Farisifoi lɛ sumɔɔɔ ni amɛkpɛlɛɔ nɔ akɛ Yesu ji mɔ ni hã nuu ni afɔ lɛ shwilafo lɛ naa nii lɛ, no hewɔ lɛ amɛtsɛ efɔlɔi kɛba. Nuu lɛ fɔlɔi lɛ le akɛ, abaanyɛ ‘ashwie amɛ kɛjɛ kpeehe lɛ.’ (Yohane 9:22) Shwiemɔ ni tamɔ nɛkɛ lɛ tsɔɔ akɛ Yudafoi krokomɛi lɛ kɛ nakai weku lɛ baafo tako mli, ni kɛ́ amɛhe fi amɛ lɛ, ayeŋ abuaŋ amɛ.

Farisifoi lɛ bi fɔlɔi lɛ saji enyɔ akɛ: “Ani nyɛbi lɛ ni nyɛkɛɔ akɛ afɔ lɛ shwilafo lɛ nɛ? Belɛ, te fee tɛŋŋ ni amrɔ nɛɛ enaa nii lɛ?” Efɔlɔi lɛ hã hetoo akɛ: “Wɔle akɛ wɔbi lɛ nɛ, ni akɛ afɔ lɛ shwilafo. Shi bɔ ni fee ni amrɔ nɛɛ enaa nii lɛ wɔleee; asaŋ mɔ ni gbele ehiŋmɛii lɛ hu wɔleee.” Kɛ́ nuu lɛ ekɛɛ efɔlɔi lɛ nɔ ni ba lɛ po lɛ, efɔlɔi lɛ kwɛ jogbaŋŋ ni amɛkawie nɔ ko ni kɛ amɛ baawo sane mli. Amɛkɛɛ akɛ: “Nyɛbia lɛ. Eda. Esa akɛ ewie ehã lɛ diɛŋtsɛ ehe.”​—Yohane 9:19-21.

No hewɔ lɛ, Farisifoi lɛ tsɛ nuu lɛ kɛba ekoŋŋ ni amɛwo ehe gbeyei akɛ, amɛyɛ odase ko kɛshi Yesu. Amɛkɛɛ nuu lɛ akɛ: “Ŋɔɔ anunyam ohã Nyɔŋmɔ; wɔle akɛ nuu nɛɛ eshafeelɔ ji lɛ.” Nuu ni tsutsu ko lɛ eshwila lɛ tswa amɛsane lɛ efɔ̃, ni ekɛɛ: “Kɛ́ eshafeelɔ ji lɛ lɛ, mi lɛ, mileee.” Kɛ̃lɛ, ekɛshi sɛɛ akɛ: “Nɔ kome mile, no ji akɛ kulɛ shwilafo ji mi, shi amrɔ nɛɛ miina nii.”​—Yohane 9:24, 25.

Akɛni Farisifoi lɛ sumɔɔɔ ni amɛŋmɛɔ sane lɛ he hewɔ lɛ, amɛsaa amɛbi nuu lɛ akɛ: “Mɛni efee bo? Te efee tɛŋŋ ni egbele ohiŋmɛii lɛ?” Nuu lɛ fee ekãa ni ehã amɛ hetoo akɛ: “Mikɛɛ nyɛ momo, ni kɛ̃lɛ nyɛbooo toi. Mɛni hewɔ nyɛtaoɔ nyɛnu ekoŋŋ lɛ? Ani nyɛ hu nyɛmiitao nyɛtsɔmɔ ekaselɔi?” Enɛ wo Farisifoi lɛ amli la, ni amɛkɛɛ lɛ akɛ: “Nakai nuu lɛ kaselɔ ji bo, shi wɔ lɛ Mose kaselɔi ji wɔ. Wɔle akɛ Nyɔŋmɔ kɛ Mose wie, shi nuu nɛɛ, wɔleee he ni ejɛ.”​—Yohane 9:26-29.

Bɔ ni nibalɔ lɛ naa kpɛ ehe sɔŋŋ hewɔ lɛ, ewie akɛ: “Eyɛ naakpɛɛ waa akɛ nyɛleee he ni ejɛ, ni kɛ̃lɛ egbele mihiŋmɛii.” Nuu lɛ tsɔ gbɛ ni nilee yɔɔ mli nɔ ekɛ amɛ susu mɔ ni Nyɔŋmɔ boɔ lɛ toi ní enáa ehe miishɛɛ lɛ he. Ekɛɛ: “Wɔle akɛ Nyɔŋmɔ booo eshafeelɔi atoi, shi kɛ́ mɔ ko sheɔ Nyɔŋmɔ gbeyei ni efeɔ esuɔmɔnaa nii lɛ, eboɔ mɔ nɛɛ toi. Kɛjɛ teteete lɛ, anuko akɛ mɔ ko egbele mɔ ko ni afɔ lɛ shwilafo hiŋmɛii dã.” Emu esane lɛ naa akɛ: “Eji nuu nɛɛ jɛɛɛ Nyɔŋmɔ ŋɔɔ kulɛ, enyɛŋ nɔ ko kwraa efee.”​—Yohane 9:30-33.

Akɛni Farisifoi lɛ nyɛɛɛ aje nɔ ni nibalɔ lɛ wie lɛ he ŋwane hewɔ lɛ, amɛwie amɛshi lɛ akɛ: “Bo lɛ, esha mli kwraa afɔ bo yɛ, ni kɛ̃lɛ bo moŋ otsɔɔ wɔ nii nɛɛ?” Ni amɛshwie lɛ kɛje jɛmɛ.​—Yohane 9:34.

Yesu ná le nɔ ni tee nɔ lɛ, ni be ni ena nuu lɛ, ebi lɛ akɛ: “Ani oná hemɔkɛyeli yɛ gbɔmɔ Bi lɛ mli?” Nuu ni atsa lɛ lɛ hã hetoo akɛ: “Onukpa, namɔ ni, koni maná hemɔkɛyeli yɛ emli?” Yesu kɛɛ lɛ faŋŋ akɛ: “Ona lɛ, ni anɔkwa, mɔ ni kɛ bo wieɔ lɛ, lɛ ji nakai mɔ lɛ.”​—Yohane 9:35-37.

Nuu lɛ hã hetoo akɛ: “Nuŋtsɔ, miná hemɔkɛyeli yɛ emli.” Nuu lɛ kula shi ekɛ woo hã Yesu kɛtsɔɔ akɛ eyɛ hemɔkɛyeli, ni ebuɔ lɛ. Kɛkɛ ni Yesu wie nɔ ko ni sa kadimɔ waa ekɛɛ: “Kojomɔ nɛɛ hewɔ miba je nɛɛ mli, no ji akɛ, koni mɛi ni enaaa nii lɛ ana nii ni mɛi ni naa nii lɛ atsɔmɔ shwilafoi.”​—Yohane 9:38, 39.

Farisifoi ni no mli lɛ amɛyɔɔ jɛmɛ lɛ le akɛ amɛshwilako. Shi mɛni abaanyɛ akɛɛ yɛ nitsumɔ ni amɛkɔ amɛfɔ̃ amɛnɔ akɛ jamɔŋ tsɔɔlɔi lɛ he? Amɛbi akɛ: “Ani wɔ hu shwilafoi ji wɔ?” Yesu kɛɛ amɛ akɛ: “Eji shwilafoi ji nyɛ kulɛ, nyɛhe bɛ esha. Shi amrɔ nɛɛ nyɛkɛɔ akɛ, ‘Wɔmiina nii.’ Nyɛhe esha lɛ eka nyɛhe.” (Yohane 9:40, 41) Eji amɛjeee tsɔɔlɔi yɛ Israel, ni amɛkpoo Yesu akɛ Mesia lɛ kulɛ, abaanu amɛ shishi. Shi akɛni amɛle Mla lɛ jogbaŋŋ hewɔ lɛ, Yesu ni amɛkpoo lɛ ji esha ni yɔɔ hiɛdɔɔ waa.