ANI okaiɔ nɔ hewɔ ni Nyɔŋmɔ bɔfoi lɛ ateŋ mɔ kome batsɔ Satan Abonsam lɛ?— Epɛsɛmkunya shwelɛ akɛ asɔmɔ lɛ lɛ ha ete shi ewo Nyɔŋmɔ. Ani bɔfoi krokomɛi batsɔmɔ Satan sɛɛnyiɛlɔi?— Hɛɛ, amɛfee nakai. Biblia lɛ tsɛɔ amɛ ‘Satan bɔfoi,’ loo daimonioi.—Kpojiemɔ 12:9.

Ani nɛkɛ bɔfoi gbohii, loo daimonioi nɛɛ heɔ yeɔ akɛ Nyɔŋmɔ yɛ?— Biblia lɛ kɛɔ akɛ: ‘Daimonioi lɛ heɔ yeɔ akɛ Nyɔŋmɔ yɛ.’ (Yakobo 2:19) Shi amrɔ nɛɛ amɛmiishe gbeyei. Ejaakɛ amɛle akɛ Nyɔŋmɔ baagbala amɛtoi yɛ nibii fɔji ni amɛfee lɛ hewɔ. Mɛɛ nibii fɔji amɛfee?—

Biblia lɛ kɛɔ akɛ nakai ŋwɛibɔfoi lɛ shi amɛ diɛŋtsɛ amɛshia ni yɔɔ ŋwɛi lɛ, ni amɛba shikpɔŋ nɔ koni amɛbahi shi akɛ gbɔmɛi. Amɛfee nakai ejaakɛ amɛmiisumɔ ni amɛkɛ yei ni he yɔɔ fɛo yɛ shikpɔŋ nɔ lɛ abaná bɔlɛ. (1 Mose 6:1, 2; Yuda 6) Mɛni ole yɛ bɔlɛnamɔ he?—

 Bɔlɛnamɔ ji be mli ni nuu kɛ yoo feɔ ekome waa yɛ gbɛ krɛdɛɛ ko nɔ. Yɛ no sɛɛ lɛ, abifao baanyɛ ada yɛ nyɛ lɛ musuŋ. Shi eji efɔŋ ákɛ ŋwɛibɔfoi kɛ amɛhe aaawo bɔlɛnamɔ mli. Nyɔŋmɔ miisumɔ ni nuu kɛ yoo ni amɛbote gbalashihilɛ mli lɛ pɛ aná bɔlɛ. Kɛ́ afɔ́ bi yɛ nakai gbɛ nɔ lɛ, wu lɛ kɛ ŋa lɛ fɛɛ baanyɛ akwɛ lɛ.

Beni ŋwɛibɔfoi lɛ ŋɔ adesa gbɔmɔtsei ni amɛkɛ yei ná bɔlɛ yɛ shikpɔŋ nɔ lɛ, amɛbii lɛ badara ni amɛbatsɔmɔ asaabui. Amɛyitseiaŋ wa, ni amɛpila gbɔmɛi. No hewɔ lɛ, Nyɔŋmɔ kɛ nu afua babaoo ba koni ekɛkpata asaabui lɛ kɛ gbɔmɛi fɔji lɛ fɛɛ ahiɛ. Shi eha Noa kpɛ adeka agbo ko, koni ekɛhere gbɔmɛi fioo ni fee nɔ ni ja lɛ ayiwala. Tsɔɔlɔ Kpele lɛ kɛɛ akɛ ehe miihia waa ni akai nɔ ni ba yɛ Nu Afua lɛ be lɛ mli lɛ.—1 Mose 6:3, 4, 13, 14; Luka 17:26, 27.

Ani ole nɔ ni ba ŋwɛibɔfoi fɔji lɛ anɔ beni Nu Afua lɛ ba lɛ?— Amɛkɛ adesai agbɔmɔtsei ni amɛfee amɛha amɛhe lɛ tsuuu nii dɔŋŋ, ni amɛku amɛsɛɛ kɛtee ŋwɛi. Shi amɛnyɛɛɛ amɛfee Nyɔŋmɔ bɔfoi dɔŋŋ, no hewɔ lɛ amɛbatsɔmɔ Satan bɔfoi, loo daimonioi. Ni mɛni ba amɛbii asaabui lɛ anɔ?—  Amɛgboi yɛ Nu Afua lɛ mli. Ni nakai nɔŋŋ ba mɛi fɛɛ ni booo Nyɔŋmɔ toi lɛ anɔ.

Kɛjɛ Nu Afua be lɛ mli kɛbaa nɛɛ, Nyɔŋmɔ eŋmɛko daimonioi lɛ agbɛ koni amɛtsake amɛhe tamɔ gbɔmɛi dɔŋŋ. Eyɛ mli akɛ wɔnaaa daimonioi lɛ moŋ, shi amɛbɔɔ mɔdɛŋ lolo koni amɛha gbɔmɛi afee nibii ni ehiii kwraa. Amɛkɛ haomɔi babaoo miiba fe bei fɛɛ ni eho. Enɛ jɛ shwiemɔ ni ashwie amɛ kɛjɛ ŋwɛi kɛba shikpɔŋ nɔ lɛ hewɔ.

Ani ole nɔ hewɔ ni wɔnaaa daimonioi lɛ?— Nɔ hewɔ lɛ ji akɛ, anyɛɛɛ akɛ hiŋmɛi ana amɛ. Shi wɔbaanyɛ wɔná nɔmimaa akɛ amɛyɛ shihilɛ mli. Biblia lɛ kɛɔ akɛ Satan ‘miilaka jeŋ muu lɛ fɛɛ,’ ni edaimonioi lɛ miiye kɛmiibua lɛ.—Kpojiemɔ 12:9, 12.

Ani Abonsam kɛ edaimonioi lɛ baanyɛ ashishiu wɔ, loo amɛlaka wɔ hu?— Hɛɛ, amɛbaanyɛ kɛji akɛ wɔkwɛɛɛ wɔhe nɔ jogbaŋŋ. Shi ehe ehiaaa ni wɔshe gbeyei. Tsɔɔlɔ Kpele lɛ kɛɛ akɛ: ‘Abonsam bɛ hewalɛ yɛ minɔ.’ Kɛji akɛ wɔtsi wɔbɛŋkɛ Nyɔŋmɔ he kpaakpa lɛ, ebaabu wɔhe kɛjɛ Abonsam kɛ edaimonioi lɛ ahe.—Yohane 14:30.

Ehe miihia ni wɔle nibii fɔji ni daimonioi lɛ baasumɔ ni wɔfee. No hewɔ lɛ susumɔ he. Mɛɛ nibii fɔji daimonioi lɛ fee beni amɛba shikpɔŋ lɛ nɔ lɛ?— Dani Nu Afua lɛ aaaba lɛ, amɛkɛ yei ná bɔlɛ, nɔ ko ni ejaaa akɛ ŋwɛibɔfoi aaafee. Ŋmɛnɛ, kɛ́ gbɔmɛi booo Nyɔŋmɔ mla ni kɔɔ bɔlɛnamɔ he lɛ toi lɛ, daimonioi lɛ sumɔɔ. Ha ni mabi bo sane, namɛi pɛ esa akɛ amɛná bɔlɛ?— Ohetoo lɛ ja, mɛi ni ebote gbalashihilɛ mli lɛ pɛ.

Ŋmɛnɛ, gbekɛbii hii kɛ yei komɛi kɛ amɛhe woɔ bɔlɛnamɔ mli, shi enɛ ehiii haaa amɛ. Biblia lɛ wieɔ ‘fɔmɔ nii’ loo nuutso he. (3 Mose 15:1-3) Atsɛɔ yoo fɔmɔ nii lɛ akɛ yoohe. Yehowa bɔ gbɔmɔtso lɛ fãi nɛɛ kɛha yiŋtoo krɛdɛɛ ko hewɔ, ni esa akɛ mɛi ni amɛbote gbalashihilɛ mli lɛ pɛ aná mli ŋɔɔmɔ. Kɛ́ gbɔmɛi fee nibii ni Yehowa kɛɛ akafee lɛ, ehaa daimonioi lɛ náa miishɛɛ. Ákɛ nɔkwɛmɔnɔ lɛ, kɛji akɛ gbekɛ nuu ko kɛ gbekɛ yoo ko yoohe shwɛ loo  gbekɛ yoo ko kɛ gbekɛ nuu ko nuutso shwɛ lɛ, daimonioi lɛ sumɔɔ. Wɔsumɔɔɔ ni wɔha daimonioi lɛ aná miishɛɛ, aloo jeee nakai?—

Nɔ kroko hu yɛ ni daimonioi lɛ sumɔɔ shi Yehowa nyɛ̃ɛɔ. Ani ole nɔ ni ji?— Yiwalɛ. (Lala 11:5) Yiwalɛ ji be mli ni gbɔmɛi feɔ efɔŋ ni amɛyeɔ mɛi krokomɛi awui. Kaimɔ akɛ, no ji nɔ ni asaabui lɛ, ni ji daimonioi lɛ abii lɛ fee lɛ.

Daimonioi lɛ sumɔɔ hu ni amɛwo gbɔmɛi ahe gbeyei. Yɛ bei komɛi amli lɛ amɛkwaa amɛfeɔ amɛhe mɛi ni egboi. Ekolɛ amɛbaakase mɛi ni egboi lɛ agbee po. Daimonioi lɛ shishiuɔ mɛi pii yɛ nɛkɛ gbɛ nɔ koni amɛhe amɛye akɛ mɛi ni egboi lɛ ahiɛ kãmɔ lolo, ni ákɛ, amɛbaanyɛ ni amɛkɛ gbɔmɛi ni yɔɔ wala mli lɛ awie. Hɛɛ, daimonioi lɛ haa mɛi pii heɔ yeɔ akɛ sisai yɛ.

No hewɔ lɛ, esa akɛ wɔhiɛ ahi wɔhe nɔ koni Satan kɛ edaimonioi lɛ akashishiu wɔ. Biblia lɛ bɔɔ kɔkɔ akɛ: ‘Satan bɔɔ mɔdɛŋ ni efee ehe tamɔ bɔfo kpakpa, ni etsuji lɛ feɔ nakai  nɔŋŋ.’ (2 Korintobii 11:14, 15) Shi, daimonioi lɛ ehiii kwraa. Nyɛhaa wɔkwɛa bɔ ni ekolɛ amɛbaabɔ mɔdɛŋ ni amɛha wɔtamɔ amɛ lɛ.

Nɛgbɛ gbɔmɛi kaseɔ awuiyeli kɛ bɔlɛnamɔ ni esaaa kɛ mumɔi kɛ sisai ahe nii babaoo kɛjɛɔ?— Ani jeee yɛ tɛlivishiŋ nɔ nifeemɔi kɛ sinii komɛi amli, kɛ kɔmpiuta kɛ vidio nɔ shwɛmɔi, Internet, kɛ gbekɛbii ashwɛmɔ he woji komɛi ni mfonirii yɔɔ mli lɛ? Ani nibii ni afeɔ nɛɛ haa wɔbɛŋkɛɔ Nyɔŋmɔ aloo amɛhaa wɔbɛŋkɛɔ Abonsam kɛ edaimonioi lɛ? Te osusuɔ tɛŋŋ?—

Namɛi osusuɔ akɛ amɛji mɛi ni sumɔɔ ni wɔbo saji gbohii atoi ni wɔkwɛ nibii nɛɛ?— Hɛɛ, Satan kɛ edaimonioi lɛ ni. No hewɔ lɛ, mɛni ehe hiaa ni bo kɛ mi fɛɛ afee?— Ehe miihia ni wɔkane nibii kpakpai ni he yɔɔ sɛɛnamɔ kɛha wɔ lɛ, ni wɔbo toi, ni wɔkwɛ, ni no baaye abua wɔ ni wɔsɔmɔ Yehowa. Ani obaanyɛ otsɔɔ nibii kpakpai ni wɔbaanyɛ wɔfee nɛɛ ekomɛi?—

Kɛji akɛ wɔfee nɔ ni hi lɛ, nɔ ko bɛ ni wɔbaadamɔ nɔ wɔshe daimonioi lɛ gbeyei. Yesu he wa fe amɛ, ni amɛsheɔ lɛ gbeyei. Gbi ko lɛ daimonioi lɛ bolɔ amɛwo Yesu akɛ: “Oba wɔ hiɛkpatamɔ!” (Marko 1:24) Ani wɔnáŋ miishɛɛ kɛji akɛ be ni Yesu kɛbaakpata Satan kɛ edaimonioi lɛ ahiɛ lɛ shɛ?— Dani nɛkɛ be nɛɛ aaashɛ lɛ, wɔbaanyɛ wɔná nɔmimaa akɛ Yesu baabu wɔhe kɛjɛ daimonioi lɛ ahe kɛji akɛ wɔbɛŋkɛ lɛ kɛ eŋwɛi Tsɛ lɛ kpaakpa.