1, 2. Mɛɛ be mli Yesu mli fu lɛ, ni mɛni hewɔ?

 YESU mli efu waa—yɛ yiŋtoo kpakpa ko hewɔ. Ekolɛ ebaawa kɛha bo akɛ ooosusu ehe yɛ nakai gbɛ nɔ, ejaakɛ eji nuu ní mli jɔ waa diɛŋtsɛ. (Mateo 21:5) Shi kɛlɛ, enyɛ eye ehe nɔ jogbaŋŋ diɛŋtsɛ, ejaakɛ emlifu lɛ ji jalɛ mlifu. a Shi mɛni ha nuu ní sumɔɔ toiŋjɔlɛ nɛɛ mli fu waa nakai lɛ? Eji sane ko ní kɔɔ jalɛ sane ní ayeee lɛ he.

² Yesu sumɔɔ sɔlemɔtsu ní yɔɔ Yerusalem lɛ waa. Yɛ je lɛŋ fɛɛ lɛ, jɛmɛ pɛ ji hé krɔŋkrɔŋ ní ajɔɔ nɔ kɛha eŋwɛi Tsɛ lɛ jamɔ. Yudafoi fãa gbɛ kakadaŋŋ kɛjɛɔ shikpɔji babaoo anɔ ni amɛbajáa Nyɔŋmɔ yɛ jɛmɛ. Jeŋmajiaŋbii ní sheɔ Nyɔŋmɔ gbeyei lɛ po baa jɛmɛ, ni amɛboteɔ sɔlemɔwe lɛ kpo lɛ nɔ he ní ato aha amɛ lɛ. Shi yɛ Yesu sɔɔmɔ nitsumɔ lɛ shishijee gbɛ lɛ, etee sɔlemɔtsu lɛ niiaŋ ni ekɛ nifeemɔ ko ní yɔɔ nyaŋemɔ diɛŋtsɛ kpe. Hɛɛ, no mli lɛ jɛmɛ tamɔ jara nɔ kwraa fe bɔ ni etamɔ he ko ní ajáa Nyɔŋmɔ yɛ! No mli lɛ jɛmɛ etsĩ kɛ jarayelɔi kɛ shika tsakelɔi. Shi kɛlɛ, nɛgbɛ jalɛ sane ní ayeee lɛ yɔɔ? Yɛ gbɔmɛi nɛɛ agbɛfaŋ lɛ, Nyɔŋmɔ sɔlemɔwe lɛ etsɔ he ko ní amɛyeɔ mɛi ahe nii yɛ—ní amɛtswaa amɛ ojo po. Yɛ mɛɛ gbɛ nɔ?—Yohane 2:14.

3, 4. Mɛɛ hiɛjoomɔ ní akɛyeɔ mɛi ahe nii tee nɔ yɛ Yehowa we lɛ, ni mɛni Yesu fee yɛ he ni ekɛjaje nibii?

³ Jamɔ mli hiɛnyiɛlɔi lɛ ewo mla akɛ shika ní ashwie pɔtɛɛ ko pɛ ji nɔ ni abaanyɛ akɛwo sɔlemɔwe too lɛ. Esa akɛ gbɔi ní baa jɛmɛ lɛ atsake amɛshika lɛ koni amɛná nakai shika pɔtɛɛ ní ashwie lɛ. No hewɔ lɛ shika tsakelɔi lɛ eto amɛ okpɔlɔi lɛ yɛ sɔlemɔtsu lɛ mli tuuntu, ni amɛheɔ eko fɛɛ eko ní amɛtsakeɔ  lɛ he nyɔmɔwoo. Amɛnáa sɛɛ waa kɛjɛɔ kooloi ahɔɔmɔ nitsumɔ lɛ hu mli. Gbɔi ní miitao ní amɛbashã afɔlei lɛ baanyɛ ahe kooloi lɛ kɛjɛ jarayelɔ fɛɛ jarayelɔ dɛŋ yɛ maŋtiase lɛ mli, shi sɔlemɔwe onukpai lɛ baanyɛ akpoo amɛ kooloi ní amɛkɛbaashã afɔle lɛ akɛ amɛsaaa. Shi kɛlɛ, amɛkpɛlɛɔ kooloi ní akɛbaashã afɔle, ní aheɔ yɛ sɔlemɔwe lɛ niiaŋ lɛ anɔ akɛ amɛhi. Akɛni gbɔmɛi lɛ anine yɛ jarayelɔi lɛ adaaŋ nɛkɛ hewɔ lɛ, bei komɛi lɛ jarayelɔi lɛ hɔ̃ɔ kooloi lɛ kɛ jara ní wa fe nine. b Enɛ ji jarayeli fɔŋ diɛŋtsɛ. Etamɔ ojotswaa pɛpɛɛpɛ!

⁴ Yesu nyɛɛɛ aŋmɛ nɛkɛ jalɛ sane ní ayeee nɛɛ gbɛ. Lɛ diɛŋtsɛ e-Tsɛ shia nɛ! Ekɛ taŋkpeei fee kplebii, ni ekɛshwie tsinai kɛ tooi lɛ fɛɛ kɛjɛ sɔlemɔtsu lɛ mli. Kɛkɛ ni ekpã enine mli kɛtee shika tsakelɔi lɛ anɔ ni etsirɛ amɛ okpɔlɔi lɛ etswia shi. Feemɔ bɔ ni nakai kapɛji lɛ baagbɛ ashwã shikpɔŋ ní akɛ marmara tɛ eká jɛmɛ fɛfɛo lɛ fɛɛ lɛ he mfoniri okwɛ! Ekɛ mlifu fãmɔ mɛi ní hɔ̃ɔ okpoi lɛ ayi akɛ: “Nyɛjiea nii nɛɛ kɛjea biɛ!” (Yohane 2:15, 16) Etamɔ nɔ ni mɔ ko kwraa ekaaa akɛ ebaate shi ewo nuu ekãalɔ nɛɛ.

5-7. (a) Yesu shihilɛ dani ebatsɔ adesa lɛ ná ejalɛsaneyeli henumɔ nɔ hewalɛ yɛ mɛɛ gbɛ nɔ, ni mɛni wɔbaanyɛ wɔkase kɛtsɔ enɔkwɛmɔnɔ lɛ kasemɔ nɔ? (b) Kristo ewuu eshi jalɛ sane ní ayeee ní kɔɔ Yehowa maŋtsɛyeli kɛ egbɛi lɛ he lɛ yɛ mɛɛ gbɛ nɔ?

⁵ Shi kɛlɛ, jarayelɔi lɛ ku amɛsɛɛ. Aaafee afii etɛ sɛɛ lɛ, Yesu tsu nakai jalɛ sane ní ayeee lɛ nɔŋŋ he nii, shi yɛ nɛkɛ be nɛɛ mli lɛ, etsɛ́ Yehowa diɛŋtsɛ wiemɔi ní ekɛbu mɛi ni kɛ E-we lɛ etsɔ “ojotswalɔi abu” lɛ fɔ́ lɛ sɛɛ. (Mateo 21:13; Yeremia 7:11) Hɛɛ, beni Yesu na bɔ ni akɛ hiɛjoomɔ yeɔ gbɔmɛi lɛ ahe nii ní abuleɔ Nyɔŋmɔ sɔlemɔwe lɛ, enu he tamɔ bɔ ni e-Tsɛ nu he lɛ pɛpɛɛpɛ. Ni enɛ bɛ naakpɛɛ! Ejaakɛ Yesu ŋwɛi Tsɛ lɛ kɛ afii  akpekpei abɔ ní aleee etsɔɔ lɛ nii aahu. Enɛ hewɔ lɛ, Yehowa jalɛsaneyeli henumɔ lɛ ehomɔ lɛ waa diɛŋtsɛ. Ebatsɔ wiemɔ ní awieɔ akɛ, “Bɔ ni tsɛ lɛ ji lɛ, nakai bi lɛ hu ji” lɛ he nɔkwɛmɔnɔ ní yɔɔ wala mli. No hewɔ lɛ, kɛ́ wɔmiitao ni wɔná Yehowa su ni ji jalɛsaneyeli lɛ he shishinumɔ ní mli kã shi faŋŋ lɛ, no lɛ gbɛ ní hi fe fɛɛ ji ní wɔsusu Yesu Kristo nɔkwɛmɔnɔ lɛ he.—Yohane 14:9, 10.

⁶ Beni Satan tsɛ́ Yehowa Nyɔŋmɔ akɛ amalelɔ yɛ gbɛ ní ejaaa nɔ, ní ete shi ewo bɔ ni E-nɔyeli lɛ ji jalɛ nɔyeli lɛ, no mli lɛ Yehowa bi koome lɛ yɛ jɛmɛ. Mɛɛ heguɔgbee nɛ! Bi lɛ nu mpoa ní Satan tswa yɛ sɛɛ mli akɛ mɔ ko mɔ ko sɔmɔŋ Yehowa yɛ gbɛ ní pɛsɛmkunya bɛ mli nɔ, yɛ suɔmɔ mli lɛ hu. Eka shi faŋŋ akɛ nɛkɛ apasa naafolɔmɔi nɛɛ dɔ Bi lɛ ni hiɛ jalɛ tsui lɛ waa. Kwɛ bɔ ni ebaaná miishɛɛ waa akɛ eeele akɛ ebaaná gbɛfaŋnɔ krɛdɛɛ yɛ nakai amale wiemɔi lɛ ajajemɔ mli! (2 Korintobii 1:20) Mɛɛ gbɛ nɔ eeetsɔ efee enɛ?

⁷ Taakɛ wɔkase yɛ Yitso 14 lɛ mli lɛ, Yesu Kristo kɛ naagbee hetoo ní yɔɔ faŋŋ ha kɛha Satan naafolɔmɔ wiemɔ ní ekɛte shi ewo Yehowa bɔɔ nii a-emuuyeli mlihiɛmɔ lɛ. Yesu kɛ nakai feemɔ to nɔdaamɔ nɔ ema shi kɛha Yehowa maŋtsɛyeli lɛ bembuu kɛ E-gbɛi lɛ hetsemɔ nɔ ni ji naagbee nɔ̃ kwraa. Ákɛ Yehowa Najiaŋdamɔlɔ Nukpa lɛ, Yesu baato ŋwɛi jalɛsaneyeli shishi ema shi yɛ jeŋ muu lɛ fɛɛ mli. (Bɔfoi lɛ Asaji 5:31) Eshihilɛ gbɛ yɛ shikpɔŋ nɔ lɛ hu jie ŋwɛi jalɛsaneyeli kpo. Yehowa wie yɛ ehe akɛ: “Mikɛ mimumɔ lɛ aaato enɔ, ni eeejaje kojomɔ etsɔɔ jeŋmaji lɛ.” (Mateo 12:18) Mɛɛ gbɛ nɔ Yesu ha nakai wiemɔi lɛ ba mli yɛ?

8-10. (a) Yudafoi ajamɔ mli hiɛnyiɛlɔi lɛ ablema saji ní akɛ naabu jaje lɛ wo bulɛ ní abɛ kɛha mɛi ní amɛjeee Yudafoi kɛ yei lɛ he hewalɛ yɛ mɛɛ gbɛ nɔ? (b) Mlai ní akɛ naabu jaje lɛ ha Yehowa Hejɔɔmɔ Gbi mla lɛ batsɔ jatsu yɛ mɛɛ gbɛ nɔ?

⁸ Yesu sumɔ Yehowa Mla lɛ ni ehi shi yɛ naa. Shi jamɔ mli  hiɛnyiɛlɔi ní hi shi yɛ egbii lɛ amli lɛ tsɔmɔ nakai Mla lɛ ni amɛkɛtsu nii yɛ gbɛ ní ejaaa nɔ. Yesu kɛɛ amɛ akɛ: “Kpoo hã nyɛ, woloŋmalɔi kɛ Farisifoi osatofoi! . . . Mla lɛ mli nii ni he jaraa ni ji kojomɔ kɛ mɔbɔnalɛ kɛ hemɔkɛyeli lɛ moŋ lɛ nyɛshiɔ.” (Mateo 23:23) Ŋwanejee ko bɛ he akɛ, nakai Nyɔŋmɔ Mla lɛ tsɔɔlɔi lɛ haaa ‘nɔ ni jalɛ kojomɔ ji’ lɛ afee faŋŋ. Shi moŋ, amɛmiitsimɔ ŋwɛi jalɛsaneyeli nɔ. Yɛ mɛɛ gbɛ nɔ? Susumɔ nɔkwɛmɔnii fioo komɛi ahe okwɛ.

⁹ Yehowa kɛ famɔ ha emaŋ lɛ akɛ amɛtsi amɛhe kɛjɛ jeŋmaji wɔŋjalɔi ní ebɔle amɛ lɛ ahe. (1 Maŋtsɛmɛi 11:1, 2) Shi kɛlɛ, jamɔ mli hiɛnyiɛlɔi komɛi ní feɔ shɛii lɛ wo maŋbii lɛ hewalɛ ní amɛkɛ mɛi fɛɛ ní amɛjeee Yudafoi lɛ aye kɛ heguɔgbee. Mishnah lɛ po kɛ mla nɛɛ fata he akɛ: “Esaaa ní ashiɔ tsinai yɛ jeŋmajiaŋbii a-gbɔiatoohe akɛni asusuɔ akɛ amɛkɛ kooloi náa bɔlɛ lɛ hewɔ.” Nɛkɛ jwɛŋmɔ fɔŋ ní amɛná yɛ mɛi fɛɛ ní amɛjeee Yudafoi lɛ ahe nɛɛ ejaaa, ni eteɔ shi ewoɔ mumɔ ni yɔɔ Mose Mla lɛ sɛɛ lɛ kwraa. (3 Mose 19:34) Adesai amlai krokomɛi hu baa yei ashi kwraa. Mla ní akɛ naabu jaje lɛ wie akɛ esa akɛ ŋa lɛ anyiɛ ewu lɛ sɛɛ, shi jeee ekoŋ nɔ. Abɔɔ nuu kɔkɔ akɛ esaaa akɛ ekɛ yoo gbaa sane yɛ maŋ, kɛ́ eji lɛ diɛŋtsɛ eŋa po. Taakɛ nyɔji ji lɛ, aŋmɛɛɛ gbɛ ní yei aye sane ko he odase yɛ saneyelihe. Ayɛ sɔlemɔ po ní hii sɔleɔ ní amɛdaa Nyɔŋmɔ shi yɛ mli ákɛ amɛjeee yei.

¹⁰ Jamɔ mli hiɛnyiɛlɔi lɛ kɛ adesai amlai kɛ akpɔi babaoo tsimɔ Nyɔŋmɔ Mla lɛ nɔ. Ákɛ nɔkwɛmɔnɔ lɛ, Hejɔɔmɔ Gbi mla lɛ gu akɛ akatsu nii yɛ Hejɔɔmɔ Gbi lɛ nɔ kɛkɛ, ni eto nakai gbi lɛ ema afã kɛha jamɔ, mumɔŋ hewalɛwoo, kɛ hejɔɔmɔ. Shi Farisifoi lɛ ha nakai mla lɛ batsɔ jatsu. Amɛkɔ amɛfɔ̃ amɛnɔ akɛ amɛ amɛbaatsɔɔ nɔ tuuntu ni feɔ “nitsumɔ.” Amɛtsĩ nifeemɔi srɔtoi 39 komɛi atã akɛ nitsumɔ, tamɔ ŋmɔshi nii kpamɔ loo gbɔbimɔ nɛkɛ. Nɛkɛ kui nɛɛ tée sanebimɔi babaoo diɛŋtsɛ shi. Kɛ́ mɔ ko gbe malai yɛ Hejɔɔmɔ Gbi lɛ nɔ lɛ, ani eegbɔbi? Kɛji ekpala ŋmãa edɛ̃ kɔkɔ obɔ̃ ní eye beni enyiɛ gbɛ nɔ lɛ, ani eji ŋmɔshi nii kpamɔ? Kɛ́ etsá mɔ ko ní he miiye lɛ, ani etsɔɔ akɛ eetsu nii? Aha sanebimɔi nɛɛ ahetoo kɛ mlai ní yɔɔ kpɛŋŋ, ní atsɔɔ nɔ fɛɛ nɔ mli fitsofitso.

11, 12. Yesu tsɔɔ bɔ ni eteɔ shi ewoɔ Farisifoi lɛ ablema saji ní damɔɔɔ ŋmalɛ nɔ lɛ yɛ mɛɛ gbɛ nɔ?

 ¹¹ Yɛ shihilɛ ní tamɔ nakai mli lɛ, mɛɛ gbɛ nɔ Yesu baatsɔ aye abua gbɔmɛi ní amɛnu nɔ ni jalɛ kojomɔ ji lɛ shishi? Ekɔ shidaamɔ ní ekãa yɔɔ mli eshi nakai jamɔ mli hiɛnyiɛlɔi lɛ, yɛ enitsɔɔmɔi kɛ bɔ ni ehi shi eha lɛ mli. Klɛŋklɛŋ lɛ, susumɔ enitsɔɔmɔi lɛ ekomɛi ahe okwɛ. Eje gbɛ ebu amɛmlai babaoo ní adesai wo lɛ fɔ́ diɛŋtsɛ, ni ekɛɛ: “Nyɛgu Nyɔŋmɔ wiemɔ lɛ yɛ nyɛ blema sane ni nyɛkɛba jeŋ lɛ hewɔ.”—Marko 7:13.

¹² Yesu kɛ hewalɛ diɛŋtsɛ tsɔɔ akɛ Farisifoi lɛ etɔ̃ yɛ Hejɔɔmɔ Gbi mla lɛ gbɛfaŋ—ni ákɛ, yɛ anɔkwale mli lɛ, amɛnuuu yiŋtoo ní yɔɔ mla lɛ sɛɛ lɛ shishi. Etsɔɔ mli akɛ, Mesia lɛ ji “hejɔɔmɔ gbi lɛ nuntsɔ,” ni no hewɔ lɛ eyɛ hegbɛ akɛ etsáa gbɔmɛi yɛ Hejɔɔmɔ Gbi lɛ nɔ. (Mateo 12:8) Bɔni afee ní ekɛma nakai oti lɛ nɔ mi lɛ, etsá mɛi yɛ naakpɛɛ gbɛ nɔ yɛ Hejɔɔmɔ Gbi lɛ nɔ yɛ faŋŋ mli. (Luka 6:7-10) Nɛkɛ tsamɔi nɛɛ fee tsamɔi ní ebaatsá gbɔmɛi yɛ shikpɔŋ lɛ nɔ fɛɛ yɛ e-Afii Akpe Nɔyeli lɛ mli lɛ he okadi. Nakai Afii Akpe lɛ diɛŋtsɛ baafee Hejɔɔmɔ Gbi ní fe fɛɛ, beni adesai anɔkwafoi fɛɛ baajɔɔ amɛhe kɛjɛ afii ohai abɔ ní amɛkɛgbo deŋme yɛ jatsui ní ji esha kɛ gbele shishi lɛ mli lɛ.

13. Mɛɛ mla ko ba shihilɛ mli yɛ Kristo shikpɔŋ nɔ sɔɔmɔ nitsumɔ lɛ hewɔ, ni esoro no yɛ mla ní tsɔ hiɛ lɛ he yɛ mɛɛ gbɛ nɔ?

¹³ Yesu ha nɔ ni jalɛ kojomɔ ji lɛ hu fee faŋŋ kɛ shishinumɔ akɛ mla hee, ni ji “Kristo mla lɛ,” ba shihilɛ mli beni egbe eshikpɔŋ nɔ sɔɔmɔ lɛ naa lɛ sɛɛ. (Galatabii 6:2) Ákɛ nɔ ni tamɔɔɔ mla ni tsɔ hiɛ, ni ji Mose Mla lɛ, nɛkɛ mla hee nɛɛ damɔɔɔ kitai babaoo ní aŋmala ashwie shi nɔ, shi moŋ edamɔ shishitoo mla nɔ. Shi kɛlɛ, kitai komɛi ní yɔɔ tɛ̃ɛ fata he. Yesu tsɛ́ nɛkɛ kitai nɛɛ ateŋ ekome akɛ “kita hee.” Yesu tsɔɔ esɛɛnyiɛlɔi lɛ fɛɛ ní amɛsumɔ amɛhe tamɔ bɔ ni lɛ hu esumɔ amɛ lɛ. (Yohane 13:34, 35) Hɛɛ, esa akɛ he-kɛ-afɔleshaa suɔmɔ afee mɛi fɛɛ ní hiɔ shi yɛ “Kristo mla lɛ” naa lɛ akadimɔ nii.

14, 15. Yesu tsɔɔ akɛ eyɔseɔ he ni hegbɛ ní eyɔɔ lɛ husui yashɛɔ yɛ mɛɛ gbɛ nɔ, ni mɛni hewɔ enɛ woɔ mɔ hewalɛ waa lɛ?

¹⁴ Yesu fee babaoo fe suɔmɔ he nii ní etsɔɔ kɛkɛ. Ehi shi yɛ “Kristo mla lɛ” naa. Eje kpo faŋŋ yɛ eshihilɛ gbɛ fɛɛ mli. Susumɔ gbɛ̀i etɛ ní Yesu nɔkwɛmɔnɔ lɛ ha nɔ ni jalɛ kojomɔ ji lɛ fee faŋŋ lɛ ahe okwɛ.

¹⁵ Klɛŋklɛŋ lɛ, Yesu je gbɛ ekwɛ jogbaŋŋ ni etsi ehe kɛjɛ nifeemɔi ni tsɔɔ jalɛ sane ni ayeee lɛ ahe. Ekolɛ oyɔse akɛ jalɛ sane ní ayeee lɛ mli babaoo baa kɛji adesai ní yeee emuu lɛ baná henɔwomɔ su ní amɛteke amɛ nɔyeli hegbɛ lɛ mli husui ní sa amɛ lɛ. Yesu efeee nakai. Be ko lɛ, nuu ko banina Yesu ni ekɛɛ lɛ akɛ: “Tsɔɔlɔ, kɛɛmɔ minyɛmi lɛ ní ekɛ mi aja gboshinii lɛ amli.” Mɛɛ hetoo Yesu ha lɛ? “Nuu, namɔ wo mi kojolɔ loo nijalɔ yɛ nyɛnɔ?” (Luka 12:13, 14) Ani enɛ jeee nɔ ni sa kadimɔ waa? Yesu nilee, ekojomɔ, kɛ bɔ ni hegbɛ ní Nyɔŋmɔ kɛha lɛ lɛ po nɔ kwɔ ha lɛ tekeɔ mɔ fɛɛ mɔ hegbɛ yɛ shikpɔŋ lɛ nɔ; shi kɛlɛ, ekpoo akɛ ekɛ ehe aaawo sane nɛɛ mli, akɛni akɛ hegbɛ pɔtɛɛ ko hako lɛ akɛ efee nakai lɛ hewɔ. Yesu kɛ hiɛshikamɔ etsu nii yɛ nɛkɛ gbɛ nɔ be fɛɛ be, yɛ afii akpei abɔ ní ekɛhi shi dani ebatsɔ adesa lɛ po mli. (Yuda 9) Anɔkwale ní eji akɛ Yesu jɛɔ heshibaa mli ekɛ ehe fɔ̃ɔ Yehowa nɔ koni etsɔɔ nɔ ni ji jalɛ lɛ jieɔ su ko ní asumɔɔ waa kpo yɛ ehe.

16, 17. (a) Yesu jie jalɛsaneyeli kpo yɛ Nyɔŋmɔ Maŋtsɛyeli lɛ he sanekpakpa lɛ shiɛmɔ mli yɛ mɛɛ gbɛ nɔ? (b) Yesu tsɔɔ akɛ mɔbɔnalɛ yɛ ejalɛsaneyeli henumɔ lɛ mli yɛ mɛɛ gbɛ nɔ?

¹⁶ Nɔ ni ji enyɔ lɛ, Yesu jie jalɛsaneyeli kpo yɛ bɔ ni eshiɛ Nyɔŋmɔ Maŋtsɛyeli lɛ he sanekpakpa lɛ eha lɛ mli. Ekwɛɛɛ mɛi ahiɛaŋ. Shi moŋ, ekɛ ekãa bɔ mɔdɛŋ akɛ eeeshɛ gbɔmɛi srɔtoi fɛɛ aŋɔɔ, ekɔɔɔ he eko akɛ amɛji niiatsɛmɛi loo ohiafoi. Nɔ ni tamɔɔɔ nakai lɛ, Farisifoi lɛ shwieɔ ohiafoi, ni ji gbɔmɛi foji lɛ kɛ heguɔgbee wiemɔ ko ni ji ʽam-ha·ʼaʹrets, loo “shikpɔŋ lɛ nɔ bii.” Yesu kɛ ekãa te shi ewo nakai jalɛ sane ní ayeee lɛ. Beni etsɔɔ gbɔmɛi lɛ sanekpakpa lɛ—aloo, kɛ́ wɔɔkɛɛ lɛ, beni ekɛ gbɔmɛi lɛ ye nii, ní elɛ̀ amɛ, etsá amɛ, aloo etee amɛ shi  kɛjɛ gbele mli lɛ—efi Nyɔŋmɔ ní sumɔɔ ní enine ashɛ “gbɔmɛi fɛɛ” anɔ lɛ jalɛsaneyeli lɛ sɛɛ. c—1 Timoteo 2:4.

¹⁷ Nɔ ni ji etɛ lɛ, Yesu jalɛsaneyeli henumɔ lɛ jieɔ mɔbɔnalɛ kpele kpo. Ebɔ mɔdɛŋ waa akɛ eeeye ebua eshafeelɔi. (Mateo 9:11-13) Efee klalo akɛ ebaaye ebua gbɔmɛi ní bɛ hewalɛ ko ní amɛkɛaabu amɛhe lɛ. Ákɛ nɔkwɛmɔnɔ lɛ, Yesu eyafataaa jamɔ mli hiɛnyiɛlɔi lɛ ahe koni akɛwo Jeŋmajiaŋbii fɛɛ amli hekɛnɔfɔɔ ní amɛbɛ lɛ mli hewalɛ. Eyɛ mli akɛ Yudafoi lɛ ji mɛi ní atsu lɛ amɛŋɔɔ klɛŋklɛŋ moŋ, shi ekɛ mɔbɔnalɛ ye ebua mɛnɛɛmɛi ateŋ mɛi komɛi ni etsɔɔ amɛ nii. Ekpɛlɛ nɔ akɛ ebaatsu naakpɛɛ tsamɔ ko he nii eha Roma asraafonyo nukpa ko, ni ekɛɛ: “Israel mli tete minako hemɔkɛyeli ni da tamɔ enɛ dã!”—Mateo 8:5-13.

18, 19. (a) Yesu wo woo ní yei yɔɔ lɛ he hewalɛ yɛ mɛɛ gbɛ̀i anɔ? (b) Yesu nɔkwɛmɔnɔ lɛ yeɔ ebuaa wɔ ni wɔnaa tsakpaa ní yɔɔ ekãa kɛ jalɛsaneyeli teŋ lɛ yɛ mɛɛ gbɛ nɔ?

¹⁸ Nakai nɔŋŋ hu Yesu fiii susumɔi ní ahiɛ yɛ yei ahe yɛ nakai beaŋ lɛ sɛɛ. Shi moŋ, ekɛ ekãa fee nɔ ni ja. Abuɔ Samaria yei akɛ mɛi ní he tseee, tamɔ bɔ ni abuɔ Jeŋmajiaŋbii lɛ pɛpɛɛpɛ. Ni kɛlɛ, Yesu shashaooo shi akɛ eeeshiɛ etsɔɔ Samaria yoo lɛ yɛ Sikar nu bu lɛ he. Yɛ anɔkwale mli lɛ, yoo nɛɛ ji klɛŋklɛŋ mɔ ni Yesu jie ehe kpo etsɔɔ lɛ yɛ faŋŋ mli akɛ lɛ ji shiwoo Mesia lɛ. (Yohane 4:6, 25, 26) Farisifoi lɛ kɛɔ akɛ esaaa akɛ atsɔɔ yei Nyɔŋmɔ Mla lɛ, shi Yesu kɛ be kɛ hewalɛ babaoo tsu nii ni ekɛtsɔɔ yei anii. (Luka 10:38-42) Ni yɛ be mli ní blema saji kɛɔ akɛ anyɛŋ ahe yei aye akɛ amɛkɛ odaseyeli ní anyɛɔ akɛ he fɔ̃ɔ nɔ baaha lɛ, Yesu kɛ woo ha yei babaoo kɛtsɔ hegbɛ ní amɛná akɛ amɛji mɛi ní na lɛ klɛŋklɛŋ yɛ eshitee lɛ sɛɛ lɛ nɔ. Ekɛɛ amɛ po ní amɛya ní amɛyagba ekaselɔi ni ji hii lɛ nɛkɛ nifeemɔ ní he hiaa fe fɛɛ nɛɛ he sane!—Mateo 28:1-10.

 ¹⁹ Hɛɛ, Yesu ha nɔ ni jalɛ kojomɔ ji lɛ fee faŋŋ eha jeŋmaji lɛ. Yɛ shihilɛi babaoo mli lɛ, ekɛ ehe wo oshara kpele diɛŋtsɛ mli ni ekɛfee nakai. Yesu nɔkwɛmɔnɔ lɛ yeɔ ebuaa wɔ ni wɔnaa akɛ anɔkwa jalɛsaneyeli sɛɛfimɔ biɔ ekãa diɛŋtsɛ. Eja gbɛ jogbaŋŋ akɛ atsɛ́ lɛ akɛ “jata lɛ ni jɛ Yuda akutso lɛ mli lɛ.” (Kpojiemɔ 5:5) Kaimɔ akɛ jata feɔ jalɛsaneyeli ní yɔɔ ekãa he mfoniri. Shi, yɛ wɔsɛɛ be ní ebɛŋkɛ kpaakpa lɛ mli lɛ, Yesu baatsu jalɛsaneyeli ní da kwraa fe enɛ he nii. Ebaato ‘jalɛ kojomɔ ema shi yɛ shikpɔŋ lɛ nɔ,’ yɛ shishinumɔ ní eye emuu naa.—Yesaia 42:4.

20, 21. Mesia Maŋtsɛ lɛ eha jalɛsaneyeli etee hiɛ yɛ shikpɔŋ lɛ nɔ fɛɛ kɛ Kristofoi asafo lɛ mli, yɛ wɔgbii nɛɛ amli, yɛ mɛɛ gbɛ nɔ?

²⁰ Kɛjɛ be mli ní Yesu batsɔ Mesia Maŋtsɛ yɛ afi 1914 kɛbaa nɛɛ, ewo jalɛsaneyeli he hewalɛ yɛ shikpɔŋ lɛ nɔ. Yɛ mɛɛ gbɛ nɔ? Eetsu egbɛnaa nii ni ji egbalɛ ni anaa yɛ Mateo 24:14 lɛ mlibaa he nii. Yesu sɛɛnyiɛlɔi ní yɔɔ shikpɔŋ nɔ lɛ etsɔɔ gbɔmɛi ní yɔɔ shikpɔji fɛɛ nɔ lɛ Yehowa Maŋtsɛyeli lɛ he anɔkwale lɛ. Taakɛ Yesu fee lɛ, amɛmiishiɛ yɛ gbɛ ní ja ní hiɛaŋkwɛmɔ bɛ mli nɔ, ni amɛmiibɔ mɔdɛŋ ní amɛha mɔ fɛɛ mɔ—gbekɛbii loo onukpai, niiatsɛmɛi loo ohiafoi, hii loo yei—fɛɛ aná hegbɛ koni amɛbale Yehowa, jalɛsaneyeli Nyɔŋmɔ lɛ.

²¹ Yesu miiwo jalɛsaneyeli he hewalɛ yɛ Kristofoi asafo lɛ, ní lɛ ji Yitso lɛ hu mli. Taakɛ agba afɔ̃ shi lɛ, ekɛ ‘gbɔmɛi ateŋ nikeenii,’ ni ji Kristofoi onukpai anɔkwafoi haa ni amɛnyiɛɔ hiɛ yɛ asafo lɛ mli. (Efesobii 4:8-12) Nɛkɛ hii nɛɛ nyiɛɔ Yesu Kristo nɔkwɛmɔnɔ lɛ sɛɛ, yɛ Nyɔŋmɔ asafoku ní jara wa lɛ nɔkwɛmɔ mli, ni amɛwoɔ jalɛsaneyeli he hewalɛ. Amɛkaiɔ be fɛɛ be akɛ Yesu miisumɔ ní akɛ etooi lɛ aye yɛ jalɛ gbɛ nɔ—ní gbɛhe ní amɛyɔɔ, bɔ ni ale amɛ aha, loo amɛ heloonaa shihilɛi kɔɔɔ he eko.

22. Te Yehowa nuɔ jalɛ sane ní ayeee ní egbɛ eshwã je lɛŋ ŋmɛnɛ lɛ he ehaa tɛŋŋ, ni mɛni ehala e-Bi lɛ koni efee yɛ enɛ he?

²² Shi, Yesu baato jalɛ kojomɔ ema shi yɛ shikpɔŋ lɛ nɔ yɛ  gbɛ ní afeko nakai dã nɔ, yɛ wɔsɛɛ be ní ebɛŋkɛ kpaakpa nɛɛ mli. Jalɛ sane ní ayeee egbɛ eshwã waa yɛ jeŋ ní ekpɔtɔ nɛɛ mli. Gbekɛ fɛɛ gbekɛ ní gboɔ yɛ hɔmɔ hewɔ lɛ gbele lɛ jɛɔ jalɛ sane ní ayeee ní ejaaa gbɛ lɛ hewɔ, titri lɛ kɛji wɔsusu shika kɛ be ní afiteɔ ní akɛfeɔ tawuu nibii kɛ nɔ ni akɛtsuɔ mɛi ní taoɔ hiɛtserɛjiemɔ lɛ apɛsɛmkunya akɔnɔi ahe nii lɛ he lɛ. Gbɔmɛi akpekpei abɔ ní gboiɔ yakatswaa daa afi lɛ ji jalɛ sane ní ayeee yɛ gbɛ̀i srɔtoi anɔ, ní ji nibii ní teeɔ Yehowa jalɛ mlifu shi lɛ ateŋ ekome pɛ. Ehala e-Bi lɛ koni ewuu jalɛ ta eshi nɛkɛ nibii agbɛjianɔtoo fɔŋ nɛɛ fɛɛ, koni ekɛfo jalɛ sane ní ayeee lɛ fɛɛ sɛɛ kɛya naanɔ.—Kpojiemɔ 16:14, 16; 19:11-15.

23. Yɛ Harmagedon sɛɛ lɛ, Kristo baaha jalɛsaneyeli aya hiɛ kɛya naanɔi anaanɔ yɛ mɛɛ gbɛ nɔ?

²³ Shi kɛlɛ, Yehowa jalɛsaneyeli lɛ biɔ babaoo fe mɛi fɔji lɛ ahiɛ ní eeekpata kɛkɛ. Ehala e-Bi lɛ koni eye nɔ akɛ “Hejɔlɛ lumɔ.” Yɛ Harmagedon ta lɛ sɛɛ lɛ, Yesu nɔyeli lɛ baato toiŋjɔlɛ ema shi yɛ shikpɔŋ lɛ fɛɛ nɔ, ni ebaaye nɔ ‘kɛtsɔ jalɛ kojomɔ nɔ.’ (Yesaia 9:5, 6) Yesu baaná he miishɛɛ yɛ nakai beaŋ akɛ eeesaa jalɛ sane ní ayeee, ní kɛ haomɔ kɛ amanehulu babaoo eba je lɛŋ lɛ fɛɛ. Ekɛ anɔkwayeli baawó Yehowa jalɛsaneyeli ní eye emuu lɛ nɔ gojoo kɛya naanɔi anaanɔ. Belɛ, ehe miihia ní wɔtao akɛ wɔɔkase Yehowa jalɛsaneyeli lɛ bianɛ. Nyɛhaa wɔkwɛa gbɛ ní wɔɔtsɔ nɔ wɔfee nakai.