Yesu yɛ Yerusalem lolo yɛ Agbai (loo Asesei) Agbi Jurɔ lɛ shishi. Eŋɔɔ enaa akɛ ‘mɛi pii ená hemɔkɛyeli yɛ emli.’ Shi enɛ eŋɔɔɔ jamɔŋ hiɛnyiɛlɔi lɛ anaa. Amɛtsu bulɔi ni amɛkɛ amɛ tsuɔ nii tamɔ jamɔŋ polisifoi lɛ koni amɛyamɔ lɛ. (Yohane 7:31, 32) Kɛ̃lɛ, Yesu eyateee ehe.

Moŋ lɛ, Yesu tee nɔ etsɔɔ nii yɛ mɛi pii ahiɛ yɛ Yerusalem, ekɛɛ: “Mikɛ nyɛ baahi shi be fioo dani maya mɔ ni tsu mi lɛ ŋɔɔ. Nyɛbaatao mi, shi nyɛnaŋ mi, ni he ni miyɔɔ lɛ, nyɛnyɛŋ jɛmɛ nyɛba.” (Yohane 7:33, 34) Yudafoi lɛ nuuu nɔ ni ewieɔ lɛ shishi, no hewɔ lɛ amɛbibii amɛhe akɛ: “Nɛgbɛ nuu nɛɛ eto eyiŋ akɛ ebaaya, ni no hewɔ lɛ wɔnaŋ lɛ lɛ? Ani eeenyɛ efee akɛ eto eyiŋ akɛ ebaaya Yudafoi ni egbɛ eshwã Helabii lɛ ateŋ lɛ aŋɔɔ koni eyatsɔɔ Helabii lɛ anii? Mɛni etaoɔ etsɔɔ lɛ be ni ekɛɛ akɛ, ‘Nyɛbaatao mi, shi nyɛnaŋ mi, ni he ni miyɔɔ lɛ, nyɛnyɛŋ jɛmɛ nyɛba’ lɛ?” (Yohane 7:35, 36) Shi no mli lɛ, Yesu miiwie egbele kɛ shi ni abaatee lɛ ni eya ŋwɛi lɛ he. Ehenyɛlɔi lɛ nyɛŋ anyiɛ esɛɛ kɛya jɛmɛ.

Gbijurɔyeli lɛ gbi ni ji kpawo eshɛ. Kɛjɛ gbi klɛŋklɛŋ ni aje gbijurɔyeli lɛ shishi lɛ, daa leebi lɛ, osɔfo ko yatsɔɔ nu ni eyayɛ yɛ Siloam Kpaakpo lɛ mli lɛ kɛwoɔ okpolu ko mli koni eho kɛtsɔ afɔleshaa latɛ lɛ shishi. Yesu gbala mɛi lɛ ajwɛŋmɔ kɛba nakai nifeemɔ lɛ nɔ, ebo ekɛɛ: “Kɛ́ kumai miiye mɔ ko lɛ, eba miŋɔɔ ni ebanu nu. Mɔ fɛɛ mɔ ni náa hemɔkɛyeli yɛ mimli lɛ, taakɛ ŋmalɛ lɛ ekɛɛ lɛ: ‘Fai ni wala nu yɔɔ mli baajɛ emli tɔ̃ɔ aho.’”​—Yohane 7:37, 38.

No mli lɛ Yesu miiwie nɔ ni baaba kɛji akɛ mumɔ krɔŋkrɔŋ lɛ fɔ ekaselɔi lɛ mu ni amɛná hegbɛ akɛ amɛbaaya ŋwɛi lɛ he. Enɛ ba mli yɛ Yesu gbele sɛɛ. Yɛ afi 33 Ŋ.B. Pentekoste gbi  lɛ nɔ lɛ, wala nu babaoo bɔi hoo be ni afɔ Yesu kaselɔi lɛ mu ni amɛtsɔɔ mɛi anɔkwale lɛ.

Nɔ ni Yesu tsɔɔ lɛ hewɔ lɛ, mɛi komɛi wie akɛ: “Gbalɔ lɛ nɛ lɛɛlɛŋ.” Ekã shi faŋŋ akɛ amɛmiiwie gbalɔ ni agba akɛ efe Mose lɛ he. Mɛi krokomɛi hu kɛɛ akɛ: “Kristo lɛ nɛ.” Shi mɛi komɛi hu kɛɛ akɛ: “Kristo lɛ, ani Galilea ebaajɛ? Ani ŋmalɛ lɛ ekɛɛɛ akɛ Kristo lɛ baajɛ David seshi lɛ mli, ni ebaajɛ Betlehem, akrowa ni David hi mli lɛ mli?”​—Yohane 7:40-42.

No hewɔ lɛ, asafoku lɛ mli gba enyɔ. Eyɛ mli akɛ mɛi komɛi miitao ni amɔ Yesu moŋ, shi mɔ ko mɔ ko etaaa ehe. Be ni bulɔi lɛ ku amɛsɛɛ kɛtee ni Yesu fataaa amɛhe lɛ, osɔfoi tsiifoi kɛ Farisifoi lɛ bi amɛ akɛ: “Mɛni hewɔ nyɛkɛ lɛ baaa lɛ?” Bulɔi lɛ here nɔ akɛ: “Gbɔmɔ ko gbɔmɔ ko ewieko nɛkɛ dã.” Farisifoi lɛ amli fu ni amɛwie amɛshi amɛ akɛ: “Ani nyɛ hu alaka nyɛ? Ani nɔyelɔi lɛ loo Farisifoi lɛ ateŋ mɔ ko ená emli hemɔkɛyeli? Shi asafoku nɛɛ ni leee Mla lɛ, alomɔ amɛ.”​—Yohane 7:45-49.

Be ni amɛwie enɛ lɛ, Nikodemo ni eji Farisifonyo kɛ Sanhedrin lɛ ateŋ mɔ ko lɛ wie ehã Yesu ni esheee gbeyei. Afii enyɔ kɛ fã ni eho nɛ lɛ, Nikodemo tee Yesu ŋɔɔ gbɛkɛ ni ená hemɔkɛyeli yɛ emli. Agbɛnɛ Nikodemo wie akɛ: “Wɔ-Mla lɛ ekojooo mɔ ko, ja anu enaa sane ni aná ale nɔ ni efeɔ dã, aloo jeee nakai?” Te amɛhã lɛ hetoo tɛŋŋ? Amɛkɛɛ lɛ akɛ: “Ani bo hu Galilea ojɛ? Taomɔ mli ni obaana akɛ gbalɔ ko eteŋ shi kɛjɛŋ Galilea.”​—Yohane 7:51, 52.

Ŋmalɛi lɛ ewieee tɛ̃ɛ akɛ gbalɔ ko baajɛ Galilea. Kɛ̃lɛ, Nyɔŋmɔ Wiemɔ lɛ tsɔɔ akɛ Kristo lɛ baajɛ jɛmɛ; egba akɛ abaana “la kpeteŋkpele” yɛ “jeŋmaji lɛ a-Galilea lɛ.” (Yesaia 8:23–9:1; Mateo 4:13-17) Kɛfata he lɛ, taakɛ agba lɛ, afɔ Yesu yɛ Betlehem, ni eji David seshinyo. Eyɛ mli akɛ ekolɛ Farisifoi lɛ le enɛ moŋ, shi amɛ titri ji mɛi ni gbɛɔ Yesu he amalei amɛshwaa lɛ.