Ebiɔ mɔdɛŋbɔɔ dani anáa naanyo; ebiɔ mɔdɛŋbɔɔ dani naanyo hiɔ shi. Abaajɔɔ mɔdɛŋ ni obɔɔ koni otsɔ Nyɔŋmɔ naanyo ni ohi shi nakai lɛ nɔ babaoo diɛŋtsɛ. Yesu kɛɛ mɛi ni he enɛ amɛye lɛ akɛ: “Anɔkwale lɛ aaaha nyɛye nyɛhe.” (Yohane 8:32) Mɛni no tsɔɔ?

Obaanyɛ oná heyeli mli ŋɔɔmɔ bianɛ. Obaanyɛ oye ohe kɛjɛ apasa tsɔɔmɔi kɛ amalei ni Satan egbɛ eshwã lɛ ahe. Obaanyɛ oye ohe kɛjɛ hiɛnɔkamɔ ni bɛ ni eyi gbɔmɛi akpekpei abɔ ni leee Yehowa lɛ ashihilɛ mli obɔ lɛ he. (Romabii 8:22) Nyɔŋmɔ nanemɛi eye amɛhe kɛjɛ “gbele gbeyeishemɔ” po mli.—Hebribii 2:14, 15.

Obaanyɛ oná heyeli mli ŋɔɔmɔ yɛ Nyɔŋmɔ jeŋ hee lɛ mli. Mɛɛ heyeli ni yɔɔ naakpɛɛ po obaanyɛ oná mli ŋɔɔmɔ yɛ wɔsɛɛ be mli nɛkɛ! Heyeli kɛmiijɛ tawuu, hela, kɛ awuiyeli mli baahi shikpɔŋ nɔ Paradeiso lɛ mli. Heyeli kɛmiijɛ ohia kɛ hɔmɔ mli. Heyeli kɛmiijɛ gbɔlɛ kɛ gbele mli. Heyeli kɛmiijɛ gbeyeishemɔ, nɔnyɛɛ, kɛ jalɛ sane ni ayeee mli. Biblia lɛ wieɔ yɛ Nyɔŋmɔ he akɛ: “Ogbɛɔ odɛŋ ni ohaa nɔ fɛɛ nɔ ni hiɛ kã tɔɔ kɛ nii ni etaoɔ.”—Lala 145:16.

 Nyɔŋmɔ nanemɛi baahi shi kɛya naanɔ. Naanɔ wala ji nikeenii ni jara wa waa ni Nyɔŋmɔ kɛbaaha mɛi fɛɛ ni taoɔ enaanyobɔɔ lɛ. (Romabii 6:23) Bo lɛ susumɔ nɔ ni naanɔ wala baatsɔɔ kɛha bo lɛ he okwɛ!

Obaaná be ni okɛfee nibii babaoo. Ekolɛ obaasumɔ ni okase saŋkutswaa. Aloo ekolɛ oosumɔ ni okase bɔ ni atɛŋɔ mfonirii ahaa aloo otsɔ kapintɛfonyo. Ekolɛ obaasumɔ ni okase kooloi kɛ kwɛ̃ɛnii ahe nii. Aloo ekolɛ obaasumɔ ni ofã gbɛ ni oyakwɛ maji kɛ gbɔmɛi srɔtoi. Naanɔ wala ni oyɔɔ lɛ baaha onyɛ ofee nɛkɛ nibii nɛɛ fɛɛ!

Obaaná be ni okɛná nanemɛi babaoo. Shihilɛ kɛmiiya naanɔ lɛ baaha onyɛ ole mɛi krokomɛi babaoo ni amɛ́batsɔmɔ Nyɔŋmɔ nanemɛi lɛ. Obaale nibii ni amɛhe esa waa yɛ mli kɛ amɛsui kpakpai lɛ, ni amɛ hu amɛbaatsɔmɔ onanemɛi. Obaasumɔ amɛ, ni amɛ hu amɛbaasumɔ bo. (1 Korintobii 13:8) Naanɔ wala ni oyɔɔ lɛ baaha oná be koni mɔ fɛɛ mɔ ni yɔɔ shikpɔŋ nɔ lɛ atsɔ onaanyo! Nɔ ni hi fe fɛɛ lɛ, okɛ Yehowa teŋ naanyobɔɔ lɛ mli baawa kɛya hiɛ yɛ be mli ni afii ohai abɔ lɛ hoɔ lɛ. Eba akɛ oootsɔ Nyɔŋmɔ naanyo kɛya naanɔ!