Be ni eshwɛ fioo ni abaaye afi 32 Ŋ.B. Hehoo lɛ, Yesu miitsɔɔ nii yɛ Galilea ni ebɛ deka kwraa. No sɛɛ lɛ, eshi kɛtee Yerusalem koni eyaye Hehoo lɛ yɛ jɛmɛ taakɛ Nyɔŋmɔ Mla lɛ bi ni afee lɛ. Shi akɛni Yudafoi lɛ miitao amɛgbe Yesu hewɔ lɛ, etee lɛ nigii. (Yohane 7:1) Be ni aye Hehoo lɛ ata lɛ, eku esɛɛ eba Galilea.

Eeenyɛ efee akɛ be ni Farisifoi lɛ kɛ woloŋmalɔi lɛ jɛ Yerusalem ba Yesu ŋɔɔ lɛ, no mli lɛ eyɛ Kapernaum. Mɛni hewɔ amɛba eŋɔɔ? Amɛmiitao nɔ ko ni amɛbaadamɔ nɔ koni amɛkɛ sane afɔ̃ Yesu nɔ akɛ etɔ̃ Nyɔŋmɔ Mla lɛ nɔ. Amɛbi lɛ akɛ: “Mɛni hewɔ okaselɔi lɛ kuɔ blematsɛmɛi lɛ akusum lɛ mli lɛ? Akɛ nɔkwɛmɔnɔ lɛ, amɛfɔɔɔ amɛdɛ̃ dani amɛyeɔ nii.” (Mateo 15:2) Nyɔŋmɔ ekɛko ewebii lɛ akɛ amɛye kusum ni ji akɛ, ‘amɛfɔ amɛniji ahe kɛyashi amɛnikutso’ lɛ nɔ. (Marko 7:3) Fɛɛ sɛɛ lɛ, Farisifoi lɛ buɔ mɔ ko ni efeee nakai lɛ akɛ eetɔ̃ tɔmɔ ni yɔɔ hiɛdɔɔ.

Yɛ nɔ najiaŋ ni Yesu aahã sane ni amɛkɛfɔ̃ɔ enɔ lɛ hetoo tɛ̃ɛ lɛ, egbala amɛjwɛŋmɔ kɛtee bɔ ni amɛjeɔ gbɛ amɛkuɔ Nyɔŋmɔ Mla lɛ mli lɛ moŋ nɔ. Ebi amɛ akɛ: “Mɛni hewɔ nyɛkuɔ Nyɔŋmɔ kitã lɛ mli yɛ nyɛkusum lɛ hewɔ lɛ? Akɛ nɔkwɛmɔnɔ lɛ, Nyɔŋmɔ kɛɛ akɛ, ‘Wo otsɛ kɛ onyɛ,’ ni, ‘Mɔ ni wieɔ wiemɔi fɔji eshiɔ etsɛ aloo enyɛ lɛ, agbe lɛ.’ Shi nyɛkɛɔ akɛ, ‘Mɔ fɛɛ mɔ ni kɛɔ etsɛ aloo enyɛ akɛ: “Nɔ fɛɛ nɔ ni miyɔɔ ni kulɛ obaaná he sɛɛ lɛ, eji nɔkeenɔ ni ajɔɔ nɔ ahã Nyɔŋmɔ” lɛ, ehiaaa akɛ ewoɔ etsɛ kwraa.’”​—Mateo 15:3-6; 2 Mose 20:12; 21:17.

Farisifoi lɛ tsɔɔ akɛ, kɛ́ mɔ ko jɔɔ eshika, loo nɔ ko ni eyɔɔ lɛ nɔ ehã Nyɔŋmɔ akɛ nɔkeenɔ lɛ, eji sɔlemɔwe lɛ nii, no hewɔ lɛ, mɔ lɛ nyɛŋ ekɛfee nɔ kroko. Shi yɛ anɔkwale mli lɛ, nakai nɔ ni ajɔɔ nɔ akɛ nɔkeenɔ lɛ kãahe ehiɔ mɔ lɛ ŋɔɔ. Akɛ nɔkwɛmɔnɔ lɛ, binuu ko baanyɛ akɛɛ akɛ eshika loo enii ni eyɔɔ lɛ ji “korban,” ni tsɔɔ akɛ ejɔɔ nɔ ehã Nyɔŋmɔ loo sɔlemɔwe lɛ akɛ nɔkeenɔ, oookɛɛ nɔ ni sɔlemɔwe lɛ yɛ nii lɛ nɔ hewalɛ fe mɔ fɛɛ mɔ. Eyɛ mli akɛ shika lɛ loo nii lɛ yɛ binuu lɛ dɛŋ lolo ní ebaanyɛ ekɛfee nɔ ko moŋ, shi nɔ ni ewie lɛ tsɔɔ akɛ enyɛŋ ekɛ nakai nɔkeenɔ lɛ aye abua efɔlɔi ni edara ni ehia amɛ lɛ. Ni no hewɔ lɛ ejoɔ sɔ̃ ni kã enɔ akɛ ekwɛ amɛ lɛ naa foi.​—Marko 7:11.

Nyɔŋmɔ Mla lɛ ni amɛtsɔmɔ lɛ yɛ nɛkɛ gbɛ nɔ lɛ wo Yesu mli la waa, ni eja gbɛ nakai, ekɛɛ amɛ akɛ: “Nyɛgu Nyɔŋmɔ wiemɔ lɛ yɛ nyɛkusum lɛ hewɔ. Osatofoi, eja pɛ akɛ Yesaia gba yɛ nyɛhe be ni ekɛɛ akɛ: ‘Maŋ nɛɛ kɛ amɛnaabu woɔ mi, shi amɛtsuii etsi amɛhe kɛje mihe kɛtee shɔŋŋ. Yakatswaa amɛyaa nɔ amɛjáa mi lɛ, ejaakɛ amɛtsɔɔ tsɔɔmɔi ni ji gbɔmɛi akitãi.’” Farisifoi lɛ nyɛɛɛ ajie nɔ ni Yesu wie eshi amɛ lɛ naa. No hewɔ lɛ Yesu tsɛ asafoku lɛ kɛba. Ni ekɛɛ amɛ akɛ: “Nyɛboa toi ni nyɛnua shishi: Jeee nɔ ni boteɔ gbɔmɔ daaŋ ji nɔ ni buleɔ lɛ, shi moŋ nɔ ni jɛɔ edaaŋ lɛ ji nɔ ni buleɔ lɛ.”​—Mateo 15:6-11; Yesaia 29:13.

Sɛɛ mli be ni Yesu kɛ ekaselɔi lɛ yɔɔ shĩa ko mli lɛ, amɛbi lɛ akɛ: “Ole akɛ be ni Farisifoi lɛ nu nɔ ni owie lɛ amɛnane tɔ̃tɔ?” Ehere nɔ ekɛɛ: “Tso fɛɛ tso ni jeee miŋwɛi Tsɛ lɛ tɛo lɛ, abaafã. Nyɛkadia amɛsɛɛ. Gbɛtsɔɔlɔi shwilafoi ji amɛ. Belɛ, kɛ́ shwilafo tsɔɔ shwilafo gbɛ lɛ, amɛyi enyɔ lɛ fɛɛ amɛbaayagbee bu mli.”​—Mateo 15:12-14.

Shi be ni Petro damɔ kaselɔi lɛ anajiaŋ ebi ni Yesu agbala nɔ ni buleɔ mɔ lɛ mli lɛ, Yesu hiɛ fee lɛ yaa. Yesu here nɔ akɛ: “Ani nyɛleee akɛ nɔ fɛɛ nɔ ni boteɔ mɔ daaŋ lɛ, musuŋ eyaa ni ajieɔ awoɔ tiafi mli? Shi nɔ fɛɛ nɔ ni jɛɔ daaŋ  jeɔ kpo lɛ, tsui lɛ mli ejɛɔ, ni nomɛi buleɔ gbɔmɔ. Akɛ nɔkwɛmɔnɔ lɛ, tsui lɛ mli susumɔi fɔji, gbɔmɔgbei, gbalafitemɔi, bɔlɛnamɔ jeŋba sha, jui, amale odasei, kɛ musubɔi jɛɔ. Enɛɛmɛi ji nibii ni buleɔ gbɔmɔ; shi dɛ̃ ni afɔɔɔ dani ayeɔ nii lɛ, no buleee gbɔmɔ.”​—Mateo 15:17-20.

Yesu wooo fɔ̃feemɔ he hewalɛ, asaŋ etsɔɔɔ akɛ esaaa akɛ afɔɔ dɛ̃ dani ahoɔ nii loo ayeɔ nii. Moŋ lɛ, eewie eeshi jamɔŋ hiɛnyiɛlɔi osatofoi lɛ ni kuɔ amɛhiɛ shwieɔ Nyɔŋmɔ mlai ni ja lɛ anɔ yɛ adesai akusumii ahewɔ lɛ. Anɔkwa, nifeemɔi fɔji ní jeɔ shishi yɛ tsui lɛ mli lɛ ji nɔ ni buleɔ mɔ.