Mɛi ni yɔɔ Nazaret lɛ kɛ miishɛɛ miikpa nɔ ko gbɛ. Dani Yesu baaya Yohane ŋɔɔ ni ebaptisi lɛ nɔ ni fe afi ni eho nɛ lɛ, no mli lɛ eji kapintafonyo yɛ Nazaret. Shi amrɔ nɛɛ, ale lɛ akɛ nuu ni tsuɔ hewalɛ nitsumɔi. Maŋ lɛ mli bii lɛ miikpa gbɛ akɛ ebaatsu hewalɛ nitsumɔi nɛɛ eko yɛ amɛteŋ.

Amɛgbɛkpamɔ lɛ mli bawa be ni Yesu tee kpeehe lɛ, taakɛ efɔɔ feemɔ lɛ. Nibii ni afeɔ yɛ “hejɔɔmɔ gbi fɛɛ hejɔɔmɔ gbi” nɔ “yɛ kpeehei lɛ” ekomɛi ji akɛ, asɔleɔ ni akaneɔ Mose niŋmai lɛ. (Bɔfoi 15:21) Kɛfata he lɛ, akaneɔ gbalɛ woji lɛ fãi komɛi. Be ni Yesu te shi damɔ shi koni ekane nii lɛ, eeenyɛ efee akɛ, ena mɛi komɛi ni afii komɛi ni eho lɛ ekɛ amɛ kpeɔ yɛ kpeehe nɛɛ. Aŋɔ gbalɔ Yesaia wolokpo lɛ ahã lɛ. Ena he ni wieɔ mɔ ni akɛ Yehowa mumɔ lɛ efɔ lɛ mu lɛ he, ní ŋmɛnɛ lɛ wɔnaa yɛ Yesaia 61:1, 2 lɛ.

Yesu kane bɔ ni akɛɛ mɔ ni agba ehe sane nɛɛ baashiɛ etsɔɔ nomii akɛ amɛbaaye amɛhe, kɛ shwilafoi akɛ amɛbaana nii, kɛ afi ni sa Yehowa hiɛ lɛ he sane. Yesu ŋɔ wolokpo lɛ ehã sɔɔlɔ lɛ, ni eho eta shi. Mɛi lɛ fɛɛ kwɛ lɛ diŋŋ. Kɛkɛ ni Yesu bɔi wiemɔ, eeenyɛ efee akɛ ewiemɔ lɛ sɛɛ kɛ, ni wiemɔi ni sa kadimɔ waa nɛɛ fata he: “Ŋmɛnɛ lɛ, ŋmalɛ nɛɛ ni nyɛnu bianɛ lɛ eba mli.”​—Luka 4:21.

Mɛi lɛ anaa kpɛ amɛhe yɛ “wiemɔi ni ŋɔɔ ni jɛɔ edaaŋ lɛ” hewɔ, ni amɛkɛɛkɛɛ akɛ: “Yosef bi nɛ, aloo jeee nakai?” Shi be ni Yesu yɔse akɛ amɛmiitao ni efee naakpɛɛ nii ni amɛnu akɛ efeɔ lɛ eko lɛ, ekɛɛ akɛ: “Ŋwanejee ko bɛ he akɛ nyɛbaabu mi abɛ nɛɛ: ‘Helatsalɔ, tsa bo diɛŋtsɛ ohe. Feemɔ nibii ni wɔnu akɛ ofee yɛ Kapernaum lɛ yɛ biɛ ni ji bo diɛŋtsɛ omaŋ lɛ hu.’” (Luka 4:22, 23) Ekolɛ, Yesu tsutsu akutsoŋbii lɛ susu akɛ, esa akɛ eje mɛi atsamɔ lɛ shishi kɛjɛ emaŋ, koni amɛ tsutsu amɛná he sɛɛ. No hewɔ lɛ, ekolɛ amɛbaanu he akɛ Yesu ebuuu amɛ.

Be ni Yesu na amɛsusumɔ lɛ, etsĩ nifeemɔi komɛi ni tee nɔ yɛ Israel yinɔsane mli lɛ tã. Ewie akɛ, yei okulafoi babaoo yɛ Israel yɛ Elia beiaŋ, shi atsuuu Elia amɛteŋ mɔ ko mɔ ko ŋɔɔ. Moŋ lɛ, atsu lɛ kɛtee yoo okulafo ko ni jeee Israelnyo ni yɔɔ Zarefat, maŋ ko ni bɛŋkɛ Sidon lɛ ŋɔɔ, he ni efee naakpɛɛ nii ni hã ahere mɛi ayiwala yɛ lɛ. (1 Maŋtsɛmɛi 17:8-16) Agbɛnɛ hu, yɛ Elisha beiaŋ lɛ, kpitiyelɔi babaoo yɛ Israel, shi Naeman, Sirianyo lɛ pɛ kpiti lɛ gbalɔ lɛ tsa.​—2 Maŋtsɛmɛi 5:1, 8-14.

Te Yesu maŋbii lɛ fee amɛnii amɛhã tɛŋŋ be ni ekɛ yinɔsane mli nibii ni eŋɔɔɔ amɛnaa lɛ to nii ahe kɛkpa ŋkomeŋfa su ni amɛhiɛ kɛ hemɔkɛyeli ni amɛbɛ lɛ he mama lɛ? Mɛi ni yɔɔ kpeehe lɛ amli fu, amɛte shi, ni amɛshwie Yesu kɛje maŋ lɛ mli. Amɛkɛ lɛ tee gɔŋ ni Nazaret ma nɔ lɛ toi, ni amɛka akɛ amɛbaatsi eyisɛɛ amɛwo jɔɔ lɛ mli. Shi Yesu sha ehe kɛje amɛdɛŋ, ni etee shweshweeshwe. Agbɛnɛ, Yesu kpeleke shi kɛtee Kapernaum, maŋ ko ni yɔɔ Galilea Ŋshɔ lɛ kooyi-anai lɛ.