi komɛi baafee mɛi ni wɔle amɛ momo, ni gbekɛbii fata he. Wɔbaale mɛi ni amɛji tamɔ bɔ ni Yairo le ebiyoo lɛ beni Yesu tee lɛ shi lɛ. Mɛi krokomɛi baafee mɛi ni gboi afii ohai loo akpei abɔ ni eho. Shi Nyɔŋmɔ hiɛ kpaŋ amɛnɔ akɛni amɛhi shi jeeŋmɔ be ko kɛkɛ hewɔ.

Ani ejeee miishɛɛ sane akɛ wɔɔle akɛ Yehowa Nyɔŋmɔ kɛ e-Bi, Yesu, sumɔɔ wɔ babaoo nakai nɔŋŋ?— Amɛmiisumɔ ni wɔhi shi, jeee afii fioo ko, shi moŋ kɛmiiya naanɔ!