1. Mɛni esa akɛ wɔfee koni wɔjamɔ lɛ asa Yehowa hiɛ? Ni mɛni hewɔ esa akɛ wɔfee nakai lɛ?

 YESU kɛɛ akɛ: “Anɔkwa jálɔi lɛ baajá Tsɛ lɛ kɛ mumɔ kɛ anɔkwale, ejaakɛ, anɔkwa, Tsɛ lɛ miitao mɛi ni tamɔ nɛkɛ ni amɛjá lɛ.” (Yohane 4:23; 6:44) Esa akɛ wɔteŋ mɔ fɛɛ mɔ ‘aya nɔ eka ekwɛ ni ena nɔ ni sa Nuŋtsɔ lɛ hiɛ.’ (Efesobii 5:10) Shi jeee be fɛɛ be enɛ feemɔ yɔɔ mlɛo. Satan sumɔɔ ni elaka wɔ ni wɔfee nibii ni Yehowa sumɔɔɔ.​—Kpojiemɔ 12:9.

2. Tsɔɔmɔ nɔ ni ba yɛ Sinai Gɔŋ lɛ masɛi.

² Mɛɛ gbɛ nɔ Satan bɔɔ mɔdɛŋ ni elaka wɔ? Gbɛ kome ji, ni efutu wɔyiŋ yɛ nɔ ni ja kɛ nɔ ni ejaaa he. Naa nɔ ko ni ba Israel maŋ lɛ nɔ be ni amɛyabɔ nsara yɛ Sinai Gɔŋ lɛ masɛi lɛ. No mli lɛ, Mose etee gɔŋ lɛ nɔ, ni maŋbii lɛ miimɛ lɛ ní eku esɛɛ kɛba nsara lɛ mli. Eshɛ he ko ni amɛnyɛɛɛ amɛmɛ lɛ dɔŋŋ, no hewɔ lɛ, amɛkɛɛ Aaron akɛ efee nyɔŋmɔ ehã amɛ. Ekɛ shika tsuru fee tsinabi amaga. Kɛkɛ ni maŋbii lɛ ye gbi jurɔ. Amɛjo kɛbɔle tsinabi lɛ, ni amɛkoto lɛ. Amɛsusu akɛ kɛ́ amɛkoto tsinabi lɛ, belɛ amɛmiijá Yehowa. Shi na ni amɛna nifeemɔ nɛɛ akɛ ‘gbi jurɔ  kɛhã Yehowa’ lɛ etsɔɔɔ akɛ eja. Yehowa na lɛ akɛ wɔŋjamɔ nifeemɔ, ni amɛteŋ mɛi pii gboi. (2 Mose 32:1-6, 10, 28) Mɛni enɛ tsɔɔ wɔ? No ji, kaahã alaka bo. ‘Kaata nɔ ko ni he tseee he,’ moŋ lɛ, hã Yehowa atsɔɔ bo nɔ ni ja kɛ nɔ ni ejaaa.​—Yesaia 52:11; Ezekiel 44:23; Galatiabii 5:9.

3, 4. Mɛni hewɔ ehi akɛ wɔbaale hei ni gbii juji ni ehe shi lɛ ateŋ pii jɛ lɛ?

³ Be ni Yesu yɔɔ shikpɔŋ lɛ nɔ lɛ, etsɔse ebɔfoi lɛ koni amɛtsɔɔ wɔ bɔ ni ajáa Yehowa yɛ gbɛ ni he tse nɔ. Egbele sɛɛ lɛ, bɔfoi lɛ tee nɔ amɛtsɔɔ kaselɔi hei Yehowa shishitoo mlai. Shi bɔfoi lɛ agbele sɛɛ lɛ, amale tsɔɔlɔi kɛ susumɔi ni ejaaa kɛ wɔŋjamɔ kusumii kɛ gbii juji bɔi asafo lɛ mli baa. Amɛtsake wɔŋjamɔ gbii juji nɛɛ ekomɛi agbɛ́ii po, koni efee tamɔ Kristofoi agbii juji. (2 Tesalonikabii 2:7, 10; 2 Yohane 6, 7) Ŋmɛnɛ lɛ, gbii juji nɛɛ ateŋ pii yɛ lolo, ni amɛmiiwo amale hemɔkɛyelii kɛ daimonioi kɛshãramɔ he hewalɛ lolo. *​—Kpojiemɔ 18:2-4, 23.

⁴ Ŋmɛnɛ lɛ, yɛ je lɛŋ fɛɛ lɛ, mɛi naa gbii juji akɛ amɛhe hiaa waa. Shi be ni oyaa nɔ oleɔ bɔ ni Yehowa susuɔ nii ahe ehãa lɛ, ekolɛ obaana akɛ ehe miihia ni otsake susumɔ ni ohiɛ yɛ gbii juji komɛi ahe lɛ. Ekolɛ onáŋ lɛ mlɛo, shi ná nɔmimaa akɛ Yehowa baawa bo. Hã wɔkwɛ hei ni gbii juji ni ehe shi ŋmɛnɛ lɛ ekomɛi jɛ, kɛkɛ lɛ, wɔbaana bɔ ni Yehowa naa amɛ ehãa.

5. Mɛɛ odaseyeli yɔɔ ni tsɔɔ akɛ, afɔɔɔ Yesu yɛ December 25 lɛ nɔ?

⁵ Yɛ je lɛŋ hei pii lɛ, ayeɔ Blonya yɛ December 25 lɛ nɔ. Mɛi pii susuɔ akɛ nakai gbi lɛ nɔ afɔ Yesu. Biblia lɛ etsɔɔɔ wɔ gbi nɔ loo nyɔɔŋ nɔ po ni afɔ Yesu, shi ekɛɔ wɔ nɔ ko yɛ be ni afɔ lɛ lɛ he. Luka ŋma akɛ, be ni afɔ Yesu yɛ Betlehem lɛ, no mli lɛ “tookwɛlɔi komɛi hu eshi amɛshĩa amɛyahi ŋa nɔ” amɛmiikwɛ amɛtoi. (Luka 2:8-11) December mli lɛ, fɛ̃i yeɔ, nugbɔ nɛɔ, ni snoo hu nɛɔ yɛ Betlehem, no hewɔ lɛ kɛ́ je na lɛ, tookwɛlɔi nyɛŋ amɛkɛ amɛtoi aje kpo. Mɛni enɛ tsɔɔ wɔ? Afɔ Yesu be ni kɔɔyɔɔ lɛ mli hi, jeee December mli. Biblia lɛ kɛ yinɔsane fɛɛ tsɔɔ akɛ, afɔ lɛ yɛ September loo October mli.

6, 7. (a) Nɛgbɛ Blonyayeli kusumii pii ni ehe shi lɛ jɛ? (b) Mɛɛ yiŋtoo hewɔ esa akɛ wɔke mɛi nii?

⁶ Belɛ, mɛni hã abɔi Blonya yeli? Ejɛ wɔŋjamɔ gbii juji tamɔ Romabii agbi jurɔ ni atsɛɔ lɛ Saturnalia lɛ mli. Eji gbi jurɔ ni ayeɔ ahãa Saturn, okwaayeli nyɔŋmɔ lɛ. The Encyclopedia Americana lɛ wie akɛ: “Saturnalia ji Romabii lɛ agbi jurɔ ni ayeɔ yɛ December teŋgbɛ, ni nibii ni mɛi feɔ kɛnáa amɛhewɔ miishɛɛ kɛ́ aaye Blonya lɛ pii jɛ gbijurɔyeli nɛɛ mli. Akɛ nɔkwɛmɔnɔ lɛ, okpɔlɔ ni aŋmɛɔ, nii ni akeɔ, kɛ kɛnrɛi ni asuɔ lɛ jɛ gbijurɔyeli nɛɛ mli.” Ayeɔ Persiabii lɛ ahulu nyɔŋmɔ ni atsɛɔ lɛ Mithra lɛ hu fɔmɔ gbi yɛ December 25 lɛ nɔ.

⁷ Shi ŋmɛnɛ lɛ, mɛi pii yeɔ Blonya ni amɛjwɛŋŋ wɔŋjamɔ kusumii ni ejɛ mli lɛ he. Nɔ hewɔ ni amɛkpaa Blonya gbɛ ji, koni amɛkɛ amɛwekumɛi afee  ekome, amɛye niyenii kpakpai, ni amɛkekee nii. Eji anɔkwale akɛ, wɔsumɔɔ wɔwekumɛi kɛ wɔnanemɛi, ni Yehowa hu miisumɔ ni etsuji ahã mɔ nɔ. Biblia lɛ wie yɛ 2 Korintobii 9:7 lɛ akɛ, “mɔ ni hãa kɛ miishɛɛ lɛ, lɛ Nyɔŋmɔ sumɔɔ.” Yehowa sumɔɔɔ ni wɔkeɔ mɛi nii yɛ gbii krɛdɛi komɛi pɛ anɔ. Yehowa webii keɔ amɛnanemɛi kɛ amɛwekumɛi nii, ni amɛfeɔ  henaabuamɔi be fɛɛ be yɛ afi lɛ mli, ni amɛkpaaa gbɛ akɛ mɔ ko ake amɛ nɔ ko kɛto najiaŋ. Amɛkeɔ mɛi nii, ejaakɛ amɛsumɔɔ mɛi.​—Luka 14:12-14.

8. Ani ŋulamiiaŋkwɛlɔi lɛ yake Yesu nii be ni eji bi ŋmɔŋ lɛ? Tsɔɔmɔ mli.

⁸ Mɛi pii kɛɔ akɛ, be ni afɔ Yesu ni eyɔɔ toi atsũ lɛ mli lɛ, nilelɔi etɛ komɛi yake lɛ nii, ni no hewɔ amɛ hu amɛkeɔ mɛi nii kɛ́ aaye Blonya lɛ. Eji anɔkwale akɛ, hii komɛi yasara Yesu ni amɛke lɛ nii. Yɛ blema lɛ, mɛi fɔɔ gbɔmɛi wuji nikee. (1 Maŋtsɛmɛi 10:1, 2, 10, 13) Shi ani ole akɛ Biblia lɛ kɛɛ ŋulamiiaŋkwɛlɔi ji hii nɛɛ, ni tsɔɔ akɛ amɛfeɔ majik, ni amɛjáaa Yehowa? Agbɛnɛ hu, jeee be ni afɔ Yesu eŋmɔŋ ni eyɔɔ toi atsũ lɛ mli lɛ ji be ni amɛyasara lɛ lɛ. Amɛyasara lɛ sɛɛ mli yɛ shĩa, be ni eji “gbekɛ” lɛ.​—Mateo 2:1, 2, 11.

9. Mɛɛ fɔmɔ gbi yelii ahe awie yɛ Biblia lɛ mli?

⁹ Gbi ni afɔɔ mɔ ko lɛ ji miishɛɛ gbi. (Lala 127:3) Shi no etsɔɔɔ akɛ wɔye fɔmɔ gbi. Susumɔ enɛ he okwɛ: Fɔmɔ gbi yelii enyɔ pɛ ahe awie yɛ Biblia lɛ mli. Ekome ji Egipt maŋtsɛ Farao ko fɔmɔ gbi jurɔ, ni ekroko lɛ ji Maŋtsɛ Herode Antipa fɔmɔ gbi jurɔ. (Kanemɔ 1 Mose 40:20-22; Marko 6:21-29.) Nɔyelɔi nɛɛ ateŋ mɔ ko mɔ ko jáaa Yehowa. Anɔkwa, awieko yɛ Biblia lɛ mli he ko he ko akɛ Yehowa jálɔ ko ye efɔmɔ gbi.

10. Te mra be mli Kristofoi lɛ na fɔmɔ gbi yeli amɛhã tɛŋŋ?

¹⁰ The World Book Encyclopedia lɛ tsɔɔ mli akɛ,  mra be mli Kristofoi lɛ “na fɔmɔ gbi yeli akɛ wɔŋjamɔ nifeemɔ.” Nifeemɔi nɛɛ jɛ amale hemɔkɛyelii amli. Akɛ nɔkwɛmɔnɔ lɛ, blema Greekbii lɛ heɔ amɛyeɔ akɛ, mɔ fɛɛ mɔ lɛ, kɛ́ ayaafɔ lɛ lɛ, mumɔ ko baa jɛmɛ, ni nakai mumɔ lɛ buɔ mɔ lɛ he. Ni amɛsusuɔ akɛ nakai mumɔ lɛ kɛ nyɔŋmɔ ko ni lɛ hu afɔ lɛ yɛ nakai gbi lɛ nɔŋŋ nɔ lɛ yɛ tsakpaa ko. Yɛ wɔŋjamɔ kusumii nɛɛ asɛɛ lɛ, fɔmɔ gbi yeli kɛ ŋulamiiaŋkwɛmɔ, kɛ agbɛnɛ hu, ŋulamiiaŋkwɛmɔ he saji yɛ tsakpaa.

11. Kɛ́ wɔfee mɛi ejurɔ lɛ, te Yehowa nuɔ he ehãa tɛŋŋ?

¹¹ Mɛi pii susuɔ akɛ, gbi ni afɔ amɛ lɛ ji gbi krɛdɛɛ ko ni esa akɛ ajie hiɛsɔɔ kɛ suɔmɔ kpo atsɔɔ amɛ yɛ nɔ. Shi wɔbaanyɛ wɔjie suɔmɔ kpo wɔtsɔɔ wɔwekumɛi kɛ wɔnanemɛi yɛ afi lɛ mli fɛɛ, jeee yɛ gbi kome ko pɛ nɔ. Yehowa miisumɔ ni wɔmli ahi, ni wɔfee mɛi ejurɔ be fɛɛ be. (Kanemɔ Bɔfoi 20:35.) Wɔdaa lɛ shi gbi fɛɛ gbi akɛ edro wɔ wala, jeee yɛ wɔfɔmɔ gbi pɛ nɔ.​—Lala 8:3, 4; 36:9.

12. Te aaafee tɛŋŋ ni wɔgbele gbi aaahi fe wɔfɔmɔ gbi lɛ?

¹² Jajelɔ 7:1 lɛ kɛɛ: “Gbɛ́i kpakpa hi fe mu kpakpa, ni gbele gbi hi fe fɔmɔ gbi.” Te aaafee tɛŋŋ ni wɔgbele gbi aaahi fe wɔfɔmɔ gbi lɛ? Gbi ni abaafɔ wɔ lɛ, no mli lɛ, wɔkɛ wɔwala tsuko nɔ ko kwraa​—ekpakpa jio, efɔŋ jio. Shi kɛ́ wɔkɛ wɔwala sɔmɔ Yehowa, ni wɔfee mɛi ejurɔ lɛ, wɔfeɔ “gbɛ́i kpakpa” wɔhãa wɔhe, ni Yehowa baakai wɔ kɛ́ wɔgboi po. (Hiob 14:14, 15) Yehowa webii yeee amɛ diɛŋtsɛ loo Yesu fɔmɔ gbi. Anɔkwa, gbi jurɔ pɛ ni Yesu fã akɛ wɔye ji, egbele lɛ Kaimɔ lɛ.​—Luka 22:17-20; Hebribii 1:3, 4.

13, 14. Nɛgbɛ Easter gbijurɔyeli lɛ jɛ?

¹³ Mɛi pii susuɔ akɛ, kɛ́ amɛmiiye Easter lɛ, belɛ amɛmiikai Yesu shitee lɛ. Shi yɛ anɔkwale mli lɛ, aná Easter gbijurɔyeli lɛ kɛjɛ gbi jurɔ ni ayeɔ ahãa Eostre, ni ji Anglo-Saxon nyɔŋmɔyoo kɛhã jetsɛremɔ kɛ sɛɛkpee nugbɔnɛmɔ lɛ mli. The Dictionary of  Mythology lɛ tsɔɔ mli akɛ, Eostre ji nyɔŋmɔyoo ni hãa afɔɔ, ni hãa ŋmɔshi nibii baa, ni hãa kooloi hu shwereɔ. Nibii komɛi ni afeɔ kɛ́ aaye Easter lɛ kɛ enɛ yɛ tsakpaa. Akɛ nɔkwɛmɔnɔ lɛ, Encyclopædia Britannica lɛ tsɔɔ mli akɛ, wuɔ wɔji “feɔ wala hee kɛ gbohiiashitee he okadi yɛ gbɛ ni sa nɔ.” Ni agbɛnɛ hu, akɛ adaŋkoi feɔ fɔmɔ kɛ shweremɔ he okadi kɛjɛ blema tɔ̃ɔ. Eyɛ faŋŋ akɛ, Easter kɛ Yesu shitee lɛ bɛ tsakpaa ko kwraa.

¹⁴ Kɛ́ Yehowa na ni mɛi kɛ amale jamɔ kusumii miikai e-Bi lɛ shitee lɛ, ani enáa he miishɛɛ? Dabi kwraa. (2 Korintobii 6:17, 18) Anɔkwa, Yehowa ekɛko akɛ wɔkai Yesu shitee lɛ.

15. Mɛni hewɔ anɔkwa Kristofoi kɛ amɛhe wooo kusumii ni afeɔ kɛ́ mɔ ko gbo lɛ ekomɛi amli lɛ?

¹⁵ Anɔkwa Kristofoi kɛ amɛhe wooo kusumii ni afeɔ kɛ́ mɔ ko gbo lɛ ateŋ babaoo amli. Kɛ́ mɔ ko gbo lɛ, bei pii lɛ mɛi shiɔ kpe kɛyashiɔ je tsɛreɔ. Kɛ́ ayaafu mɔ lɛ, ewekumɛi fɔ̃ɔ shia loo fɔfɔii amɛwoɔ gbonyo bu lɛ mli dani atsĩɔ enɔ. Mɔ lɛ gbele sɛɛ gbii fioo, nyɔji fioo, loo afii fioo komɛi lɛ, ayɛ kusumii krokomɛi ni afeɔ. Mɛi feɔ nibii nɛɛ fɛɛ ejaakɛ amɛheɔ amɛyeɔ akɛ gbohii lɛ baanyɛ aye abua hiɛkãalɔi, loo amɛye amɛ awui. Shi Biblia lɛ kɛɔ akɛ, gbohii lɛ “leee nɔ ko nɔ ko.” No hewɔ lɛ, mɛi ni miisumɔ ni amɛya nɔ amɛhi Nyɔŋmɔ suɔmɔ lɛ mli lɛ kɛ amɛhe wooo kusumii ni hãa mɛi jáa gbohii lɛ eko kwraa mli.​—Jajelɔ 9:5, 10.

16, 17. Kɛ́ wɔmiito yookpeemɔ he gbɛjianɔ lɛ, mɛni he esa akɛ wɔsusu?

¹⁶ Yookpeemɔ gbi ji miishɛɛ gbi. Esoro bɔ ni afeɔ yookpeemɔ ahãa yɛ je lɛŋ he fɛɛ he. Bei pii lɛ, mɛi susuuu he ni yookpeemɔ kusumii jɛ lɛ he, no hewɔ lɛ, ekolɛ amɛleee akɛ kusumii nɛɛ ekomɛi jɛ amale jamɔ tsɔɔmɔi amli. Shi kɛ́ Kristofoi miito amɛyookpeemɔ he gbɛjianɔ lɛ, esa akɛ amɛfee lɛ bɔ ni baasa Yehowa hiɛ. Kɛ́ amɛná amɛle he ni yookpeemɔ kusumii lɛ jɛ lɛ, ebaawa amɛ ni amɛkpɛ yiŋ ni ja.​—Marko 10:6-9.

¹⁷ Mɛi heɔ amɛyeɔ akɛ, yookpeemɔ kusumii komɛi hãa nuu lɛ kɛ yoo lɛ náa ‘shade kpakpa.’ (Yesaia 65:11) Akɛ nɔkwɛmɔnɔ lɛ, yɛ hei komɛi lɛ, akɛ omɔ gbiŋ kɛ ehenɔi lɛ shwãa ayemforo kɛ ayemforo wu lɛ nɔ. Aheɔ ayeɔ akɛ, enɛ baahã nuu lɛ kɛ yoo lɛ afɔ bii, amɛná miishɛɛ, amɛwala sɛɛ atsɛ, ní ebu amɛhe koni nɔ fɔŋ ko akaba amɛnɔ. Shi Kristofoi kwɛɔ jogbaŋŋ koni amɛkɛ amɛhe akawo nifeemɔ ko ni jɛ amale jamɔ mli lɛ mli.​—Kanemɔ 2 Korintobii 6:14-18.

18. Mɛɛ Biblia mli shishitoo mlai krokomɛi kɔɔ yookpeemɔ he?

¹⁸ Kristofoi sumɔɔ ni amɛyookpeemɔ afee miishɛɛ, ni bulɛ hu ahi he, ni amɛsumɔɔ ni mɛi ni baaba lɛ fɛɛ aná miishɛɛ. Kɛ́ wɔtee Kristofoi ayookpeemɔ ko lɛ, esaaa akɛ wɔwieɔ wiemɔi ni esaaa, wiemɔi ni kɔɔ bɔlɛnamɔ he, loo wiemɔi ni tsɔɔ akɛ wɔbuuu ayemforo lɛ kɛ ewu lɛ loo mɛi krokomɛi. (Abɛi 26:18, 19; Luka 6:31; 10:27) Kristofoi efeee yookpeemɔ ni baatsɔɔ akɛ ‘amɛkɛ nii ni amɛyɔɔ lɛ miishwã.’  (1 Yohane 2:16) Kɛ́ ooto yookpeemɔ he gbɛjianɔ lɛ, bɔɔ mɔdɛŋ ni ofee lɛ bɔ ni wɔsɛɛ lɛ, oshwaŋ ohe.​—Kwɛmɔ Wiemɔi Komɛi Amligbalamɔ 28.

19, 20. Nɛgbɛ glase nɔ ni awóɔ lɛ jɛ?

¹⁹ Nɔ ko ni afɔɔ feemɔ yɛ yookpeemɔi kɛ nifeemɔi krokomɛi ashishi ji glase nɔ ni awóɔ. Bɔ ni afeɔ lɛ ji akɛ, mɔ kome baa jɔɔmɔ, ni mɛi krokomɛi lɛ fɛɛ holeɔ amɛglasei lɛ anɔ. Te esa akɛ Kristofoi ana nifeemɔ nɛɛ amɛhã tɛŋŋ?

²⁰ Wolo ni ji International Handbook on Alcohol and Culture lɛ tsɔɔ mli akɛ, ekolɛ glase nɔ ni awóɔ lɛ jɛ blema wɔŋjamɔ nifeemɔ ko mli. Mɛi ni kɛ amɛhe wo nifeemɔ nɛɛ mli lɛ kɛ “nɔ ko ni yɔɔ nuinui ni abuɔ lɛ akɛ eyɛ krɔŋkrɔŋ lɛ shwieɔ shi amɛhãa nyɔŋmɔi lɛ.” Amɛfeɔ enɛ “kɛbiɔ nyɔŋmɔi lɛ nii, ni nɔ ni amɛwieɔ ji, ‘oyi aná wala!’ loo ‘ná gbɔmɔtsoŋ hewalɛ kpakpa!’” Yɛ blema lɛ, mɛi holeɔ amɛkɔɔpoi anɔ kɛbiɔ amɛnyɔŋmɔi lɛ adɛŋ jɔɔmɔ. Shi jeee nakai Yehowa taoɔ akɛ wɔfee dani ejɔɔ wɔ.​—Yohane 14:6; 16:23.

21. Mɛɛ gbii juji krokomɛi esaaa akɛ Kristofoi kɛ amɛhe woɔ mli?

²¹ Kɛ́ wɔmiikwɛ kɛji esa akɛ wɔkɛ wɔhe awo gbijurɔyeli ko mli loo wɔkɛ wɔhe akawo mli lɛ, esa akɛ wɔsusu sui ni nakai gbi jurɔ lɛ woɔ he hewalɛ lɛ he. Akɛ nɔkwɛmɔnɔ lɛ, yɛ gbii juji komɛi ashishi lɛ, ajoɔ yɛ gbɛ ni teɔ bɔlɛnamɔ henumɔi ashi lɛ nɔ, anuɔ dãa fe nine, ni akɛ he woɔ jeŋba sha mli po. Gbii juji  lɛ ekomɛi woɔ hii kɛ hii loo yei kɛ yei hewalɛ ni amɛkɛ amɛhe aná bɔlɛ, ni ekomɛi hu woɔ mɛi hewalɛ ni amɛkɛ amɛhe awo maŋhedɔɔ nifeemɔi amli. Kɛ́ wɔkɛ wɔhe wo gbii juji nɛɛ amli lɛ, ani wɔbaanyɛ wɔkɛɛ lɛɛlɛŋ akɛ, wɔnyɛɔ nɔ ni Yehowa nyɛɔ?​—Lala 1:1, 2; 97:10; 119:37.

22. Mɛni baaye abua Kristofonyo ko ni ekpɛ eyiŋ kɛji ekɛ ehe baawo gbijurɔyeli ko mli loo ekɛ ehe woŋ mli?

²² Esa akɛ Kristofoi akwɛ jogbaŋŋ ni amɛkɛ amɛhe akawo gbijurɔyeli ko ni wooo Nyɔŋmɔ hiɛ nyam lɛ mli. Bɔfo Paulo ŋma akɛ: “Kɛ́ nii nyɛyeɔ jio, nii nyɛnuɔ jio, aloo nɔ kroko nyɛfeɔ jio, nyɛfea nibii fɛɛ kɛwoa Nyɔŋmɔ hiɛ nyam.” (1 Korintobii 10:31; kwɛmɔ Wiemɔi Komɛi Amligbalamɔ 29.) Anɔkwa, jeee gbii juji fɛɛ kɔɔ jeŋba sha, amale jamɔ, kɛ maŋhedɔɔ he. Kɛ́ gbijurɔyeli ko eteee shi ewooo Biblia mli shishitoo mlai lɛ, no lɛ, wɔ diɛŋtsɛ wɔbaakpɛ wɔyiŋ kɛji wɔkɛ wɔhe baawo mli loo wɔkɛ wɔhe woŋ mli. Esa akɛ wɔsusu bɔ ni yiŋ ni wɔbaakpɛ lɛ baasa mɛi krokomɛi ahe ahã lɛ hu he.

23, 24. Te obaafee tɛŋŋ ogbála nɔ hewɔ ni oyeee gbii juji komɛi dɔŋŋ lɛ mli otsɔɔ owekumɛi ni jeee Odasefoi lɛ?

²³ Ekolɛ okɛ ohe wooo gbii juji ni wooo Yehowa hiɛ nyam lɛ amli dɔŋŋ. Shi ekolɛ owekumɛi ni jeee Yehowa Odasefoi lɛ ateŋ mɛi komɛi baasusu akɛ osumɔɔɔ amɛsane, loo ootse ohe kɛmiije amɛhe. Ekolɛ amɛnuɔ he akɛ, bei pɛ ni nyɛweku lɛ náa kɛbuaa nyɛhe naa ji bei ni aaye gbii juji. No hewɔ lɛ,  mɛni obaafee? Nibii pii yɛ ni obaanyɛ ofee kɛtsɔɔ amɛ akɛ osumɔɔ amɛ, ni amɛsane kã otsui nɔ. (Abɛi 11:25; Jajelɔ 3:12, 13) Obaanyɛ ohã amɛbasara bo yɛ bei krokomɛi amli.

²⁴ Kɛ́ owekumɛi miitao ale nɔ hewɔ ni oyeee gbii juji komɛi dɔŋŋ lɛ, obaanyɛ otao nii amli yɛ asafo lɛ woji lɛ amli kɛ jw.org lɛ nɔ, koni onyɛ ogbála mli otsɔɔ amɛ. Okɛ amɛ akataa saji anaa, ni kaanyɛ amɛnɔ ni amɛkpɛlɛ osusumɔ lɛ nɔ. Hã amɛna akɛ, osusu nii ahe jogbaŋŋ dani okpɛ oyiŋ lɛ. Too otsui shi ohã amɛ, ni ohã ‘owiemɔ he aba nyam daa, kɛ́ wɔɔkɛɛ lɛ, ŋoo ahi mli.’​—Kolosebii 4:6.

25, 26. Mɛɛ gbɛ nɔ fɔlɔi baanyɛ aye abua amɛbii koni amɛsumɔ Yehowa shishitoo mlai lɛ?

²⁵ Ehe miihia ni wɔteŋ mɔ fɛɛ mɔ ale nɔ tuuntu hewɔ ni ekpɛ eyiŋ akɛ ekɛ ehe woŋ gbijurɔyeli pɔtɛɛ ko mli lɛ. (Hebribii 5:14) Oti ni ma wɔhiɛ ji, ni wɔsa Yehowa hiɛ. Ni kɛ́ fɔlɔi ji wɔ lɛ, esa akɛ wɔhe be kɛye wɔbua wɔbii lɛ ni amɛnu Biblia mli shishitoo mlai lɛ ashishi, ni agbɛnɛ hu, amɛsumɔ shishitoo mlai nɛɛ. Kɛ́ amɛna Yehowa akɛ mɔ ko ni yɔɔ diɛŋtsɛ lɛ, amɛ hu amɛbaasumɔ ni amɛsa ehiɛ.​—Yesaia 48:17, 18; 1 Petro 3:15.

²⁶ Kɛ́ Yehowa na akɛ wɔmiibɔ mɔdɛŋ fɛɛ ni wɔbaanyɛ koni wɔjamɔ lɛ he atse, ní wɔye anɔkwa lɛ, enáa miishɛɛ. (Yohane 4:23) Shi mɛi pii susuɔ akɛ mɔ ko kwraa bɛ ni baanyɛ aye anɔkwa yɛ jeŋ ni ayeee anɔkwa yɛ mli nɛɛ mli. Ani nakai sane lɛ ji? Hã wɔsusu enɛ he yɛ yitso ni nyiɛ sɛɛ lɛ mli.