Be ni Yesu kɛ ekaselɔi lɛ jɛ Perea kɛyaa Yerusalem lɛ, amɛfo Yordan Faa lɛ yɛ he ko ni bɛŋkɛ Yeriko. Mɛi krokomɛi fata amɛhe kɛmiifã gbɛ lɛ koni amɛyaye afi 33 Ŋ.B. Hehoo lɛ.

Yesu nyiɛ kaselɔi lɛ ahiɛ, eesumɔ ni eyashɛ Yerusalem dani aye Hehoo lɛ. Shi kaselɔi lɛ miishe gbeyei. Be ni Lazaro gbo, ni Yesu miishi Perea kɛya Yudea lɛ, Toma kɛɛ kaselɔi krokomɛi lɛ akɛ: “Nyɛhãa wɔ hu wɔyaa koni wɔkɛ lɛ ayagbo.” (Yohane 11:16, 47-53) No hewɔ lɛ, eyɛ oshara waa akɛ amɛbaaya Yerusalem, ni enɛ he gbeyei kaselɔi lɛ sheɔ lɛ.

Bɔ ni afee ni Yesu asaa bɔfoi lɛ eto nɔ ni amɛkɛbaakpe lɛ, etsɛ amɛ kɛtee afã ni ekɛɛ amɛ akɛ: “Wɔmiikwɔ kɛmiiya Yerusalem, ni abaaŋɔ gbɔmɔ Bi lɛ awo osɔfoi tsiifoi lɛ kɛ woloŋmalɔi lɛ adɛŋ. Amɛbaabu lɛ gbele fɔ ni amɛbaaŋɔ lɛ amɛhã jeŋmajiaŋbii lɛ koni amɛye ehe fɛo ni amɛkɛ kpelebii ayi lɛ ni amɛgbe lɛ yɛ tso jaŋŋ nɔ; ni yɛ gbi ni ji gbi etɛ lɛ nɔ lɛ, abaatee lɛ shi.”​—Mateo 20:18, 19.

Enɛ ji shii etɛ nɔ ni Yesu kɛ ekaselɔi lɛ wieɔ egbele kɛ eshitee lɛ he. (Mateo 16:21; 17:22, 23) Shi yɛ nɔ ni ekɛ amɛ wieɔ amrɔ nɛɛ mli lɛ, etsĩ tã akɛ abaagbe lɛ yɛ tso jaŋŋ nɔ. Amɛbo lɛ toi shi amɛnuuu nɔ ni ekɛ amɛ wieɔ lɛ shishi. Ekolɛ amɛmiikpa gbɛ akɛ abaasaa ato Israel Maŋtsɛyeli lɛ shishi, ni amɛ kɛ Kristo baaye maŋtsɛ yɛ shikpɔŋ lɛ nɔ ni abaawo amɛhiɛ nyam ni akɛ woo baahã amɛ.

Yakobo kɛ Yohane mami, ni ekolɛ lɛ ji Salome lɛ fata he ni amɛfãa gbɛ lɛ. Eeenyɛ efee akɛ bɔ ni bɔfoi enyɔ nɛɛ ahiɛ yɔɔ laŋlaŋ lɛ hewɔ lɛ, Yesu wo amɛ gbɛ́i ko ni shishi ji “Nugbɔshiimɔ Bii.” (Marko 3:17; Luka 9:54) Be saŋŋ nɛ lɛ, bɔfoi enyɔ nɛɛ miisumɔ ni amɛná hegbɛ wulu ko yɛ Kristo Maŋtsɛyeli lɛ mli.  Amɛmami le enɛ. No hewɔ lɛ, eyana Yesu ehã amɛ, ni ekoto lɛ koni ebi lɛ nii. Yesu bi lɛ akɛ: “Mɛni otaoɔ?” Yoo lɛ here lɛ nɔ akɛ: “Kɛɛmɔ koni mibihii enyɔ lɛ ateŋ mɔ kome ata oninejurɔ nɔ, ni mɔ kome hu ata obɛku nɔ, yɛ o-Maŋtsɛyeli lɛ mli.”​—Mateo 20:20, 21.

Yakobo kɛ Yohane diɛŋtsɛ ji mɛi ni hɔ nibimɔ nɛɛ sɛɛ. No mli lɛ, Yesu ehã kaselɔi lɛ ele akɛ abaashwie ehiɛ shi ni abaafee lɛ nibii ni esaaa, no hewɔ lɛ ebi Yakobo kɛ Yohane akɛ: “Nyɛleee nɔ ni nyɛbiɔ lɛ. Ani nyɛbaanyɛ nyɛnu kpulu ni miiba mibanu lɛ?” Amɛkɛɛ lɛ akɛ: “Wɔbaanyɛ.” (Mateo 20:22) Shi no mli lɛ, ekã shi faŋŋ akɛ amɛnuko nɔ ni Yesu tsɔɔ lɛ shishi lolo.

Fɛɛ sɛɛ lɛ, Yesu kɛɛ amɛ akɛ: “Anɔkwa, nyɛbaanu kpulu lɛ moŋ, shi mininejurɔ kɛ mibɛku nɔ taramɔ lɛ, jeee minɔŋ ni mikɛbaahã, shi moŋ mɛi ni mi-Tsɛ esaa eto amɛ lɛ anɔ ni.”​—Mateo 20:23.

Be ni bɔfoi nyɔŋma ni eshwɛ lɛ ná le nɔ ni Yakobo kɛ Yohane eyabi lɛ, amɛmli wo la. Ani eeenyɛ efee akɛ klɛŋklɛŋ be ni bɔfoi lɛ taa naa yɛ mɔ ni ji agbo fe fɛɛ yɛ amɛteŋ lɛ he lɛ, Yakobo kɛ Yohane naa yawa yɛ mli? (Luka 9:46-48) Bɔ fɛɛ bɔ ni ji lɛ, nɔ ni amɛyabi amrɔ nɛɛ tsɔɔ akɛ bɔfoi 12 lɛ kɛ ŋaa ni Yesu wo amɛ akɛ amɛfee amɛnii akɛ mɛi ni baa shi lɛ tsuko nii. Amɛkahe amɛmiipele hegbɛ he.

Yesu kpɛ mli akɛ ebaatsu naataamɔ nɛɛ he nii. Etsɛ mɛi 12 lɛ kɛba ni ejɛ suɔmɔ mli ewo amɛŋaa akɛ: “Nyɛle akɛ mɛi ni abuɔ amɛ jeŋmaji lɛ anɔyelɔi lɛ yeɔ amɛnɔ akɛ nuŋtsɔmɛi, ni amɛgbɔmɛi agboi lɛ hu yɛ amɛnɔ hewalɛ. Esaaa akɛ afeɔ nakai yɛ nyɛteŋ; moŋ lɛ, mɔ fɛɛ mɔ ni miisumɔ akɛ etsɔ agbo yɛ nyɛteŋ lɛ, esa akɛ etsɔ nyɛsɔɔlɔ, ni mɔ fɛɛ mɔ ni miisumɔ akɛ etsɔ klɛŋklɛŋ mɔ yɛ nyɛteŋ lɛ, esa akɛ etsɔ nyɔŋ kɛhã mɛi fɛɛ.”​—Marko 10:42-44.

Yesu hã amɛna mɔ ni esa akɛ amɛkase, ni ji lɛ diɛŋtsɛ. Ekɛɛ amɛ akɛ: “Gbɔmɔ Bi lɛ baaa koni asɔmɔ lɛ, shi eba sɔɔmɔ moŋ, koni ebaŋɔ ewala ehã akɛ kpɔmɔnɔ kɛkpɔ̃ mɛi babaoo.” (Mateo 20:28) Yesu kɛ afii etɛ sɔŋŋ esɔmɔ mɛi. Ni ebaagbo po kɛhã adesai! Esa akɛ kaselɔi lɛ aná esu nɛɛ eko ni amɛbɔ mɔdɛŋ akɛ amɛbaasɔmɔ mɛi krokomɛi moŋ fe akɛ amɛbaatao hegbɛi.