Yehowa biɔ ni ‘wɔsumɔ ejurɔfeemɔ [loo “anɔkwayeli,” NW].’ (Mika 6:8) Su nɛɛ he miihia waa yɛ nyɛgbalashihilɛ lɛ mli, ejaakɛ kɛ́ nyɛyeee nyɛhe anɔkwa lɛ, nyɛnyɛŋ nyɛkɛ nyɛhiɛ afɔ̃fɔ̃ɔ nyɛhe nɔ. Ni ja nyɛkɛ nyɛhiɛ fɔ̃fɔ̃ɔ nyɛhe nɔ dani suɔmɔ ni yɔɔ nyɛteŋ lɛ mli baawa.

Ŋmɛnɛ lɛ, mɛi babaoo yeee anɔkwa yɛ amɛgbalashihilɛ mli. Esa akɛ otswa ofai shi akɛ obaafee nibii enyɔ komɛi kɛbu ogbalashihilɛ lɛ he.

NƆ NI BIBLIA LƐ KƐƆ: ‘Nyɛyoa nii ni hi titri lɛ.’ (Filipibii 1:10) Ogbalashihilɛ lɛ ji nibii ni he hiaa fe fɛɛ yɛ oshihilɛ mli lɛ ateŋ ekome. Esaaa akɛ okɛ shwɛɔ kwraa.

Yehowa miisumɔ ni okɛ ojwɛŋmɔ ama ohefatalɔ lɛ nɔ, ni nyɛfee ekome ‘kɛhi shi yɛ miishɛɛ mli.’ (Jajelɔ 9:9) Efeɔ lɛ faŋŋ akɛ, esa akɛ okwɛ ohefatalɔ lɛ tsiabo daa, ni nyɛteŋ mɔ fɛɛ mɔ atao gbɛi anɔ ni ebaatsɔ ehã ehefatalɔ lɛ aná miishɛɛ. (1 Korintobii 10:24) Hã ohefatalɔ lɛ anu he akɛ ohiɛ sɔɔ lɛ, ni akɛ ehe hiaa bo.

NƆ NI OBAANYƐ OFEE:

• Kwɛmɔ ni oná be ohã ohefatalɔ lɛ daa ní okahã nɔ kroko miigbala ojwɛŋmɔ yɛ nakai beaŋ

• Feemɔ onii akɛ nyɛyi enyɔ shi jeee mɔ kome

NƆ NI BIBLIA LƐ KƐƆ: “Mɔ fɛɛ mɔ ni kwɛɔ yoo ni ehe feɔ lɛ akɔnɔ lɛ, ekɛ lɛ efite gbala momo yɛ etsui mli.” (Mateo 5:28) Kɛ́ mɔ ko tee nɔ esusu bɔlɛnamɔ jeŋba sha he lɛ, yɛ gbɛ ko nɔ lɛ, eyeee ehefatalɔ lɛ anɔkwa.

Yehowa kɛɛ ehe miihia ni ohã “ohiɛ akã otsui he.” (Abɛi 4:23; Yeremia 17:9) Ja okudɔ nibii ni okɛ ohiŋmɛi kwɛɔ lɛ dani obaanyɛ ofee nakai. (Mateo 5:29, 30) Kasemɔ blematsɛ Hiob, mɔ ni kɛ ehiŋmɛii kpaŋ koni ekɛ akɔnɔ akakwɛ yoo kroko lɛ. (Hiob 31:1) Tswaa ofai shi akɛ okwɛŋ ponografi kɔkɔɔkɔ. Ni ŋmɔɔ oyiŋ kpɔ akɛ, okɛ mɔ ko shwɛŋ suɔmɔ shwɛmɔi ja ohefatalɔ lɛ pɛ.

NƆ NI OBAANYƐ OFEE:

• Hã mɛi krokomɛi ana akɛ oŋmɛɛɛ gbɛ kɔkɔɔkɔ ni mɔ ko aba okɛ ohefatalɔ lɛ teŋ

• Susumɔ bɔ ni ohefatalɔ lɛ nuɔ nii ahe ehãa lɛ he, ni ofo naanyobɔɔ fɛɛ naanyobɔɔ ni baagba enaa lɛ sɛɛ amrɔ nɔŋŋ