Mɛi ebale Yesu waa kɛjɛ be ni abaptisi lɛ lɛ kɛbashi bianɛ. Yudafoi akpei abɔ ena naakpɛɛ nii ni efee lɛ, ni naakpɛɛ nii ni efee lɛ he amaniɛbɔɔ egbɛ eshwa shikpɔŋ lɛ fɛɛ nɔ. Amrɔ nɛɛ, mɛi ni eba Yerusalem kɛhã Agbai (loo Asesei) Agbi Jurɔ lɛ miikpa gbɛ akɛ amɛbaana lɛ.

Mɛi hiɛ Yesu he jwɛŋmɔi srɔtoisrɔtoi. Mɛi komɛi kɛɛ akɛ: “Gbɔmɔ kpakpa ji lɛ.” Mɛi komɛi hu kɛɛ: “Ejeee gbɔmɔ kpakpa. Elakaa asafoku lɛ.” (Yohane 7:12) Wiemɔi ni tamɔ nɛkɛ tee nɔ yɛ gbijurɔyeli lɛ klɛŋklɛŋ gbii lɛ amli shi amɛwie yɛ ablɛbiaŋ. Kɛ̃lɛ mɔ ko mɔ ko náa ekãa ni ebaawie Yesu he yɛ faŋŋ, ejaakɛ amɛmiishe nɔ ni Yudafoi ahiɛnyiɛlɔi lɛ baafee amɛ lɛ gbeyei.

Be ni shɛ gbijurɔyeli lɛ teŋgbɛ lɛ, Yesu pue yɛ sɔlemɔwe lɛ. Bɔ ni ele nitsɔɔmɔ jogbaŋŋ lɛ fee mɛi babaoo naakpɛɛ waa. Akɛni eyako rabifoi askul srɔtoi lɛ eko hewɔ lɛ, Yudafoi lɛ ahiɛ fee amɛ yaa, ni amɛbi akɛ: “Te nuu nɛɛ fee tɛŋŋ ele Ŋmalɛi lɛ amli nɛkɛ, be mli ni ekaseko nii yɛ skul ko kwraa mli lɛ?”​—Yohane 7:15.

Yesu kɛɛ akɛ: “Nɔ ni mitsɔɔ lɛ, jeee minɔ ni, shi moŋ mɔ ni tsu mi lɛ nɔ ni. Kɛji mɔ ko miisumɔ akɛ efee E-suɔmɔnaa nii lɛ, ebaale kɛji nitsɔɔmɔ lɛ jɛ Nyɔŋmɔ ŋɔɔ aloo mi diɛŋtsɛ mitoɔ miyiŋ miwieɔ.” (Yohane 7:16, 17) Nɔ ni Yesu tsɔɔ lɛ kɛ Nyɔŋmɔ Mla lɛ kpãa gbee, belɛ eyɛ faŋŋ akɛ etaooo ewo lɛ diɛŋtsɛ ehiɛ nyam, shi moŋ eetao ewo Nyɔŋmɔ hiɛ nyam.

Kɛkɛ ni Yesu kɛɛ akɛ: “Mose hã nyɛ Mla lɛ, aloo jeee nakai? Shi nyɛteŋ mɔ ko mɔ ko yeee Mla lɛ nɔ. Mɛni hewɔ nyɛtaoɔ mi nyɛgbe lɛ?” Asafoku lɛ ateŋ mɛi komɛi ni eeenyɛ efee akɛ jeee maŋ lɛŋ amɛyɔɔ lɛ leee akɛ aatao lɛ agbe. Ewa kɛhã amɛ akɛ amɛaahe amɛye akɛ mɔ ko baasumɔ ni egbe tsɔɔlɔ ni tamɔ nɛkɛ. No hewɔ lɛ, amɛsusu akɛ, ekolɛ nɔ ko miigba Yesu naa no hewɔ ewieɔ nakai lɛ. Amɛkɛɛ lɛ akɛ: “Oyɛ daimonio. Namɔ taoɔ bo agbe?”​—Yohane 7:19, 20.

Yɛ anɔkwale mli lɛ, afi kɛ fã nɛ ni Yesu tsa nuu ko yɛ Hejɔɔmɔ Gbi lɛ nɔ lɛ, no mli lɛ, Yudafoi ahiɛnyiɛlɔi lɛ miitao lɛ amɛgbe. Yesu tsɔ ŋaa gbɛ nɔ ekɛ amɛsusu nii ahe ni ekpa jwɛŋmɔ gbonyo ni amɛhiɛ lɛ he mama. Etsɔɔ mli akɛ, yɛ Mla lɛ naa lɛ, abaanyɛ afo gbekɛ nuu ko ketia yɛ gbi ni ji kpaanyɔ lɛ nɔ kɛ eji Hejɔɔmɔ Gbi po. No sɛɛ lɛ ebi amɛ akɛ: “Kɛ́ afoɔ gbɔmɔ ketia yɛ Hejɔɔmɔ Gbi nɔ koni akaku Mose Mla lɛ mli lɛ, ani nyɛ lɛ, nyɛmli efu mi waa akɛni mihã mɔ ko he wa lɛ jogbaŋŋ yɛ Hejɔɔmɔ Gbi nɔ lɛ hewɔ? Nyɛkpaa kponɔgbɛ ni nyɛkwɛɔ kɛkojoɔ lɛ, moŋ lɛ nyɛkojoa jalɛ kojomɔ.”​—Yohane 7:23, 24.

Mɛi ni yɔɔ Yerusalem ni le sane nɛɛ wie akɛ: “Mɔ nɛ ji mɔ ni [nɔyelɔi lɛ taoɔ] lɛ amɛgbe lɛ, aloo jeee lɛ ni? Ni kɛ̃lɛ, naa! eewie yɛ mɛi ahiɛ, ni amɛkɛɛɛ lɛ nɔ ko. Ani nɔyelɔi lɛ ená ele kɛ nɔmimaa akɛ mɔ nɛ ji Kristo lɛ?” Mɛni hewɔ mɛi lɛ heee yeee akɛ Yesu ji Kristo lɛ? Amɛwie akɛ: “Wɔle he ni nuu nɛɛ jɛ; kɛ̃lɛ kɛ́ Kristo lɛ ba lɛ, mɔ ko mɔ ko leŋ he ni ejɛ.”​—Yohane 7:25-27.

Yesu hã hetoo yɛ sɔlemɔwe lɛ nɔŋŋ akɛ: “Nyɛle mi ni nyɛle he ni mijɛ. Ni mitooo mi diɛŋtsɛ miyiŋ mibaaa, shi mɔ ni tsu mi lɛ yɛ lɛɛlɛŋ, ni nyɛleee lɛ. Mile lɛ, ejaakɛ najiaŋdamɔlɔ ni jɛ eŋɔɔ ji mi, ni nakai mɔ lɛ tsu mi.” (Yohane 7:28, 29) Enɛ hewɔ lɛ, amɛtao akɛ amɛbaamɔ Yesu ni amɛwo lɛ tsuŋ loo amɛgbe lɛ. Shi amɛyayeee omanye, ejaakɛ be ni akɛbaagbe Yesu lɛ shɛko.

Shi mɛi babaoo he Yesu nɔ ye. Enyiɛ ŋshɔ hiɛ, ehã kɔɔyɔɔ fɔ̃ɔ tswaa, etsɔ naakpɛɛ gbɛ nɔ ekɛ  aboloi fioo kɛ loo lɛ́ mɛi akpei abɔ, etsa helai, ehã akpakei nyiɛ, egbele shwilafoi ahiŋmɛi, etsa kpitiyelɔi, ni etee gbohii ashi po. Anɔkwa, amɛyɛ nibii kpakpai babaoo ni amɛbaanyɛ amɛdamɔ nɔ amɛbi akɛ: “Kɛ́ Kristo lɛ ba lɛ, ani ebaafee okadii babaoo fe nɔ ni nuu nɛɛ feɔ nɛɛ?”​—Yohane 7:31.

Be ni Farisifoi lɛ nu nɔ ni asafoku lɛ wieɔ lɛ, amɛ kɛ osɔfoi tsiifoi lɛ tsu bulɔi koni amɛyamɔ Yesu.