1-3. (a) Mɛɛ hegbeyeiwoo shihilɛ Israelbii lɛ kɛkpe yɛ Mizraimbii lɛ adɛŋ? (b) Mɛɛ gbɛ nɔ Yehowa tsɔ ewuu eha ewebii lɛ?

 ISRAELBII lɛ enaaa he ni amɛbaatsɔ—asá amɛyi yɛ gɔji kɛ amɛnɔ tɛsaai gɔgɔmeei ní ehiii kwɔɔ lɛ, kɛ ŋshɔ ní amɛnyɛŋ amɛfo lɛ teŋ. Mizraim asraafoi, ni ji yiwalɔi kɛ gbɔmɔgbelɔi akuu lɛ nyiɛ amɛsɛɛ kɛ foi, ní amɛtswa amɛfai shi akɛ amɛbaakpata amɛhiɛ kwraa. a Shi kɛlɛ, Mose wo Nyɔŋmɔ webii lɛ hewalɛ ní amɛnijiaŋ akaje wui. Ema nɔ mi eha amɛ akɛ: “Yehowa baawuu aha nyɛ.”—2 Mose 14:14.

² Nakai po lɛ, eyɛ faŋŋ akɛ Mose bolɔ etsɛ Yehowa, ni Nyɔŋmɔ here lɛ nɔ ni ekɛɛ: “Mɛɛba obolɔɔ otsɛɔ mi? . . . Wó otso lɛ nɔ, ní okpã onine mli yɛ ŋshɔ lɛ nɔ ní ogbá mli.” (2 Mose 14:15, 16) Bo diɛŋtsɛ feemɔ nibii ní nyiɛ sɛɛ kɛba lɛ ahe mfoniri okwɛ. Yehowa kɛ famɔ ha eŋwɛibɔfo ko amrɔ nɔŋŋ, ni atatu kutuu ko badamɔ Israel sɛɛgbɛ, ni ekolɛ elɛɛ emli tamɔ gbogbo ni etsĩ Mizraim asraafoi lɛ atutuamɔ lɛ naa. (2 Mose 14:19, 20; Lala 105:39) Mose kpã enine mli. Kɛkɛ ni kɔɔyɔɔ ko ní naa wa waa tswa ni egbá ŋshɔ lɛ mli enyɔ. Nui lɛ wà yɛ gbɛ ko nɔ, ni edamɔ shi tamɔ gbogboi, ni egbele gbɛ ní mli lɛɛ bɔ ni maŋ muu lɛ fɛɛ baanyɛ anyiɛ kɛtsɔ nɔ!—2 Mose 14:21; 15:8.

³ Yɛ hewalɛ ní ajie lɛ kpo atsɔɔ Farao nɛɛ hewɔ lɛ, kulɛ esa akɛ efã ní esraafoi lɛ aku amɛsɛɛ. Shi yɛ no najiaŋ lɛ, Farao henɔwolɔ lɛ fã ní amɛtutua amɛ moŋ. (2 Mose 14:23) Mizraimbii lɛ kɛ foi nyiɛ amɛsɛɛ kɛtee ŋshɔ lɛ mli, shi etsɛɛɛ ni amɛtutuamɔ lɛ batsɔ basabasa-feemɔ beni amɛshwiilii lɛ anaji bɔi faamɔ lɛ.  Beni Israelbii lɛ fo ni amɛyashɛ afã kroko lɛ shweshweeshwe lɛ, Yehowa kɛ famɔ ha Mose akɛ: “Kpã onine mli yɛ ŋshɔ lɛ nɔ, koni nui lɛ aku sɛɛ aba Mizraimbii lɛ kɛ amɛshwiilii kɛ amɛkpɔŋɔiatsɛmɛi lɛ anɔ!” Nui ní etsɔ tamɔ gbogboi lɛ kumɔ shwie shi, ni efũ Farao kɛ esraafoi lɛ fɛɛ!—2 Mose 14:24-28; Lala 136:15.

4. (a) Mɛni Yehowa jie ehe kpo akɛ eji yɛ Ŋshɔ Tsuru lɛ naa? (b) Te mɛi komɛi baafee amɛnii yɛ bɔ ni Yehowa jie ehe kpo nɛɛ he amɛha tɛŋŋ?

⁴ Israel maŋ lɛ kpɔmɔ yɛ Ŋshɔ Tsuru lɛ naa lɛ ji nifeemɔ ko ní he hiaa waa yɛ bɔ ni Nyɔŋmɔ kɛ adesa eye eha lɛ he yinɔsane mli. Yehowa jie ehe kpo yɛ jɛmɛ akɛ eji “tawulɔ.” (2 Mose 15:3) Shi kɛlɛ, te ofeɔ onii yɛ bɔ ni Yehowa jie ehe kpo eha nɛɛ he ohaa tɛŋŋ? Yɛ anɔkwale mli lɛ, tai kɛ piŋmɔ kɛ amanehulu babaoo eba adesai anɔ. Ani eeenyɛ efee akɛ nii ahiɛkpatamɔ hewalɛ ní Nyɔŋmɔ kɛtsu nii lɛ feɔ tamɔ nɔ ni tsĩɔ wɔ gbɛ moŋ fe ní eeekanya wɔ ní wɔtsi wɔbɛŋkɛ lɛ?

5, 6. (a) Mɛni hewɔ atsɛɔ Nyɔŋmɔ yɛ gbɛ ní ja nɔ akɛ ‘tai a-Yehowa’ lɛ? (b) Esoro Nyɔŋmɔ tai yɛ adesai atai ahe yɛ mɛɛ gbɛ nɔ?

⁵ Taakɛ shishijee wiemɔi ní akɛŋmala Biblia lɛ tsɔɔ lɛ, akɛ sabala ni ji ‘tai a-Yehowa’ tsɛɔ Nyɔŋmɔ nɔ ni miihe ashɛ shii ohai etɛ yɛ Hebri Ŋmalɛi lɛ amli, kɛ shii enyɔ yɛ Kristofoi a-Hela Ŋmalɛi lɛ amli. (1 Samuel 1:11) Ákɛ Nɔyelɔ kɛ Maŋtsɛ lɛ, Yehowa yeɔ ŋwɛibɔfoi atai babaoo anɔ maŋtsɛ. (Yoshua 5:13-15; 1 Maŋtsɛmɛi 22:19) Nii ahiɛkpatamɔ hewalɛ ní ta nɛɛ yɔɔ lɛ yɛ gbeyei waa diɛŋtsɛ. (Yesaia 37:36) Adesai ahiɛkpatamɔ jeee sane ní yɔɔ miishɛɛ akɛ aaasusu he. Shi kɛlɛ, esa akɛ wɔkai akɛ Nyɔŋmɔ tai lɛ tamɔɔɔ adesai atai bibii ní amɛwuɔ lɛ. Ekolɛ asraafoi kɛ maŋkwramɔŋ hiɛnyiɛlɔi kɛ yiŋtoi kpakpai haa yɛ amɛtutuamɔi lɛ ahewɔ. Shi bei pii lɛ, tai ní adesai wuɔ lɛ jɛɔ hiɛjoomɔ kɛ pɛsɛmkunya hewɔ.

 ⁶ Nɔ ni tamɔɔɔ nakai lɛ, Yehowa jeee mɔ ni henumɔ folo ko kɛkɛ tsirɛɔ lɛ. Wɔkaneɔ yɛ 5 Mose 32:4 lɛ akɛ: “Tɛsaa ji lɛ, ni enitsumɔi hi pɛ; ejaakɛ egbɛ̀i fɛɛ jalɛ ni. Anɔkwa Mawu ji lɛ, nɔ̃ sha bɛ lɛ; jalɔ ji lɛ ni esa pɛ.” Nyɔŋmɔ Wiemɔ lɛ buɔ mlifu ní anyɛɛɛ akudɔ lɛ, yiwalɛ, kɛ awuiyeli fɔ́. (1 Mose 49:7; Lala 11:5) No hewɔ lɛ Yehowa efeee nɔ ko ní yiŋtoo bɛ he kɔkɔɔkɔ. Ekɛ hewalɛ ní ekɛkpataa nii ahiɛ lɛ tsuɔ nii yɛ bei fioo pɛ mli, ni ekɛtsuɔ nii ákɛ naagbee nifeemɔ kwraa. Etamɔ bɔ ni etsɔ egbalɔ Ezekiel nɔ ejaje lɛ pɛpɛɛpɛ, akɛ: “Aso mináa miishɛɛ yɛ efɔŋfeelɔ gbele hewɔ? Nuntsɔ Yehowa kɛɛ; ni jeee akɛ ekpale kɛjɛ egbɛ lɛ nɔ ní eyi aná wala moŋ?”—Ezekiel 18:23.

7, 8. (a) Te Hiob mu sane naa yɛ gbɛ ní ejaaa nɔ, yɛ emanehului lɛ ahe eha tɛŋŋ? (b) Elihu jaje Hiob susumɔi yɛ enɛ gbɛfaŋ lɛ yɛ mɛɛ gbɛ nɔ? (d) Mɛni wɔbaanyɛ wɔkase kɛjɛ Hiob niiashikpamɔ lɛ mli?

⁷ Belɛ, mɛni hewɔ Yehowa kɛ nii ahiɛkpatamɔ hewalɛ tsuɔ nii mɔ? Dani wɔɔha hetoo lɛ, ekolɛ wɔbaakai jalɔ Hiob sane lɛ. Satan tswa mpoa akɛ ani Hiob—yɛ faŋŋ mli lɛ, ani adesa ko—baahiɛ emuuyeli mli yɛ kaa shishi lo. Yehowa ha nakai mpoatswaa lɛ hetoo kɛtsɔ gbɛ ní eŋmɛ Satan koni eka Hiob emuuyeli lɛ ekwɛ lɛ nɔ. Enɛ hewɔ lɛ, hela mɔ Hiob, nibii fɛɛ ní eyɔɔ lɛ hiɛ kpata, ni ebii lɛ gboi. (Hiob 1:1–2:8) Akɛni Hiob leee saji ní kɔɔ eshihilɛ nɛɛ he nɔ ko hewɔ lɛ, emu sane naa yɛ gbɛ ní ejaaa nɔ akɛ emanehulu lɛ ji toigbalamɔ ní ejaaa gbɛ, ní jɛ Nyɔŋmɔ ŋɔɔ. Ebi Nyɔŋmɔ nɔ hewɔ ní E-jie ‘ehiɛ eka’ lɛ, ni ebuɔ lɛ akɛ ‘henyɛlɔ’ lɛ.—Hiob 7:20; 13:24.

⁸ Oblanyo ko ní atsɛɔ lɛ Elihu jie tɔmɔ ní yɔɔ Hiob susumɔ nɛɛ mli lɛ kpo, ni ekɛɛ: “Okɛɔ akɛ: ‘Mijalɛ lɛ fe Mawu nɔ̃.’” (Hiob 35:2) Hɛɛ, nilee bɛ mli akɛ wɔɔsusu akɛ wɔle nii fe Nyɔŋmɔ, aloo ní wɔɔsusu akɛ efee nii yɛ gbɛ ní ejaaa nɔ. Elihu jaje akɛ: “Enɛ akagbale Mawu akɛ eeefee nɔ̃ fɔŋ, kɛ Ofe lɛ hu akɛ eeefee nɔ ko ní ejaaa gbɛ.” Ewie yɛ sɛɛ mli hu akɛ: “Ofe lɛ, wɔninaaa lɛ, ehewalɛ teke nɔ; shi ekɔ̃dɔ̃ɔɔ kojomɔ kɛ jalɛ ní fá.” (Hiob 34:10; 36:22, 23; 37:23) Wɔbaanyɛ wɔná nɔmimaa akɛ kɛ́ Nyɔŋmɔ wuu ta lɛ, eyɛ yiŋtoo kpakpa hewɔ ní efee nakai.  Beni enɛ yɔɔ wɔjwɛŋmɔ mli lɛ, nyɛhaa wɔpɛia yiŋtoi ahewɔ ní bei komɛi lɛ toiŋjɔlɛ Nyɔŋmɔ lɛ tsakeɔ ní eŋɔɔ tabilɔ hegbɛ lɛ ekomɛi amli wɔkwɛa.—1 Korintobii 14:33.

9. Mɛni hewɔ toiŋjɔlɛ Nyɔŋmɔ lɛ wuɔ ta lɛ?

⁹ Beni Mose jie Nyɔŋmɔ yi akɛ “tawulɔ” lɛ sɛɛ lɛ, ejaje akɛ: “Namɔ tamɔo, Yehowa, yɛ nyɔŋmɔi lɛ ateŋ? Namɔ tamɔo ní ohiɛ yɔɔ nyam yɛ krɔŋkrɔŋfeemɔ mli?” (2 Mose 15:11) Gbalɔ Habakuk hu ŋma yɛ gbɛ ní tamɔ nakai nɔŋŋ nɔ akɛ: “Ohiŋmɛii yɛ krɔŋŋ tsɔ, bɔ ni okɛaakwɛ nɔ̃ fɔŋ, ni onyɛŋ okwɛ haomɔ.” (Habakuk 1:13) Eyɛ mli akɛ Yehowa ji Nyɔŋmɔ ní yɔɔ suɔmɔ moŋ, shi eji krɔŋkrɔŋfeemɔ, kɛ jalɛ, kɛ jalɛsaneyeli Nyɔŋmɔ hu. Bei komɛi lɛ, nɛkɛ sui nɛɛ nyɛɔ enɔ ní ekɛ ehewalɛ ní ekɛkpataa nii ahiɛ lɛ atsu nii. (Yesaia 59:15-19; Luka 18:7) No hewɔ lɛ Nyɔŋmɔ wooo ekrɔŋkrɔŋfeemɔ lɛ he muji kɛji ewuu ta. Shi moŋ, ewuɔ ta lɛ ejaakɛ eyɛ krɔŋkrɔŋ.—2 Mose 39:30.

10. (a) Mɛɛ be, ni mɛɛ gbɛ nɔ bɔ ni ehe hiaa ní Nyɔŋmɔ awuu ta lɛ je shishi klɛŋklɛŋ? (b) Mɛɛ gbɛ pɛ nɔ abaatsɔ ana nyɛɛ ní agba afɔ̃ shi yɛ 1 Mose 3:15 lɛ naa, ni mɛɛ sɛɛnamɔi ekɛbaaha adesai ni ji jalɔi?

¹⁰ Susumɔ shihilɛ ní te shi beni klɛŋklɛŋ adesai enyɔ, ni ji Adam kɛ Hawa, tse Nyɔŋmɔ hiɛ atua lɛ sɛɛ lɛ he okwɛ. (1 Mose 3:1-6) Eji Yehowa ŋmɛ amɛnifeemɔ ní ejaaa lɛ gbɛ kulɛ, ebaafite lɛ diɛŋtsɛ ehegbɛ ní eyɔɔ akɛ Jeŋ Muu Fɛɛ Maŋtsɛ lɛ. Ákɛ Nyɔŋmɔ ni ji jalɔ lɛ, gbɛnaa nii kã enɔ akɛ ebu amɛ gbele fɔ́. (Romabii 6:23) Egba efɔ̃ shi yɛ Biblia lɛ mli klɛŋklɛŋ gbalɛ lɛ mli akɛ nyɛ̃ɛ ko baahi lɛ diɛŋtsɛ etsuji lɛ kɛ “onufu” lɛ, ni ji Satan sɛɛnyiɛlɔi lɛ ateŋ. (Kpojiemɔ 12:9; 1 Moses 3:15) Yɛ naagbee lɛ, abaanyɛ ana nɛkɛ nyɛ̃ɛ nɛɛ naa kɛtsɔ Satan hiɛkpatamɔ pɛ nɔ. (Romabii 16:20) Shi nakai kojomɔ nifeemɔ lɛ kɛ jɔɔmɔi wuji baaba abaha adesai ni ji jalɔi lɛ, ni ebaajie Satan hewalɛ kɛjɛ shikpɔŋ lɛ nɔ kwraa, ni ebaagbele gbɛ kɛha jeŋ muu fɛɛ paradeiso. (Mateo 19:28) Kɛyashi nakai be lɛ baashɛ lɛ, mɛi ní fĩɔ Satan sɛɛ lɛ baafee amɛhe  hegbeyeiwoo nɔ̃ ní yɔɔ bianɛ kɛha Nyɔŋmɔ webii ashihilɛ diɛŋtsɛ kɛ amɛmumɔŋ shihilɛ kpakpa namɔ. Bei komɛi lɛ, ebaabi ní Yehowa kɛ ehe awo sane lɛ mli.

11. Mɛni hewɔ Nyɔŋmɔ nu he akɛ eji gbɛnaa nii ní kã enɔ akɛ ekɛ jeŋ muu fɛɛ nu afua aba lɛ?

¹¹ Noa gbii lɛ amli Nu Afua lɛ ji bɔ ni ekɛ ehe wo saji amli lɛ he nɔkwɛmɔnɔ. Akɛɔ wɔ yɛ 1 Mose 6:11, 12 lɛ akɛ: “Shikpɔŋ lɛ nɔ efite yɛ Nyɔŋmɔ hiɛ, ni awo shikpɔŋ lɛ nɔ obɔ kɛ yiwalɛ. Ni Nyɔŋmɔ kwɛ shikpɔŋ lɛ, ni naa, enɔ efite; ejaakɛ heloo fɛɛ efite egbɛ yɛ shikpɔŋ lɛ nɔ.” Ani Nyɔŋmɔ baaŋmɛ efɔŋfeelɔi agbɛ ní amɛkpata jeŋba kpakpa he naagbee kadimɔ nii ní eshwɛ yɛ shikpɔŋ nɔ lɛ hiɛ? Dabi. Yehowa nu he akɛ gbɛnaa nii kã enɔ akɛ esa akɛ ekɛ jeŋ muu fɛɛ nu afua aba koni ekɛjie mɛi ní kɛ amɛhe ewo yiwalɛ nifeemɔi kɛ jeŋba shara mli lɛ kwraa kɛjɛ shikpɔŋ lɛ nɔ.

12. (a) Mɛni Yehowa gba efɔ̃ shi ní kɔɔ Abraham “seshi” lɛ he? (b) Mɛni hewɔ esa akɛ akpata Amorbii lɛ ahiɛ kwraa lɛ?

¹² Enɛ tamɔ Nyɔŋmɔ kojomɔ ní ekɛshi Kanaanbii lɛ pɛpɛɛpɛ. Yehowa jie lɛ kpo akɛ “seshi” ko ní shikpɔŋ lɛ nɔ wekui fɛɛ baatsɔ enɔ amɛná jɔɔmɔ lɛ baajɛ Abraham mli kɛba. Yɛ nakai yiŋtoo lɛ kɛ gbeekpamɔ naa lɛ, Nyɔŋmɔ wo akpɔ akɛ ekɛ Kanaan shikpɔŋ lɛ, ni ji shikpɔŋ ní gbɔmɛi komɛi ní atsɛɔ amɛ Amorbii lɛ yɔɔ nɔ lɛ, baaha Abraham seshibii lɛ. Te aaafee tɛŋŋ ní Nyɔŋmɔ sane aaaja kɛji ekɛ nɔnyɛɛ shwie gbɔmɛi nɛɛ kɛjɛ amɛshikpɔŋ lɛ nɔ hu? Yehowa gba efɔ̃ shi akɛ amɛ shwiemɔ lɛ baŋ aahu ja aaafee afii 400 sɛɛ dã—kɛyashi be mli ní “Amorbii lɛ anɔ̃ sha lɛ” ‘aaayi.’ b (1 Mose 12:1-3; 13:14, 15; 15:13, 16; 22:18) Yɛ nakai be lɛ mli lɛ, Amorbii lɛ fite kwraa kɛbote jeŋba ní ekpɔtɔ mli vii diɛŋtsɛ. Kanaan batsɔ wɔŋjamɔ, láshishwiemɔ, kɛ bɔlɛnamɔ mli nifeemɔi fɔji fɛɛ amaŋ. (2 Mose 23:24; 34:12, 13; 4 Mose 33:52) Shikpɔŋ lɛ  nɔ bii lɛ gbeɔ gbekɛbii yɛ afɔleshaa la mli po. Ani Nyɔŋmɔ ní yɔɔ krɔŋkrɔŋ lɛ baaha ewebii ayahi efɔŋfeemɔ shihilɛ ní tamɔ nɛkɛ mli? Dabi! Ejaje akɛ: “Abule shikpɔŋ lɛ, no hewɔ lɛ mibawo lɛ enishaianii lɛ ahe nyɔmɔ, ni shikpɔŋ lɛ baashwe enɔ bii lɛ ashwie.” (3 Mose 18:21-25) Shi kɛlɛ, Yehowa egbeee gbɔmɛi lɛ kɛkɛ ní ekpaaa mli. Abaa Kanaanbii ní sumɔɔ jalɛ nifeemɔ, tamɔ Rahab kɛ Gibeonbii lɛ ayi.—Yoshua 6:25; 9:3-27.

13, 14. (a) Mɛni hewɔ gbɛnaa nii kã Yehowa nɔ akɛ etse egbɛi lɛ he lɛ? (b) Mɛɛ gbɛ nɔ Yehowa tsɔ ejie heguɔgbee ní akɛba egbɛi lɛ nɔ lɛ?

¹³ Akɛni Yehowa yɛ krɔŋkrɔŋ hewɔ lɛ, egbɛi lɛ yɛ krɔŋkrɔŋ. (3 Mose 22:32) Yesu tsɔɔ ekaselɔi lɛ ní amɛsɔle akɛ: “Ha ogbɛi lɛ he atse.” (Mateo 6:9, NW) Eden atuatsemɔ lɛ gbe Nyɔŋmɔ gbɛi lɛ he guɔ, ni etée yiŋkɔshikɔshifeemɔ shi yɛ Nyɔŋmɔ gbɛi lɛ kɛ gbɛ ní etsɔɔ nɔ eyeɔ nɔ lɛ he. Yehowa nyɛŋ eku ehiɛ efɔ̃ heguɔgbee kɛ atuatsemɔ ní tamɔ nɛkɛ nɔ kɔkɔɔkɔ. Gbɛnaa nii kã enɔ akɛ ejie heguɔgbee ní akɛba egbɛi lɛ nɔ lɛ kɛjɛ jɛmɛ.—Yesaia 48:11.

¹⁴ Susumɔ Israelbii lɛ ahe ekoŋŋ okwɛ. Bei abɔ ní amɛkã he amɛji nyɔji yɛ Mizraim lɛ, belɛ Nyɔŋmɔ shiwoo ní ekɛha Abraham akɛ shikpɔŋ nɔ wekui fɛɛ baatsɔ e-Seshi lɛ nɔ amɛná jɔɔmɔi amɛha amɛhe lɛ baafee tamɔ shiwoo folo. Shi Yehowa jie heguɔgbee ní akɛba egbɛi lɛ nɔ lɛ kɛjɛ jɛmɛ kɛtsɔ kpɔmɔ ní ekpɔ̃ amɛ ní eto amɛ akɛ maŋ lɛ nɔ. Enɛ hewɔ lɛ, gbalɔ Daniel kai yɛ sɔlemɔ mli akɛ: “[Oo Yehowa, NW] wɔ-Nyɔŋmɔ . . . okɛ nineshiwalɛ jie omaŋ lɛ kɛjɛ Mizraim shikpɔŋ lɛ nɔ, ní oŋɔhere gbɛi.”—Daniel 9:15.

15. Mɛni hewɔ Yehowa jie Yudafoi lɛ kɛjɛ nomŋɔɔ mli yɛ Babilon lɛ?

¹⁵ Nɔ ni yɔɔ miishɛɛ ji akɛ, Daniel sɔle yɛ nɛkɛ gbɛ nɔ yɛ be mli ní Yudafoi lɛ taoɔ ní Yehowa afee nii shikome ekoŋŋ yɛ E-gbɛi lɛ hewɔ lɛ. Yudafoi toigbolɔi lɛ na amɛhe yɛ nomŋɔɔ mli yɛ Babilon, yɛ nakai beaŋ. Amɛ diɛŋtsɛ amɛmaŋtiase, ni ji Yerusalem kã shi amaŋfɔ. Daniel le akɛ Yudafoi lɛ asɛɛ ní amɛaaku kɛba amɛmaŋ shikpɔŋ nɔ ekoŋŋ lɛ baawó Yehowa  gbɛi lɛ nɔ gojoo. Enɛ hewɔ lɛ Daniel sɔle akɛ: “[Oo Yehowa, NW], ŋɔɔfa! [Oo Yehowa, NW], ká toi, ní ofee; kaatsɛ kwraa, yɛ bo diɛŋtsɛ ohewɔ, mi-Nyɔŋmɔ; ejaakɛ akɛ ogbɛi ewo omaŋ kɛ omaŋbii lɛ!”—Daniel 9:18, 19, wɔma efã ko nɔ mi.

16. Tsɔɔmɔ nɔ hewɔ ní miishɛɛ ní Yehowa yɔɔ akɛ eeefã egbɛi lɛ he lɛ etsɔɔɔ akɛ ebɛ henumɔ, ni esusuɔ ekome pɛ ehe lɛ mli.

¹⁶ Ani miishɛɛ ní Yehowa yɔɔ akɛ eeefã egbɛi lɛ he lɛ tsɔɔ akɛ ebɛ henumɔ, ni esusuɔ ekome pɛ ehe? Dabi, ejaakɛ ebuɔ ewebii ahe, kɛtsɔ nii ní efeɔ yɛ ekrɔŋkrɔŋfeemɔ kɛ suɔmɔ ní eyɔɔ kɛha jalɛsaneyeli lɛ kɛ gbeekpamɔ naa hewɔ lɛ nɔ. Susumɔ 1 Mose yitso 14 lɛ he okwɛ. Wɔkaneɔ bɔ ni maŋtsɛmɛi ejwɛ komɛi batutua Abraham wɔfase Lot, ní amɛmɔ lɛ, ní amɛloo Lot weku lɛ fɛɛ kɛfata ehe kɛtee lɛ he sane yɛ jɛmɛ. Kɛtsɔ Nyɔŋmɔ yelikɛbuamɔ nɔ lɛ, Abraham ye tai ní ewula amɛhe kwraa fe lɛ nɛɛ anɔ kunim butuu! Eeenyɛ efee akɛ nɛkɛ kunimyeli nɛɛ he sane ji klɛŋklɛŋ nɔ̃ ní aŋma awo “Yehowa tai awolo lɛ” mli, ni ekolɛ eji wolo ní aŋmala tawuu mli nifeemɔi ní aŋmalako amɛhe saji yɛ Biblia lɛ mli lɛ yɛ mli. (4 Mose 21:14) Kunimyelii krokomɛi babaoo baanyiɛ sɛɛ kɛba.

17. Mɛni tsɔɔ akɛ Yehowa wuu tai eha Israelbii lɛ beni amɛyashɛ Kanaan shikpɔŋ lɛ nɔ lɛ sɛɛ? Okɛ nɔkwɛmɔnii aha.

¹⁷ Beni eshwɛ fioo ní Israelbii lɛ baabote Kanaan shikpɔŋ lɛ nɔ lɛ, Mose ma nɔ mi eha amɛ akɛ: “Yehowa, nyɛ-Nyɔŋmɔ lɛ, ní nyiɛ nyɛhiɛ lɛ, lɛ nɔŋŋ eeewuu eha nyɛ, taakɛ bɔ nɔŋŋ ní efee eha nyɛ yɛ Mizraim [lɛ].” (5 Mose 1:30; 20:1) Kɛjɛ Mose sɛɛyelɔ Yoshua nɔ, kɛtsa nɔ aahu kɛbashɛ Kojolɔi lɛ abe lɛ mli kɛ Yuda maŋtsɛmɛi anɔkwafoi lɛ anɔyeli beaŋ fɛɛ lɛ, Yehowa wuu tai eha ewebii lɛ, ni eha amɛye amɛ henyɛlɔi lɛ anɔ kunim butuu ní sa kadimɔ waa.—Yoshua 10:1-14; Kojolɔi 4:12-17; 2 Samuel 5:17-21.

18. (a) Mɛni hewɔ wɔbaanyɛ wɔda shi waa akɛ Yehowa tsakeko lɛ? (b) Mɛni baaba kɛji nyɛɛ ní atsɔɔ mli yɛ 1 Mose 3:15 lɛ yashɛ he ni mli wa fe fɛɛ lɛ?

¹⁸ Yehowa tsakeko; nakai nɔŋŋ eyiŋ ní eto akɛ ebaaha shibɔlemɔ  ŋulami nɛɛ atsɔ toiŋjɔlɛ paradeiso lɛ hu tsakeko. (1 Mose 1:27, 28) Nyɔŋmɔ nyɛ̃ɔ efɔŋfeemɔ lolo. Yɛ nakai beaŋ nɔŋŋ lɛ, esumɔɔ ewebii asane waa, ni etsɛŋ ni ebaafee nii yɛ amɛhewɔ. (Lala 11:7) Yɛ anɔkwale mli lɛ, aakpa gbɛ akɛ nyɛ̃ɛ ní atsɔɔ mli yɛ 1 Mose 3:15 lɛ baashɛ tsakemɔ be ko ní yɔɔ gbeyei, ní mli wa waa mli yɛ wɔsɛɛ be ní ebɛŋkɛ kpaakpa lɛ mli. Yehowa baatsɔ “tawulɔ” shikome ekoŋŋ ni ebaatse egbɛi lɛ he ni ebaabu ewebii lɛ ahe hu!—Zakaria 14:3; Kpojiemɔ 16:14, 16.

19. (a) Feemɔ nɔ hewɔ ní nii ahiɛkpatamɔ hewalɛ ní Nyɔŋmɔ kɛtsuɔ nii lɛ baanyɛ agbala wɔ kɛbɛŋkɛ lɛ lɛ he nɔkwɛmɔnɔ. (b) Mɛɛ hewalɛ esa akɛ bɔ ni Nyɔŋmɔ sumɔɔ ní ewuu ta lɛ aná yɛ wɔnɔ?

¹⁹ Susumɔ nɔkwɛmɔnɔ ko he okwɛ: Ŋɔɔ lɛ akɛ kooloo awuiyelɔ ko eba eetutua nuu ko weku, ni nuu lɛ kɛ kooloo lɛ bɔi nɔmɔ waa kɛ hiɛdɔɔ, ni egbe kooloo awuiyelɔ lɛ. Ani obaakpa gbɛ akɛ eŋa kɛ ebii lɛ baatsi amɛhe kɛjɛ ehe yɛ enifeemɔ nɛɛ hewɔ? Nɔ ni tamɔɔɔ nakai lɛ, obaakpa gbɛ akɛ suɔmɔ ní pɛsɛmkunya bɛ mli, ní eyɔɔ kɛha amɛ nɛɛ baakanya amɛ. Yɛ nakai gbɛ nɔŋŋ nɔ lɛ, esaaa akɛ nii ahiɛkpatamɔ hewalɛ ní Nyɔŋmɔ kɛtsuɔ nii lɛ haa wɔtsiɔ wɔhe kɛjɛɔ ehe. Esa akɛ bɔ ni esumɔɔ ní ewuu ta ní ekɛbu wɔhe lɛ aha suɔmɔ ní  wɔyɔɔ kɛha lɛ lɛ mli awa. Esa akɛ bulɛ ní wɔyɔɔ kɛha ehewalɛ ní husu bɛ he lɛ hu mli akwɔ. Kɛtsɔ no nɔ lɛ, wɔbaanyɛ “[wɔsɔmɔ] Nyɔŋmɔ bɔ ni sa ehiɛ kɛ woo kɛ gbeyeishemɔ.”—Hebribii 12:28.

20. Kɛ́ wɔkane Biblia mli saji ní kɔɔ Nyɔŋmɔ tawuu ko he ní ekolɛ wɔnuuu shishi jogbaŋŋ lɛ, te esa akɛ wɔfee wɔnii wɔha tɛŋŋ, ni mɛni hewɔ?

²⁰ Yɛ anɔkwale mli lɛ, Biblia lɛ etsɔɔɔ Yehowa yiŋtoo ní kɔɔ etai ní ewuu lɛ ahe lɛ fɛɛ he saji amli fitsofitso yɛ shihilɛi lɛ eko fɛɛ eko mli. Shi wɔbaanyɛ wɔná nɔmimaa yɛ enɛ he, akɛ: Yehowa kɛ hewalɛ ní ekɛkpataa nii ahiɛ lɛ tsuuu nii yɛ gbɛ ní ejaaa, gbɛ fɔŋ, loo yiwalɛ gbɛ nɔ. Bei pii lɛ, Biblia mli sane ko mli saji ní fata he lɛ loo saji krokomɛi ní kɔɔ he lɛ ahe susumɔ baanyɛ aye abua wɔ ní wɔnu nibii ashishi jogbaŋŋ. (Abɛi 18:13) Kɛ́ wɔnine shɛɛɛ otii lɛ fɛɛ nɔ po lɛ, Yehowa he saji babaoo ní wɔɔkase kɛ esui ní nɔ bɛ lɛ anɔ ní wɔɔjwɛŋ lɛ baanyɛ aye abua wɔ ní wɔye yiŋkɔshikɔshifeemɔi ní baanyɛ ate shi lɛ anɔ. Kɛ́ wɔfee enɛ lɛ, wɔbanaa akɛ wɔyɛ yiŋtoo kpakpa ní wɔɔdamɔ nɔ wɔkɛ wɔhe afɔ̃ Yehowa, wɔ-Nyɔŋmɔ lɛ nɔ.—Hiob 34:12.

21. Eyɛ mli akɛ Yehowa ji “tawulɔ” yɛ bei komɛi amli moŋ, shi te Yehowa tamɔ eha tɛŋŋ yɛ etsui mli diɛŋtsɛ?

²¹ Eyɛ mli akɛ Yehowa ji “tawulɔ” kɛji shihilɛ lɛ bi ní efee nakai moŋ, shi enɛ etsɔɔɔ akɛ yɛ etsui mli lɛ, eji mɔ ko ní sumɔɔ tawuu. Yɛ Ezekiel ninaa ní kɔɔ ŋwɛi shwiili lɛ he lɛ mli lɛ, afee Yehowa he mfoniri akɛ efee klalo akɛ ebaawuu eshi ehenyɛlɔi lɛ. Shi kɛlɛ, Ezekiel na Nyɔŋmɔ ní kwaabuɛtɛ—ni feɔ toiŋjɔlɛ he okadi lɛ, ebɔle ehe kɛkpe. (1 Mose 9:13; Ezekiel 1:28; Kpojiemɔ 4:3) Eyɛ faŋŋ akɛ, Yehowa he jɔ ni esumɔɔ toiŋjɔlɛ. Bɔfo Yohane ŋma akɛ: “Nyɔŋmɔ lɛ, suɔmɔ ji lɛ.” (1 Yohane 4:8) Yehowa sui lɛ fɛɛ ŋmɛɔ pɛpɛɛpɛ yɛ gbɛ ní yeɔ emuu nɔ. Belɛ, kwɛ hegbɛ kpele ní wɔná akɛ wɔɔnyɛ wɔbɛŋkɛ Nyɔŋmɔ ní he wa, ní kɛlɛ eyɔɔ suɔmɔ tamɔ nɛkɛ!