Yesu etsɔ hiɛ egba ekaselɔi lɛ nɔkwɛmɔnɔ ko ni tsɔɔ nɔ hewɔ ni esa akɛ amɛya nɔ amɛsɔle ni amɛkakpa lɛ. (Luka 11:5-13) Eeenyɛ efee akɛ eyɛ Samaria loo Galilea lolo, ni shi kome ekoŋŋ lɛ ewie bɔ ni esa akɛ amɛsɔle ni amɛkakpa lɛ he. Ekɛ nɔkwɛmɔnɔ kroko tsɔɔ enɛ:

“Kojolɔ ko hi maŋ ko nɔ, esheee Nyɔŋmɔ gbeyei, ni ebuuu gbɔmɔ hu. Yoo okulafo ko hu yɛ nakai maŋ lɛ mli, ni etee eŋɔɔ shii abɔ eyakɛɛ akɛ, ‘Kwɛmɔ ni oye jalɛ sane ohã mi yɛ mɔ ni mikɛyeɔ sane lɛ dɛŋ.’ Anɔkwa, ekpɛlɛɛɛ aahu kɛyashi be ko, shi sɛɛ mli lɛ ekɛɛ yɛ eyiŋ akɛ, ‘Eyɛ mli akɛ misheee Nyɔŋmɔ gbeyei ni mibuuu gbɔmɔ moŋ, shi akɛni yoo okulafo nɛɛ kã he eegba minaa hewɔ lɛ, makwɛ ni maye jalɛ sane mahã lɛ koni ekakã he eba miŋɔɔ ni ekɛ enibimɔ lɛ basu mitsui kɛyashi mimumɔ naa tã.’”​—Luka 18:2-5.

Yesu tsɔɔ nɔkwɛmɔnɔ lɛ mli akɛ: “Nyɛboa nɔ ni kojolɔ ni ejeee jalɔ lɛ po kɛɛ lɛ toi! Belɛ, yɛ anɔkwale mli lɛ, ani Nyɔŋmɔ yeŋ jalɛ sane ehãŋ emɛi ni ehala ni bolɔɔ tsɛɔ lɛ shwane kɛ nyɔɔŋ lɛ, be mli ni etoɔ etsui shi ehãa amɛ lɛ?” (Luka 18:6, 7) Mɛni Yesu taoɔ atsɔɔ wɔ yɛ e-Tsɛ lɛ he lɛ?

Ekã shi faŋŋ akɛ, nɔ ni Yesu wie lɛ etsɔɔɔ akɛ Yehowa Nyɔŋmɔ feɔ enii tamɔ kojolɔ ni ejaaa lɛ. Ekɛ sane miito sane he kɛmiitsɔɔ akɛ: Kɛ́ kojolɔ ni ji adesa ni ejaaa lɛ po baafee nɔ ni mɔ ko taoɔ lɛ ehã lɛ akɛni mɔ lɛ kpaaa enaagbamɔ lɛ hewɔ lɛ, enyiɛ nɔŋŋ Nyɔŋmɔ boŋ wɔ toi kɛ wɔtee nɔ wɔbi lɛ nɔ ko. Jalɔ ji lɛ, ni ehi hu, ni ebaahã etsuji ni yaa nɔ amɛbiɔ lɛ nii ni amɛkpaaa lɛ hetoo. Wɔnaa enɛ yɛ nɔ ni Yesu wie kɛtsa nɔ lɛ mli, ewie akɛ: “Miikɛɛ nyɛ akɛ, [Nyɔŋmɔ baaye] jalɛ sane ehã amɛ oya.”​—Luka 18:8.

Bei pii lɛ, ayeɔ sane ashiɔ mɛi foji kɛ ohiafoi, shi ayeɔ sane ahãa mɛi ni yɔɔ hegbɛi wuji kɛ niiatsɛmɛi. Shi Nyɔŋmɔ efeee nakai. Yɛ be ni sa mli lɛ, Nyɔŋmɔ baagbala efɔŋfeelɔi atoi ni ebaahã etsuji lɛ naanɔ wala.

Namɔ yɔɔ hemɔkɛyeli tamɔ yoo okulafo lɛ? Mɛi enyiɛ heɔ amɛyeɔ lɛɛlɛŋ akɛ Nyɔŋmɔ baaye “jalɛ sane ehã amɛ oya”? Nɔkwɛmɔnɔ ni Yesu gba lɛ tsɔɔ akɛ esa akɛ wɔya nɔ wɔsɔle ni wɔkakpa. Agbɛnɛ ebi sane ko ni ekɛtsɔɔ akɛ sɔlemɔ tsuɔ nii waa, ebi akɛ: “Kɛ́ gbɔmɔ Bi lɛ ba lɛ, ani ebaaba ebana hemɔkɛyeli nɛɛ yɛ shikpɔŋ lɛ nɔ lɛɛlɛŋ?” (Luka 18:8) Nɔ ni etaoɔ etsɔɔ ji akɛ, kɛ́ Kristo ba lɛ, ekolɛ ebaana akɛ mɛi babaoo bɛ hemɔkɛyeli tamɔ nɛkɛ.

Mɛi ni boɔ Yesu toi lɛ ateŋ mɛi komɛi susuɔ akɛ amɛyɛ hemɔkɛyeli fe mɔ fɛɛ mɔ. Amɛbuɔ amɛhe jalɔi, ni amɛbuɔ mɛi krokomɛi akɛ amɛjaaa. No hewɔ lɛ, Yesu gba nɔkwɛmɔnɔ ni nyiɛ sɛɛ nɛɛ kɛkɔ mɛi nɛɛ ahe, ekɛɛ:

“Hii enyɔ kwɔ kɛtee sɔlemɔwe lɛ koni amɛyasɔle, mɔ kome lɛ Farisifonyo ji lɛ, ni mɔ kroko lɛ, toohelɔ ni. Farisifonyo lɛ ho edamɔ shi ni ebɔi sɔlemɔ yɛ eyiŋ ewie nibii nɛɛ, ‘Oo Nyɔŋmɔ, miida bo shi akɛ mitamɔɔɔ mɛi krokomɛi lɛ​—ojotswalɔi, mɛi ni ejaaa, gbalafitelɔi​—loo tamɔ toohelɔ nɛɛ po. Mihiɔ ŋmaa shii enyɔ daa otsi; miŋɔɔ  nibii fɛɛ ni mináa lɛ mlijaa nyɔŋma mihãa.’”​—Luka 18:10-12.

Ale Farisifoi lɛ akɛ mɛi ni feɔ nii yɛ mɛi ahiɛ koni mɛi ana amɛ akɛ amɛja. Gbii ni amɛfɔɔ ŋmaahilɛ, ni amɛ diɛŋtsɛ amɛto shishi lɛ ji, Ju kɛ Soo, ni ji jarayeli gbii wuji ni sɔɔ waa lɛ, koni mɛi pii ana amɛ. Ni amɛbɔɔ mɔdɛŋ akɛ amɛbaawo mlijaa nyɔŋma yɛ kwɛ̃ɛnii bibii po anɔ. (Luka 11:42) Nyɔji fioo komɛi ni eho lɛ, amɛnyaŋe mɛi foji lɛ amɛkɛɛ: “Asafoku nɛɛ ni leee Mla lɛ [yɛ Farisifoi lɛ asusumɔ naa lɛ], alomɔ amɛ.”​—Yohane 7:49.

Yesu tsa nɔkwɛmɔnɔ lɛ nɔ ekɛɛ: “Shi toohelɔ lɛ damɔ sɛɛ shɔŋŋ, ni esumɔɔɔ akɛ eholeɔ ehiŋmɛii anɔ kɛyaa ŋwɛi po, shi etee nɔ egbala etsitsi mai ekɛɛ, ‘Oo Nyɔŋmɔ, duromɔ mi, mi eshafeelɔ nɛɛ.’” Hɛɛ, toohelɔ nɛɛ jɛ heshibaa mli ejaje akɛ eyeee emuu. Yesu mu nɔkwɛmɔnɔ lɛ naa akɛ: “Miikɛɛ nyɛ akɛ, nuu nɛɛ kpeleke shi kɛtee eshĩa akɛ jalɔ fe nakai Farisifonyo lɛ. Ejaakɛ mɔ fɛɛ mɔ ni wóɔ ehe nɔ lɛ, abaaba lɛ shi, shi mɔ fɛɛ mɔ ni baa ehe shi lɛ, abaawó enɔ.”​—Luka 18:13, 14.

Yesu hã efee faŋŋ akɛ, esa akɛ wɔba wɔhe shi. Ŋaa ni Yesu wo nɛɛ he baaba sɛɛnamɔ kɛhã ekaselɔi lɛ ejaakɛ amɛyɛ Farisifoi ni buɔ amɛhe jalɔi tuutu ni buɔ mɛi ni yɔɔ hegbɛ kɛ gbɛnaa lɛ akɛ mɛi ni hiɛ yɔɔ nyam lɛ ateŋ. Ni eji ŋaawoo kpakpa hu kɛhã Yesu sɛɛnyiɛlɔi fɛɛ.