ANI ole nɔ ni hetsɛ̃ ji?— Ojogbaŋŋ, hetsɛ̃ tsɔɔ mɔ ko sane ni osumɔɔɔ akɛni esoro lɛ loo ekolɛ ewieɔ wiemɔ kroko hewɔ. No hewɔ lɛ, mɔ ni hiɛ hetsɛ̃ su lɛ ji mɔ ni náa henumɔ loo susumɔ fɔŋ yɛ mɔ ko he dani ebaleɔ mɔ lɛ jogbaŋŋ po.

Ani osusuɔ akɛ eja akɛ ooofee mɔ ni sumɔɔɔ mɔ ko sane beni oleko mɔ ni eji diɛŋtsɛ, loo akɛni esoro lɛ lɛ hewɔ?— Dabi, hetsɛ̃ ejaaa, ni ejeee nɔ ni mlihilɛ yɔɔ mli hu. Esaaa akɛ wɔfeɔ mɛi ni bɛ mlihilɛ kɛha mɔ ko akɛni esoro lɛ yɛ wɔhe lɛ hewɔ.

Susumɔ he okwɛ. Ani ole mɔ ko ni esoro ehewolo nɔ su yɛ onɔ̃ he, aloo ewieɔ wiemɔ ni yɔɔ srɔto yɛ onɔ̃ lɛ he?— Ekolɛ ole mɛi ni kɛ́ okwɛ lɛ amɛyɔɔ srɔto akɛni ápila amɛ loo hela ko yɔɔ amɛhe lɛ hewɔ. Ani oyɛ mlihilɛ kɛ suɔmɔ kɛha mɛi ni esoro amɛ yɛ ohe lɛ?—

Kɛji akɛ wɔbo Tsɔɔlɔ Kpele, ni ji Yesu Kristo toi lɛ, wɔmli baahi aha mɔ fɛɛ mɔ. Esaaa akɛ maŋ ni mɔ lɛ jɛ loo bɔ ni ehewolɔ nɔ su ji lɛ kɛ srɔtofeemɔ baa. Esa akɛ wɔmli ahi aha lɛ. Eyɛ mli akɛ enɛ jeee nɔ ni mɛi pii kpɛlɛɔ nɔ moŋ, shi eji nikasemɔ ni Yesu tsɔɔ. Nyɛhaa wɔsusua he wɔkwɛa.

Yudanyo ko ni he tsɛ̃ɔ mɛi krokomɛi ba Yesu ŋɔɔ ni ebabi lɛ akɛ, ‘Mɛni mafee koni mahi shi kɛya naanɔ?’ Yesu le akɛ ekolɛ gbɔmɔ lɛ miibɔ mɔdɛŋ ni eha ekɛɛ akɛ esa akɛ wɔmli ahi aha wɔ wekumɛi loo wɔ maŋbii pɛ. No hewɔ lɛ, yɛ nɔ najiaŋ ni Yesu diɛŋtsɛ aaaha sanebimɔ lɛ hetoo lɛ, ebi nuu lɛ akɛ: ‘Mɛni Nyɔŋmɔ Mla lɛ kɛɔ akɛ esa akɛ wɔfee?’

 Nuu lɛ ha hetoo akɛ: ‘Suɔmɔ Yehowa o-Nyɔŋmɔ lɛ kɛ otsui fɛɛ, ni osumɔ onaanyo tamɔ bɔ ni osumɔɔ bo diɛŋtsɛ ohe.’ Yesu kɛɛ lɛ akɛ: ‘Ohetoo lɛ ja. Yaa nɔ ofee enɛ ni obaaná naanɔ wala.’

Shi, nuu lɛ sumɔɔɔ ni emli ahi, loo ená suɔmɔ kɛha gbɔmɛi ni esoro amɛ yɛ ehe lɛ. No hewɔ lɛ, ebɔ mɔdɛŋ ni etao naajiemɔ. Ebi Yesu akɛ: “Ni namɔ ji minaanyo?” Ekolɛ eesumɔ ni Yesu akɛɛ akɛ: “Omaŋbii ji onanemɛi” aloo, “Amɛji gbɔmɛi ni tamɔ bo pɛpɛɛpɛ.” Bɔni afee ni Yesu aha nakai sanebimɔ lɛ hetoo lɛ, egba sane ko ni kɔɔ Yudanyo ko kɛ Samarianyo ko lɛ he. Bɔ ni etee nɔ eha nɛ.

Nuu ko miikpeleke shi yɛ gbɛ ni jɛ Yerusalem maŋtiase lɛ mli lɛ nɔ kɛmiiya Yeriko. Nuu nɛɛ ji Yudanyo. Beni enyiɛ gbɛ kɛyaa lɛ, ojotswalɔi mɔ lɛ. Amɛtswa lɛ nii ni egbee shikpɔŋ, ni amɛhe eshika kɛ etadei kɛjɛ edɛŋ. Ojotswalɔi lɛ tswia lɛ nii ni amɛpila lɛ, ni amɛshi lɛ beni egbo fã-kɛ-fã yɛ gbɛ lɛ nɔ lɛ.

Be fioo ko sɛɛ lɛ, osɔfo ko batsɔ gbɛ lɛ nɔ kɛho. Ena nuu ni epila waa lɛ. Kulɛ mɛni obaafee?— Ojogbaŋŋ, osɔfo lɛ tsɔ gbɛ kroko  nɔ kɛtee. Ewaaa po. Efeee nɔ ko nɔ ko kwraa ni ekɛaaye ebua nuu lɛ.

Kɛkɛ ni nuu kroko hu ni sumɔɔ Nyɔŋmɔ jamɔ waa tsɔ gbɛ lɛ nɔ kɛba. Eji Levinyo ni sɔmɔɔ yɛ Yerusalem sɔlemɔtsu lɛ mli. Ani ebaawa ni eye ebua?— Dabi. Nɔ ni osɔfo lɛ fee lɛ, nakai pɛpɛɛpɛ lɛ hu efee.

Yɛ naagbee lɛ, Samarianyo ko tsɔ gbɛ lɛ nɔ kɛba. Ani oona ni epue kɛmiiba yɛ he ni gbɛ lɛ tsɔɔ kɛyaa lɛ?— Ena Yudanyo ni epila waa ni kã shi lɛ. Shi esa akɛ ale akɛ Samariabii kɛ Yudafoi pii kɛ amɛhe yeee kwraa. (Yohane 4:9) No hewɔ lɛ, ani Samarianyo nɛɛ baashi nuu lɛ ni eyeee ebuaaa lɛ kwraa? Ani ebaakɛɛ lɛ diɛŋtsɛ  ehe akɛ: ‘Mɛni hewɔ esa akɛ maye mabua nɛkɛ Yudanyo nɛɛ? Eji miji mɔ ni epila lɛ kulɛ eyeŋ ebuaŋ mi’?

Ojogbaŋŋ, Samarianyo lɛ kwɛ nuu ni kã gbɛ lɛ masɛi lɛ, ni enii fee lɛ mɔbɔ. Enyɛɛɛ eshi lɛ yɛ jɛmɛ koni egbo. No hewɔ lɛ, eyi shi kɛjɛ kooloo ni eta enɔ lɛ nɔ, ni etee nuu lɛ masɛi, ni eje shishi eto epilamɔi lɛ anɔ. Ekɛ mu kɛ wein shwie nɔ. Enɛ baaye abua ni pilamɔi lɛ atã. Kɛkɛ ni ekɛ mama fimɔ pilamɔi lɛ anɔ.

Samarianyo lɛ wó nuu ni epila lɛ blɛoo etá ekooloo lɛ nɔ. Kɛkɛ ni amɛtsɔ gbɛ lɛ nɔ kɛkpeleke shi blɛoo kɛyashi be mli ni amɛbashɛ gbɔiatoohe bibioo ko. Samarianyo lɛ ná tsũ ko yɛ jɛmɛ koni nuu lɛ ahi mli, ni ekwɛ lɛ jogbaŋŋ diɛŋtsɛ.

Agbɛnɛ Yesu bi nuu ni ekɛ lɛ wieɔ lɛ akɛ: ‘Hii nɛɛ ateŋ namɔ osusuɔ akɛ eji naanyo kpakpa?’ Mɛni obaakɛɛ? Ani osɔfo lɛ, Levinyo lɛ, aloo Samarianyo lɛ?—

Nuu lɛ ha hetoo akɛ: ‘Nuu ni wa ni ekwɛ nuu ni epila lɛ ji naanyo kpakpa.’ Yesu kɛɛ lɛ akɛ: ‘Ohetoo lɛ ja. Yaa koni bo diɛŋtsɛ hu oyafee nakai nɔŋŋ.’—Luka 10:25-37.

Ani enɛ jeee sane ni agba ni ŋɔɔ waa? Ehaa wɔleɔ mɛi  ni ji wɔnanemɛi lɛ yɛ faŋŋ mli. Amɛjeee wɔnanemɛi ni bɛŋkɛ wɔ lɛ kɛkɛ. Ni amɛjeee mɛi ni amɛhewolo nɔ su tamɔ wɔnɔ loo wɔkɛ amɛ wieɔ wiemɔ kome lɛ kɛkɛ. Yesu tsɔɔ wɔ akɛ esa akɛ wɔmli ahi aha gbɔmɛi fɛɛ, ni he ni amɛjɛ, bɔ ni amɛtamɔ ha, loo nɔ̃ wiemɔ ni amɛwieɔ lɛ kɔɔɔ he eko.

Nɛkɛ ji bɔ ni Yehowa Nyɔŋmɔ tamɔ. Ebɛ mɔ ko mɔ ko he jwɛŋmɔ fɔŋ. Yesu kɛɛ akɛ: ‘Nyɛtsɛ ni yɔɔ ŋwɛi lɛ haa ehulu teɔ shi yɛ gbɔmɛi fɔji kɛ gbɔmɛi kpakpai anɔ. Ni ehaa nugbɔ nɛɔ shwieɔ gbɔmɛi kpakpai kɛ mɛi ni jeee gbɔmɛi kpakpai lɛ anɔ.’ No hewɔ lɛ, esa akɛ wɔmli ahi aha mɛi fɛɛ, tamɔ bɔ ni Nyɔŋmɔ ji lɛ.—Mateo 5:44-48.

No hewɔ lɛ, kɛ́ ona mɔ ko ni epila lɛ, mɛni obaafee?— Ni kɛ́ mɔ lɛ jɛ maŋ kroko nɔ aloo esoro ehewolo nɔ su yɛ onɔ̃ lɛ he hu? Ekã he eji onaanyo, ni esa akɛ oye obua lɛ. Kɛji akɛ onuɔ he akɛ odaaa bɔ ni oooye obua lɛ lɛ, bi ni onukpa ko aye abua. Aloo obaanyɛ otsɛ polisifonyo loo skul tsɔɔlɔ lɛ. No tsɔɔ akɛ omli hi, tamɔ Samarianyo lɛ.

Tsɔɔlɔ Kpele lɛ miisumɔ ni wɔmli ahi. Eesumɔ ni wɔye wɔbua mɛi krokomɛi, ní mɛi ni amɛji kɔɔɔ he eko. No hewɔ ni egba sane ni kɔɔ Samarianyo ni mli hi lɛ he lɛ he sane lɛ.