Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

NIKASEMƆ 57

Ni Kɛ́ Ofee Esha Ko Ni Yɔɔ Hiɛdɔɔ Hu?

Ni Kɛ́ Ofee Esha Ko Ni Yɔɔ Hiɛdɔɔ Hu?

Eyɛ mli akɛ osumɔɔ Yehowa waa ni okwɛɔ jogbaŋŋ ni okafee nibii ni baahã ewerɛ aho ehe moŋ, shi bei komɛi lɛ obaatɔ̃. Shi tɔmɔi komɛi yɛ hiɛdɔɔ fe ekrokomɛi. (1 Korintobii 6:​9, 10) Hã ehi ojwɛŋmɔŋ akɛ, kɛ́ ofee esha ko ni yɔɔ hiɛdɔɔ lɛ, no etsɔɔɔ akɛ Yehowa sumɔɔɔ bo dɔŋŋ; eesumɔ ni ekɛke bo ni ewa bo.

1. Mɛni esa akɛ wɔfee koni Yehowa kɛ wɔhe ake wɔ?

Kɛ́ mɛi ni sumɔɔ Yehowa lɛ fee esha ko ni yɔɔ hiɛdɔɔ lɛ, amɛwerɛ hoɔ amɛhe waa. Shi ni Yehowa wo ewebii lɛ shɛjeɔ amɛmii. Ekɛɛ akɛ: “Kɛ́ nyɛhe eshai lɛ tsuɔ tamɔ lá po, amɛbaayɛ tamɔ snoo.” (Yesaia 1:​18) Kɛ́ wɔtsake wɔtsui lɛɛlɛŋ lɛ, Yehowa kɛbaake wɔ kwraa. Mɛni tsɔɔ akɛ mɔ ko etsake etsui? Mɔ lɛ shwaa ehe waa yɛ efɔŋ ni efee lɛ hewɔ, ekpaa efɔŋ lɛ feemɔ, ni ekpaa Yehowa fai koni ekɛke lɛ. No sɛɛ lɛ, ebɔɔ mɔdɛŋ waa koni ekpa nifeemɔi ni esaaa loo etsake susumɔi ni esaaa ni hã efee esha lɛ, ni ehiɔ shi yɛ Yehowa mlai ni he tse lɛ anaa.​—Kanemɔ Yesaia 55:​6, 7.

2. Kɛ́ wɔfee esha lɛ, mɛɛ gbɛ nɔ Yehowa tsɔɔ asafoŋ onukpai lɛ anɔ ewaa wɔ?

Yehowa kɛɔ wɔ akɛ, kɛ́ wɔfee esha ko ni yɔɔ hiɛdɔɔ lɛ, ‘wɔtsɛ asafoŋ onukpai lɛ.’ (Kanemɔ Yakobo 5:​14, 15.) Hii ni Yehowa ehala nɛɛ sumɔɔ lɛ kɛ ewebii lɛ. Atsɔɔ amɛ bɔ ni amɛbaafee amɛwa wɔ koni wɔsaa wɔ kɛ Yehowa teŋ.​—Galatiabii 6:1.

Kɛ́ wɔfee esha ko ni yɔɔ hiɛdɔɔ lɛ, mɛɛ gbɛ nɔ asafoŋ onukpai lɛ waa wɔ? Asafoŋ onukpai enyɔ loo etɛ baajɛ Ŋmalɛ lɛ mli amɛjaje wɔ. Amɛbaawo wɔ ŋai kpakpai komɛi ni baawa wɔ koni wɔkafee esha lɛ ekoŋŋ. Shi kɛ́ mɔ ko fee esha ko ni yɔɔ hiɛdɔɔ ni etsakeee etsui lɛ, asafoŋ onukpai lɛ baajie lɛ kɛje asafo lɛ mli koni ekafite mɛi yɛ asafo lɛ mli.

KASEMƆ PII OFATA HE

Obaana bɔ ni obaafee ni ohiɛ asɔ Yehowa waa yɛ wamɔ ni ewaa wɔ kɛ́ wɔfee esha ko ni yɔɔ hiɛdɔɔ lɛ hewɔ.

3. Kɛ́ wɔjaje esha ni wɔfee lɛ, wɔ kɛ Yehowa teŋ baahi ekoŋŋ

Kɛ́ wɔfee esha lɛ, edɔɔ Yehowa, no hewɔ lɛ, esa akɛ wɔjaje wɔtsɔɔ lɛ. Nyɛkanea Lala 32:​1-5 lɛ, ni nyɛsusua sanebimɔ nɛɛ he:

  • Kɛ́ wɔfee esha lɛ, mɛni hewɔ ehi waa akɛ wɔbaajaje wɔtsɔɔ Yehowa, moŋ fe ni wɔbaatsimɔ nɔ lɛ?

Kɛ́ wɔjaje wɔhe eshai lɛ wɔtsɔɔ Yehowa, ni wɔhã asafoŋ onukpai lɛ hu wa wɔ lɛ, wɔhe jɔɔ wɔ waa. Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.

  • Mɛɛ gbɛ nɔ asafoŋ onukpai lɛ wa Canon ni eku esɛɛ eba Yehowa ŋɔɔ ekoŋŋ?

Esaaa akɛ wɔkɛ nɔ ko teɔ asafoŋ onukpai lɛ; amɛmiisumɔ ni amɛwa wɔ. Nyɛkanea Yakobo 5:​16 lɛ, ni nyɛsusua sanebimɔ nɛɛ he:

  • Kɛ́ wɔkɛ nɔ ko eteee asafoŋ onukpai lɛ, mɛɛ gbɛ nɔ ebaahã amɛwa wɔ jogbaŋŋ?

Jajemɔ ohe eshai lɛ, okɛ nɔ ko akatee asafoŋ onukpai lɛ, ni okpɛlɛ wamɔ ni tsɔɔ suɔmɔ ni Yehowa kɛhãa bo lɛ nɔ

4. Yehowa naa efɔŋfeelɔi mɔbɔ

Kɛ́ mɔ ko fee esha ni yɔɔ hiɛdɔɔ, ni esumɔɔɔ ni ehiɔ shi yɛ Yehowa mlai lɛ anaa dɔŋŋ lɛ, ajieɔ lɛ kɛjeɔ asafo lɛ mli ni wɔkɛ lɛ ebɔɔɔ. Nyɛkanea 1 Korintobii 5:​6, 11 lɛ, ni nyɛsusua sanebimɔ nɛɛ he:

  • Tamɔ bɔ ni ashikishaŋ-sha shaa ashikishaŋ muu fɛɛ lɛ, kɛ́ asafo lɛ mli bii lɛ kɛ eshafeelɔ ni tsakeee etsui bɔ lɛ, mɛni baajɛ mli kɛba?

Asafoŋ onukpai lɛ kaseɔ bɔ ni Yehowa naa efɔŋfeelɔi mɔbɔ lɛ, ni amɛtaoɔ mɛi ni ajie amɛ kɛje asafo lɛ mli lɛ koni amɛye amɛbua amɛ. Mɛi babaoo eku amɛsɛɛ kɛba asafo lɛ mli ekoŋŋ. Mɛni hewɔ? Eyɛ mli akɛ edɔ amɛ akɛ ajie amɛ kɛje asafo lɛ mli moŋ, shi no hã amɛna akɛ gbɛ ni amɛkɔ lɛ ejaaa.—Lala 141:5.

Mɛɛ gbɛ nɔ bɔ ni Yehowa kɛ efɔŋfeelɔi yeɔ ehãa lɛ tsɔɔ akɛ enuɔ nii ashishi, enaa mɔbɔ, ni eyɛ suɔmɔ?

5. Kɛ́ wɔtsake wɔtsui lɛ Yehowa kɛkeɔ wɔ

Yesu gba abɛbua ko ni hãa wɔnaa bɔ ni Yehowa nuɔ he ehãa kɛ́ mɔ ko tsake etsui. Nyɛkanea Luka 15:1-7 lɛ, ni nyɛsusua sanebimɔ nɛɛ he:

  • Mɛni enɛ tsɔɔ bo yɛ Yehowa he?

Nyɛkanea Ezekiel 33:11 lɛ, ni nyɛsusua sanebimɔ nɛɛ he:

  • Mɛni ehe hiaa ni wɔfee kɛtsɔɔ akɛ wɔtsake wɔtsui lɛɛlɛŋ?

Tamɔ bɔ ni tookwɛlɔ jwɛŋɔ etoi ahe waa lɛ, nakai nɔŋŋ Yehowa jwɛŋɔ ewebii lɛ ahe waa

MƐI KOMƐI KƐƆ AKƐ: “Miishe gbeyei akɛ kɛ́ mikɛɛ asafoŋ onukpai lɛ efɔŋ ni mifee lɛ abaajie mi kɛje asafo lɛ mli.”

  • Kɛ́ mɔ ko kɛɛ nakai lɛ, mɛni obaakɛɛ lɛ?

EMLI OTI

Kɛ́ wɔfee esha ko ni yɔɔ hiɛdɔɔ ni wɔtsake wɔtsui lɛɛlɛŋ, ni wɔtswa wɔfai shi akɛ wɔfeŋ efɔŋ lɛ dɔŋŋ lɛ, Yehowa kɛbaake wɔ.

Mɛni Okase?

  • Mɛni hewɔ ehi akɛ wɔbaajaje wɔtɔmɔi lɛ wɔtsɔɔ Yehowa lɛ?

  • Mɛni esa akɛ wɔfee koni akɛ wɔhe eshai lɛ ake wɔ?

  • Kɛ́ wɔfee esha ko ni yɔɔ hiɛdɔɔ lɛ, mɛni hewɔ esa akɛ wɔhã asafoŋ onukpai lɛ awa wɔ?

Nɔ Ni Obaanyɛ Ofee

EHE SAJI KROKOMƐI

Obaana bɔ ni Yehowa na nuu ko mɔbɔ tamɔ awie yɛ Yesaia 1:​18 lɛ.

Yehowa Naa Mɔ Mɔbɔ Lɛɛlɛŋ (5:02)

Kɛ́ mɔ ko fee esha ni yɔɔ hiɛdɔɔ lɛ, mɛɛ gbɛ nɔ asafoŋ onukpai lɛ bɔɔ mɔdɛŋ ni amɛwa lɛ?

“Bɔ Ni Asafoŋ Onukpai Lɛ Hãa Mɛi Ni Efee Esha Lɛ Naa Akɛ Amɛsumɔɔ Amɛ Ni Amɛnaa Mɔbɔ” (Buu-Mɔɔ, August 2024)

Obaana bɔ ni asafoŋ onukpai lɛ jieɔ suɔmɔ kɛ mɔbɔnalɛ kpo amɛtsɔɔ efɔŋfeelɔi ni tsakeko amɛtsui lɛ.

“ɔ Ni Asafoŋ Onukpai Lɛ Yeɔ Amɛbuaa Mɛi Ni Ajie Amɛ Kɛje Asafo Lɛ Mli Lɛ” (Buu-Mɔɔ, August 2024)

Kɛ́ okane sane ni ji, “Esa Akɛ Maku Sɛɛ Kɛba Yehowa Ŋɔɔ” lɛ, obaana nɔ hewɔ ni nuu ko ni shi anɔkwale lɛ nu he akɛ Yehowa egbala lɛ kɛba ekoŋŋ lɛ.

“Biblia Lɛ Tsakeɔ Mɛi” (Buu-Mɔɔ, April 1, 2012)