Nyɛmimɛi Ni Wɔsumɔɔ:

Wɔsumɔɔ Nyɔŋmɔ, ni wɔsumɔɔ mɛi, ni no ji nɔ ni tsirɛɔ wɔ ni ‘wɔya ni wɔyafee mɛi ni jɛ jeŋmaji lɛ fɛɛ amli lɛ kaselɔi, ni wɔbaptisi amɛ.’ (Mat. 28:​19, 20; Mar. 12:​28-31) Suɔmɔ krɔŋŋ nyɛɔ nibii pii efeɔ. Kɛ́ wɔyɛ suɔmɔ ni tamɔ nɛkɛ lɛ, wɔbaanyɛ wɔye wɔbua “mɛi fɛɛ ni yɔɔ anɔkwale lɛ ni baanyɛ ahã amɛná naanɔ wala lɛ he tsui kpakpa lɛ.”—Bɔf. 13:48.

Be ko ni eho lɛ, wɔkpeɔ shiɛmɔ wiemɔi wɔwoɔ wɔyitsoŋ, ni nɔ titri ni ma wɔhiɛ ji ni wɔhã mɛi woji. Shi amrɔ nɛɛ, nɔ ni esa akɛ wɔfee ji, ni wɔkase bɔ ni akɛ mɛi gbaa sane jogbaŋŋ. Kɛ́ wɔkɛ mɛi gba nibii ni amɛ amɛnyaa he lɛ ahe sane lɛ, no hãa amɛnaa akɛ wɔsumɔɔ amɛ. Nɔ ni baaye abua wɔ ni wɔnyɛ wɔfee enɛ ji, ni wɔkɛ wɔhe baawo mɛi lɛ ashihilɛ mli, ni wɔsusu nibii ni gbaa amɛnaa kɛ nibii ni amɛnyaa he lɛ ahe. Mɛɛ gbɛ nɔ wolo nɛɛ baaye abua wɔ ni wɔnyɛ wɔfee nakai?

Nikasemɔi 12 yɔɔ wolo nɛɛ mli, ni eko fɛɛ eko wieɔ su ko ni baaye abua wɔ ni wɔsumɔ mɛi, ni wɔnyɛ wɔfee amɛ kaselɔi lɛ he. Yɛ nikasemɔi lɛ eko fɛɛ eko mli lɛ, wɔbaana Biblia mli sane ko ni tsɔɔ bɔ ni Yesu loo blema Kristofoi lɛ ateŋ mɔ ko jie su pɔtɛɛ ko kpo yɛ shiɛmɔ nitsumɔ lɛ mli. Oti lɛ ji, ni wɔna nibii ni wɔbaanyɛ wɔfee kɛtsɔɔ akɛ wɔsumɔɔ mɛi, shi jeee ni wɔkpe shiɛmɔ wiemɔi wɔwo wɔyitsoŋ. Eyɛ mli akɛ sui ni awie he yɛ wolo nɛɛ mli lɛ fɛɛ ahe miihia yɛ shiɛmɔ nitsumɔ lɛ mli moŋ, shi wɔbaana amɛteŋ nɔ ni baaye abua wɔ waa kɛ́ wɔmiije sanegbaa shishi, wɔmiifee sɛɛkuukɛsaramɔ, loo wɔkɛ mɛi miikase Biblia lɛ.

Kɛ́ ookase nikasemɔi lɛ eko fɛɛ eko lɛ, susumɔ bɔ ni obaafee ojie su ni awie he yɛ mli lɛ kpo be ni okɛ mɛi gbaa sane yɛ okutso lɛ mli lɛ he. Okɛma ohiɛ akɛ, obaahã suɔmɔ ni oyɔɔ kɛhã Yehowa kɛ mɛi lɛ mli awa, ejaakɛ kɛ́ wɔyɛ sui nɛɛ kɛ hesai krokomɛi fɛɛ, shi wɔbɛ nakai suɔmɔ lɛ, wɔnyɛŋ wɔshɛ oti ni ma wɔhiɛ akɛ wɔfee mɛi kaselɔi lɛ he.

Eŋɔɔ wɔnaa waa akɛ, wɔkɛ nyɛ efee ekome kɛmiitsu nii. (Zef. 3:9) Enɛ ji hegbɛ kpele diɛŋtsɛ kɛhã wɔ! Nyɛyaa nɔ nyɛsumɔa mɛi ni nyɛfea amɛ kaselɔi, ni Yehowa baajɔɔ nyɛ waa!