1. Mɛɛ tsɔne ko ní yeɔ awui yɛ teemɔŋ adesai ní yeee emuu lɛ gbeeɔ mli yɛ gbɛ ní waaa kwraa nɔ?

 “HEWALƐ ko kwraa bɛ ní akɛ tsɔne ni duɔ mɔ nigii woko mli.” Nakai wiemɔi ní afii ohai 19 lɛ mli lalafolɔ ko wie lɛ gbalaa jwɛŋmɔ kɛyaa oshara ko ní yeɔ awui yɛ teemɔŋ lɛ nɔ: no ji hewalɛ ní akɛtsuɔ nii yɛ gbɛ fɔŋ nɔ. Dɔlɛ sane ji akɛ, adesai ní yeee emuu lɛ gbeeɔ tsɔne nɛɛ mli yɛ gbɛ ní waaa kwraa nɔ. Lɛɛlɛŋ, ‘gbɔmɔ eye enaanyo gbɔmɔ nɔ ni ekɛye lɛ awui’ yɛ yinɔsane be fɛɛ mli. (Jajelɔ 8:9) Hewalɛ kɛ nitsumɔ ní suɔmɔ bɛ mli lɛ kɛ amanehulu babaoo diɛŋtsɛ eba adesai anɔ.

2, 3. (a) Mɛni sa kadimɔ waa yɛ bɔ ni Yehowa kɛ hewalɛ tsuɔ nii ehaa lɛ he? (b) Mɛni baanyɛ afata wɔ hewalɛ lɛ he, ni te esa akɛ wɔkɛ hewalɛ nɛɛ fɛɛ atsu nii aha tɛŋŋ?

² Shi, ani ejeee nɔ ni sa kadimɔ waa akɛ Yehowa Nyɔŋmɔ, mɔ ni yɔɔ hewalɛ ní husu bɛ he lɛ, kɛ nakai hewalɛ lɛ tsuuu nii yɛ gbɛ fɔŋ nɔ kɔkɔɔkɔ? Taakɛ wɔna yɛ yitsei ní tsɔ hiɛ lɛ amli lɛ, ekɛ ehewalɛ lɛ—ekɔɔɔ he eko akɛ eji adebɔɔ, nii ahiɛkpatamɔ, hebuu hewalɛ, loo hewalɛ ní ekɛsaa nibii ekoŋŋ lɛ—tsuɔ nii be fɛɛ be yɛ eyiŋtoi ní suɔmɔ yɔɔ mli lɛ kɛ gbeekpamɔ naa. Kɛ́ wɔsusu bɔ ni ekɛ ehewalɛ lɛ tsuɔ nii ehaa lɛ he lɛ, etsirɛɔ wɔ ni wɔtsiɔ wɔbɛŋkɛɔ lɛ. Ni no hu baanyɛ akanya wɔ ní ‘wɔtsɔmɔ Nyɔŋmɔ kaselɔi’ yɛ bɔ ni wɔ diɛŋtsɛ wɔkɛ hewalɛ tsuɔ nii wɔhaa lɛ gbɛfaŋ. (Efesobii 5:1) Shi mɛɛ hewalɛ wɔ, ákɛ adesai ní wɔhe waaa nɛɛ yɔɔ?

³ Kaimɔ akɛ abɔ gbɔmɔ yɛ “Nyɔŋmɔ subaŋ” kɛ ehenɔ. (1 Mose 1:26, 27) No hewɔ lɛ, wɔ hu wɔyɛ hewalɛ—kɛ́ hoo lɛ, nɔ ni fá bɔ ni sa. Ekolɛ nibii ní baanyɛ afata wɔ hewalɛ lɛ he lɛ ekomɛi ji nyɛmɔ ní wɔnyɛɔ wɔfeɔ nibii, wɔtsuɔ nii; mɛi krokomɛi akudɔmɔ loo hegbɛ ní wɔyɔɔ yɛ amɛnɔ; nyɛmɔ ní wɔnyɛɔ wɔkɛnáa mɛi krokomɛi, titri lɛ, mɛi ni sumɔɔ wɔsane lɛ anɔ hewalɛ; gbɔmɔtsoŋ hewalɛ (nyɛmɔ); loo heloonaa nibii ní  wɔyɔɔ. Lalatsɛ lɛ wie Yehowa he akɛ: “Bo oŋɔɔ wala nubu yɔɔ.” (Lala 36:10) No hewɔ lɛ, Nyɔŋmɔ ji hewalɛ fɛɛ hewalɛ ní wɔyɔɔ yɛ mla naa lɛ jɛɛhe, yɛ gbɛ ní yɔɔ tɛ̃ɛ loo ebɛ tɛ̃ɛ nɔ. No hewɔ lɛ wɔmiisumɔ ní wɔkɛtsu nii yɛ gbɛ̀i ní saa ehiɛ nɔ. Mɛɛ gbɛ nɔ wɔɔtsɔ wɔfee nakai?

4, 5. (a) Mɛni ji nɔ̃ titri ni he hiaa kɛha hewalɛ kɛ nitsumɔ yɛ gbɛ ní ja nɔ, ni Nyɔŋmɔ diɛŋtsɛ nɔkwɛmɔnɔ lɛ jieɔ enɛ kpo faŋŋ yɛ mɛɛ gbɛ nɔ? (b) Suɔmɔ baaye abua wɔ ní wɔkɛ wɔhewalɛ atsu nii yɛ gbɛ ní ja nɔ yɛ mɛɛ gbɛ nɔ?

⁴ Nɔ̃ titri ni he hiaa ní baaha akɛ hewalɛ atsu nii yɛ gbɛ ní ja nɔ ji suɔmɔ. Ani Nyɔŋmɔ diɛŋtsɛ nɔkwɛmɔnɔ lɛ ejieee enɛ kpo? Kaimɔ Nyɔŋmɔ sui titrii ejwɛ ní wɔsusu he lɛ—hewalɛ, jalɛsaneyeli, nilee, kɛ suɔmɔ—yɛ Yitso 1 lɛ mli lɛ. Te sui ejwɛ lɛ ateŋ nɔ ni tá fɛɛ nɔ? Suɔmɔ. Yohane Klɛŋklɛŋ Wolo 4:8 lɛ kɛɔ akɛ: “Nyɔŋmɔ lɛ, suɔmɔ ji lɛ.” Hɛɛ, suɔmɔ ji nɔ̃ titri ní Yehowa ji; enáa nɔ fɛɛ nɔ ní efeɔ lɛ nɔ hewalɛ. No hewɔ lɛ suɔmɔ kanyaa ehewalɛ lɛ kpojiemɔi fɛɛ, ni yɛ naagbee lɛ, ekɛtsuɔ nii kɛhaa mɛi ní sumɔɔ lɛ lɛ ahilɛ-kɛhamɔ.

⁵ Suɔmɔ baaye abua wɔ hu ní wɔkɛ wɔ hewalɛ lɛ atsu nii yɛ gbɛ ní ja nɔ. Ejaakɛ, Biblia lɛ kɛɔ wɔ akɛ suɔmɔ ‘mli hi,’ ni “epeleee lɛ diɛŋtsɛ enɔ̃.” (1 Korintobii 13:4, 5) No hewɔ lɛ, suɔmɔ eŋmɛŋ gbɛ ní wɔfee nii kɛ mlila loo yitsoŋwalɛ wɔshi mɛi ní wɔyɔɔ nɔyeli hegbɛ yɛ amɛnɔ yɛ gbɛ ko nɔ lɛ. Shi moŋ, wɔkɛ mɛi krokomɛi baaye yɛ woo kɛ bulɛ mli, ni wɔbaaha amɛ hiamɔ nii kɛ henumɔi aye wɔ diɛŋtsɛ wɔnɔ̃ hiɛ.—Filipibii 2:3, 4.

6, 7. (a) Mɛni ji Nyɔŋmɔ gbeyeishemɔ, ni mɛni hewɔ su nɛɛ baaye abua wɔ ní wɔkwa hewalɛ kɛ nitsumɔ yɛ gbɛ fɔŋ nɔ lɛ? (b) Okɛ tsakpaa ní yɔɔ gbeyei ní wɔsheɔ akɛ wɔɔfee nɔ ko ní esaaa Nyɔŋmɔ hiɛ, kɛ suɔmɔ ní wɔyɔɔ kɛha Nyɔŋmɔ lɛ teŋ lɛ he nɔkwɛmɔnɔ aha.

⁶ Suɔmɔ kɛ su kroko hu ní baanyɛ aye abua wɔ ní wɔkwa hewalɛ kɛ nitsumɔ yɛ gbɛ fɔŋ nɔ lɛ yɛ tsakpaa: no ji Nyɔŋmɔ gbeyeishemɔ. Te su nɛɛ jara wa ha tɛŋŋ? Abɛi 16:6 kɛɔ akɛ: “Yehowa gbeyeishemɔ haa mɔ jeɔ efɔŋ he.” Eka shi faŋŋ akɛ hewalɛ ní akɛtsuɔ nii yɛ gbɛ fɔŋ nɔ lɛ fata gbɛ̀i fɔji ní esa akɛ  wɔtsi wɔhe kɛjɛ he lɛ ahe. Nyɔŋmɔ gbeyeishemɔ baatsĩ wɔnaa ní wɔkɛ mɛi ní wɔyɔɔ amɛnɔ hewalɛ lɛ akaye yɛ gbɛ fɔŋ nɔ. Mɛni hewɔ? Nɔ̃ kome ji akɛ, wɔle akɛ wɔbaabu bɔ ni wɔkɛ nakai mɛi lɛ yeɔ wɔhaa lɛ he akɔntaa wɔha Nyɔŋmɔ. (Nehemia 5:1-7, 15) Shi Nyɔŋmɔ gbeyeishemɔ kɔɔ nibii babaoo he fe no pɛ. Bei pii lɛ, shishijee wiemɔi ní akɛtsu nii kɛha “gbeyeishemɔ” lɛ kɔɔ bulɛ ní mli kwɔ kɛ woo ní wɔyɔɔ kɛha Nyɔŋmɔ lɛ he. Enɛ hewɔ lɛ, Biblia lɛ kɛ gbeyeishemɔ toɔ suɔmɔ ní wɔyɔɔ kɛha Nyɔŋmɔ lɛ he. (5 Mose 10:12, 13) Nɔ ni fata nɛkɛ woo ní bulɛ yɔɔ mli nɛɛ he ji gbeyeishemɔ kpakpa ní wɔɔna akɛ wɔfeŋ nɔ ko ní esaaa Nyɔŋmɔ hiɛ—jeee akɛni wɔmiishe nɔ ni baajɛ mli aba lɛ he gbeyei kɛkɛ, shi moŋ akɛni wɔsumɔɔ lɛ lɛɛlɛŋ hu hewɔ.

⁷ Ákɛ nɔkwɛmɔnɔ lɛ: Susumɔ wekukpaa kpakpa ní hiɔ gbekɛ nuu fioo kɛ etsɛ teŋ lɛ he okwɛ. Gbekɛ nuu lɛ nuɔ miishɛɛ kɛ suɔmɔ ní etsɛ yɔɔ kɛha lɛ lɛ he. Shi gbekɛ lɛ hu le nibii ní etsɛ taoɔ yɛ edɛŋ, ni ele akɛ kɛji ekɛ ehe wo jeŋba ko ní esaaa mli lɛ, etsɛ baagbala etoi. Enɛ hewɔ lɛ gbekɛ lɛ náaa etsɛ lɛ he gbeyeishemɔ fɔŋ. Shi moŋ, esumɔɔ etsɛ lɛ sane waa. Gbekɛ lɛ náa miishɛɛ akɛ ebaafee nɔ ni baaha etsɛ lɛ akpɛlɛ enɔ kɛ miishɛɛ ŋmɔlɔ. Nakai ji bɔ ni Nyɔŋmɔ gbeyeishemɔ ji. Akɛni wɔsumɔɔ Yehowa, wɔŋwɛi Tsɛ lɛ hewɔ lɛ, wɔsheɔ gbeyei akɛ wɔɔfee nɔ ko ní baaha “edɔ lɛ yɛ etsui mli.” (1 Mose 6:6) Yɛ no najiaŋ lɛ, wɔshweɔ akɛ wɔɔha etsui anyɔ emli. (Abɛi 27:11) No hewɔ ni wɔsumɔɔ ní wɔkɛ wɔ hewalɛ atsu nii yɛ gbɛ ní ja nɔ lɛ. Nyɛhaa wɔsusua bɔ ni wɔɔfee enɛ wɔha lɛ he jogbaŋŋ wɔkwɛa.

8. (a) Mɛɛ hegbɛ wumɛi yɔɔ yɛ weku lɛ mli, ni te esa akɛ amɛkɛ enɛ atsu nii aha tɛŋŋ? (b) Wu baanyɛ atsɔɔ akɛ ekɛ woo haa eŋa yɛ mɛɛ gbɛ nɔ?

⁸ Klɛŋklɛŋ lɛ, susumɔ weku kɔkɔrɔɔ lɛ he. Efesobii 5:23 lɛ kɛɔ akɛ: “Wu lɛ ji ŋa lɛ yitso.” Te esa akɛ wu lɛ kɛ hegbɛ ní Nyɔŋmɔ kɛha lɛ nɛɛ atsu nii eha tɛŋŋ? Biblia lɛ kɛɔ wumɛi lɛ ní amɛkɛ amɛŋamɛi lɛ ahi shi “yɛ nilee naa, ni [amɛkɛ] woo awoa yoo akɛ nɔ ni he waaa tuutu ko.” (1 Petro 3:7) Hela wiemɔ ní  atsɔɔ shishi akɛ “woo” lɛ shishinumɔ ji “jarawalɛ, sɛɛnamɔ, . . . bulɛ.” Atsɔɔ wiemɔ nɛɛ sui komɛi ashishi akɛ ‘nikeenii’ kɛ ‘nii ní jara wa.’ (Bɔfoi lɛ Asaji 28:10; 1 Petro 2:7) Wu ní kɛ woo haa eŋa lɛ tutuaŋ yoo lɛ yɛ gbɔmɔtsoŋ kɔkɔɔkɔ; nakai nɔŋŋ hu ewoŋ lɛ hiɛgbele ní ebaŋ lɛ shi hu, ní eeeha enu he akɛ ehe bɛ sɛɛnamɔ. Shi moŋ, eyɔseɔ akɛ ehe yɛ sɛɛnamɔ, ni ekɛ lɛ yeɔ yɛ bulɛ mli. Nuu lɛ tsɔɔ ewiemɔi kɛ enifeemɔi—yɛ teemɔŋ kɛ mɛi ahiɛ hu—nɔ etsɔɔ akɛ yoo lɛ jara wa waa kɛha lɛ. (Abɛi 31:28) Jeee ŋa lɛ suɔmɔ kɛ bulɛ pɛ wu ní tamɔ nɛkɛ náa, shi moŋ enáa nɔ ni he hiaa fe no, ni ji Nyɔŋmɔ nɔkpɛlɛmɔ hu.

9. (a) Mɛɛ hegbɛ ŋamɛi yɔɔ yɛ weku lɛ mli? (b) Mɛni baanyɛ aye abua ŋa lɛ ní ekɛ enyɛmɔi atsu nii ní ekɛfi ewu lɛ sɛɛ, ni mɛni baajɛ mli aba?

⁹ Ŋamɛi hu yɛ hegbɛ falɛ ko yɛ weku lɛ mli. Biblia lɛ wieɔ yei ní sheɔ Nyɔŋmɔ gbeyei, ní eteee shi amɛwooo yitsoyeli gbɛjianɔtoo kpakpa lɛ, shi amɛŋɔ hegbɛ lɛ ni amɛkɛná amɛwumɛi anɔ hewalɛ yɛ gbɛ kpakpa nɔ, loo amɛye amɛbua amɛ ni amɛtsi amɛhe kɛjɛ kojomɔ mli tɔmɔi komɛi ahe lɛ ahe. (1 Mose 21:9-12; 27:46–28:2) Ekolɛ ŋa ko jwɛŋmɔ nyɛɔ emɔɔ nii oya kwraa fe ewu, aloo ekolɛ eyɛ nyɛmɔi komɛi ní nuu lɛ bɛ eko. Shi kɛlɛ, esa akɛ yoo lɛ aná ‘bulɛ ní mli kwɔ’ eha ewu lɛ ní ‘eba ehe shi’ eha lɛ ‘tamɔ bɔ ni efeɔ ehaa Nuntsɔ lɛ.’ (Efesobii 5:22, 33) Kɛ́ ŋa lɛ hã Nyɔŋmɔ hiɛ ní eeesa lɛ fee oti ní ma ehiɛ lɛ, ebaanyɛ eye ebua lɛ ní ekɛ enyɛmɔi atsu nii ní ekɛfi ewu lɛ sɛɛ moŋ fe ní eeeba lɛ shi loo ní eeebɔ mɔdɛŋ ní eye enɔ. ‘Yoo nilelɔ’ diɛŋtsɛ ní tamɔ nɛkɛ lɛ kɛ ewu lɛ feɔ ekome waa ni amɛkɛtswaa weku lɛ amɛmaa shi. Etsɔɔ nɛkɛ gbɛ nɔ ehiɛɔ ekɛ Nyɔŋmɔ teŋ toiŋjɔlɛ mli daa.—Abɛi 14:1.

10. (a) Mɛɛ hegbɛ Nyɔŋmɔ kɛha fɔlɔi? (b) Mɛni ji wiemɔ “tsɔsemɔ” lɛ shishinumɔ, ni te esa akɛ atsu he nii aha tɛŋŋ? (Kwɛmɔ shishigbɛ niŋmaa lɛ hu.)

¹⁰ Fɔlɔi yɛ hegbɛ hu ní Nyɔŋmɔ kɛha amɛ. Biblia lɛ woɔ ŋaa akɛ: “Tsɛmɛi lɛ, nyɛkawoa nyɛbii amlifu, shi moŋ nyɛlɛa amɛ yɛ [Yehowa, NW] tsɔsemɔ kɛ ŋaawoo lɛ mli.” (Efesobii 6:4) Yɛ Biblia lɛ mli lɛ, wiemɔ ni ji “tsɔsemɔ” lɛ shishinumɔ baanyɛ afee “ní alɛ, atsɔse, atsɔɔ nii.” Tsɔsemɔ he hiaa gbekɛbii; kɛ́ aha amɛ gbɛtsɔɔmɔi, hegbɛi, kɛ husui ní yɔɔ faŋŋ lɛ, ehaa amɛyaa  nɔ jogbaŋŋ. Biblia lɛ kɛ tsɔsemɔ, loo gbɛtsɔɔmɔ ní tamɔ nɛkɛ toɔ suɔmɔ he. (Abɛi 13:24) No hewɔ lɛ, esaaa ni akɛ “tsɔsemɔ tso” lɛ tsuɔ nii yɛ gbɛ fɔŋ nɔ kɔkɔɔkɔ—yɛ henumɔŋ loo yɛ gbɔmɔtsoŋ. a (Abɛi 22:15; 29:15) Tsɔsemɔ ni yɔɔ kpɛŋŋ loo enaa wa, ní suɔmɔ henumɔ bɛ mli lɛ ji fɔlɔ hegbɛ ní akɛtsuɔ nii yɛ gbɛ ní ejaaa nɔ, ni ebaanyɛ eha gbekɛ lɛ mumɔ werɛ aho ehe. (Kolosebii 3:21) Yɛ gbɛ kroko nɔ lɛ, tsɔsemɔ ní ŋmɛɔ pɛpɛɛpɛ ní akɛhaa yɛ gbɛ kpakpa nɔ lɛ haa gbekɛbii lɛ leɔ akɛ amɛfɔlɔi lɛ sumɔɔ amɛsane, ní amɛsusuɔ gbɔmɛi ní amɛbaatsɔmɔ wɔsɛɛ lɛ he.

11. Mɛɛ gbɛ nɔ gbekɛbii baatsɔ ní amɛkɛ amɛhewalɛ atsu nii yɛ gbɛ ní ja nɔ?

¹¹ Ni gbekɛbii lɛ hu? Mɛɛ gbɛ nɔ amɛaatsɔ amɛkɛ amɛhewalɛ lɛ atsu nii yɛ gbɛ ní ja nɔ? Abɛi 20:29 lɛ kɛɔ akɛ: “Oblahii anunyam ji amɛ hewalɛ.” Eka shi faŋŋ akɛ gbɛ ko bɛ ní hi kɛha oblahii kɛ oblayei ní amɛkɛ amɛhewalɛ kɛ nyɛmɔ aaatsu nii, fe ní amɛkɛaasɔmɔ wɔ ‘Bɔlɔ Kpeteŋkpele’ lɛ. (Jajelɔ 12:1) Oblahii kɛ oblayei lɛ baafee jogbaŋŋ akɛ amɛaakai akɛ amɛnifeemɔi baanyɛ asa amɛfɔlɔi ahenumɔi ahe. (Abɛi 23:24, 25) Kɛ́ gbekɛbii bo amɛfɔlɔi ní sheɔ Nyɔŋmɔ gbeyei lɛ atoi ní amɛtee nɔ amɛnyiɛ gbɛ ní ja nɔ lɛ, amɛhaa amɛfɔlɔi lɛ atsuii nyaa. (Efesobii 6:1) Jeŋba ní tamɔ nɛkɛ “sa Nuntsɔ lɛ hiɛ jogbaŋŋ.”—Kolosebii 3:20.

12, 13. (a) Te esa akɛ onukpai lɛ asusu hegbɛ ní amɛyɔɔ yɛ asafo lɛ mli lɛ he amɛha tɛŋŋ? (b) Okɛ nɔ hewɔ ní esa akɛ onukpai lɛ kɛ asafoku lɛ aye yɛ mlihilɛ mli lɛ he nɔkwɛmɔnɔ aha.

¹² Yehowa kɛ nɔkwɛlɔi eha koni amɛnyiɛ hiɛ yɛ Kristofoi asafo lɛ mli. (Hebribii 13:17) Esa akɛ nɛkɛ hii ní he esa nɛɛ kɛ hegbɛ ní Nyɔŋmɔ kɛha amɛ lɛ atsu nii ní amɛkɛ yelikɛbuamɔ ní he hiaa lɛ aha, ní amɛye amɛbua kɛha asafoku lɛ hilɛ-kɛhamɔ.  Ani onukpai agbɛhe lɛ haa amɛ hegbɛ ní amɛye amɛnanemɛi heyelilɔi lɛ anɔ nuntsɔmɛi asane? Dabi kwraa! Esa akɛ onukpai lɛ aná gbɛhe ní amɛyɔɔ yɛ asafo lɛ mli lɛ he jwɛŋmɔ ní ŋmɛɔ pɛpɛɛpɛ, ní tsɔɔ heshibaa. (1 Petro 5:2, 3) Biblia lɛ kɛɔ nɔkwɛlɔi lɛ akɛ: “Nyɛlɛa Nyɔŋmɔ asafo lɛ, ní ekɛ lɛ diɛŋtsɛ e-Bi lɛ lá he lɛ.” (Bɔfoi lɛ Asaji 20:28, NW) Enɛ ji yiŋtoo ní mli wa hewɔ ní esa akɛ amɛkɛ asafoku lɛ mli bii fɛɛ aye yɛ mlihilɛ mli lɛ.

¹³ Wɔbaanyɛ wɔfee he nɔkwɛmɔnɔ yɛ nɛkɛ gbɛ nɔ. Onaanyo ko ní bɛŋkɛɔ bo kpaakpa kɛ nɔ ko ní esumɔɔ waa baha bo akɛ okwɛ nɔ oha lɛ. Ole akɛ onaanyo lɛ hé nakai nii lɛ kɛ jara ní wa waa. Ani okwɛŋ nii lɛ nɔ jogbaŋŋ, yɛ ŋaa mli hu? Nakai nɔŋŋ Nyɔŋmɔ hu kɛ gbɛnaa nii ewo onukpai lɛ adɛŋ akɛ amɛkwɛ enɔ̃ ko ní jara wa waa nɔ amɛha lɛ: no ji asafo lɛ, ní akɛ emli bii lɛ toɔ tooi ahe lɛ. (Yohane 21:16, 17) Yehowa tooi lɛ ajara wa waa kɛha lɛ—yɛ anɔkwale mli lɛ, amɛjara wa aahu akɛ ekɛ lɛ diɛŋtsɛ e-Bi koome ní esumɔɔ, ni ji Yesu Kristo lá ní jara wa lɛ hé amɛ. Yehowa wo jara ní wa fe fɛɛ ni ekɛhe etooi lɛ. Onukpai ní baa amɛhe shi lɛ kaiɔ enɛ ni amɛkɛ Yehowa tooi lɛ yeɔ yɛ nakai gbɛ nɔ.

14. Mɛɛ hewalɛ lilɛi lɛ yɔɔ?

¹⁴ Biblia lɛ kɛɔ akɛ: “Gbele kɛ wala yɛ lilɛi dɛŋ.” (Abɛi 18:21) Yɛ anɔkwale mli lɛ, lilɛi baanyɛ afite nii babaoo. Wɔteŋ namɔ nuko mlifu ní naa wa ní wiemɔ ko ní asusuuu he loo heguɔgbee wiemɔ kɛbaa lɛ eko he dã? Shi lilɛi yɛ hewalɛ hu ní akɛsaa nii. Abɛi 12:18 lɛ kɛɔ akɛ: “Nilelɔ lilɛi tsáa mɔ.” Hɛɛ, wiemɔi kpakpai ní woɔ mɔ hewalɛ lɛ baanyɛ afee tamɔ tsofa ní jɔ́ɔ hewaa he, tsofa ní tsáa mɔ, ní akɛmiifee tsui lɛ tsofa. Susumɔ nɔkwɛmɔnii komɛi ahe okwɛ.

15, 16. Wɔbaanyɛ wɔkɛ wɔlilɛi atsu nii ní wɔkɛwo mɛi krokomɛi hewalɛ yɛ mɛɛ gbɛi anɔ?

¹⁵ Tesalonikabii a-Klɛŋklɛŋ Wolo 5:14 lɛ woɔ hewalɛ akɛ: “Nyɛshɛjea mɛi ni tsui fãa lɛ amii.” Hɛɛ, bei komɛi lɛ, Yehowa tsuji anɔkwafoi po peleɔ amɛhe yɛ jwɛŋmɔŋ nɔnyɛɛ shihilɛ shishi. Mɛɛ gbɛ nɔ wɔɔtsɔ wɔye wɔbua gbɔmɛi ní tamɔ nɛkɛ?  Okɛ yijiemɔ pɔtɛɛ, ní jɛ anɔkwayeli mli aha ní eye ebua amɛ ní amɛna bɔ ni amɛ diɛŋtsɛ amɛjara wa yɛ Yehowa hiɛ. Okɛ amɛ agba Biblia mli ŋmalɛi ní mli wiemɔi yɔɔ hewalɛ waa, ní tsɔɔ akɛ Yehowa susuɔ mɛi ni “tsuii ekumɔ” kɛ mɛi ni “mumɔ tswiaa shi kɛ dɔlɛ” lɛ ahe lɛɛlɛŋ, ni esumɔɔ amɛsane. (Lala 34:19) Kɛ́ wɔkɛ hewalɛ ní wɔlilɛi yɔɔ lɛ tsu nii ní wɔkɛshɛje mɛi krokomɛi amii lɛ, wɔtsɔɔ akɛ wɔmiikase wɔ-Nyɔŋmɔ ní yɔɔ musuŋtsɔlɛ, “mɔ ni shɛjeɔ mɛi ní yɔɔ nɔnyɛɛ shishi lɛ amii lɛ.”—2 Korintobii 7:6, New American Standard Bible.

¹⁶ Wɔbaanyɛ wɔkɛ hewalɛ ní wɔlilɛi yɔɔ lɛ hu atsu nii ní wɔkɛ hewalɛwoo aha mɛi ní no he ehia amɛ waa lɛ. Ani naanyo heyelilɔ ko suɔlɔ ko eje mli? Miishɛjemɔ wiemɔi ní tsɔɔ bɔ ni wɔsusuɔ ehe ní wɔnuɔ he wɔhaa lɛ lɛ baanyɛ ashɛje tsui ní yeɔ awerɛho lɛ mii. Ani nyɛmi nuu loo nyɛmi yoo ko ní egbɔ miinu he akɛ ehe ehiaaa? Hewalɛwoo wiemɔi baanyɛ ama nɔ mi kɛha mɛi ní egbɔlɔ lɛ akɛ, amɛhe yɛ sɛɛnamɔ ni hiɛ sɔɔ amɛ waa. Ani mɔ ko miimia ehiɛ kɛ hela ko ní ehiii tsamɔ? Mlihilɛ wiemɔi ní akɛ mɔ aaawie yɛ tɛlifoŋ nɔ loo tɛ̃ɛ lɛ baanyɛ afee babaoo ní ewo mɔ ni he yeɔ lɛ mumɔ ekãa. Kwɛ bɔ ni wɔ-Bɔlɔ lɛ baaná miishɛɛ waa kɛji wɔkɛ wiemɔ mli hewalɛ lɛ tsu  nii ní wɔkɛwie wiemɔi ‘kpakpai ní tswaa mɔ emaa shi’!—Efesobii 4:29.

17. Wɔbaanyɛ wɔkɛ wɔlilɛi atsu nii ní ehe aba sɛɛnamɔ kɛha mɛi krokomɛi yɛ mɛɛ gbɛ ní he hiaa nɔ, ni mɛni hewɔ esa akɛ wɔfee nakai?

¹⁷ Gbɛ ko bɛ ni he hiaa dɔŋŋ, fe ní wɔkɛ hewalɛ ní lilɛi lɛ yɔɔ lɛ aaatsu nii ní wɔkɛgba mɛi krokomɛi Nyɔŋmɔ Maŋtsɛyeli lɛ he sanekpakpa lɛ. Abɛi 3:27 lɛ kɛɔ akɛ: “Mɛi ni sa ejurɔfeemɔ lɛ, kaakama amɛ, kɛji efeemɔ yɛ odɛŋ hewalɛ mli lɛ.” Eji gbɛnaa nii ní kã wɔnɔ akɛ wɔkɛ mɛi krokomɛi agba sanekpakpa ní hereɔ mɔ yiwala lɛ he sane. Efeeŋ nɔ ni ja gbɛ akɛ wɔɔtsĩ shɛɛ sane ní he hiaa waa ní Yehowa ejɛ mlihilɛ mli ekɛha wɔ lɛ naa. (1 Korintobii 9:16, 22) Shi nɛgbɛ Yehowa taoɔ ní wɔkɛ wɔhe awo nitsumɔ nɛɛ mli kɛyashi?

18. Mɛni Yehowa kpaa gbɛ yɛ wɔdɛŋ?

¹⁸ Suɔmɔ ní wɔyɔɔ kɛha Yehowa lɛ tsirɛɔ wɔ ni wɔkɛ wɔhe woɔ Kristofoi asɔɔmɔ nitsumɔ lɛ mli kɛmɔɔ shi. Mɛni Yehowa kpaa gbɛ yɛ wɔdɛŋ yɛ enɛ gbɛfaŋ? Nɔ ko ní wɔteŋ mɔ fɛɛ mɔ baanyɛ ekɛha, ní bɔ ni wɔshihilɛ ji lɛ kɔɔɔ he eko: “Nɔ fɛɛ nɔ ní nyɛfeɔ lɛ, nyɛjiea nyɛmusuŋ nyɛtsua, taakɛ [Yehowa, NW] nyɛtsuɔ nyɛhaa ni jeee gbɔmɛi.” (Kolosebii 3:23) Beni Yesu jajeɔ nɔ ni ji kita wulu fe fɛɛ lɛ, ekɛɛ akɛ: “Suɔmɔ [Yehowa, NW] o-Nyɔŋmɔ lɛ kɛ otsui fɛɛ kɛ osusuma fɛɛ kɛ ojwɛŋmɔ fɛɛ kɛ onyɛmɔ fɛɛ!” (Marko 12:30) Hɛɛ, Yehowa miikpa wɔteŋ mɔ fɛɛ mɔ gbɛ ní wɔsumɔ lɛ ní wɔsɔmɔ lɛ kɛ wɔsusuma muu fɛɛ.

19, 20. (a) Akɛni tsui lɛ, jwɛŋmɔ lɛ, kɛ hewalɛ lɛ fata susuma lɛ he hewɔ lɛ, mɛni hewɔ atsĩ nyɛmɔi krokomɛi nɛɛ atã yɛ Marko 12:30 lɛ? (b) Ákɛ aaasɔmɔ Yehowa kɛ susuma muu fɛɛ lɛ tsɔɔ mɛni?

¹⁹ Ákɛ aaasɔmɔ Nyɔŋmɔ kɛ susuma muu fɛɛ lɛ tsɔɔ mɛni? Susuma lɛ kɔɔ gbɔmɔ muu lɛ fɛɛ, kɛ egbɔmɔtsoŋ kɛ ejwɛŋmɔŋ nyɛmɔi fɛɛ he. Akɛni tsui lɛ, jwɛŋmɔ lɛ, kɛ hewalɛ lɛ fata susuma lɛ he hewɔ lɛ, mɛni hewɔ atsĩ nyɛmɔi krokomɛi nɛɛ atã yɛ Marko 12:30 lɛ? Susumɔ nɔkwɛmɔnɔ ko he okwɛ. Yɛ Biblia bei amli lɛ, mɔ ko nyɛɔ ehɔ̃ɔ ehe (ni ji esusuma) ewoɔ nyɔŋyeli mli. Shi kɛlɛ, ekolɛ nyɔŋ lɛ sɔmɔŋ etsulɔ lɛ kɛ etsui muu fɛɛ; ekolɛ ekɛ ehewalɛ fɛɛ loo ejwɛŋmɔŋ nyɛmɔi fɛɛ tsuŋ nii ní ekɛha enuntsɔ lɛ nibii aya hiɛ. (Kolosebii 3:22) No hewɔ lɛ, eka shi faŋŋ akɛ Yesu tsĩ nyɛmɔi krokomɛi nɛɛ atã bɔni afee ní ekɛma nɔ mi akɛ esaaa akɛ wɔtsĩɔ nɔ ko nɔ ko naa yɛ sɔɔmɔ ní wɔkɛhaa Nyɔŋmɔ lɛ mli. Wɔsusuma muu fɛɛ ní wɔkɛaasɔmɔ Nyɔŋmɔ lɛ tsɔɔ wɔhe fɛɛ ní wɔkɛaaha, ní wɔkɛ wɔ hewalɛ kɛ nyɛmɔi fɛɛ atsu nii kɛmɔ shi bɔ ni wɔɔnyɛ yɛ esɔɔmɔ mli.

²⁰ Ani wɔsusuma muu fɛɛ ní wɔkɛaasɔmɔ lɛ tsɔɔ akɛ esa akɛ wɔ fɛɛ wɔkɛ be kɛ hewalɛ kome atsu nii yɛ sɔɔmɔ nitsumɔ lɛ mli? Enyɛŋ eba lɛ nakai, ejaakɛ wɔshihilɛi kɛ wɔnyɛmɔi yɛ srɔtoi, kɛjɛɔ mɔ kome nɔ kɛyaa mɔ kroko nɔ. Ákɛ nɔkwɛmɔnɔ lɛ, oblanyo loo oblayoo ni yɔɔ gbɔmɔtsoŋ hewalɛ kpakpa kɛ nyɛmɔ baanyɛ ekɛ be babaoo atsu nii yɛ shiɛmɔ mli fe bɔ ni mɔ ko ní gbɔlɛ eha ehewalɛ nɔ egbɔ lɛ baanyɛ afee. Ekolɛ  oshijafonyo ní weku mli gbɛnaa nii ko kãaa enɔ lɛ baanyɛ afee babaoo fe bɔ ni mɔ ko ní miikwɛ weku lɛ baanyɛ afee. Kɛji wɔyɛ hewalɛ kɛ shihilɛi ní haa wɔnyɛɔ wɔtsuɔ babaoo yɛ sɔɔmɔ nitsumɔ lɛ mli lɛ, no lɛ esa akɛ wɔda shi waa yɛ he! Shi kɛlɛ, wɔsumɔŋ ní wɔná mumɔ ní haa wɔwieɔ wɔshiɔ mɛi krokomɛi, ní wɔkɛ wɔhe aaato mɛi krokomɛi ahe yɛ enɛ gbɛfaŋ. (Romabii 14:10-12) Shi moŋ, wɔmiisumɔ ní wɔkɛ wɔ hewalɛ atsu nii ní wɔkɛwo mɛi krokomɛi hewalɛ.

21. Mɛni ji gbɛ ni hi, ní he hiaa fe fɛɛ ní wɔɔtsɔ nɔ wɔkɛ wɔ hewalɛ atsu nii?

²¹ Yehowa efee nɔkwɛmɔnɔ kpakpa efɔ̃ shi, yɛ ehewalɛ ní ekɛtsuɔ nii yɛ gbɛ ní ja nɔ lɛ gbɛfaŋ. Wɔmiisumɔ ní wɔkase lɛ jogbaŋŋ bɔ ni wɔnyɛmɔ akɛ adesai ní yeee emuu lɛ baaŋmɛ wɔ gbɛ. Wɔbaanyɛ wɔkɛ wɔ hewalɛ atsu nii yɛ gbɛ ní ja nɔ kɛtsɔ mɛi ní wɔyɔɔ nɔyeli hegbɛ ko yɛ amɛnɔ lɛ ní wɔkɛ amɛ aaaye yɛ woo kɛ bulɛ mli lɛ nɔ. Kɛfata he lɛ, wɔmiisumɔ ní wɔkɛ wɔ susuma muu fɛɛ atsu yiwalaheremɔ shiɛmɔ nitsumɔ ní Yehowa kɛwo wɔdɛŋ akɛ wɔtsu lɛ. (Romabii 10:13, 14) Kaimɔ akɛ, kɛ́ okɛ onii ní jara wa fe fɛɛ ní ooonyɛ—ni ji osusuma—ha Yehowa lɛ, enáa he miishɛɛ. Ani otsui tsirɛɔ bo koni ofee bɔ fɛɛ bɔ ní ooonyɛ yɛ Nyɔŋmɔ ní yɔɔ niiashishinumɔ kɛ suɔmɔ tamɔ nɛkɛ lɛ sɔɔmɔ mli? Gbɛ ko bɛ ni hi, loo ehe hiaa fe enɛ, ní oootsɔ nɔ okɛ ohewalɛ atsu nii.