NIKASEMƆ 05
Biblia Lɛ Ji Wolo Ni Jɛ Nyɔŋmɔ Ŋɔɔ
Yehowa eke wɔ nɔ ko ni nɔ bɛ—no ji, Biblia lɛ. Woji 66 yɔɔ Biblia lɛ mli. Shi ekolɛ obaabi ohe akɛ: ‘Te fee tɛŋŋ ni aná Biblia lɛ? Namɔ ŋɔɔ ejɛ?’ Bɔ ni afee ni wɔná sanebimɔi nɛɛ ahetoo lɛ, hã wɔsusu bɔ ni fee ni wɔnine shɛ Nyɔŋmɔ Wiemɔ lɛ, ni ji Biblia lɛ, nɔ lɛ he.
1. Kɛ́ gbɔmɛi ni ŋma Biblia lɛ, belɛ, mɛni hewɔ akɛɔ akɛ ejɛ Nyɔŋmɔ ŋɔɔ lɛ?
Hii srɔtoi aaashɛ 40 ni ŋmala woji ni yɔɔ Biblia lɛ mli lɛ. Aje shishi yɛ afi 1513 D.Ŋ.B., ni agbe naa aaafee afi 98 Ŋ.B., ni tsɔɔ akɛ ehe aaafee afii 1,600 dani agbe naa. Esoro he ni mɛi ni ŋma lɛ ateŋ mɔ fɛɛ mɔ hi kɛ nitsumɔ ni etsu. Fɛɛ sɛɛ lɛ, emli woji lɛ eko eteee shi ewooo eko. Te fee tɛŋŋ eba lɛ nakai? Ejaakɛ ejɛ Nyɔŋmɔ ŋɔɔ. (Kanemɔ 1 Tesalonikabii 2:13.) Biblia ŋmalɔi lɛ ŋmalaaa amɛ diɛŋtsɛ amɛsusumɔi. Moŋ lɛ, “mumɔ krɔŋkrɔŋ lɛ tsirɛ [amɛ] ni amɛwie wiemɔi ni jɛ Nyɔŋmɔ ŋɔɔ.” a (2 Petro 1:21) Nyɔŋmɔ hã emumɔ krɔŋkrɔŋ lɛ kudɔ hii nɛɛ ni amɛŋmala esusumɔi.—2 Timoteo 3:16.
2. Namɛi baanyɛ aná Biblia lɛ he sɛɛ?
“Jeŋmaŋ fɛɛ jeŋmaŋ kɛ weku fɛɛ weku, kɛ wiemɔ fɛɛ wiemɔ, kɛ gbɔmɛi srɔtoi fɛɛ” baanyɛ aná sane kpakpa ni yɔɔ Biblia lɛ mli lɛ he sɛɛ. (Kanemɔ Kpojiemɔ 14:6.) Nyɔŋmɔ ekwɛ ni atsɔɔ Biblia lɛ shishi kɛtee wiemɔi babaoo amli fe woji krokomɛi fɛɛ. Ŋmɛnɛ lɛ, ewaaa akɛ mɔ ko nine baashɛ Biblia lɛ eko nɔ ekane, loo ebo emli wiemɔi lɛ toi, ekɔɔɔ he eko he ni eyɔɔ loo wiemɔ ni ewieɔ.
3. Mɛni Yehowa fee koni akakpãtã Biblia lɛ hiɛ?
Aŋmala Biblia mli woji lɛ yɛ nibii ni etsɛɛɛ fitemɔ, tamɔ kooloo hewolo kɛ papiro, ni akɛ jwɛi henɔ ko fee lɛ nɔ. Shi gbɔmɛi ni sumɔɔ Biblia lɛ kwɛ Biblia lɛ nɔ amɛŋmala ekomɛi pɛpɛɛpɛ amɛshwie shi. Eyɛ mli akɛ mɛi komɛi ni hiɛ gbɛnai ka akɛ amɛbaakpãtã Biblia lɛ hiɛ moŋ, shi mɛi komɛi hu kɛ amɛwala wo oshãra mli ni amɛbaa yi. Yehowa hãko mɔ ko loo nɔ ko atsĩ enaa koni wɔnine akashɛ e-Wiemɔ lɛ nɔ. Biblia lɛ kɛɛ: “Wɔ-Nyɔŋmɔ lɛ wiemɔ lɛ hiɔ shi kɛyaa naanɔ.”—Yesaia 40:8.
KASEMƆ PII OFATA HE
Obaana bɔ ni Nyɔŋmɔ kɛ emumɔ lɛ tsirɛ mɛi ni amɛŋma Biblia lɛ, bɔ ni ekwɛ koni akakpãtã hiɛ, kɛ nɔ ni efee koni adesai fɛɛ anine anyɛ ashɛ nɔ.
4. Biblia lɛ hã ana mɔ ŋɔɔ ni ejɛ
Jiemɔ VIDIO lɛ. No sɛɛ lɛ, nyɛkanea 2 Timoteo 3:16 lɛ, ni nyɛsusua sanebimɔi ni nyiɛ sɛɛ nɛɛ ahe.
-
Kɛ́ gbɔmɛi ni ŋma Biblia lɛ, belɛ, mɛni hewɔ atsɛɔ lɛ Nyɔŋmɔ Wiemɔ lɛ?
-
Kɛ́ okwɛ lɛ, ani eji anɔkwale akɛ Nyɔŋmɔ hã adesai ŋmala esusumɔi amɛshwie shi?
Mɔ ko baanyɛ ewie, koni mɔ kroko aŋma ehã lɛ. Nakai nɔŋŋ gbɔmɛi ŋma Biblia lɛ moŋ, shi emli wiemɔi lɛ jɛ Nyɔŋmɔ ŋɔɔ
5. Anyɛɛɛ akpãtã Biblia lɛ hiɛ
Akɛni Biblia lɛ jɛ Nyɔŋmɔ ŋɔɔ hewɔ lɛ, ekã shi faŋŋ akɛ, ebaakwɛ ni akakpãtã hiɛ. Kɛjɛ blema tɔ̃ɔ lɛ, mɛi ni yɔɔ gbɛnai eka akɛ amɛbaakpãtã hiɛ. Osɔfoi kɛ amɛwebii eka akɛ amɛhãŋ mɛi anine ashɛ nɔ. Mɛi pii bɔ mɔdɛŋ amɛbaa yi, eyɛ mli akɛ ate shi awo amɛ, loo no hã amɛwala yaje oshãra mli po. Kɛ́ ootao ole amɛteŋ mɔ kome he sane lɛ, jiemɔ VIDIO lɛ, ni nyɛsusua sanebimɔi ni nyiɛ sɛɛ nɛɛ ahe.
-
Ani le ni obale mɔdɛŋ ni mɛi bɔ koni akakpãtã Biblia lɛ hiɛ lɛ ehã oonu he akɛ esa akɛ okase? Mɛni hewɔ?
Nyɛkanea Lala 119:97 lɛ, ni nyɛsusua sanebimɔ nɛɛ he:
-
Mɛni hã mɛi pii kɛ amɛwala wo oshãra mli ni amɛtsɔɔ Biblia lɛ shishi, ni amɛhã mɛi anine shɛ nɔ lɛ?
6. Wolo kɛhã gbɔmɛi fɛɛ
Atsɔɔ Biblia lɛ shishi kɛtee wiemɔi pii amli, ni aprinti pii fe woji krokomɛi fɛɛ. Nyɛkanea Bɔfoi 10:34, 35 lɛ, ni nyɛsusua sanebimɔi nɛɛ ahe:
-
Mɛni hewɔ Nyɔŋmɔ ehã atsɔɔ e-Wiemɔ lɛ shishi kɛtee wiemɔi pii amli, ni aprinti pii hu lɛ?
-
Mɛni osumɔɔ waa yɛ Biblia lɛ he?
Kɛ́ abua
mɛi 100
naa lɛ, amɛteŋ mɛi 99
nine baanyɛ ashɛ Biblia lɛ eko nɔ yɛ wiemɔ ni amɛnuɔ shishi mli
Atsɔɔ emuu lɛ fɛɛ loo efã ko
shishi kɛtee
wiemɔi ni fa fe
3,000 mli
5,000,000,000
Enɛ ji Bibliai abɔ ni aprinti,
ni wolo ko bɛ ni aprinti nakai
MƐI KOMƐI KƐƆ AKƐ: “Biblia lɛ ji blema wolo ko kɛkɛ ni adesai ŋma.”
-
Te bo hu osusuɔ tɛŋŋ?
-
Mɛni tsɔɔ akɛ Biblia lɛ ji Nyɔŋmɔ Wiemɔ?
EMLI OTI
Biblia lɛ ji Nyɔŋmɔ Wiemɔ, ni ekwɛ koni adesai fɛɛ anine anyɛ ashɛ nɔ.
Mɛni Okase?
-
Kɛ́ akɛɛ Nyɔŋmɔ kɛ emumɔ krɔŋkrɔŋ lɛ tsirɛ gbɔmɛi ni amɛŋma Biblia lɛ, te atsɔɔ tɛŋŋ?
-
Anyɛɛɛ akpãtã Biblia lɛ hiɛ, atsɔɔ shishi, ni aprinti fe woji krokomɛi fɛɛ. Mɛni onyaa he yɛ saji nɛɛ ahe?
-
Akɛni Nyɔŋmɔ ekwɛ koni akakpãtã Biblia lɛ hiɛ koni onine ashɛ nɔ hewɔ lɛ, te onaa Nyɔŋmɔ ohãa tɛŋŋ?
EHE SAJI KROKOMƐI
Obaana Biblia lɛ he saji—kɛjɛ blema kɛbashi ŋmɛnɛ.
“Bɔ Ni Fee Ni Wɔnine Shɛ Biblia Lɛ Nɔ” (Awake!, November 2007)
Obaana nibii etɛ ni kulɛ ebaahã Biblia lɛ hiɛ akpãtã, shi eyabaaa lɛ nakai.
“Biblia Lɛ—Enyɛ Ehi Shi Kɛbashi Ŋmɛnɛ” (Buu-Mɔɔ No. 4 2016)
Obaana bɔ ni mɛi kɛ amɛwala wo oshãra mli koni amɛtsɔɔ Biblia lɛ shishi.
Akwɛ Biblia lɛ nɔ aŋmala ekomɛi ashwie shi, ni atsɔɔ shishi shii abɔ. Mɛni tsɔɔ akɛ atsakeko wiemɔi ni yɔɔ mli lɛ?
a Taakɛ abaatsɔɔ mli yɛ Nikasemɔ 07 lɛ mli lɛ, mumɔ krɔŋkrɔŋ lɛ ji Nyɔŋmɔ hewalɛ ni miitsu nii.
Ekolɛ Obaasumɔ Enɛ Hu
SAJI NI MƐI FƆƆ BIMƆ
Mɛni Ji Biblia Mli Nikasemɔ Ni Yehowa Odasefoi Kɛ Mɛi Feɔ Lɛ?
Yehowa Odasefoi kɛ mɛi kaseɔ Biblia lɛ tamɔ aagba sane, ni amɛheee nɔ ko; obaanyɛ okɛ Biblia shishitsɔɔmɔi lɛ ateŋ eko fɛɛ eko akase nii lɛ. Obaanyɛ ofɔ̃ oweku muu lɛ fɛɛ loo onanemɛi nine koni amɛfata ohe kɛkase nii lɛ.
